ചാവക്കാട് ബ്ലോക്ക് പഞ്ചായത്തിന്റെ 2020-21 വാർഷിക ബജറ്റ് അവതരിപ്പിച്ചു. സമ്പൂർണ്ണ പാർപ്പിടം, കൃഷി, സമഗ്ര വികസനം, ശുചിത്വം, മാലിന്യ സംസ്‌ക്കരണം എന്നീ പദ്ധതികൾക്കാണ് മുൻഗണന. ഭവന നിർമ്മാണത്തിന് ഊന്നൽ നൽകി സമ്പൂർണ്ണ പാർപ്പിട ബ്ലോക്ക് പഞ്ചായത്താക്കി ഉയർത്തുന്നതിന് ബജറ്റിൽ പ്രത്യേകം ശ്രദ്ധ നൽകിയിട്ടുണ്ട്.

കോവിഡ് വൈറസിനെ സംബന്ധിച്ച് ജനങ്ങൾക്കിടയിൽ ഭീതിയും ആശങ്കയും വേണ്ടെന്നും കൊടുങ്ങല്ലൂരിൽ സ്ഥിതി നിയന്ത്രണ വിധേയമാണെന്നും നഗരസഭാ ചെയർമാൻ കെ ആർ ജൈത്രൻ പറഞ്ഞു. കോവിഡ് വൈറസിന്റെ പശ്ചാത്തലത്തിൽ പ്രതിരോധ- ബോധവൽക്കരണ പ്രവർത്തനങ്ങൾ ശക്തിപ്പെടുത്തുവാൻ ചേർന്ന അടിയന്തിര കൗൺസിൽ യോഗത്തിലാണ് ചെയർമാന്റെ പ്രസ്താവന.
താലൂക്കാശുപത്രിയിൽ ഏഴ് പേർ നിരീക്ഷണത്തിലാണെങ്കിലും ആർക്കും രോഗം സ്ഥിരീകരിച്ചിട്ടില്ല. വ്യാജ പ്രചരണങ്ങളും തെറ്റായ വാർത്തകളും നൽകുന്നവർക്കെതിരെ കർശന നടപടി സ്വീകരിക്കും.

എസ്എസ്എൽസി പരീക്ഷ എഴുതുകയായിരുന്ന വിദ്യാർത്ഥിയെ തെരുവ് നായ കടിച്ച പശ്ചാത്തലത്തിൽ ചെറുതുരുത്തി പ്രദേശത്ത് തെരുവ് നായകളുടെ ശല്യം ഇല്ലാതാക്കാൻ ആവശ്യമായ ഉത്തരവ് ബന്ധപ്പെട്ട തദ്ദേശസ്വയം ഭരണ സ്ഥാപനത്തിന് നൽകണമെന്ന് മനുഷ്യാവകാശ കമ്മീഷൻ.
തൃശൂർ ജില്ലാ കളക്ടർക്കാണ് കമ്മീഷൻ ജുഡീഷ്യൽ അംഗം പി മോഹനദാസ് നിർദ്ദേശം നൽകിയത്. നടപടി സ്വീകരിച്ച ശേഷം കളക്ടർ റിപ്പോർട്ട് സമർപ്പിക്കണം.

പുഴയ്ക്കൽ ബ്ലോക്ക് പഞ്ചായത്തിൽ വികസന പദ്ധതിയിൽ ഉൾപ്പെടുത്തി വയോജനങ്ങൾക്ക് കട്ടിൽ വിതരണം ചെയ്തു. അടാട്ട്, അവണൂർ ഗ്രാമപഞ്ചായത്തിലെ ഗുണഭോക്താക്കൾക്കാണ് കട്ടിൽ വിതരണം ചെയ്തത്. ബ്ലോക്ക് പഞ്ചായത്ത് പ്രസിഡന്റ് സി വി കുരിയാക്കോസ് ഉദ്ഘാടനം ചെയ്തു. വൈസ് പ്രസിഡന്റ് ഷീബാ ഗിരീഷ് അധ്യക്ഷത വഹിച്ചു. അടാട്ട് ഗ്രാമ പഞ്ചായത്ത് പ്രസിഡന്റ് ടി ആർ ജയചന്ദ്രൻ, ബ്ലോക്ക് പഞ്ചായത്ത് സ്ഥിരംസമിതി അധ്യക്ഷൻ എം ടി സന്തോഷ്, സെക്രട്ടറി വി എം ഷൈല, പട്ടികജാതി വികസന ഓഫീസർ സിനി, ഹെൽത്ത് ഇൻസ്പെക്ടർ പി ജെ തോമസ്, വനിതാ ക്ഷേമ ഓഫീസർ പി ബി ശശീധരൻ തുടങ്ങിയവർ പങ്കെടുത്തു.
 

