മാടക്കത്തറ ഗ്രാമപഞ്ചായത്തിലെ രണ്ട് റോഡുകളുടെ നിർമാണ പ്രവർത്തി പൂർത്തീകരണ ഉദ്ഘാടനം റവന്യൂ ഭവന നിർമാണ വകുപ്പ് മന്ത്രി അഡ്വ. കെ രാജൻ നിർവഹിച്ചു. മാടക്കത്തറ ഗ്രാമപഞ്ചായത്ത് പ്രസിഡന്റ് സണ്ണി ചെന്നിക്കര അധ്യക്ഷത വഹിച്ചു.

കർണ്ണംകോട്ട് സെക്കൻ്റ് സ്ട്രീറ്റ് റോഡ്, മണ്ണൂർണ്ണികുളം റോഡ് എന്നിവയാണ് നാടിന് സമർപ്പിച്ചത്. റവന്യൂ ഭവന നിർമാണ വകുപ്പ് മന്ത്രിയും ഒല്ലൂർ നിയോജക മണ്ഡലം എം എൽ എ യുമായ കെ. രാജന്റെ ആസ്‌തി വികസന ഫണ്ട് മുഖേനയാണ് റോഡ് നിർമാണം പൂർത്തീകരിച്ചത് 

മാർച്ച്‌ നാലിന് (റിലീസ് നൽകിയത് മാർച്ച്‌ മൂന്നിന്) പ്രസിദ്ധീകരിച്ച നിക്ഷേപകര്‍ക്ക് പരാതി അറിയിക്കാം എന്ന മണ്ണുത്തി പോസ്റ്റ് ഓഫീസിലെ എംപികെബിവൈ ഏജന്റും എസ്എഎസ് ഏജന്റുമായ ടി വത്സല കുമാരിയുടെ എസ്എഎസ് ഏജൻസി (സി.എ നം.6/86/എസ്എഎസ്/ടിസിആർ) റദ്ദ് ചെയ്യുന്നതുസംബന്ധിച്ച വാർത്തയിൽ എം പി കെ ബി വൈ ഏജൻസി റദ്ദ് ചെയ്തതായാണ് അച്ചടിച്ചു വന്നത്. വത്സലകുമാരിയുടെ എസ് എസ് ഏജൻസിയാണ് റദ്ദ് ചെയ്തത്. നിലവിൽ എംപികെബിവൈ ഏജന്റായി പ്രവർത്തിക്കുന്നുണ്ട്. വാർത്തയിൽ തെറ്റ് വന്നതിൽ ഖേദിക്കുന്നു.

കോലഴിയിൽ പുതിയതായി വീട് - ശിശു പരിചരണ കേന്ദ്രം ആരംഭിക്കുന്നു. കോലഴി കൈതച്ചാൽ റോഡിൽ ആരംഭിക്കുന്ന ആധുനിക സജ്ജീകരണങ്ങളോടുകൂടിയ വീട്-ശിശുപരിചരണ കേന്ദ്രത്തിന്റെ ഉദ്ഘാടനം സേവ്യർ ചിറ്റിലപ്പിള്ളി എം. എൽ എ നിർവഹിച്ചു. സംസ്ഥാന ശിശു ക്ഷേമ സമിതി വൈസ് പ്രസിഡന്റ് പി. സുമേശൻ അധ്യക്ഷത വഹിച്ചു.
ജില്ലാ പഞ്ചായത്ത് പ്രസിഡന്റ് മേരി തോമസ് മുഖ്യാതിഥിയായി.

മണ്ണുത്തി വെറ്ററിനറി സർവ്വകലാശാല ക്യാമ്പസിൽ കോഴി വളർത്തലുമായി ബന്ധപ്പെട്ട് നടന്നുവരുന്ന എ.ഐ.സി.ആർ.പി 2025-26 എസ്.സി.എസ്.പി (പട്ടികജാതി ഉപപദ്ധതി) പദ്ധതിയുടെ ഭാഗമായി കോഴിവളർത്തലിൽ സെമിനാറും സഹായവിതരണവും സംഘടിപ്പിച്ചു.  മണലൂർ ഗ്രാമപഞ്ചായത്ത് ഹാളിൽ നടന്ന ചടങ്ങിൽ ഗ്രാമപഞ്ചായത്ത് പ്രസിഡന്റ് സിജി മോഹൻദാസ് ഉദ്ഘാടനം ചെയ്തു.

