സാങ്കേതിക കാരണങ്ങളാൽ മാർച്ച് 23, 24 തീയതികളിൽ നോർക്ക റൂട്ട്സിന്റെ എറണാകുളം മേഖല ഓഫീസിൽ സർട്ടിഫിക്കറ്റ് അറ്റസ്റ്റേഷൻ ഉണ്ടായിരിക്കുന്നതല്ലെന്ന് സെന്റർ  മാനേജർ  അറിയിച്ചു.
പി.എൻ.എക്സ്.1136/2020

കോവിഡ്19 പശ്ചാത്തലത്തിൽ വിമാനങ്ങൾ റദ്ദ് ചെയ്യുന്ന സാഹചര്യമുള്ളതിനാൽ ഇന്ത്യയിൽ നിന്ന് പുറത്തേക്കും മറ്റു രാജ്യങ്ങളിൽനിന്ന് ഇവിടേക്കുമുള്ള തപാൽ ഉരുപ്പടികളുടെ വിതരണത്തിൽ കാലതാമസമുണ്ടാകാൻ സാധ്യതയുള്ളതായി കേരള സർക്കിൾ ചീഫ് പോസ്റ്റ് മാസ്റ്റർ ജനറൽ അറിയിച്ചു.
സ്ഥിതി സാധാരണനിലയിലാകുന്നതുവരെ തപാൽ വകുപ്പിന്റെ നിശ്ചിത മാനദണ്ഡങ്ങൾ പ്രകാരം വിതരണത്തിന് തടസ്സങ്ങളുണ്ടാകും. എന്നാൽ വൈകുന്നതിന്റെ പേരിൽ യാതൊരുവിധ നഷ്ടപരിഹാരത്തിനും അർഹതയുണ്ടായിരിക്കില്ലെന്നും ചീഫ് പോസ്റ്റ് മാസ്റ്റർ ജനറൽ അറിയിച്ചു.
പി.എൻ.എക്സ്.1135/2020

അയ്യന്തോൾ ജില്ലാ കളക്ടറേറ്റ് പരിസരത്ത് അര കിലോമീറ്റർ ചുറ്റളവിൽ മൂന്ന് ഹാൻഡ് വാഷിംഗ് കിയോസ്‌ക്കൾ സജ്ജമായി. ബ്രേക്ക് ദി ചെയിൻ ക്യാമ്പയിന്റെ ഭാഗമായാണ് ഫൗണ്ടേഷൻ ഫോർ ഇന്റർനാഷണൽ റീഹാബിലിറ്റേഷൻ റിസർച് ആൻഡ് എംപവർമെന്റ് (ഫയർ) കോവിഡ്- 19 പ്രതിരോധ പ്രവർത്തനങ്ങൾക്കായി കളക്ട്രേറ്റ് പരിസരത്ത് വാഷ് ബേസിനുകളും ആവശ്യത്തിന് വെള്ളവും ഹാൻഡ് വാഷും സജ്ജമാക്കിയത്. കളക്ട്രേറ്റിലും അനുബന്ധ ഓഫീസുകളിലും പല ആവശ്യങ്ങൾക്കായി വന്നുചേരുന്ന ഉപഭോക്താക്കൾക്ക് കൈകഴുകാനുള്ള സൗകര്യത്തിന് ഹാൻഡ്വാഷുകളും സാനിറ്ററികളും വാഷ്ബേസിനുകളും ആവശ്യത്തിന് വെള്ളവും ഒരുക്കിയിരിക്കുന്നത്.

കോവിഡ് 19 രോഗപ്രതിരോധത്തോടനുബന്ധിച്ച് മാർച്ച് 20 മുതൽ തൃശൂർ ഗവൺമെന്റ് മെഡിക്കൽ കോളേജ് ആശുപത്രിയിൽ സന്ദർശക നിയന്ത്രണം ഏർപ്പെടുത്തി. അടിയന്തര ഘട്ടങ്ങളിൽ മാത്രം എമർജൻസി പാസ്സ് അനുവദിക്കും. ഗവ. മെഡിക്കൽ കോളേജിലെ രോഗി സന്ദർശനം പരമാവധി ഒഴിവാക്കണമെന്നും കോളേജ് പ്രിൻസിപ്പൽ അറിയിച്ചു.

