കയ്പമംഗലം മണ്ഡലത്തിന്റെ വിവിധ ഭാഗങ്ങളിലുണ്ടായ കടലാക്രമണ പ്രദേശങ്ങൾ ഇ ടി ടൈസൺ മാസ്റ്റർ എംഎൽഎ അടങ്ങുന്ന ജനപ്രതിനിധി സംഘം സന്ദർശിച്ചു. ജിയോ ബാഗ് ഉപയോഗിച്ചുള്ള കടൽഭിത്തി നിർമ്മാണം കോവിഡ് പശ്ചാത്തലത്തിൽ വേഗത കുറഞ്ഞുവെങ്കിലും അടിയന്തരമായി നിർമ്മാണം പൂർത്തീകരിക്കാൻ നിർദ്ദേശം നൽകിയതായി ഇ ടി ടൈസൺ മാസ്റ്റർ എംഎൽഎ പറഞ്ഞു. വേലിയേറ്റ സമയത്ത് കരയിലേക്ക് വെള്ളം കയറുന്ന സ്ഥിതി തടയാൻ ഊർജ്ജിതമായ ശ്രമങ്ങൾ നടക്കുന്നുണ്ട്.

34 വർഷമായി തരിശു കിടന്ന ഭൂമിക്ക് കോവിഡ് കാലത്ത് ശാപമോക്ഷം. ഇന്ന് ഇവിടെയെത്തുന്നവരെ വരവേൽക്കുന്നത് നിറയെ തളിർത്ത ചീരയും, തഴച്ചു വളർന്ന വെണ്ടയും, മറ്റു പച്ചകറികളുമാണ്. വടാക്കാഞ്ചേരി വാഴാനിയിലുളള തൃശൂർ സഹകരണ സ്പിന്നിങ്ങ് മില്ലിന്റെ സ്ഥലത്താണ് ജീവനക്കാർ ചേർന്ന് കൃഷിയിറക്കിയത്. 30 കിലോയോളം ചീര വിളവെടുത്തതിന്റെ ചാരിതാർത്ഥ്യത്തിലാണ് ജീവനക്കാർ. ആസന്നമായേക്കാവുന്ന ഭക്ഷ്യക്ഷാമം മുന്നിൽ കണ്ട് സർക്കാർ രൂപം നൽകിയ'സുഭിക്ഷ കേരളം' പദ്ധതിയനുസരിച്ചാണ് കൃഷിയിറക്കിയത്.

കോർപ്പറേഷനിലെ മാലിന്യ സംസ്‌കരണ പദ്ധതിക്ക് ഹൈക്കോടതിയുടെ അംഗീകാരം. നേരത്തെ മലിനീകരണനിയന്ത്രണ ബോർഡ് പിഴയായി ചുമത്തിയ 4.56 കോടി രൂപ അടയ്ക്കാനുള്ള വിധി ഹൈക്കോടതി ചീഫ് ജസ്റ്റിസ് എസ് മണി കുമാർ, ജസ്റ്റിസ് ഷാജി പി ചാലി എന്നിവരടങ്ങിയ ബഞ്ച് റദ്ദാക്കി. തൃശൂർ കോർപ്പറേഷൻ മാലിന്യ നിർമാർജ്ജന രംഗത്ത് നടത്തിയ പ്രവർത്തനങ്ങൾ വിശദീകരിച്ച് കേരള ഹൈക്കോടതിയിൽ സത്യവാങ് മൂലം നൽകി.

