കൊറോണ രോഗ പ്രതിരോധത്തിന്റെ ജില്ലയിലെ പ്രവര്‍ത്തനങ്ങള്‍ ഏകോപിപ്പിക്കാന്‍ കളക്‌ട്രേറ്റില്‍ 24 മണിക്കൂറും പ്രവര്‍ത്തിക്കുന്ന കണ്‍ട്രോള്‍ റും സജ്ജമായി. ആരോഗ്യ വകുപ്പ്, ദുരന്തനിവാരണ അതോറിറ്റി, പോലീസ്, ഫയര്‍ഫോഴ്‌സ് തുടങ്ങിയ വകുപ്പുകളിലെ ജീവനക്കാരാണ് രാപകലില്ലാതെ   ജാഗ്രത പുലര്‍ത്തുന്നത്. പലവിധ സംശയ നിവാരണത്തിനായി ദിവസം നൂറ്റമ്പതോളം ഫോണ്‍ കോളുകളാണ് കണ്‍ട്രോള്‍ റൂമില്‍ ലഭിക്കുന്നത്. വിദേശത്ത് നിന്നു വന്നവരും, വിദേശത്തു നിന്നും വരാന്‍ ആഗ്രഹിക്കുന്നവരും, വീടുകളില്‍ നിരീക്ഷണത്തില്‍ കഴിയുന്നവരുമാണ് കൂടുതലായും കണ്‍ട്രോള്‍ റൂമിന്റെ സഹായം തോടുന്നത്.

കൊറോണ രോഗ പശ്ചാത്തലത്തില്‍ ജില്ലാ ഭരണകൂടം ആവിഷ്‌കരിച്ച ഗിഫ്റ്റ് എ ബുക്ക് കാമ്പെയിനിന്റെ ഭാഗമായി വീടുകളില്‍ നിരീക്ഷണത്തില്‍ കഴിയുന്നവര്‍ക്ക് പുസ്തകം ലഭ്യമാക്കും. കാമ്പെയിനിലൂടെ നിരവധി പുസ്തകങ്ങളാണ് കളക്‌ട്രേറ്റ് എമര്‍ജന്‍സി സെല്ലില്‍ എത്തിയിരിക്കുന്നത്. നിരീക്ഷണത്തില്‍ കഴിയുന്നവര്‍ക്ക് പുസ്തകം ആവശ്യമെങ്കില്‍ 04936 204151 എന്ന നമ്പറില്‍ വിളിക്കണം.   8078409770 എന്ന വാട്‌സാപ്പ് നമ്പറിലും വിവരം അറിയിക്കാം.

 കല്‍പ്പറ്റ മുണ്ടേരി ഗവ: വെക്കേഷണല്‍ ഹയര്‍ സെക്കണ്ടറി സ്‌ക്കൂളില്‍  യുവജനക്ഷേമ ബോര്‍ഡും യുവക്ലബ്ബ് എമിലിയും സംയുക്തമായി സ്‌കൂള്‍ കവാടത്തില്‍ കൊറോണ പ്രതിരോധത്തിന്റെ ഭാഗമായി കൈ കഴുകാന്‍ സംവിധാനമൊരുക്കി. സ്‌കൂള്‍ പ്രിന്‍സിപ്പാള്‍ സജീവന്‍, യൂത്ത് കോ ഓര്‍ഡിനേറ്റര്‍ വി.നൗഷാദ്, കെ.ഗീത, എ.സുഹറ,കെ. രമേഷന്‍ ,  വി.സി രവി, എന്നിവര്‍ നേതൃത്വം നല്‍കി.

    കേരള ലോകായുക്ത മാര്‍ച്ച് 23 മുതല്‍ 27വരെ കണ്ണൂര്‍, തലശ്ശേരി, കോഴിക്കോട് എന്നിവിടങ്ങളില്‍ നടത്താന്‍ നിശ്ചയിച്ചിരുന്ന ക്യാമ്പ് സിറ്റിംഗ് മാറ്റി വെച്ചു.

   കൊറോണ വൈറസ് വ്യാപനം തടയുന്നതിന്റെ ഭാഗമായി ആരോഗ്യവകുപ്പിന്റെ  ക്വാറന്റൈന്‍ നിര്‍ദ്ദേശം ലംഘിച്ച നാല് പേരെ ബുധനാഴ്ച്ച അറസ്റ്റ് ചെയ്തു. വിദേശത്തുനിന്നെത്തിയ മുട്ടില്‍ സ്വദേശികളായ രണ്ട് പേരെയും അമ്പലവയല്‍,പുല്‍പ്പള്ളി സ്വദേശികളായ ഒരോരുത്തരെയുമാണ് അറസ്റ്റ് ചെയ്തത്. ഇവരെ പിന്നീട് സ്വന്തം ജാമ്യത്തില്‍ വിട്ടു. നിര്‍ദ്ദേശങ്ങള്‍ പാലിക്കാത്തവര്‍ക്കെതിരെ  കര്‍ശന നടപടി സ്വീകരിക്കുമെന്ന് ജില്ലാ പോലീസ് മേധാവി അറിയിച്ചു.