വേനൽക്കാല കുടിവെള്ള വിതരണത്തിനും ഡാമിന്റെ പ്രൊഫൈൽ കവർ ലെവൽ പാലിക്കുന്നതിനുമായി വാഴാനി ഡാമിൽ നിന്ന്    അധികജലം മാർച്ച് 16 മുതൽ 25 വരെ ഇടതുകര മെയിൻ കനാൽ വഴി 10 ദിവസത്തേക്കും മാർച്ച് 26 മുതൽ 29 വരെ നാല് ദിവസത്തേക്കും സ്ലൂയിസ് ഷട്ടർ ഉയർത്തി വടക്കാഞ്ചേരി പുഴയിലേക്ക് വെള്ളം തുറന്ന് വിടുമെന്ന് ജില്ലാ ഇറിഗേഷൻ എക്സിക്യൂട്ടീവ് എൻജിനീയർ അറിയിച്ചു.

എളവള്ളി വില്ലേജിൽ കാക്കശ്ശേരി ദേശം, കാങ്ക വീട്ടിൽ കണ്ടപ്പൻ മകൻ ജയൻ (52) എന്ന വ്യക്തിയെ 2025 ജനുവരി 22 മുതൽ പാവറട്ടി പോലീസ് സ്റ്റേഷൻ പരിധിയിൽ നിന്നും കാണാതായി. ഇതുമായി ബന്ധപ്പെട്ട് പാവറട്ടി പോലീസ് സ്റ്റേഷൻ കേസ് രജിസ്റ്റർ ചെയ്ത് അന്വേഷണം നടത്തിവരുകയാണ്. വ്യക്തിയെക്കുറിച്ച് എന്തെങ്കിലും വിവരം ലഭിക്കുകയാണെങ്കിൽ അടുത്തുള്ള പോലീസ് സ്റ്റേഷനിലോ, കൺട്രോൾ റൂമിലോ 9497980591, 9497980554, 0487 2263000, എന്നീ ഫോൺ നമ്പറുകളിലോ അറിയിക്കണമെന്ന് പാവറട്ടി പോലീസ് സ്റ്റേഷൻ സബ് ഇൻസ്പെക്ടർ അറിയിച്ചു.

സംസ്ഥാന പൊലീസ് കംപ്ലയിന്റ്സ് അതോറിറ്റി അംഗം പി.കെ. അരവിന്ദ് ബാബു മാർച്ച് 16 ന് രാവിലെ 11 മുതൽ തൃശ്ശൂർ കളക്ടറേറ്റിലെ എക്സിക്യൂട്ടീവ്  കോൺഫറൻസ് ഹാളിൽ  പരാതിയിമേൽ തെളിവെടുപ്പ് നടത്തും. അന്നേദിവസം രാവിലെ പത്തു മുതൽ പതിനൊന്നുവരെ പൊതുജനങ്ങൾക്ക് പോലീസ് സൂപ്രണ്ടിന്റെയും അതിനുമുകളിലുള്ള പോലീസ് ഉദ്യോഗസ്ഥരുടെയും എല്ലാതരത്തിലുള്ള നടപടി ദോഷത്തെ പറ്റിയുള്ള പരാതികളും, കസ്റ്റഡിയിലുള്ള സ്ത്രീകളെ ലൈംഗികമായി പീഡിപ്പിക്കൽ, ഏതെങ്കിലും ആളുകളുടെ മരണത്തിന് കാരണമാകൽ, ഗുരുതരമായി പരിക്കേൽപ്പിക്കൽ തുടങ്ങിയ  ഗുരുതര സ്വഭാവമുള്ള പരാതികളും  അതോറിറ്റി മുമ്പാകെ നേരിട്ട് സമർപ്പിക്കാം. ഫോൺ: 0471 2336939.

മണ്ണുത്തിയിലെ കോളേജ് ഓഫ് വെറ്ററിനറി ആൻഡ് അനിമൽ സയൻസസിന്റെ നേതൃത്വത്തിൽ വേലൂർ ഗ്രാമപഞ്ചായത്തിൻ്റെയും സംസ്ഥാന മൃഗസംരക്ഷണ വകുപ്പിന്റെയും സഹകരണത്തോടെ  പട്ടികജാതി വിഭാഗത്തിൽപ്പെട്ട കർഷകർക്ക് ഏകാരോഗ്യം ബോധവത്ക്കരണ ക്ലാസ് നടത്തി. ക്ലാസ് വേലൂർ ഗ്രാമപഞ്ചായത്ത് പ്രസിഡന്റ് സ്വപ്ന രാമചന്ദ്രൻ ഉദ്ഘാടനം ചെയ്തു. വൈസ് പ്രസിഡൻ്റ് നിധീഷ് ചന്ദ്രൻ അധ്യക്ഷത വഹിച്ചു. ജന്തുജന്യ രോഗങ്ങളും നിവാരണ മാർഗ്ഗങ്ങളും' എന്ന വിഷയം സംബന്ധിച്ച് അസിസ്റ്റന്റ്റ് പ്രൊഫസർ ഡോ. ദിവ്യ റാണി തോമസ് ക്ലാസ് നയിച്ചു.