ശാസ്ത്രീയമായ മാലിന്യ സംസ്‌ക്കരണ സംവിധാനം ശക്തിപ്പെടുത്തുന്നതിന്റെ ഭാഗമായി കൊടുങ്ങല്ലൂർ നഗരസഭയിലെ എല്ലാ വീടുകളിലേയ്ക്കും നൽകുന്ന ജൈവ മാലിന്യ ഭരണികളുടെ വിതരണം ആരംഭിച്ചു. ജൈവ മാലിന്യം സംസ്‌ക്കരിക്കുന്നതിന് എല്ലാ വീടുകളിലും സ്ഥാപനങ്ങളിലും ഇനി മുതൽ ഈ ഉപകരണം നിർബന്ധമായും സ്ഥാപിക്കണം. ഉപകരണം വാങ്ങുമ്പോൾ സബ്സിഡി കഴിഞ്ഞ് ഓരോ ഗുണഭോക്താവും ഒരു യൂണിറ്റിന് 155 രൂപ മാത്രം നൽകിയാൽ മതി. ഇതോടൊപ്പം സംസ്‌ക്കരണ യൂണിറ്ററിൽ ഇടാനുള്ള ജീവാണു ഇനോക്കുലം 10 കി.ഗ്രാം കൂടി ലഭിക്കും. ആവശ്യമുള്ളവർ നഗരസഭയിൽ ആധാർ കാർഡും റേഷൻ കാർഡുമായി വന്ന് അപേക്ഷയും പണവും നൽകണം.

നാട്ടിക ഗ്രാമപഞ്ചായത്ത് 2020-21 വാർഷിക പദ്ധതിയിൽ ഉൾപ്പെടുത്തി നടപ്പിലാക്കുന്ന വിവിധ പദ്ധതികൾക്കായി ഗുണഭോക്താക്കളിൽ നിന്നും അപേക്ഷകൾ ക്ഷണിച്ചു. സമഗ്ര പുരയിട കൃഷി, ബയോ ഫ്ളോക്ക് മത്സ്യകൃഷി, കറവ പശുകൾക്ക് കാലിത്തീറ്റ, പ്രൊഫഷണൽ പട്ടികജാതി വിഭാഗത്തിലുൾപ്പെട്ട വിദ്യാർത്ഥികൾക്ക് ലാപ്ടോപ്പ് എന്നിവയ്ക്കാണ് അപേക്ഷ ക്ഷണിച്ചത്. അപേക്ഷ ഫോം ജൂൺ 22 മുതൽ പഞ്ചായത്ത് ഓഫീസിൽ നിന്നും ലഭിക്കും. പൂരിപ്പിച്ച അപേക്ഷകൾ സ്വീകരിക്കുന്ന അവസാന തിയ്യതി ജൂൺ 29. ഫോൺ: 0487 2391245

പട്ടികവർഗ്ഗ വികസന വകുപ്പിന്റെ കീഴിൽ പ്രവർത്തിക്കുന്ന ചാലക്കുടി മോഡൽ റസിഡെൻഷ്യൽ സ്‌കൂളിലേക്ക് ഒരു ലക്ഷത്തിൽ താഴെ വരുമാനമുള്ള പട്ടികവർഗ്ഗക്കാരായ രക്ഷിതാക്കളുടെ മക്കളിൽ നിന്നും അപേക്ഷ ക്ഷണിച്ചു. ആറാം ക്ലാസ്സിൽ - 8 ഒഴിവുകളിലേക്കും, ഏഴാം ക്ലാസ്സിൽ - 3 ഒഴിവ്, എട്ടാം ക്ലാസ്സിൽ - 1, ഒമ്പതാം ക്ലാസ്സ് - 1, പത്താം ക്ലാസ്സിൽ - 1 എന്നിങ്ങനെയാണ് ഒഴിവുകൾ. അപേക്ഷകർ അപേക്ഷയോടൊപ്പം ക്രിസ്തുമസ് പരീക്ഷയുടെ മാർക്ക് ലിസ്റ്റ് അയക്കേണ്ടതാണ്. ഫോൺ: 0480 2960400, 9544113821.

