ജില്ലയില്‍ കോവിഡ് 19 വൈറസ് നിയന്ത്രണത്തിന്റെ ഭാഗമായി കൂടുതല്‍ മെഡിക്കല്‍ സംഘങ്ങള്‍ എത്തിയിട്ടുണ്ടെന്ന് ജില്ലാ മെഡിക്കല്‍ ഓഫീസര്‍ (ആരോഗ്യം)ഡോ.എ.എല്‍ ഷീജ പറഞ്ഞു. തിരുവനന്തപുരം മെഡിക്കല്‍ കോളജ്, പാരിപ്പള്ളി മെഡിക്കല്‍ കോളജ്, കോട്ടയം മെഡിക്കല്‍ കോളജ്, കൊല്ലം ട്രാവന്‍കോര്‍ മെഡിക്കല്‍ കോളജ്, കൊല്ലം മെഡിസിറ്റി, തിരുവല്ല പുഷ്പഗിരി മെഡിക്കല്‍ കോളജ്, തിരുവല്ല ബിലീവേഴ്സ് മെഡിക്കല്‍ കോളജ്, മൗണ്ട് സിയോണ്‍ ആശുപത്രി എന്നിവിടങ്ങളില്‍ നിന്നും കമ്മ്യൂണിറ്റി മെഡിസിന്‍ പ്രൊഫസര്‍മാര്‍, പി.ജി മെഡിക്കല്‍ വിദ്യാര്‍ഥികള്‍ എന്നിവരാണ് എത്തിയിട്ടുള്ളതെന്ന് ഡി.എം.ഒ പറഞ്ഞു.

പത്തനംതിട്ട ജില്ലയില്‍ വീടുകളില്‍ നിരീക്ഷണത്തിലുള്ള 900 പേര്‍ ആരോഗ്യ വകുപ്പ് നല്‍കുന്ന നിര്‍ദേശങ്ങള്‍ കര്‍ശനമായി പാലിക്കണമെന്ന് ഡി.എം.ഒ. (ആരോഗ്യം) ഡോ.എ.എല്‍ ഷീജ പറഞ്ഞു. നിര്‍ദേശങ്ങള്‍ അവഗണിച്ചാല്‍ വൈറസ് മറ്റുള്ളവരിലേക്കു പടരാനുള്ള സാഹചര്യമുണ്ട്.  ഐസലേഷനിലുള്ളവര്‍ക്ക് മെഡിക്കല്‍ സഹായം ആരോഗ്യ വിഭാഗവും മറ്റു സഹായങ്ങള്‍ പഞ്ചായത്തുകളും നല്‍കും. 

28 ദിവസം വീടുകളില്‍ ആളുകള്‍ കഴിയുന്നത് അവര്‍ക്ക് വേണ്ടിയും സമൂഹത്തിനു വേണ്ടിയാണ്. ഭീതിയുടെ ആവശ്യമില്ല. വൈറസ് പടരാതിരിക്കാനുള്ള മുന്‍കരുതലെന്ന് നിലയിലാണ് ഈ നിയന്ത്രണങ്ങളെന്നും എല്ലാവരും സഹകരിക്കണമെന്നും ഡി.എം.ഒ അഭ്യര്‍ഥിച്ചു.

എയര്‍പോര്‍ട്ടിലെ പരിശോധനയില്‍ കൊറോണ രോഗലക്ഷണങ്ങള്‍ കണ്ടെത്തിയവര്‍ പൊതുഗതാഗത സംവിധാനം ഉപയാഗിക്കരുതെന്ന് ജില്ലാ കലക്ടര്‍ സാംബശിവറാവു അറിയിച്ചു.  കൊറോണ രോഗവ്യാപനം തടയുന്നതിന് സ്വീകരിക്കേണ്ട മുന്‍കരുതല്‍ നടപടികളും പ്രവര്‍ത്തന രീതിയും സംബന്ധിച്ച് കലക്ടറേറ്റില്‍  വിളിച്ചുചേര്‍ത്ത വിവിധ വകുപ്പ് ഉദ്യോഗസ്ഥരുടെ യോഗത്തില്‍ സംസാരിക്കുകയായിരുന്നു അദ്ദേഹം.  കൊറോണബാധിത പ്രദേശങ്ങളില്‍നിന്ന് കേരളത്തിലേക്കെത്തുന്നവര്‍ക്ക് ആവശ്യമായ പ്രാഥമിക പരിശോധന സംവിധാനങ്ങള്‍ എയര്‍പോര്‍ട്ടുകളില്‍ കാര്യക്ഷമമാണെന്നും അദ്ദേഹം പറഞ്ഞു.   

കോവിഡ് 19 വൈറസ് നിയന്ത്രണവിധേയമാക്കുന്നതിന്റെ ഭാഗമായി വീടുകളില്‍ നിരീക്ഷണത്തില്‍ കഴിയുന്നവര്‍ക്ക്, ആവശ്യമെങ്കില്‍ സപ്ലൈകോ വഴി ഭക്ഷണസാധനങ്ങള്‍ എത്തിക്കുമെന്ന് ജില്ലാ കളക്ടര്‍ പി.ബി നൂഹ് പറഞ്ഞു. വാട്ടര്‍ അതോറിട്ടി വഴി കുടിവെള്ളവും എത്തിക്കും. നിലവില്‍ ജില്ലയില്‍ 25 പഞ്ചായത്തുകളിലാണ് 900ത്തോളം പേര്‍ വീടുകളില്‍ നിരീക്ഷണത്തില്‍ കഴിയുന്നത്. കോറോണ രോഗം സ്ഥിരീകരിച്ചവരുമായി നേരിട്ടും അല്ലാതെയും ഇടപഴകിയവരാണിവര്‍. നേരിട്ട് ഇടപഴകിയവര്‍ 28 ദിവസവും അല്ലാത്തവര്‍ 14 ദിവസവുമാണ് വീടുകളില്‍ മറ്റുള്ളവരുമായി സമ്പര്‍ക്കമില്ലാതെ കഴിയേണ്ടത്. 

