കേരളത്തിലെ വിമാനത്താവളങ്ങളിലും സീപോര്‍ട്ടുകളിലും നിരീക്ഷണം കൂടുതല്‍ ശക്തമാക്കിയതായി ആരോഗ്യ മന്ത്രി കെ. കെ. ശൈലജ ടീച്ചര്‍ പറഞ്ഞു. കോവിഡ് 19 അവലോകന യോഗത്തിന് ശേഷം മാധ്യമങ്ങളോടു സംസാരിക്കുകയായിരുന്നു മന്ത്രി. കോവിഡ് ബാധിത രാജ്യങ്ങളില്‍ നിന്ന് കൂടുതല്‍ പേര്‍ വിമാനത്താവളങ്ങളില്‍ എത്തുന്നുണ്ട്. എല്ലാവരെയും കൃത്യമായി പരിശോധിക്കുന്നുണ്ട്. പുതിയ പോസിറ്റീവ് കേസുകളൊന്നും റിപ്പോര്‍ട്ട് ചെയ്തിട്ടില്ലെന്ന് മന്ത്രി അറിയിച്ചു.

കോവിഡ് 19 (കൊറോണ) നിയന്ത്രണ  നടപടികളുടെ ഭാഗമായി ജില്ലാ ഭരണകൂടത്തിന്റെയും ജില്ലാ മെഡിക്കല്‍ ഓഫീസിന്റെയും നേതൃത്തില്‍ കലക്ട്രേറ്റ് കോണ്‍ഫറന്‍സ് ഹാളില്‍ സിവില്‍ സ്റ്റേഷനിലെ മുഴുവന്‍ വകുപ്പുകളിലെയും ജീവനക്കാര്‍ക്ക് ബോധവല്‍ക്കരണ ക്ലാസ് സംഘടിപ്പിച്ചു.   ഏതൊക്കെ രീതിയില്‍ പ്രതിരോധ പ്രവര്‍ത്തനങ്ങള്‍ നടത്തണം,  മാസ്‌കുകള്‍ ഉപയോഗിക്കേണ്ട വിധം ,പൊതു സമൂഹത്തിത്തില്‍ വ്യക്തികള്‍ ഇടപെടേണ്ടതെങ്ങനെ തുടങ്ങിയവ വിശദീകരിച്ചു.  ജില്ലാ മെഡിക്കല്‍ ഓഫീസര്‍ ഡോ.വി. ജയശ്രീ, 

 അഡീഷണല്‍ ഡി എം ഒ ഡോ .രാജേന്ദ്രന്‍, ആര്‍ സി എച്ച് ഓഫീസര്‍ ഡോ .ടി.എം. മോഹന്‍ദാസ് എന്നിവര്‍ ക്ലാസെടുത്തു. 

ജില്ലയില്‍ കൊവിഡ് 19 നിയന്ത്രണത്തിന്റെ ഭാഗമായി വീടുകളില്‍  നിരീക്ഷണത്തില്‍ കഴിയുന്ന 37 പേര്‍ക്ക് ഇന്ന് (മാര്‍ച്ച് 11) വീടുകളില്‍ ഭക്ഷണ സാധനങ്ങള്‍ എത്തിച്ചുകൊടുത്തു. സിവില്‍ സപ്ലൈസ് വഴിയാണ് ലഭ്യമാക്കിയത്. നിരീക്ഷണത്തിലുള്ളവരില്‍ അവശ്യവസ്തുക്കള്‍ ആവശ്യമുള്ളവരുടെ കണക്കെടുത്ത് ജില്ലാഭരണകൂടം, ആരോഗ്യവകുപ്പ്, കുടുംബശ്രീ, ഗ്രാമപഞ്ചായത്ത് ,വാട്ടര്‍ അതോരിട്ടി തുടങ്ങിയ സര്‍ക്കാര്‍ സംവിധാനങ്ങളുടെ സഹായത്തോടെയാണ്  തുടര്‍ന്നും  അവശ്യസാധനങ്ങള്‍ എത്തിക്കുക.

പത്തനംതിട്ട ജില്ലയില്‍ കോവിഡ് 19 നിയന്ത്രണത്തിന്റെ ഭാഗമായി വീടുകളില്‍ നിരീക്ഷണത്തില്‍ കഴിയുന്നവര്‍ 969 പേര്‍. 25 പേര്‍ ആശുപത്രികളില്‍ ഐസലേഷന്‍ വാര്‍ഡുകളില്‍ നിരീക്ഷണത്തിലുണ്ട്. ഇന്ന് (മാര്‍ച്ച് 11) ലഭിച്ച 10 പേരുടെ റിസല്‍ട്ടുകളും നെഗറ്റീവായതിനെ തുടര്‍ന്ന് 9 പേരെ വീടുകളിലേക്ക് മാറ്റി. ഇവര്‍ വീടുകളില്‍ നിരീക്ഷണത്തില്‍ കഴിയണമെന്നും ജില്ലാ കളക്ടര്‍ പി.ബി നൂഹ് പറഞ്ഞു. 

