പുല്ലൂര്‍-പെരിയ ഗ്രാമപഞ്ചായത്തില്‍  2019-20 വര്‍ഷത്തെ കച്ചവട ലൈസന്‍സ് പുതുക്കാത്ത വ്യാപാരികള്‍ ഈ മാസം  അഞ്ചിനകം ലൈസന്‍സ് പുതുക്കണം.നിശ്ചിത സമയപരിധിക്കകം ലൈസന്‍സ് പുതുക്കാത്തവരില്‍  നിന്നും പിഴ ഈടാക്കും. 

ജില്ലയിലെ എല്ലാ വില്ലേജ് ഓഫീസുകളിലും ഇനി എ.ടി.എം കാര്‍ഡുപയോഗിച്ച് പണമടയ്ക്കാം. ഡിജിറ്റല്‍ ഇന്ത്യാ നാലാം വാര്‍ഷികാഘോഷത്തിന്റെ ഭാഗമായി ജില്ലയിലെ എല്ലാ വില്ലേജ് ഓഫീസുകള്‍ക്കും ഇ-പോസ് മെഷീന്‍ വിതരണം ചെയ്യുന്നതിന്റെ ഉദ്ഘാടനം ജില്ലാ കലക്ടര്‍ ഡി. ബാലമുരളി നിര്‍വഹിച്ചു. വിവര സാങ്കേതികവിദ്യയുടെ ഗുണങ്ങള്‍ ഭരണ സംവിധാനത്തില്‍ പ്രായോഗികമായി നടപ്പാക്കിയാല്‍ ജനജീവിതം ആയാസകരമാക്കാമെന്നും സര്‍ക്കാര്‍ സേവനങ്ങള്‍ അതിവേഗം ജനങ്ങളിലെത്താന്‍ ഇതുവഴി സാധിക്കുമെന്നും കലക്ടര്‍ പറഞ്ഞു. 

 സമ്പൂര്‍ണ്ണ തൊഴിലാളി രജിസ്‌ട്രേഷന്‍ കര്‍മ്മ പദ്ധതിയുടെ ഭാഗമായി ജില്ലയില്‍ നാളിതുവരെയും ക്ഷേമനിധിയില്‍ അംഗത്വം എടുത്തിട്ടില്ലാത്ത സ്വകാര്യ മോട്ടോര്‍ വാഹന ഗതാഗത മേഖലയിലെ തൊഴിലാളികള്‍ക്കും ക്ഷേമനിധിയില്‍ അംഗത്വം നല്‍കി ആനുകുല്യങ്ങള്‍ക്ക് അര്‍ഹരാക്കുക എന്ന ലക്ഷ്യത്തോടെ ജില്ലയുടെ വിവിധ ഭാഗങ്ങളില്‍ ക്യാമ്പുകള്‍ സംഘടിപ്പിച്ചു വരുന്നു. കൂടാതെ നിലവില്‍ അംഗത്വം ഉളളവരും ക്ഷേമനിധി അംശാദായം കുടിശ്ശിക വരുത്തിയിട്ടുളളതുമായ തൊഴിലാളികള്‍ക്കും അടച്ചു തീര്‍ക്കുന്നതിനുളള കാലാവധി സെപ്തംബര്‍ 30 വരെ ദീര്‍ഘിപ്പിച്ചു.