ഇരിങ്ങാലക്കുട നിയോജക മണ്‌ഡലത്തിലെ ഇരിങ്ങാലക്കുട നഗരസഭ, കാറളം-കാട്ടൂർ ഗ്രാമപഞ്ചായത്തുകൾ എന്നിവയെ ബന്ധിപ്പിച്ച് കടന്നു പോകുന്ന, പൊതുമരാമത്ത് വകുപ്പിൻ്റെ കീഴിലുള്ള പ്രധാന പാതയായ കരുവന്നൂർ-കാട്ടൂർ റോഡ് നവീകരിക്കുന്നതിന്റെ നിർമ്മാണ ഉദ്ഘാടനം പൊതുമരാമത്ത്, ടൂറിസം വകുപ്പ് മന്ത്രി പി. എ. മുഹമ്മദ് റിയാസ് ഓൺലൈനായി നിർവഹിച്ചു. കാട്ടൂർ ഗ്രാമ പഞ്ചായത്തിലെ കാട്ടൂർ ബസാറിൽ നടന്ന ചടങ്ങിൽ ഉന്നതവിദ്യാഭ്യാസ സാമൂഹിക നീതി വകുപ്പ് മന്ത്രി ഡോ. ആർ. ബിന്ദു അദ്ധ്യക്ഷത വഹിച്ചു.

കിഫ്ബി പദ്ധതിയിൽ ഉൾപ്പെടുത്തി 12.60 കോടി രൂപ ചിലവിൽ ഡി.ബി.എം ആൻഡ് ബി.സി നിലവാരത്തിലാണ് റോഡ് നവീകരിക്കുന്നത്.

നടത്തറ ഗ്രാമപഞ്ചായത്തിലെ രണ്ട് റോഡുകളുടെ ഉദ്ഘാടനം റവന്യൂ, ഭവന നിർമാണ വകുപ്പ് മന്ത്രി അഡ്വ. കെ രാജൻ നിർവഹിച്ചു. ഇരുപതാം വാർഡിൽ നിർമിച്ച ലൗഷോർ റോഡ്, നാലാം വാർഡിൽ നിർമിച്ച കൈപ്പിള്ളി ഗാർഡൻസ് റോഡ് എന്നിവയാണ് നാടിന് സമർപ്പിച്ചത്. നടത്തറ ഗ്രാമപഞ്ചായത്ത് പ്രസിഡന്റ് സി. ജോബി ജോസ് അധ്യക്ഷത വഹിച്ചു. ഒല്ലൂക്കര ബ്ലോക്ക് പഞ്ചായത്ത് പ്രസിഡന്റ് ശ്രീവിദ്യ രാജേഷ് മുഖ്യാതിഥിയായി.

റവന്യൂ, ഭവന നിർമാണ വകുപ്പ് മന്ത്രിയും ഒല്ലൂർ നിയോജക മണ്ഡലം എം എൽ എ യുമായ കെ. രാജന്റെ പ്രത്യേക ആസ്തി വികസന ഫണ്ട് ഉപയോഗിച്ചാണ് രണ്ട് റോഡുകളും നിർമിച്ചത്.
 

ചേര്‍ത്തല - മാരാരിക്കുളം റെയില്‍വേ സ്റ്റേഷനുകള്‍ക്കിടയിലുള്ള ലെവല്‍ ക്രോസ് നമ്പര്‍ 37 (11-ാം മൈല്‍ ഗേറ്റ്) മാര്‍ച്ച് 16  മുതല്‍ 20ന് വൈകിട്ട് ആറ് മണി വരെ അറ്റകുറ്റ പണികള്‍ക്കായി അടച്ചിടും. വാഹനങ്ങള്‍ തൊട്ടടുത്തുള്ള ലെവല്‍ ക്രോസ് നമ്പര്‍ 36 (ആഞ്ഞിലിപ്പാലം ഗേറ്റ്) 41 (തിരുവിഴ നോര്‍ത്ത് ഗേറ്റ്) എന്നിവ വഴി പോകണം.

2026 കേരള നിയമസഭാ തിരഞ്ഞെടുപ്പുമായി ബന്ധപ്പെട്ട് ആലപ്പുഴ ജില്ലയിലെ ബന്ധപ്പെട്ട വരണാധികാരികള്‍ക്ക് വോട്ടിംഗ് യന്ത്രങ്ങള്‍ വിതരണം ചെയ്യുന്ന ദിവസത്തേക്ക് കളക്ട്രേറ്റ് കോമ്പൗണ്ടില്‍ പന്തലുകളും അനുബന്ധ സൗകര്യങ്ങളും (ലൈറ്റ്, ഡെസ്‌ക്, കസേര, പെഡസ്റ്റല്‍ ഫാന്‍) ഒരുക്കുന്നതിനായി ക്വട്ടേഷനുകള്‍ ക്ഷണിച്ചു. ക്വട്ടേഷനുകള്‍ കളക്ടറേറ്റിലെ ജില്ലാ ഇലക്ഷന്‍ വിഭാഗത്തില്‍ മാര്‍ച്ച് 17ന് വൈകിട്ട് നാല് മണിക്ക് മുമ്പായി സമര്‍പ്പിക്കണം. ഫോൺ: 0477-2251801, 8547610045, 9633499858.