മുഖ്യമന്ത്രിയുടെ 12 ഇന പരിപാടിയുടെ ഭാഗമായി കൃഷി വകുപ്പ് നടപ്പാക്കുന്ന ' ജീവനി നമ്മുടെ കൃഷി നമ്മുടെ ആരോഗ്യം'  പദ്ധതിയില്‍ ഉള്‍പ്പെടുത്തി കര്‍ഷകര്‍ക്ക് പച്ചക്കറി കൃഷിക്കായി മഴമറ നിര്‍മിക്കുന്നതിന് കൃഷി വകുപ്പ് സാമ്പത്തിക ആനുകൂല്യം നല്‍കും. 100 ചതുരശ്ര മീറ്റര്‍ വലിപ്പമുളള മഴമറ നിര്‍മ്മിക്കാന്‍ ഒരാള്‍ക്ക് 75 ശതമാനം സബ്സിഡിയില്‍ പരമാവധി 50000 രൂപയാണ് അനുവദിക്കുന്നത്. വായ്പ ആവശ്യമുളള കര്‍ഷകര്‍ അതത് കൃഷിഭവനില്‍ ജൂണ്‍ 25 നകം അപേക്ഷിക്കണമെന്ന് പ്രിന്‍സിപ്പല്‍ കൃഷി ഓഫീസര്‍ അറിയിച്ചു.

കോവിഡ് - 19  മായി ബന്ധപ്പെട്ട് കേന്ദ്ര സര്‍ക്കാര്‍ അനുവദിച്ച പി.എം.ജി.കെ.വൈ പദ്ധതിപ്രകാരം ജൂണ്‍ മാസത്തെ സൗജന്യ അരി, കടല/പയര്‍ വിതരണം  ആരംഭിച്ചു. ജൂണ്‍ 30 വരെ സൗജന്യമായി അരി വാങ്ങാം. എ.എ.വൈ (മഞ്ഞ കാര്‍ഡ്), പി.എച്ച്.എച്ച് (പിങ്ക് കാര്‍ഡ്) കുടുംബങ്ങളിലെ അംഗങ്ങള്‍ക്ക്, ഒരു അംഗത്തിന്  അഞ്ച് കിലോഗ്രാം വീതം സൗജന്യമായി അരിയും കാര്‍ഡ് ഒന്നിന് ഒരു കിലോഗ്രാം പയര്‍ അല്ലെങ്കില്‍ കടല ലഭിക്കുമെന്ന് ജില്ലാ സപ്ലൈ ഓഫീസര്‍ അറിയിച്ചു.

കോവിഡ് 19 ജാഗ്രതയുടെ ഭാഗമായി സര്‍ക്കാര്‍ ഓഫീസുകളില്‍ തിരക്ക് നിയന്ത്രിക്കാന്‍ 2020 ഫെബ്രുവരിയില്‍ നടന്ന കെ- ടെറ്റ് പരീക്ഷ വിജയിച്ചവരുടെ സര്‍ട്ടിഫിക്കറ്റ് പരിശോധന ജൂണ്‍ 22 മുതല്‍ താല്‍ക്കാലികമായി നിര്‍ത്തി വെയ്ക്കുമെന്ന് പാലക്കാട് ജില്ലാ വിദ്യാഭ്യാസ ഓഫീസര്‍ അറിയിച്ചു.

മരുതറോഡ് ഗ്രാമപഞ്ചായത്തിലെ മഹാത്മാഗാന്ധി ദേശീയ ഗ്രാമീണ തൊഴിലുറപ്പ് പദ്ധതിയില്‍ അക്കൗണ്ട്ന്റ്- ഡാറ്റാ എന്‍ട്രി ഓപ്പറേറ്റര്‍ ഒഴിവിലേക്ക് നിയമനം. സര്‍ക്കാര്‍ അംഗീകൃത ബികോം, പി.ജി.ഡി.സി.എ. യാണ് യോഗ്യത. താല്‍പര്യമുള്ളവര്‍ അപേക്ഷ, ബന്ധപ്പെട്ട യോഗ്യതാ സര്‍ട്ടിഫിക്കറ്റുകളുടെ പകര്‍പ്പ് എന്നിവ സഹിതം ജൂണ്‍ 26 ന് വൈകീട്ട് മൂന്നിനകം പഞ്ചായത്ത് ഓഫീസില്‍ എത്തണമെന്ന് സെക്രട്ടറി അറിയിച്ചു.

കുമരംപുത്തൂര്‍ ഗ്രാമപഞ്ചായത്തില്‍ സുഭിക്ഷകേരളം പദ്ധതിയുമായി ബന്ധപ്പെട്ട് വിവിധ വ്യക്തിഗത ആനുകൂല്യങ്ങള്‍ക്കുള്ള അപേക്ഷാ ഫോറങ്ങള്‍ ഗ്രാമപഞ്ചായത്ത് ഓഫീസ്, വാര്‍ഡ് അംഗങ്ങള്‍ എന്നിവ മുഖേന വിതരണം ചെയ്യുമെന്ന് സെക്രട്ടറി അറിയിച്ചു.

