വാണിജ്യ സര്‍ട്ടിഫിക്കറ്റുകളുടെ യു.എ.ഇ എംബസി സാക്ഷ്യപ്പെടുത്തല്‍ ഇനി മുതല്‍ നോര്‍ക്ക റൂട്ട്‌സ് മുഖേന നിര്‍വഹിക്കും. ജൂലൈ ഒന്ന് മുതലാണ് ഈ സംവിധാനം നിലവില്‍ വരുക. നോര്‍ക്ക റൂട്ട്‌സിന്റെ തിരുവനന്തപുരം, എറണാകുളം, കോഴിക്കോട് ഓഫീസുകള്‍ മുഖാന്തിരം ഈ സേവനം ലഭ്യമാകും.  പവര്‍ ഓഫ് അറ്റോണി, ട്രഡ് മാര്‍ക്ക്, ബിസിനസ്സ് ലൈസന്‍സുകള്‍ തുടങ്ങിയ വിവിധ വാണിജ്യ സര്‍ട്ടിഫിക്കേറ്റുകളാണ് നോര്‍ക്ക റൂട്ട്‌സ് മുഖേന സാക്ഷ്യപ്പെടുത്തുന്നത്. കൂടുതല്‍ വിവരങ്ങള്‍ക്ക്-1800 425 3939.  

 ജില്ലാ മാനസികാരോഗ്യ പരിപാടി ക്യമ്പിലേക്ക് ക്ലീനിക്കല്‍ സൈക്കോളജിസ്റ്റ് തസ്തികയിലേക്കും  ,സ്‌കൂള്‍ മെന്റല്‍ ഹെല്‍ത്തിലെ പ്രോജക്ട് ഓഫീസര്‍ തസ്തികയിലേക്കും ജൂലൈ മൂന്നിന് അഭിമുഖം നടത്തും.  എംഫില്‍/ പി.ജി.ഡിപ്ലോമ ഇന്‍ ക്ലീനിക്കല്‍ സൈക്കോളജി യോഗ്യതയുള്ളവര്‍ക്ക് ജൂലൈ മൂന്നിന് രാവിലെ പത്തിന് നടക്കുന്ന ക്ലീനിക്കല്‍ സൈക്കോളജിസ്റ്റിന്റെ അഭിമുഖത്തില്‍ പങ്കെടുക്കാം.

പെരിയ സര്‍ക്കാര്‍ പോളിടെക്‌നിക് കോളേജില്‍ രണ്ടാം വര്‍ഷം പോളിടെക്‌നിക് ഡിപ്ലോമ ക്ലാസുകളിലേക്ക് ലാറ്ററല്‍ എന്‍ട്രി മുഖേന പ്രവേശനം നേടുന്നതിന് അപേക്ഷ ക്ഷണിച്ചു. അപേക്ഷ നേരിട്ട് പോളിടെക്‌നിക്കില്‍ സമര്‍പ്പിക്കണം. അപേക്ഷ ഫീസ്  പൊതുവിഭാഗത്തിന് 300 രൂപയും എസ് സി/ എസ് ടി വിഭാഗക്കാര്‍ക്ക് 150 രൂപയും ആണ്.പ്ലസ് ടു, തത്തുല്യ പരീക്ഷയില്‍ ഫിസിക്‌സ്, കെമിസ്ട്രി, മാത്തമാറ്റിക്‌സ്, ഇംഗ്ലീഷ് എന്നീ വിഷയങ്ങള്‍ക്ക് 50 ശതമാനം മാര്‍ക്ക് ലഭിച്ചിട്ടുള്ള വിദ്യാര്‍ത്ഥികള്‍ക്ക് അപേക്ഷിക്കാം.

 നീലേശ്വരം നഗരസഭയില്‍ കെട്ടിട നിര്‍മ്മാണ അനുമതിക്കായി അപേക്ഷ സമര്‍പ്പിച്ചിട്ട് വിവിധ കാരണങ്ങളാല്‍ തീര്‍പ്പുകല്‍പ്പിക്കാന്‍ അവശേഷിക്കുന്ന അപേക്ഷകളില്‍ തീര്‍പ്പുകല്‍പ്പിക്കുന്നതിനായി  ജൂലൈ ഒന്‍പതിന് രാവിലെ 10.30 മുതല്‍ നഗരസഭ അനക്‌സ് ഹാളില്‍  അദാലത്ത് സംഘടിപ്പിക്കുന്നു. അദാലത്തില്‍ പങ്കെടുക്കുന്നതിന് അപേക്ഷകര്‍ക്ക് നീലേശ്വരം നഗരസഭയില്‍ നിന്നും അറിയിപ്പ് നല്‍കും. ഏതെങ്കിലും കാരണവശാല്‍ അറിയിപ്പ് ലഭിക്കാത്തവരുണ്ടെങ്കില്‍ കെട്ടിട നിര്‍മ്മാണ അപേക്ഷയുമായി ബന്ധപ്പെട്ട രേഖകള്‍ സഹിതം അദാലത്തില്‍ പങ്കെടുക്കണം.

