കോവിഡ് 19 പ്രതിരോധത്തിന്റെ ഭാഗമായി അതീവജാഗ്രതാ നിർദ്ദേശം നിലനിൽക്കുന്നതിനാൽ കാണം/വെറുമ്പാട്ടം/കൂടിയായ്മ, കുടികിടപ്പ് എന്നീ ഭൂമികൾക്ക് ജന്മം അനുവദിച്ച് ക്രയസർട്ടിഫിക്കറ്റ് നൽകുന്നതുമായി ബന്ധപ്പെട്ട് തൃശൂർ ജില്ലയിലെ എല്ലാ ലാന്റ് ട്രൈബ്യൂണലുകളിലും മാർച്ച് 31 വരെ നടത്താൻ നിശ്ചയിച്ച എസ് എം കേസുകളുടെ വിചാരണ മാറ്റിവച്ചതായി എഡിഎം അറിയിച്ചു. പുതുക്കിയ തീയതി പിന്നീടറിയിക്കും.

കോവിഡ് 19 പ്രതിരോധത്തോടനുബന്ധിച്ച് തൃശൂർ ജില്ലാ ഹോമിയോപ്പതി വകുപ്പ് നടത്താനിരുന്ന അഭിമുഖങ്ങൾ മാറ്റിവെച്ചു. വകുപ്പിനു കീഴിലുള്ള പദ്ധതികളിലേക്കുള്ള വിവിധ തസ്തികകളിലേക്ക് മാർച്ച് 24 മുതൽ 27 വരെ നടത്താനിരുന്ന അഭിമുഖങ്ങളാണ് മാറ്റിവെച്ചത്. പുതുക്കിയ തീയതികൾ പിന്നീട് അറിയിക്കുമെന്ന് ജില്ലാ മെഡിക്കൽ ഓഫീസർ(ഹോമിയോ) അറിയിച്ചു.
 

കോവിഡ് 19 വൈറസ് വ്യാപനം തടയുന്നതിന്റെ ഭാഗമായി പട്ടികജാതി പട്ടികവർഗ്ഗ കോളനികളിൽ ബോധവൽക്കരണം നടത്തണമെന്നും മതിയായ അളവിൽ ഹാൻഡ് വാഷുകൾ, സാനിറ്റൈസറുകൾ എന്നിവയുടെ ലഭ്യത ഉറപ്പുവരുത്തണമെന്നും ജില്ലാ കളക്ടർ എസ് ഷാനവാസ് ഉത്തരവിട്ടു. കൂടാതെ അമ്പതിലധികം ആളുകൾ ഒന്നിച്ചു കൂടിയുള്ള ആചാരങ്ങളും ഉത്സവങ്ങളും തടയുന്നതിന് നടപടികൾ സ്വീകരിക്കുമെന്നും ജില്ലാ കളക്ടർ അറിയിച്ചു.

കോവിഡ് 19 രോഗവ്യാപനം തടയുന്നതിനായി 50ൽപരം ആളുകൾ ഒന്നിച്ചു കൂടുന്ന ആഘോഷങ്ങളും ഉത്സവങ്ങളും ചടങ്ങുകളും മാറ്റിവയ്ക്കാൻ കളക്ടർ എസ് ഷാനവാസ് ഉത്തരവിറക്കി. വിവാഹം ഉൾപ്പെടെയുള്ള ചടങ്ങുകൾ മാറ്റിവെച്ചവർക്ക് ഹാൾ ഉടമസ്ഥർ അഡ്വാൻസ് തുക പൂർണമായി തിരികെ നൽകുകയോ മറ്റൊരു തീയതിയിലേക്ക് ചടങ്ങുകൾ മാറ്റിവെക്കാൻ അനുവദിക്കുകയോ വേണമെന്നും നിർദ്ദേശിച്ചു. ഇത് ലംഘിക്കുന്ന ഓഡിറ്റോറിയം ഉടമസ്ഥർക്കെതിരെ നടപടി സ്വീകരിക്കുമെന്നും ജില്ലാ കളക്ടർ അറിയിച്ചു.