തൃശൂർ നെഹ്റു യുവകേന്ദ്ര, സാധനാ മിഷൻ, ശ്രദ്ധ എന്നിവയുടെ സംയുക്താഭിമുഖ്യത്തിൽ അന്താരാഷ്ട്ര യോഗാ ദിനത്തോടനുബന്ധിച്ച് ജൂൺ 21ന് ഓൺലൈൻ ഫോട്ടോഗ്രാഫിയും പ്രശ്നോത്തരി മത്സരവും സംഘടിപ്പിക്കുന്നു. പരിപാടിയുടെ ഓൺലൈൻ ഉദ്ഘാടനം ടി.എൻ. പ്രതാപൻ എം പി നിർവ്വഹിക്കും. പ്രശ്നോത്തരിയിലെ ചോദ്യങ്ങൾക്ക് ഉത്തരം നൽകി, സ്വന്തം വീട്ടിലിരുന്ന് യോഗ ചെയ്തതിന്റെ ഫോട്ടോ ഓൺലൈനിൽ അപ്ലോഡ് ചെയ്ത് മത്സരത്തിൽ പങ്കെടുക്കാവുന്നതാണ്. പങ്കെടുക്കുന്നവർക്ക് ഇ-സർട്ടിഫിക്കറ്റ് ലഭിക്കും. കൂടുതൽ വിവരങ്ങൾക്ക് ഫോൺ 8157863150.
 

കോവിഡ് 19 മൂലം തൊഴിൽ ദിനങ്ങൾ നഷ്ടപ്പെട്ട കേരള കർഷക തൊഴിലാളി ക്ഷേമനിധി അംഗങ്ങൾക്ക് സർക്കാർ അനുവദിച്ച 1000 രൂപ ധനസഹായം ലഭിക്കുന്നതിന് അപേക്ഷ സമർപ്പിക്കുന്നതിനുളള അവസാന തീയ്യതി ജൂൺ 26 വരെ നീട്ടിയതായി ചീഫ് എക്‌സിക്യൂട്ടീവ് അറിയിച്ചു. www.karshakathozhilali.org, boardswelfareassistance.lc.kerala.gov.in, എന്നീ വെബ്‌സൈറ്റുകൾ വഴിയും karshakathozilali എന്ന മൊബൈൽ ആപ്പ് വഴിയും അക്ഷയ കേന്ദ്രങ്ങൾ വഴിയും അംഗങ്ങൾക്ക് അപേക്ഷ സമർപ്പിക്കാം. നിലവിൽ കുടിശ്ശിക ഉളള അംഗങ്ങൾ ഉൾപ്പെടെ എല്ലാ അംഗങ്ങളും ഈ ധനസഹായത്തിന് അർഹരാണ്. ഫോൺ: 0487 2386871.
 

കോവിഡിന്റെ സാഹചര്യത്തിൽ പുതിയ തൊഴിൽ സംരംഭങ്ങൾ കണ്ടത്തേണ്ടത് കേരളത്തിന്റെ ആവശ്യമെന്ന് തദ്ദേശ സ്വയംഭരണ വകുപ്പ് മന്ത്രി എ സി മൊയ്തീൻ. പലരും ജോലി നഷ്ടപ്പെട്ട അവസ്ഥയിലാണ് നാട്ടിലേക്ക് തിരിച്ചു വരുന്നത്. കേരളത്തിന് പുറത്തും ഇന്ത്യയ്ക്ക് പുറത്തുമായി ജോലി ചെയ്യുന്നവർ എല്ലാം ഉപേക്ഷിച്ചാണ് നാട്ടിലെത്തുന്നത്. തിരിച്ചെത്തുന്നവർക്ക് വേണ്ട സഹായങ്ങൾ നൽകാൻ ഭരണകൂടത്തിന് കഴിയണം. ഇതിന് സഹായകരമായ പദ്ധതികളുമായാണ് ഗവണ്മെന്റ് മുന്നോട്ടുപോകുന്നതെന്നും മന്ത്രി പറഞ്ഞു. പൊയ്യ ഗ്രാമ പഞ്ചായത്ത് എരട്ടപ്പടി വനിതാ വ്യവസായ കേന്ദ്രത്തിന്റെ ഉദ്ഘാടനം നിർവ്വഹിച്ച് സംസാരിക്കുകയായിരുന്നു മന്ത്രി.