കുന്നംകുളം നഗരസഭയുടെ കെ ആർ നാരായണൻ സ്മാരക ഹാളിന്റെ ദിവസവാടക 10,000 രൂപയാക്കി കുറച്ചു. കഴിഞ്ഞ ദിവസം നടന്ന കൗൺസിൽ യോഗത്തിലാണ് തീരുമാനം. 17,000 രൂപയാണ് നിലവിലുണ്ടായിരുന്ന വാടക നിരക്ക്.
18 ശതമാനം നികുതിയും വൈദ്യുതി, ഹാൾ വൃത്തിയാക്കൽ എന്നിവയ്ക്ക് വേറെയും തുക നൽകണം. എന്നാൽ നഗരസഭാ പ്രദേശത്തുള്ളവരും അല്ലാത്തവരുമായ എസ് സി, എസ് ടി വിഭാഗക്കാർക്ക് വാടക നിരക്കിൽ 50 ശതമാനം ഇളവുണ്ട്.

തൃശൂർ നഗരസഭ പരിധിയിലെ പ്രധാനപ്പെട്ട സ്ഥലങ്ങളിൽ സി സി ടി വി ക്യാമറകൾ സ്ഥാപിക്കുന്ന പ്രവർത്തിയുടെ ഇ- ടെണ്ടറിൽ തെരഞ്ഞെടുക്കപ്പെട്ട പാലക്കാടുള്ള iti limited എന്ന സ്ഥാപനത്തിന്റെ ക്യാമറകളുടെ ഡെമോൺസ്‌ട്രേഷൻ വെളളിയാഴ്ച (മാർച്ച് 13) വൈകീട്ട് 3 മണിക്ക് കോർപ്പറേഷൻ കൗൺസിൽ ഹാളിൽ നടത്തുമെന്ന് കോർപ്പറേഷൻ മേയർ അജിത ജയരാജൻ അറിയിച്ചു.
 

തിരുവില്വാമല ഗ്രാമപഞ്ചായത്ത് വികസന സെമിനാർ നടത്തി. പഞ്ചായത്ത് പ്രസിഡന്റ് എം ആർ മണിയുടെ അധ്യക്ഷതയിൽ പി നാരായണൻ ഉണ്ണി (ചെയർമാൻ, നവര ഫൌണ്ടേഷൻ) ഉദ്ഘാടനം ചെയ്തു. കരട് പദ്ധതി രേഖ 2020-21, ദുരന്ത നിവാരണ പദ്ധതി രേഖ എന്നിവ പ്രകാശനം ചെയ്തു. 7,45,52,000 രൂപ വകയിരുത്തിയ ബഡ്ജറ്റിൽ ഉൽപാദന മേഖലയ്ക്ക് 57,85,000 സേവന മേഖലയ്ക്ക് 2,36,50,000 പശ്ചാത്തല മേഖലയ്ക്ക് 1,44,78,000 രൂപയും വകയിരുത്തിയിട്ടുണ്ട്. പഞ്ചായത്ത് ജനപ്രതിനിധികൾ, ഉദ്യോഗസ്ഥർ എന്നിവർ വികസന സെമിനാറിൽ പങ്കെടുത്തു.
 

കോവിഡ് 19 ന്റെ സാഹചര്യത്തിൽ കൊടകര ബ്ലോക്ക് പരിധിയിൽ നടത്താനിരുന്ന തീർത്ഥാടനങ്ങൾക്കും ആഘോഷ പരിപാടികൾക്കും മാറ്റം. ഇരിഞ്ഞാലക്കുട രൂപതാധ്യക്ഷൻ മാർ പോളി കണ്ണൂക്കാടന്റെ നിർദ്ദേശപ്രകാരം മാർച്ച് 11 ബുധനാഴ്ച മുതൽ മാർച്ച് 31-ാം തിയ്യതി വരെ നിശ്ചയിച്ചിരുന്ന കനകമല നോമ്പുകാല തീർത്ഥാടനം നിർത്തിവെച്ചു.