കൊറോണയുമായി ബന്ധപ്പെട്ട് കടങ്ങോട് ഗ്രാമപഞ്ചായത്തിലെ എട്ട്, ഒൻപത്, പത്ത് വാർഡുകളിൽ ജാഗ്രതാ യോഗങ്ങൾ ചേർന്നു. സർക്കാരിന്റെയും, ആരോഗ്യ വകുപ്പിന്റെയും ജാഗ്രതാ നിർദ്ദേശങ്ങൾ ഗ്രാമങ്ങളിൽ എത്തിക്കുന്നതിനും നിരീക്ഷണത്തിൽ കഴിയുന്ന പ്രവാസി സുഹൃത്തുക്കളുടെ ഭവനങ്ങൾ സന്ദർശിക്കുന്നതിനും യോഗം തീരുമാനിച്ചു. ഗ്രാമ പഞ്ചായത്ത് ആരോഗ്യ സ്റ്റാൻഡിംഗ് കമ്മിറ്റി ചെയർമാൻ ജലീൽ ആദൂർ അധ്യക്ഷത വഹിച്ചു. ഗ്രാമ പഞ്ചായത്ത് മെമ്പർ ദീപ രാമചന്ദ്രൻ, ജൂനിയർ ഹെൽത്ത് ഇൻസ്പെക്ടർ ശശികുമാർ, ഹെൽത്ത് നഴ്സ് ധന്യ, തുടങ്ങിയവർ സംസാരിച്ചു. ആശാവർക്കർമാർ, അങ്കണവാടി ടീച്ചർമാർ, കുടുംബശ്രീ സിഡിഎസ് അംഗങ്ങൾ തുടങ്ങിയവർ സംബന്ധിച്ചു.

ജനമൈത്രി പോലീസുമായി സഹകരിച്ച് വലപ്പാട് സാമൂഹികാരോഗ്യ കേന്ദ്രത്തിലെ ഉദ്യോഗസ്ഥർ ഹോം ക്വാറന്റയിനിൽ കഴിയുന്നവരുടെ വീടുകൾ സന്ദർശിച്ചു. ഭക്ഷ്യസാധനങ്ങളുടെ ലഭ്യത, ഹോം ക്വാറന്റയിനി ലിരിക്കുന്നവരുടെ ആരോഗ്യസ്ഥിതി എന്നിവ വിലയിരുത്താനായിരുന്നു സന്ദർശനം. ഹെൽത്ത് ഇൻസ്പെക്ടർ വി.എസ്.രമേഷ്, ജൂനിയർ ഹെൽത്ത് ഇൻസ്പെക്ടർമാരായ എ.ഐ.മുഹമ്മദ് മുജീബ്, സി.പി.നിഷൻ, ജെ.പി.എച്ച്.എൻമാരായ ഷക്കീല, സനീഷ, ആതിര ജനമൈത്രി പോലീസിലെ സിവിൽ ഓഫീസർമാരായ കുട്ടൻ, ലെനിൻ, രാജേഷ് എന്നിവർ നേതൃത്വം നൽകി. ആവശ്യമുള്ള വീടുകളിൽ ഭക്ഷ്യവസ്തുക്കൾ എത്തിച്ചു.

കോവിഡ് 19 വൈറസ് വ്യാപനം തടയുന്നതിന്റെ ഭാഗമായി സർക്കാർ ഓഫീസുകളിൽ സന്ദർശക നിയന്ത്രണം പാലിക്കണമെന്ന് ജില്ലാ കളക്ടർ എസ് ഷാനവാസ് അറിയിച്ചു. ജീവനക്കാർക്ക് ആരോഗ്യസുരക്ഷാ ക്രമീകരണങ്ങൾ ഒരുക്കുന്നതിന്റെ ഭാഗമായി ഹാൻഡ് വാഷ് / സാനിറ്റൈസർ ലഭ്യത ഉറപ്പുവരുത്തണം. ജീവനക്കാരും പൊതുജനങ്ങളും പതിവായി സ്പർശിക്കാൻ ഇടയുള്ള സ്ഥലങ്ങൾ കൃത്യമായ ഇടവേളകളിൽ അണുവിമുക്തമാക്കണം. അത്യാവശ്യമല്ലാത്ത ഔദ്യോഗിക യാത്രകളും അടിയന്തരമല്ലാത്ത യോഗങ്ങളും ഒഴിവാക്കേണ്ടതാണെന്നും ജില്ലാ കളക്ടർ അറിയിച്ചു.