കേരള കള്ള് വ്യവസായ തൊഴിലാളി ക്ഷേമനിധി ബോർഡിലെ തൊഴിലാളികൾക്കായി ഇന്ത്യ പോസ്റ്റ് പേയ്മെന്റ് ബാങ്കുമായി സഹകരിച്ച് ബോർഡ് നടപ്പിലാക്കുന്ന 2026 വർഷത്തേക്കുള്ള അന്ത്യോദയ ശ്രമിക് സുരക്ഷ യോജന ഇൻഷുറൻസ് പദ്ധതിയിൽ രണ്ടാം ഘട്ടത്തിൽ തൊഴിലാളികളെ ഉൾപ്പെടുത്തുന്നതിന് ഇതുവരെ ഈ പദ്ധതിയിൽ ഉൾപ്പെടാത്തവരും, ലീവിന് ശേഷം ജോലി ചെയ്ത് തുടങ്ങിയവരും പുതുതായി ജോലിയിൽ പ്രവേശിച്ച് രജിസ്ട്രേഷൻ ലഭിച്ചിട്ടുള്ളതുമായ തൊഴിലാളികളും 2026 മാർച്ച് മാസം 23-ാം തീയതിക്ക് മുൻപായി പോസ്റ്റ് ഓഫീസിൽ ഐപിപിബി അക്കൌണ്ട്, അപകട ഇൻഷുറൻസ് പ്രൊപ്പോസൽ ഫോറം തുടങ്ങിയവ പൂരിപ്പിച്ച് ഈ ഓഫീസിൽ ഹാജരാക്കണമെന്ന് വെൽഫയർ ഫണ്ട്‌ ഇൻസ്‌പെക്ടർ അറിയിച്ചു.

തളിക്കുളം നമ്പികടവ് റോഡിൽ തളിക്കുളം സെന്റർ മുതൽ സ്നേഹതീരം ബീച്ച് വരെയുള്ള ഭാഗത്ത് ടാറിങ് നടക്കുന്നതിനാൽ മാർച്ച്‌ 16ന് രാത്രി ഏഴ് മണി മുതൽ പ്രവൃത്തി പൂർത്തീകരിക്കുന്നത് വരെ ഈ ഭാഗത്തെ ഗതാഗതം തടസ്സപ്പെടുമെന്ന് അസിസ്റ്റന്റ് എഞ്ചിനീയർ അറിയിച്ചു.
 

നെടുമ്പാൾ കോന്തിപുലം കോൾകർഷകസമിതിയിൽ 50 എച്ച് പി സബ്മെഴ്‌സബിൾ മോട്ടോർ പമ്പ് സെറ്റിന്റെ പ്രവർത്തനോദ്ഘാടനം ജില്ലാ പഞ്ചായത്ത് അംഗം ജോസ് ജെ ചിറ്റിലപ്പിള്ളി നിർവഹിച്ചു. കൃഷിയിറക്കുന്നതിനാവശ്യമായ ജലം ക്രമീകരിക്കുന്നതിന് മോട്ടോർ പമ്പ് സെറ്റ് ഇല്ലാത്തതിനാൽ ഒരുപാട് ബുദ്ധിമുട്ടുകൾ വർഷങ്ങളായി കർഷകർ നേരിട്ടുവരികയായിരുന്നു. ഈ പ്രശ്നത്തിനു പരിഹാരമായാണ് തൃശ്ശൂർ ജില്ലാപഞ്ചായത്തിന്റെ 2025-26 വാർഷികപദ്ധതിയിൽ ഉൾപ്പെടുത്തി മോട്ടോർ പമ്പ് സെറ്റ് സ്ഥാപിച്ചിരിക്കുന്നത്.