സ്‌കൂള്‍ ഉച്ചഭക്ഷണ പദ്ധതിയില്‍ ഉള്‍പ്പെട്ടിരുന്ന കുട്ടികള്‍ക്കുളള ഭക്ഷ്യ കിറ്റ് വിതരണത്തിന്റെ  ജില്ലാതല ഉദ്ഘാടനം പുല്ലാട് ബിആര്‍സിയില്‍ നടന്നു.  വിദ്യാഭ്യാസ ഉപഡയറക്ടര്‍ പി.കെ.ഹരിദാസിന്റെ അധ്യക്ഷതയില്‍ ചേര്‍ന്ന ചടങ്ങില്‍ കോയിപ്രം ബ്ലോക്ക് പഞ്ചായത്ത് പ്രസിഡന്റ് അഡ്വ. ആര്‍. കൃഷ്ണകുമാര്‍ ഭക്ഷ്യ കിറ്റിന്റെ വിതരണ ഉദ്ഘാടനം നിര്‍വഹിച്ചു.
കോയിപ്രം ഗ്രാമപഞ്ചായത്ത് അംഗം അനില്‍കുമാര്‍, പുല്ലാട് എഇഒ ബി.ആര്‍. അനില, പുല്ലാട് സപ്ലൈക്കോ മാനേജര്‍ സന്ധ്യ, ഹെഡ്മാസ്‌റ്റേഴ്‌സ് ഫോറം കണ്‍വീനര്‍ സി.റ്റി. വിജയാനന്ദന്‍ എന്നിവര്‍ സംസാരിച്ചു.

തൃശൂർ ഫുഡ് ക്രാഫ്റ്റ് ഇൻസ്റ്റിറ്റ്യൂട്ടിൽ ഫുഡ് ആൻഡ് ബീവറേജ് സർവീസ്, ഫുഡ് പ്രൊഡക്ഷൻ, ഫ്രണ്ട് ഓഫീസ് ഓപ്പറേഷൻ, ഹോട്ടൽ അക്കോമഡേഷൻ ഓപ്പറേഷൻ എന്നീ കോഴ്‌സുകളിലേക്ക് അപേക്ഷ ക്ഷണിച്ചു. എസ്എസ്എൽസി യോഗ്യതയുളള പരിശീലനത്തിന്റെ കാലാവധി ഒരു വർഷമാണ്. എസ്‌സി, എസ്ടി, ഒഇസി വിഭാഗത്തിൽപ്പെട്ട വിദ്യാർത്ഥികൾക്ക് പഠനം സൗജന്യമാണ്. അപേക്ഷഫോറവും വിശദവിവരങ്ങളും www.fcikerala.org എന്ന വെബ്‌സൈറ്റിൽ ലഭിക്കും. ഓൺലൈനായി അപേക്ഷ സ്വീകരിക്കുന്ന അവസാന തീയതി ജൂലൈ 30 വൈകീട്ട് 5 മണി. ഫോൺ: 0487 2384253, 9847677549, 9895880075.

കോടതി കുടിശ്ശിക ഈടാക്കുന്നതിന് മണത്തല വില്ലേജ് സർവെ 176/8 ൽ പ്പെട്ട 0.0405 ഹെക്ടർ ആർ ഭൂമിയും ആയതിലെ കുഴിക്കൂറ് ചമയങ്ങളും ജൂലൈ 30 രാവിലെ 11 ന് മണത്തല വില്ലേജ് ഓഫീസിൽ ലേലം ചെയ്യും. ഫോൺ: 0487 2507350.

അഴീക്കോട് മേഖല ചെമ്മീൻ വിത്തുൽപ്പാദന കേന്ദ്രത്തിലേക്ക് റൗണ്ട് എഫ്ആർപി ടാങ്ക് വാങ്ങുന്നതിന് ടെണ്ടർ ക്ഷണിച്ചു. ടെണ്ടർ സ്വീകരിക്കുന്ന അവസാന തീയതി ജൂലൈ 23 വൈകീട്ട് 3 മണി. ഫോൺ: 0480 2819698.

കോവിഡ് 19 രോഗവ്യാപനം തടയുന്നതിനായി നടത്തറ ഗ്രാമപഞ്ചായത്തിലെ 8-ാം വാർഡിനെ കണ്ടെയ്ൻമെന്റ് സോണായി ജില്ലാ കളക്ടർ എസ് ഷാനവാസ് പ്രഖ്യാപിച്ചു. ജൂലൈ 5 ന് പ്രഖ്യാപിച്ച കുന്നംകുളം നഗരസഭയിലെ 07, 10, 11, 15, 17, 19, 25, 26 ഡിവിഷനുകൾ കണ്ടെയ്ൻമെന്റ് സോണുകളായി തുടരും.

ബയോഫ്ലോക്ക് കൃഷിരീതിയുടെ സാങ്കേതികവശങ്ങൾ മത്സ്യകർഷകരെ പരിചയപ്പെടുത്തുവാനായി മത്സ്യ കർഷകർക്ക് പരിശീലനം നൽകുന്നു. മത്സ്യകർഷകദിനാചരണത്തിന്റെയും സുഭിക്ഷ കേരളം ബയോഫ്‌ലോക് പരിശീലന പദ്ധതിയുടെയും ഉദ്ഘാടനം ജൂലൈ 10ന് ഫിഷറീസ് മന്ത്രി ജെ മേഴ്‌സിക്കുട്ടിയമ്മ ഓൺലൈനായി നിർവഹിക്കും. 14 ജില്ലകളിൽ 40 കേന്ദ്രങ്ങളിലായി നാനൂറോളം മത്സ്യ കർഷകർ നേരിട്ട് പരിശീലന പരിപാടിയിൽ പങ്കെടുക്കും.

ജില്ലയിൽ പ്ലസ് വൺ പ്രവേശന നടപടികൾ ഈ മാസം 10നു ശേഷം ആരംഭിക്കും. മുൻവർഷങ്ങളിലെപ്പോലെ ഓൺലൈനായി ഏകജാലക സംവിധാനത്തിൽത്തന്നെയാകും പ്രവേശന നടപടികൾ. അപേക്ഷിക്കാൻ കൂടുതൽ ദിവസം അനുവദിക്കും. സിബിഎസ്ഇ, ഐസിഎസ്ഇ ഫലം 15നകം വരുന്നതിനാൽ എല്ലാവർക്കും ആദ്യഘട്ടം തന്നെ അപേക്ഷ നൽകാനാകും.