കോവിഡ് 19 പ്രതിരോധ പ്രവർത്തനത്തിലും ബോധവൽക്കരണത്തിലും സുപ്രധാന പങ്ക് വഹിച്ച് ഒല്ലൂരിലെ പോലീസ് സേന. ബോധവൽക്കരണം ദിനം പ്രതി ഓരോ വീടുകളിലും നേരിട്ട് ചെന്നാണ് ഇവർ നടത്തുന്നത്. ഒല്ലൂർ പോലീസ് സ്റ്റേഷൻ പരിധിയിൽ 234 പേരാണ് വീടുകളിൽ നിരീക്ഷണത്തിൽ കഴിയുന്നത്. ഒല്ലൂരിൽ 147, നടത്തറ 29, വെട്ടുകാട് 46, ഒല്ലൂക്കര 12, എന്നിങ്ങനെയാണ് ഇതുവരെയുള്ള കണക്ക്. ഈ പ്രദേശത്തുനിന്നും മൂന്നു പേർ മെഡിക്കൽ കോളേജ് ആശുപത്രിയിൽ ഐസൊലേഷനിലാണ്. ആരോഗ്യവകുപ്പ് ഉദ്യോഗസ്ഥരും ജനമൈത്രി പോലീസും സംയുക്തമായാണ് ഈ പരിധിയിൽ ആവശ്യമായ ബോധവൽക്കരണം നടത്തി വരുന്നത്.

കോവിഡ് 19 രോഗവ്യാപനം തടയുന്നതിനായി സ്വീകരിക്കേണ്ട മുൻകരുതലുകൾ വിശദമാക്കി ജില്ലാഭരണകൂടം ഉത്തരവ് പുറപ്പെടുവിച്ചു. ആളുകൾ കൂട്ടമായി സംഘടിച്ച് രോഗം പടരുന്ന സാഹചര്യം ഒഴിവാക്കണം. കലാ കായിക മത്സരങ്ങൾ, പരിപാടികൾ, പരിശീലനങ്ങൾ, വാണിജ്യ വിപണന മേളകൾ, കാലിച്ചന്തകൾ എന്നിവ നടത്തുന്നതും സംഘടിപ്പിക്കുന്നതും ഒഴിവാക്കണം. കൂടുതൽ ആളുകൾ വരുന്ന ജിംനേഷ്യങ്ങൾ, പാർക്കുകൾ എന്നിവയുടെ പ്രവർത്തനം നിരോധിച്ചു.

കൊറോണ വൈറസിന്റെ  സാമൂഹ്യ വ്യാപനം തടയുന്നതിന്റെ ഭാഗമായി  ആരോഗ്യ വകുപ്പിന്റെ നേതൃത്വത്തില്‍ വന്‍തോതില്‍  സാനിറ്റൈസര്‍ നിര്‍മാണം ആരംഭിച്ചു. പൊതുസമൂഹവുമായി കൂടുതല്‍ ഇടപെടുന്ന വിവിധ മേഖലകളില്‍ പ്രവര്‍ത്തിക്കുന്നവരെ മുന്നില്‍കണ്ടാണ് ഇത്തരമൊരു നടപടി.
ജില്ലാ മെഡിക്കല്‍ ഓഫീസര്‍ ഡോ വി വി ഷേര്‍ളി ജില്ലാ ഇന്‍ഫര്‍മേഷന്‍ ഓഫീസര്‍ സി അജോയ്ക്ക് സാനിറ്റൈസറിന്റെ ആദ്യ ബോട്ടില്‍ നല്‍കി പരിപാടിക്ക് തുടക്കം കുറിച്ചു.