വീണ്ടുമൊരു പ്രളയം ഉണ്ടായാല്‍ അതിജീവിക്കാനും രക്ഷാപ്രവര്‍ത്തനത്തിനും പുതിയ രീതികള്‍ തേടുകയാണ് ജില്ലാ അഗ്‌നിശമനസേന വിഭാഗം. ഉപയോഗശൂന്യമായി വലിച്ചെറിയുന്ന പ്ലാസ്റ്റിക് കുപ്പികളും തടിക്കഷ്ണങ്ങള്‍ കൊണ്ട് ബോട്ട് നിര്‍മിച്ചിരിക്കുകയാണ് മണ്ണാര്‍ക്കാട് ഫയര്‍ ആന്‍ഡ് റെസ്‌ക്യൂ സിവില്‍ ഡിഫന്‍സ് ടീം.

ഒഴിഞ്ഞ പ്ലാസ്റ്റിക് കുപ്പികള്‍ വൃത്തിയാക്കിയാണ് ബോട്ട് നിര്‍മാണത്തിന് ഉപയോഗിച്ചിരിക്കുന്നത്. ചിലവുകുറഞ്ഞതും ഇന്ധനവുമില്ലാതെ തുഴയാന്‍ സാധിക്കുന്നതുമായ ഈ ബോട്ടില്‍ നാല് പേര്‍ക്ക് ഇരിക്കാം.  കൂടാതെ ബോട്ടില്‍ നില്‍ക്കാനുമുള്ള സ്ഥലവുമുണ്ട്.

ദോഹ, ദുബായ്, ഷാര്‍ജ, കുവൈറ്റ്, മസ്‌കറ്റ് എന്നിവിടങ്ങളില്‍ നിന്നും നെടുമ്പാശ്ശേരി, കരിപ്പൂര്‍, കണ്ണൂര്‍, തിരുവനന്തപുരം അന്താരാഷ്ട്ര വിമാനത്താവളങ്ങളില്‍ ഇന്നലെ (ജൂണ്‍ 18) ജില്ലയിലെത്തിയത് 26 പാലക്കാട് സ്വദേശികള്‍. ഇവരില്‍ 12 പേര്‍ ഇന്‍സ്റ്റിറ്റിയൂഷനല്‍ ക്വാറന്റൈനില്‍ പ്രവേശിച്ചു. ഒരാളെ കളമശ്ശേരി മെഡിക്കല്‍ കോളേജില്‍ പ്രവേശിപ്പിച്ചു. ബാക്കി 13 പേര്‍ വീടുകളില്‍ നിരീക്ഷണത്തിലാണ്.

ഷാര്‍ജയില്‍ നിന്നും കൊച്ചി അന്താരാഷ്ട്ര വിമാനത്താവളത്തിലെത്തിയ മൂന്ന് പേരില്‍ രണ്ടുപേര്‍ ഇന്‍സ്റ്റിറ്റിയൂഷനല്‍ ക്വാറന്റൈനില്‍ പ്രവേശിച്ചു. ഒരാള്‍ വീട്ടില്‍ നിരീക്ഷണത്തിലാണ്.

ജില്ലയിലെ കോവിഡ്-19 പ്രതിരോധ പ്രവര്‍ത്തനങ്ങളുമായി ബന്ധപ്പെട്ട് പട്ടികജാതി- പട്ടികവര്‍ഗ- പിന്നാക്കക്ഷേമ- നിയമ-സാംസ്‌ക്കാരിക- പാര്‍ലമെന്ററികാര്യ  മന്ത്രി എ.കെ.ബാലന്റെയും ജലവിഭവ വകുപ്പ് മന്ത്രി കെ.കൃഷ്ണന്‍കുട്ടിയുടെയും അധ്യക്ഷതയില്‍ ഇന്ന് (ജൂണ്‍ 20) രാവിലെ 9.30 ന് കലക്ടറേറ്റില്‍ അവലോകന യോഗം ചേരും. ബന്ധപ്പെട്ടവര്‍ യോഗത്തില്‍ പങ്കെടുക്കണമെന്ന് താങ്കള്‍ പങ്കെടുക്കണമെന്ന് ജില്ലാ കലക്ടര്‍ അറിയിച്ചു.

പി.എന്‍. പണിക്കര്‍ അനുസ്മരണ വായനാമാസാചരണത്തിന്റെ 25-മത് വാര്‍ഷികാഘോഷത്തോടനുബന്ധിച്ചുള്ള ജില്ലാതല പരിപാടികള്‍ക്ക് തുടക്കമായി. കോവിഡ് 19 ന്റെ പശ്ചാത്തലത്തില്‍ ഓണ്‍ലൈനിലൂടെ നടത്തുന്ന പരിപാടികളുടെ ജില്ലാതല ഉദ്ഘാടനം എ.ഡി.എം. ആര്‍.പി. സുരേഷ് നിര്‍വഹിച്ചു. സംസ്ഥാന സര്‍ക്കാര്‍, കേരള സ്റ്റേറ്റ് ലൈബറി കൗണ്‍സില്‍ , പി.എന്‍. പണിക്കര്‍ ഫൗണ്ടേഷന്‍, വിക്ടേഴ്‌സ് ചാനല്‍ എന്നിവരുടേയും കേന്ദ്ര സര്‍ക്കാര്‍ ഏജന്‍സികളുടെയും പങ്കാളിത്തത്തോടെയാണ് പരിപാടികള്‍ സംഘടിപ്പിക്കുന്നത്.