ജില്ലയിലെ 22 തദ്ദേശസ്ഥാപനങ്ങളുടെ 2019-20 വാര്‍ഷിക പദ്ധതി ഭേദഗതികള്‍ക്ക് ജില്ലാ ആസൂത്രണ സമിതി അംഗീകാരം നല്‍കി. അമ്പലവയല്‍, വെള്ളമുണ്ട, തിരുനെല്ലി, വൈത്തിരി, പനമരം, എടവക, നെന്മേനി, തരിയോട്, പൊഴുതന, കോട്ടത്തറ, തൊണ്ടര്‍നാട്, പുല്‍പ്പള്ളി, മേപ്പാടി, പടിഞ്ഞാറത്തറ, പൂതാടി, മീനങ്ങാടി ഗ്രാമപ്പഞ്ചായത്തുകളുടെയും മാനന്തവാടി, കല്‍പ്പറ്റ നഗരസഭകളുടേയും സുല്‍ത്താന്‍ ബത്തേരി, മാനന്തവാടി, പനമരം ബ്ലോക്ക് പഞ്ചായത്തുകളുടേയും ജില്ലാ പഞ്ചായത്തിന്റേയും വാര്‍ഷിക പദ്ധതി ഭേദഗതികള്‍ക്കാണ് അംഗീകാരം. 

ഭൂരഹിത ആദിവാസികള്‍ക്ക് ഭൂമി നല്‍കി പുനരധിവസിപ്പിക്കുന്നതുമായി ബന്ധപ്പെട്ട് നടക്കുന്ന സര്‍വേ പുരോഗതി ജില്ലാ കലക്ടര്‍ എ.ആര്‍.അജയകുമാറിന്റെ അധ്യക്ഷതയില്‍ ചേര്‍ന്ന യോഗം വിലയിരുത്തി. നടപടികള്‍ പൂര്‍ത്തിയാക്കി ജൂലൈ ഒന്നിന് സ്‌കെച്ച് നല്‍കണമെന്നു ജില്ലാ കളക്ടര്‍ നിര്‍ദേശിച്ചു. വനംവകുപ്പ് നല്‍കാമെന്നേറ്റ ഭൂമിയിലാണ് സര്‍വേ പുരോഗമിക്കുന്നത്. നോര്‍ത്ത് വയനാട്, സൗത്ത് വയനാട് വനം ഡിവിഷനുകളിലായി 200 ഹെക്ടര്‍ വനഭൂമിയാണ് ആദിവാസി കുടുംബങ്ങളെ പുനരധിവസിപ്പിക്കാനായി കണ്ടെത്തിയിട്ടുള്ളത്. ഇതില്‍ വാസയോഗ്യമായ ഭൂമി കണ്ടെത്താനാണ് സര്‍വേ.

പുത്തൻചിറ ഗ്രാമപഞ്ചായത്തിൽ ദേശീയ തൊഴിലുറപ്പ് പദ്ധതിയിൽ നടപ്പിലാക്കുന്ന തൊഴുത്ത്, ആട്ടിൻകൂട് നിർമ്മാണം, ഫാംപോണ്ട്, കോഴിക്കൂട്, കക്കൂസ് നിർമ്മാണം, സോക്ക്പിറ്റ്, അസോള ടാങ്ക്, ഫലവൃക്ഷത്തോട്ടം, വർക്ക് ഷെഡ് തുടങ്ങീ ആനുകൂല്യങ്ങൾക്കായി ബിപിഎൽ, എസ് സി, ആശ്രയ, ഐഎവൈ, വിധവകൾ, വികലാംഗർ എന്നിവരിൽ നിന്നും അപേക്ഷ ക്ഷണിച്ചു. അപേക്ഷ ഗ്രാമപഞ്ചായത്ത് ഓഫീസിൽ ജൂലൈ 30 വരെ സ്വീകരിക്കും. അപേക്ഷാഫോമിനും വിശദവിവരങ്ങൾക്കും ഓഫീസുമായി ബന്ധപ്പെടണമെന്ന് സെക്രട്ടറി അറിയിച്ചു. ഫോൺ : 0480-2890208.
 

ജില്ലാ സാക്ഷരതാ മിഷന്റെ ആഭിമുഖ്യത്തിൽ ജില്ലാതല വായനാ മത്സരം ഇന്ന് (ജൂൺ 29) നടക്കും. രാവിലെ 10 ന് ജില്ലാ പഞ്ചായത്ത് ഹാളിൽ പത്ത്, പ്ലസ്സ് ടു തുല്യതാ പഠിതാക്കളെ പങ്കെടുപ്പിച്ചുകൊണ്ട് ഒരു മണിക്കൂർ വീതമുള്ള കഥ, കവിതാരചന മത്സരം, പുസ്തക ആസ്വാദന കുറിപ്പ് തയ്യാറാക്കൽ എന്നിവ നടക്കും. ഉച്ചയ്ക്ക് രണ്ടിന് കോസ്റ്റ് ഫോർഡ് ഹാളിൽ വായനാസംഗമം മുരളി പെരുനെല്ലി എംഎൽഎ ഉദ്ഘാടനം ചെയ്യും. ജില്ലാ പഞ്ചായത്ത് പ്രസിഡണ്ട് മേരി തോമസ്സ് അദ്ധ്യക്ഷത വഹിക്കും.
 

പെരുവല്ലൂർ പട്ടികജാതി സർവീസ് സഹകരണ സംഘത്തിൽ സെക്രട്ടറിയുടെ തസ്തികയിലേക്ക് നിർദ്ദിഷ്ട യോഗ്യതയുളളവരിൽ നിന്ന് അപേക്ഷ ക്ഷണിച്ചു. പ്രായം 18 നും 40 നും മദ്ധ്യേയുളളവരാകണം. സംവരണവിഭാഗകാർക്ക് നിയമാനുസൃത ഇളവ് ലഭിക്കും. അപേക്ഷ സ്വീകരിക്കുന്ന അവസാന തീയതി ജൂലൈ 15. കൂടുതൽ വിവരങ്ങൾക്ക് സംഘം ഓഫീസുമായി ബന്ധപ്പെടുക. ഫോൺ : 9745292281.

കുഴൽമന്ദം ഗവ. ഐ ടി ഐയിൽ പത്താം ക്ലാസ്സ് യോഗ്യതയുളളവരിൽ നിന്നും ലിഫ്റ്റ് ഇറക്ടർ കോഴ്‌സിന് അപേക്ഷ ക്ഷണിച്ചു. ഫോൺ : 0492-2273888, 9061899611.