കേരള വനിതാ കമ്മീഷന്‍ മാര്‍ച്ച് മാസത്തില്‍ വിവിധ ജില്ലകളില്‍ നടത്താനിരുന്ന അദാലത്തുകള്‍ മാറ്റിവച്ചു. പത്തനംതിട്ട, ഇടുക്കി, തൃശൂര്‍, പാലക്കാട്, മലപ്പുറം, കോട്ടയം, കണ്ണൂര്‍, എറണാകുളം, തിരുവനന്തപുരം ജില്ലകളില്‍ വിവിധ തീയതികളില്‍ നടത്താനിരുന്ന അദാലത്തുകളാണ് മാറ്റിവച്ചത്. പുതിയ തീയതി പിന്നീട് അറിയിക്കും. 

മെഡിക്കല്‍ ഓഫീസര്‍മാരുടെ ഭാഗത്തുനിന്നു പിഴവില്ലാത്ത പ്രവര്‍ത്തനങ്ങള്‍ ഉണ്ടാകണമെന്ന് ജില്ലാ കളക്ടര്‍ പി.ബി നൂഹ് പറഞ്ഞു. പത്തനംതിട്ട കെ.ജി.എം.ഒ.എ ഓഫീസില്‍ മെഡിക്കല്‍ ഓഫീസര്‍മാര്‍ക്കായുള്ള ഓറിയന്റേഷന്‍ ക്ലാസില്‍ അധ്യക്ഷത വഹിച്ച് സംസാരിക്കുകയായിരുന്നു കളക്ടര്‍. 

733 പേരാണ് ജില്ലയുടെ വിവിധ ഭാഗങ്ങളിലായി ഹോം ഐസലേഷനില്‍ കഴിയുന്നത്. പി എച്ച് എസികളിലെ ഡോക്ടര്‍മാരും ഹോം ഐസലേഷന്‍ പരിശോധന നടത്തണം. ജില്ലയിലെ എല്ലാ പ്രാഥമികാരോഗ്യ കേന്ദ്രങ്ങളും സജ്ജരായിരിക്കണം. ഹോം ഐസലേഷനിലെ ആള്‍ക്കാര്‍ എല്ലാവരും വീട്ടില്‍ തന്നെയുണ്ടെന്ന് ഡോക്ടര്‍മാര്‍ ഉറപ്പുവരുത്തണമെന്നും കളക്ടര്‍ പറഞ്ഞു.

ജില്ലയില്‍ കോവിഡ് 19 സ്ഥിരീകരിച്ച സാഹചര്യത്തില്‍ കൂടുതല്‍ ഐസലേഷന്‍ വാര്‍ഡുകള്‍ ക്രമീകരിക്കുന്നതിന് ജില്ലാ കളക്ടര്‍ പിബി.നൂഹ്, തിരുവല്ല സബ് കളക്ടര്‍ ഡോ.വിനയ് ഗോയല്‍, എന്‍എച്ചഎം ഡി.പി.എം ഡോ.എബി സുഷന്‍ എന്നിവരുടെ നേതൃത്വത്തില്‍ ആശുപത്രികള്‍ സന്ദര്‍ശിച്ചു. നിര്‍മ്മാണത്തിലിരിക്കുന്ന കോന്നി മെഡിക്കല്‍ കോളേജിലാണ്  കളക്ടറുടെ നേതൃത്വത്തില്‍ സന്ദര്‍ശനം നടത്തിയത്. അടിയന്തര സാഹചര്യം ഉണ്ടായാല്‍ നേരിടാന്‍വേണ്ട മുന്‍ ഒരുക്കത്തോടെയാണ് ഇത്തരത്തില്‍ സന്ദര്‍ശനം നടത്തിയത്. എത്ര വാര്‍ഡുകള്‍ ക്രമീകരിക്കാന്‍ സാധിക്കും, വെളളത്തിന്റെ ലഭ്യത തുടങ്ങിയ കാര്യങ്ങള്‍ സന്ദര്‍ശനത്തില്‍ വിലയിരുത്തി.