 കേരള മദ്രസാധ്യാപക ക്ഷേമനിധിയില്‍ അംഗങ്ങളായവരുടെ മക്കളില്‍ 2018-19 അധ്യായന വര്‍ഷം എസ്.എസ്.എല്‍.സി, പ്ലസ് ടു, തത്തുല്ല്യ പരീക്ഷകളില്‍ എല്ലാ വിഷയങ്ങള്‍ക്കും എ പ്ലസ് ലഭിച്ച കുട്ടികള്‍ക്കുളള സ്‌കോളര്‍ഷിപ്പിന്  അപേക്ഷിക്കാനുള്ള  തീയതി ഈ മാസം 20 വരെ ദീര്‍ഘിപ്പിച്ചു. അപേക്ഷയോടൊപ്പം അംഗത്വകാര്‍ഡ്, വിഹിതം ഒടുക്കിയത് സംബന്ധിച്ച രേഖകള്‍, മാര്‍ക്ക് ലിസ്റ്റ്, അംഗത്തിന്റെയോ മക്കളുടേയോ ബാങ്ക് പാസ്ബുക്ക് (സഹകരണ ബാങ്ക് ഒഴിച്ച്) എന്നിവയുടെ പകര്‍പ്പ് ഉളളടക്കം ചെയ്യണം. മാനേജര്‍, കേരള മദ്രസാധ്യപക ക്ഷേമനിധി ഓഫീസ്, പുതിയറ, കോഴിക്കോട് -1, എന്ന വിലാസത്തില്‍ അപേക്ഷ സമര്‍പ്പിക്കണം 

കുംബഡാജെ ഗ്രാമപഞ്ചായത്തിലെ എന്‍ഡോസള്‍ഫാന്‍ ദുരിതബാധിതര്‍ ഉള്‍പ്പെടെയുളള ഭിന്നശേഷിക്കാരുടെ ശാരീരിക അവശതയുടെ തോത് കണക്കാക്കി അവരെ വ്യത്യസ്ത വിഭാഗങ്ങളില്‍ ഉള്‍പ്പെടുത്തി സമഗ്രമായ ലിസ്റ്റ് തയ്യാറാക്കുന്നതിന് ആവശ്യമായ മെഡിക്കല്‍ പരിശോധനകള്‍ക്ക് കേരള സാമൂഹ്യ സുരക്ഷ മിഷന്റെ ആഭിമുഖ്യത്തില്‍ ക്യാമ്പ് നാളെ (ജൂലൈ 4 ) മാര്‍പ്പനടുക്ക പ്രാഥമികാരോഗ്യകേന്ദ്രത്തിന്റെ പുതിയ ബില്‍ഡിങ്ങില്‍ നടത്തുന്നു.ഭിന്നശേഷിക്കാരായവര്‍ ക്യാമ്പില്‍ പങ്കെടുക്കണം.

 കുംബഡാജെ ഗ്രാമപഞ്ചായത്തിലെ 2019-20 വര്‍ഷത്തെ വ്യക്തിഗത ആനൂകുല്യങ്ങള്‍ വിതരണം ചെയ്യുന്ന പദ്ധതികളിലേക്കുളള അപേക്ഷ ക്ഷണിച്ചു. അപേക്ഷഫോം പഞ്ചായത്ത് ഓഫീസില്‍ നിന്നും ലഭിക്കും. അപേക്ഷ ഈ മാസം 15 നകം പഞ്ചായത്ത് ഓഫിസില്‍ സമര്‍പ്പിക്കണം.

കാസര്‍കോട് നഗരസഭാപരിധിയിലെ കര്‍ഷകര്‍ക്ക് ഇന്ന് (ജൂലായ് 3)  കാസര്‍കോട് കൃഷിഭവനില്‍ മണ്ണ് പരിശോധനയുടെ ആവശ്യകതയും മണ്ണുസാമ്പിള്‍ എടുക്കുന്ന രീതിയും എന്ന വിഷയത്തില്‍ ക്ലാസ് സംഘടിപ്പിക്കുന്നു. ക്ലാസില്‍ പങ്കെടുക്കുന്ന കര്‍ഷകരുടെ മണ്ണ് സൗജന്യമായി പരിശോധിച്ചു നല്‍കും.കഴിഞ്ഞ മണ്ണ് പരിശോധനാ പദ്ധതിയില്‍ പരിശോധിക്കപ്പെട്ട മണ്ണിന്റെ ഫലവും വിതരണം ചെയ്യും. ഫോണ്‍ -9383472310.