ഐ.ടി.ഐ പ്രവേശനത്തിനുള്ള  അപേക്ഷ ഓണ്‍ലൈന്‍     ആയി www.itiadmissions.kerala.gov.in എന്ന വെബ് സൈറ്റിലൂടെ സമര്‍പ്പിക്കുന്നതിനുള്ള തീയ്യതി ജൂലൈ അഞ്ചു വരെ ദീര്‍ഘിപ്പിച്ചു കൂടുതല്‍ വിവരങ്ങള്‍ക്ക് വെസ്റ്റ് എളേരി ബേബി ജോണ്‍ മെമ്മോറിയല്‍ ഗവണ്‍മെന്റ് (വനിത) ഐ.ടി.ഐ ഓഫിസുമായി ബന്ധപ്പെടുക.

വലിയപറമ്പ ഗ്രാമപഞ്ചായത്ത് മഹാത്മാഗാന്ധി ദേശീയ ഗ്രാമീണ തൊഴിലുറപ്പ് പദ്ധതിയില്‍ ഉള്‍പ്പെടുത്തി പശുത്തൊഴുത്ത്, ആട്ടിന്‍കൂട്, കോഴിക്കൂട്, കമ്പോസ്റ്റ്പിറ്റ് നിര്‍മ്മാണം, കിണര്‍ റീചാര്‍ജ്, കിണര്‍ ആള്‍മറ, കാര്‍ഷികാവശ്യത്തിന് കുളം, കിണര്‍, മത്സ്യകൃഷിക്ക് കുളം നിര്‍മ്മാണം എന്നിവയ്ക്ക് ആനുകൂല്യം നല്‍കുന്നു. നിശ്ചിത മാതൃകയിലുള്ള അപേക്ഷ ഫോറം ഗ്രാമപഞ്ചായത്ത്  ഓഫീസില്‍ നിന്നു വിതരണം ചെയ്യും.അപേക്ഷ  ജൂലായ് 10 വരെ സ്വീകരിക്കും.

തെക്കുപടിഞ്ഞാറന്‍ കാലവര്‍ഷം ആരംഭിച്ചതിനു ശേഷം ജില്ലയില്‍ ഇതുവരെ 577.009 മില്ലിമീറ്റര്‍ മഴ ലഭിച്ചു. കഴിഞ്ഞ 24 മണിക്കൂറില്‍ 0.4375 മില്ലിമീറ്റര്‍ മഴയാണ് ലഭിച്ചത്. ഇതുവരെ ഒരു വീട് പൂര്‍ണമായും 37 വീടുകള്‍ ഭാഗികമായും തകര്‍ന്നു. 18.3 ഹെക്ടര്‍ പ്രദേശത്തെ കൃഷിക്ക് നാശമുണ്ടായി.

വായനാ വാരാഘോഷത്തിന്റെ സമാപന ദിനത്തില്‍ രാവണേശ്വരം ഗവണ്‍മെന്റ് ഹയര്‍സെക്കന്ററി സ്‌കൂളില്‍ ചില്‍ഡ്രന്‍സ് പാര്‍ക്ക് ഉദ്ഘാടനവും വായനാ ബോധി വൃക്ഷ നിര്‍മ്മാണവും നടന്നു. തങ്ങള്‍ വായിച്ച പുസ്തകത്തിലെ മഹത്‌വചനങ്ങള്‍ ബോധി വൃക്ഷത്തിലൊരുക്കി വായനാ വാരാചരണം വിദ്യാര്‍ത്ഥികള്‍ സംപുഷ്ടമാക്കി. സര്‍ക്കാര്‍ നടപ്പിലാക്കുന്ന സമ്പൂര്‍ണ്ണ വിദ്യാഭ്യാസ സംരക്ഷണ യജ്ഞത്തിന്റെ ഭാഗമായി പി.ടി.എയുടെയും നാട്ടുകാരുടെയും സാമ്പത്തിക സഹകരണത്തോടെ രണ്ടുലക്ഷം രൂപയോളം ചെലവഴിച്ചാണു പാര്‍ക്ക് നിര്‍മ്മാണം പൂര്‍ത്തിയാക്കിയത്. 

വായനാപക്ഷാചരണത്തിന്റെ ഭാഗമായി സാക്ഷരതാമിഷന്റെ നേതൃത്വത്തില്‍    പത്താതരം തുല്യതാ പഠിതാക്കള്‍ക്കായി കഥാരചന, കവിതരചന, പുസ്തക ആസ്വദനക്കുറിപ്പ് എന്നീ മത്സരങ്ങള്‍ സംഘടിപ്പിക്കുന്നു. നാളെ(ജൂലൈ ഒന്നിന്) രാവിലെ 10ന് ജില്ലാ പഞ്ചായത്ത് അനക്സ് ഹാളിലാണ് പരിപാടി. മലയാളം, കന്നഡ എന്നീ വിഭാഗങ്ങളിലായാണ് മത്സരം നടത്തുന്നത്. വിജയിക്കുന്നവര്‍ക്ക് സംസ്ഥാന സാക്ഷരതാമിഷനും സാഹിത്യ അക്കാദമിയും സംയുക്തമായി ജുലൈ അവസാന വാരം സംഘടിപ്പിക്കുന്ന സാഹിത്യക്യാമ്പില്‍ പങ്കെടുക്കാന്‍ അവസരം ലഭിക്കും.