വള്ളിക്കോട് പ്രാഥമികാരോഗ്യ കേന്ദ്രത്തില്‍ ദിവസവേതനാടിസ്ഥാനത്തില്‍ താത്ക്കാലികമായി ഫാര്‍മസിസ്റ്റിനെ നിയമിക്കുന്നു. ഫാര്‍മസി കൗണ്‍സിലിന്റെ അംഗീകാരമുള്ള ഡി.ഫാം അല്ലെങ്കില്‍ ബി.ഫാം യോഗ്യത ഉണ്ടായിരിക്കണം. സര്‍ക്കാര്‍ ആശുപത്രിയില്‍ നിന്നും ഫാര്‍മസിസ്റ്റായി വിരമിച്ചവര്‍ക്ക് മുന്‍ഗണന ലഭിക്കും. താത്പര്യമുള്ളവര്‍ ഈ മാസം 16ന് രാവില 10.30ന് ഗ്രാമപഞ്ചായത്ത് ഓഫീസില്‍ വാക്ക്-ഇന്‍- ഇന്റര്‍വ്യൂവിന് ഹാജരാകണം. ഫോണ്‍: 0468 2356338. 

കൊറോണ രോഗബാധിതരുമായി സമ്പര്‍ക്കത്തില്‍ വന്ന നൂറുകണക്കിന് ആളുകള്‍ ജില്ലയില്‍ വീടുകളില്‍ ഐസൊലേഷനില്‍ കഴിയുന്നുണ്ട്. സ്വന്തം വീട്ടിലാണെങ്കിലും ഉറ്റവരുടെ സാമീപ്യമില്ലാതെയും പുറംലോകം കാണാതെയും 28 ദിവസങ്ങള്‍. അവര്‍ ഈ ഏകാന്തത അനുഭവിക്കുന്നത് അവരുടെ വീട്ടുകാര്‍ക്ക് വേണ്ടി മാത്രമല്ല. മുഴുവന്‍ സമൂഹത്തിനും വേണ്ടിയാണ്. അതിനാല്‍ അവ ര്‍ക്ക് എല്ലാ പിന്തുണയും നല്‍കാന്‍ നമുക്ക് ബാധ്യതയുണ്ടെന്ന് ജില്ലാ മെഡിക്കല്‍ ഓഫീസര്‍ ഡോ.എ.എല്‍.ഷീജ പറഞ്ഞു. 

ആറന്മുള സത്രത്തില്‍ നാളെ (13) നടത്താനിരുന്ന അളവുതൂക്ക ഉപകരണങ്ങളുടെ പരിശോധന 27ലേക്ക് മാറ്റിയതായി ലീഗല്‍ മെട്രോളജി അധികൃതര്‍ അറിയിച്ചു. ഫോണ്‍: 0468 2322853.          

കോന്നി മെഡിക്കല്‍ കോളജിനടുത്ത് നിര്‍മാണം നടന്നുകൊണ്ടിരിക്കുന്ന ജലശുദ്ധീകരണ ശാലയ്ക്ക് സമീപം 13ന് നടത്താനിരുന്ന കരിങ്കല്ലുകളുടെ ലേലം മാറ്റിവച്ചതായി ജല അതോറിറ്റി എക്‌സിക്യൂട്ടീവ് എന്‍ജിനീയര്‍ അറിയിച്ചു.                    

തിരുവനന്തപുരം സർക്കാർ ആയുർവേദ കോളേജിൽ ശല്യതന്ത്ര വകുപ്പിന്റെ നേതൃത്വത്തിൽ ക്യാൻസർ ഒ.പിയുമായി ബന്ധപ്പെട്ട് ഈ രംഗത്തെ പ്രഗത്ഭരായ ഡോക്ടർമാരെ ഉൾപ്പെടുത്തി ഏപ്രിൽ ആദ്യവാരം ശില്പശാല സംഘടിപ്പിക്കുന്നു. ഇതിന്റെ ഭാഗമായി ക്യാൻസർ രോഗികൾക്ക് സൗജന്യ ചികിത്സയും തുടർ ചികിത്സയും ലഭിക്കും. താത്പര്യമുള്ളവർ 16 മുതൽ 28 വരെയുള്ള ദിവസങ്ങളിൽ രാവിലെ എട്ടു മുതൽ ഒരു മണിവരെ ഒ.പി നമ്പർ മൂന്നിൽ എത്തിച്ചേരണം.
പി.എൻ.എക്സ്.1016/2020

കേരളത്തിൽ കൊവിഡ്-19 സ്ഥിരീകരിച്ച സാഹചര്യത്തിൽ, കേരള മെഡിക്കൽ സർവ്വീസസ് കോർപ്പറേഷന്റെ ആസ്ഥാനകാര്യാലയത്തിലെ വിവിധ വിഭാഗങ്ങളിലേയ്ക്ക് ഡാറ്റാ എൻട്രി ഓപ്പറേറ്റർമാരെ തിരഞ്ഞെടുക്കുന്നതിന് മാർച്ച് 17 ന് നടത്തുവാൻ നിശ്ചയിച്ചിരുന്ന ഇന്റർവ്യൂ 27ലേയ്ക്ക് മാറ്റിവെച്ചതായി അറിയിച്ചു. വേദിയ്ക്ക് മാറ്റമുണ്ടായിരിക്കില്ല.
പി.എൻ.എക്സ്.1015/2020