സംസ്ഥാനത്തെ വിദ്യാലയ പരിസരങ്ങളില്‍നിന്നു ലഹരി വസ്തുക്കളുടെ സാന്നിധ്യം ഇല്ലാതാക്കുകയാണ് പൊതുവിദ്യാഭ്യാസ സംരക്ഷണ യജ്ഞത്തിന്റെ അടുത്ത ലക്ഷ്യമെന്ന് വിദ്യാഭ്യാസ മന്ത്രി പ്രൊഫ. സി. രവീന്ദ്രനാഥ്. ലഹരിയുടെ ഒരു തന്മാത്രപോലും ശരീരത്തിലേക്കു കടക്കാന്‍ സംസ്ഥാനത്തെ ഒരു വിദ്യാര്‍ഥിയും അനുവദിക്കരുതെന്നും അദ്ദേഹം പറഞ്ഞു. എസ്.എസ്.എല്‍.സി, പ്ലസ്ടു പരീക്ഷകളില്‍ മികച്ച വിജയം നേടിയ വിദ്യാര്‍ഥികളെയും സ്‌കൂളുകളെയും അനുമോദിക്കാന്‍ തിരുവനന്തപുരം ജില്ലാ പഞ്ചായത്ത് സംഘടിപ്പിച്ച പ്രതിഭാ സംഗമം പരിപാടി ഉദ്ഘാടനം ചെയ്തു സംസാരിക്കുകയായിരുന്നു മന്ത്രി.

വിവരാവകാശ കമ്മീഷന്‍ സിറ്റിംഗ്
സംസ്ഥാന വിവരാവകാശ കമ്മീഷന്‍ ഇന്നും ജൂണ്‍ 28, 29 തീയതികളില്‍ കണ്ണൂരില്‍ സിറ്റിംഗ് നടത്തും.  രാവിലെ 10 മണി മുതല്‍ കലക്ടറേറ്റ് കോണ്‍ഫറന്‍സ് ഹാളില്‍ നടക്കുന്ന സിറ്റിംഗില്‍ വിവരാവകാശ കമ്മീഷണര്‍ കെ വി സുധാകരന്‍ പങ്കെടുക്കും.
പി എന്‍ സി/2184/2019

ഭരണാനുമതിയായി
കണ്ണൂര്‍ കോര്‍പറേഷനിലെ എടക്കാട് ഡിവിഷന്‍ നാറാണത്ത് പാലം-ഉദയമംഗലം ഗണപതി ക്ഷേത്രം റോഡ് പുനരുദ്ധാരണ പ്രവൃത്തിക്ക് മത്സ്യബന്ധന തുറമുഖ വകുപ്പില്‍ നിന്നും 70 ലക്ഷം രൂപയുടെ  ഭരണാനുമതി ലഭിച്ചു.
പി എന്‍ സി/2185/2019

ആശ പ്രവര്‍ത്തകരെ ജില്ലാ തലത്തില്‍ ഏകോപിപ്പിക്കുന്നതിനും  പ്രവര്‍ത്തനങ്ങളിലെ മാറ്റങ്ങളും ഉത്തരവുകള്‍ അറിയിക്കുന്നതിലെ കാലതാമസവും ഒഴിവാക്കുന്നതിനുമായി ആശപ്രവര്‍ത്തകരുടെ ജില്ലാതല അവലോകന യോഗം സംഘടിപ്പിച്ചു.  ജില്ലാ ആര്‍ സി എച്ച് ഓഫീസര്‍ ഡോ. പി എം ജോതിയുടെ നേതൃത്വത്തില്‍ നടന്ന യോഗം ജില്ലാ ഡെപ്യൂട്ടി ഡി എംഒ ഡോ. കെ ടി രേഖ ഉദ്ഘാടനം ചെയ്തു.