കോവിഡ് 19 രോഗവ്യാപനം തടയുന്നതിന്റെ ഭാഗമായി മുൻകൂട്ടി നിശ്ചയിച്ച വിവാഹമുൾപ്പെടെയുള്ള ചടങ്ങുകൾ മാറ്റിവെച്ച കുടുംബങ്ങൾക്ക് ഹാൾ/ഓഡിറ്റോറിയം ബുക്ക് ചെയ്ത തുക തിരിച്ചുനൽകുന്നതിനും മറ്റൊരു തിയ്യതിയിലേക്ക് ബുക്കിംഗ് അക്കൗണ്ട് ചെയ്യുന്നതിനും വേണ്ട നടപടികൾ സ്വീകരിക്കണമെന്ന് ജില്ലാ കളക്ടർ എസ്. ഷാനവാസ് നിർദ്ദേശിച്ചു. സമൂഹത്തിന്റെ പൊതുസുരക്ഷ കൂടി കണക്കിലെടുത്തുകൊണ്ടുള്ള നടപടിക്ക് പിന്തുണ നൽകണമെന്നും ഉത്തരവിന് വിപരീതമായി ഹാൾ/ഓഡിറ്റോറിയം ഉടമസ്ഥർ പ്രവർത്തിക്കരുതെന്നും ജില്ലാ കളക്ടർ പറഞ്ഞു.

ദേശമംഗലം സ്വദേശിയായ പ്രവാസിയുടെ ഇടുക്കി ശാന്തൻപാറയിലുള്ള ഏലത്തോട്ടത്തിൽ തോട്ടത്തിന്റെ മുൻ ഉടമ നടത്തുന്ന അതിക്രമങ്ങളെ കുറിച്ച് സംസ്ഥാന മനുഷ്യാവകാശ കമ്മീഷൻ നേരിട്ട് അന്വേഷിക്കും.
കമ്മീഷന്റെ മുഖ്യ അന്വേഷണ ഉദ്യോഗസ്ഥൻ പരാതിയെ കുറിച്ച് അന്വേഷിച്ച് രണ്ടു മാസത്തിനകം റിപ്പോർട്ട് നൽകണമെന്ന് ജുഡീഷ്യൽ അംഗം പി. മോഹനദാസ് നിർദ്ദേശിച്ചു.
ഡിവൈഎസ്പി റാങ്കിൽ കുറയാത്ത ഉദ്യോഗസ്ഥനെ നിയോഗിച്ച് അന്വേഷണം നടത്തി 30 ദിവസത്തിനകം റിപ്പോർട്ട് നൽകണമെന്ന് കമ്മീഷൻ ഇടുക്കി ജില്ലാ പോലീസ് മേധാവിക്ക് നിർദ്ദേശം നൽകി.
ദേശമംഗലം സ്വദേശി അബ്ദുൾ ഖാദർ നൽകിയ പരാതിയിലാണ് നടപടി.

കോവിഡ് 19 പ്രതിരോധ പ്രവർത്തനങ്ങളുടെ ഭാഗമായി പുഴയ്ക്കൽ ബ്ലോക്ക് പഞ്ചായത്തിൽ മുൻകരുതലുകളെടുക്കാൻ തീരുമാനം. നിരീക്ഷണത്തിലിരിക്കുന്ന വ്യക്തികൾക്കും കുടുംബാംഗങ്ങൾക്കും ആവശ്യമായ സഹായങ്ങൾ നൽകാനും സമൂഹ വ്യാപനം തടയുന്നതിനായി സംസ്ഥാന സർക്കാരിന്റെ നിർദ്ദേശങ്ങൾ അംഗീകരിക്കാനും പുഴയ്ക്കൽ ബ്ലോക്ക് പഞ്ചായത്തിൽ ചേർന്ന അടിയന്തര യോഗം തീരുമാനിച്ചു. മുഖ്യമന്ത്രിയും പ്രതിപക്ഷനേതാവും വീഡിയോ കോൺഫറൻസ് വഴി അഭിസംബോധന ചെയ്തത് ഭരണസമിതിയംഗങ്ങളും ജനപ്രതിനിധികളും ഉദ്യോഗസ്ഥരും വീക്ഷിച്ചു. രാഷ്ട്രീയ പാർട്ടി പ്രതിനിധികളും യോഗത്തിൽ പങ്കെടുത്തു.