കോവിഡ് 19 വൈറസ് നിയന്ത്രണത്തിന്റെ ഭാഗമായി ജില്ലാഭരണകൂടം പുറത്തുവിട്ട ഫ്ളോ ചാര്‍ട്ട് കണ്ട് ഇന്നലെ(11) വിളിച്ചത് 70 പേര്‍. ഇതില്‍ 15 പേര്‍ പ്രൈമറി  കോണ്ടാക്ട് ലിസ്റ്റില്‍ ഉള്‍പ്പെട്ടവരാണ്. 15 പേരില്‍ 14 പേര്‍ നേരത്തെ തന്നെ നിരീക്ഷിക്കേണ്ടവരുടെ പട്ടികയില്‍ ഉള്‍പ്പെട്ടവരാണെന്ന് പരിശോധനയില്‍ കണ്ടെത്തി. ലിസ്റ്റില്‍ ഇല്ലാതിരുന്ന ഒരാളെ കണ്ടെത്തുകയും അയാള്‍ക്ക് 

രോഗലക്ഷണങ്ങള്‍ കണ്ടതിനെ തുടര്‍ന്ന് ആശുപത്രിയിലാക്കുകയും ചെയ്തു. ബാക്കിയുള്ളവര്‍ വീടുകളില്‍ കഴിയുകയാണെന്നും ജില്ലാ കളക്ടര്‍ പി.ബി. നൂഹ് അറിയിച്ചു.

സംസ്ഥാനത്തിന്റെ പല ഭാഗങ്ങളിലും കൊറോണ വൈറസ് ബാധ റിപ്പോര്‍ട്ട് ചെയ്തതിനെ തുടര്‍ന്ന്  കക്കോടി ഗ്രാമ പഞ്ചായത്തില്‍  മാര്‍ച്ച് 16, 17 തീയ്യതികളില്‍ നടത്താനിരുന്ന അങ്കണവാടി വര്‍ക്കര്‍മാരുടെ കൂടിക്കാഴ്ച മാറ്റിവച്ചതായി ശിശു വികസന പദ്ധതി ഓഫീസര്‍ അറിയിച്ചു.  പുതുക്കിയ തിയതി പിന്നീട് അറിയിക്കും.

കോഴിക്കോട് നെഹ്റു യുവകേന്ദ്ര ജില്ലാ ഉപദേശക സമിതി യോഗം  മാര്‍ച്ച് 17 ന് ഉച്ചയ്ക്ക് രണ്ട് മണിക്ക്് കോഴിക്കോട് ജില്ലാ കളക്ടറുടെ ചേംബറില്‍ നടത്തുമെന്ന് കോഓര്‍ഡിനേറ്റര്‍ അറിയിച്ചു.  

വിവിധ വകുപ്പുകളുടെ അധീനതയിലുള്ളതും പൊതുജനങ്ങള്‍ ഉപയോഗിക്കുന്നതുമായ തകര്‍ന്നുകിടക്കുന്ന റോഡുകള്‍ തദ്ദേശ സ്വയംഭരണ സ്ഥാപനങ്ങളുടെ ഫണ്ട് ഉപയോഗിച്ച് പുനരുദ്ധരിക്കാന്‍ അനുമതിയായതായി പി.ടി.എ റഹീം എം.എല്‍.എ അറിയിച്ചു.

ബന്ധപ്പെട്ട വകുപ്പുകളുടെ നിരാക്ഷേപ പത്രം വാങ്ങി ഇത്തരം റോഡുകളുടെ പ്രവൃത്തികള്‍ നടത്താന്‍ വികേന്ദ്രീകൃതാസൂത്രണ സംസ്ഥാനതല കോ-ഓര്‍ഡിനേഷന്‍ സമിതിയുടെ യോഗമാണ് തീരുമാനമെടുത്തത്.

പത്തനംതിട്ട ജില്ലയില്‍ ഇന്ന് ഒരു കേസും പോസീറ്റിവായി കണ്ടെത്തിയിട്ടില്ല.
പ്രോഗ്രാം ആഫീസര്‍മാരുടെയും മാനേജ്‌മെന്റ് ടീം ലീഡര്‍മാരുടെയും പ്ലാനിംഗ് മീറ്റിംഗ് ജില്ലാ കളക്ടര്‍ പി.ബി. നൂഹിന്റെ സാന്നിധ്യത്തില്‍ ജില്ലാ മെഡിക്കല്‍ ഓഫീസറുടെ ചേംമ്പറില്‍ കൂടി.
മെഡിക്കല്‍ ഓഫീസര്‍മാര്‍, ഫീല്‍ഡ് സ്റ്റാഫ് എന്നിവരടങ്ങിയ 12 സര്‍വൈലന്‍സ് ടീമുകള്‍  13 പ്രൈമറി കോണ്‍ടാക്ടുകള്‍, 34 സെക്കന്ററി കോണ്‍ടാക്ടുകള്‍ എന്നിവരെ കണ്ടെത്തി.
ജനറല്‍ ആശുപത്രി പത്തനംതിട്ടയില്‍ 14 പേരും, ജില്ലാ ആശുപത്രി കോഴഞ്ചേരിയില്‍ 10 പേരും, നിലവില്‍ ഐസൊലേഷനില്‍ ഉണ്ട്.