മലയാളി വായനക്കാരുടെ ഹൃദയത്തില്‍ ഇടംപിടിച്ച എം മുകുന്ദന്റെ കഥാപാത്രങ്ങളെ തേടി കഥാകാരനൊപ്പം മയ്യഴിയുടെ മണ്ണിലൂടെയുള്ള സര്‍ഗയാത്ര ജൂണ്‍ 29. സാഹിത്യ രചനയില്‍ തല്‍പ്പരരായ വിദ്യാര്‍ഥികള്‍ക്കായി ഇന്‍ഫര്‍മേഷന്‍ പബ്ലിക് റിലേഷന്‍സ് വകുപ്പാണ് 'കഥ തേടി പോകാം' എന്ന പേരില്‍ സര്‍ഗയാത്ര ഒരുക്കുന്നത്. 

കേരളത്തിലെ ആദ്യത്തെ ഒളിമ്പിക്‌സ് മെഡല്‍ ജേതാവ് മാനുവല്‍ ഫ്രെഡറിക്കിന് സര്‍ക്കാര്‍ നിര്‍മ്മിച്ച് നല്‍കിയ വീടിന്റെ താക്കോല്‍ദാനം നാളെ 29 ന്  വൈകിട്ട് 4.30ന് കായിക വകുപ്പ് മന്ത്രി ഇ പി ജയരാജന്‍ നിര്‍വഹിക്കും. പയ്യാമ്പലത്തിനടുത്ത് പള്ളിയാംമൂലയില്‍ സര്‍ക്കാര്‍ പതിച്ചു നല്‍കിയ അഞ്ച് സെന്റ് ഭൂമിയില്‍ 38 ലക്ഷം രൂപ ചെലവിലാണ് വീട് നിര്‍മ്മിച്ചിരിക്കുന്നത്. 

ഏറെ കാലത്തെ ഉമ്മയുടെ ആഗ്രഹമായിരുന്നു അടച്ചുറപ്പുള്ളൊരു വീട്, ഈ സ്വപ്‌നം സാക്ഷാത്കരിച്ചതിന് ശേഷമാണ് ഉമ്മ പോയതെന്ന് പറയുമ്പോള്‍ സൈനബയുടെ തൊണ്ടയിടറിയിരുന്നു. മഹാ പ്രളയത്തില്‍ ശക്തമായ കാറ്റിലും മഴയിലും വീട് തകര്‍ന്ന റുഖിയയ്ക്കും മകള്‍ സൈനബയ്ക്കും കെയര്‍ ഹോം പദ്ധതി പ്രകാരം മൗവ്വഞ്ചേരി സര്‍വീസ് സഹകരണ ബാങ്കിന്റെ നേതൃത്വത്തിലാണ് സര്‍ക്കാര്‍ വീടുവെച്ചു നല്‍കിയത്. സര്‍ക്കാര്‍ ധനസഹായമായ 5.95 ലക്ഷം രൂപയും വ്യക്തികളില്‍ നിന്നും സംഘടനകളില്‍ നിന്നും സംഭാവനയായി ലഭിച്ച 1.19 ലക്ഷം രൂപയും ചേര്‍ത്തായിരുന്നു വീട് നിര്‍മ്മാണം.

കറിവേപ്പില, ആര്യവേപ്പ് തുടങ്ങി നമുക്കാവശ്യമുള്ള കാര്‍ഷിക ഉല്‍പ്പന്നങ്ങള്‍ വീട്ടില്‍ തന്നെ ഉല്‍പ്പാദിപ്പിക്കണമെന്നും എന്തിനും ഏതിനും വിപണിയെ ആശ്രയിക്കുന്ന മനോഭാവത്തിന് മാറ്റം വരണമെന്നും ജില്ലാ പഞ്ചായത്ത് പ്രസിഡന്റ് കെ വി സുമേഷ് പറഞ്ഞു. ഗൃഹചൈതന്യം  പദ്ധതി ജില്ലാതല ശില്‍പശാല ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.