മലയാലപ്പുഴ കാഞ്ഞിരപ്പാറ കേന്ദ്രമാക്കി കാലങ്ങളായി നടന്നുവരുന്ന പണം വച്ചുള്ള ചീട്ടുകളി സംഘത്തെ ജില്ലാ പോലീസ് മേധാവിയുടെ പ്രത്യേക പോലീസ് വിദഗ്ധമായി കീഴടക്കി. ജില്ലയിലെ വിവിധ പ്രദേശങ്ങളിലേയും  സമീപ ജില്ലകളില്‍ നിന്നുള്ള ആളുകളെയും സംഘടിപ്പിച്ചു ചീട്ടുകളി  നടത്തിവന്ന മലയാലപ്പുഴ കാഞ്ഞിരപ്പാറ തുറംന്തയില്‍ വീട്ടില്‍ നാരദന്‍ എന്ന് വിളിക്കുന്ന രാജേഷിന്റെ (44) നേതൃത്വത്തിലുള്ള സംഘത്തെയാണ് പിടികൂടിയത്. സ്ഥലത്തുനിന്നും 25 പേരെ അറസ്റ്റ് ചെയ്യുകയും 7,51,465 രൂപ പിടിച്ചെടുക്കുകയും ചെയ്തു.

ജില്ലയില്‍ കൊറോണ സ്ഥിരീകരിച്ച സാഹചര്യത്തില്‍ രാജീവ് യൂത്ത് ഫൗണ്ടേഷന്റെ ആഭിമൂഖ്യത്തില്‍ ട്രിപ്പിള്‍ ലെയര്‍ മാസ്‌ക്കുകള്‍ ജില്ലാ കളക്ടര്‍ പി.ബി നൂഹിന് കൈമാറി. രാജീവ് യൂത്ത് ഫൗണ്ടേഷന്‍ ജില്ലാ വൈസ് ചെയര്‍മാന്‍ മനോഷ് ഇലന്തൂരാണ് 500 മാസ്‌ക്കുകള്‍ നല്‍കിയത്. തിരുവല്ല സബ് കളക്ടര്‍ ഡോ.വിനയ് ഗോയലിന്റെ സാന്നിധ്യത്തിലാണ് മാസ്‌ക്കുകള്‍ കൈമാറിയത്. 

ജില്ലയില്‍ കൊറോണ വൈറസ്ബാധ സ്ഥിരീകരിച്ച സാഹചര്യത്തില്‍ ജില്ലയിലെ എല്ലാ ഫിറ്റ്‌നെസ് സെന്ററുകളുടെയും ജിംനേഷ്യങ്ങളുടെയും പ്രവര്‍ത്തനം ഒരാഴ്ചത്തേക്ക് നിര്‍ത്തിവയ്ക്കണമെന്ന് ജില്ലാ കളക്ടര്‍ പി.ബി നൂഹ് നിര്‍ദേശിച്ചു.

ജില്ലാ പഞ്ചായത്ത് പദ്ധതി പ്രകാരം ഓമല്ലൂര്‍ ഗവണ്‍മെന്റ് ഹൈസ്‌കൂള്‍, കൈപ്പട്ടൂര്‍ ഗവണ്‍മെന്റ് ഹൈസ്‌കൂള്‍ എന്നിവിടങ്ങളിലേക്ക് മൈക്ക്‌സെറ്റ് വിതരണം ചെയ്യുന്നതിന് ക്വട്ടേഷന്‍ ക്ഷണിച്ചു. ക്വട്ടേഷന്‍ സ്വീകരിക്കുന്ന അവസാന തീയതി മാര്‍ച്ച് 16. കൂടുതല്‍ വിവരം തിരുവല്ല വിദ്യാഭ്യാസ ഉപഡയറക്ടറുടെ കാര്യാലയത്തില്‍ ലഭിക്കും. ഫോണ്‍: 0469 2600181. 

ജലഅതോറിറ്റി തിരുവല്ലയില്‍ ഈ മാസം 17ന് നടത്താനിരുന്ന ജില്ലാതല റവന്യു അദാലത്ത് മാറ്റിവച്ചതായി ജലഅതോറിറ്റി ഡിവിഷന്‍ എക്‌സിക്യൂട്ടീവ് എന്‍ജിനീയര്‍ അറിയിച്ചു.

ജില്ലയില്‍ സര്‍ജിക്കല്‍ മാസ്‌കുകളുടെ ദൗര്‍ലഭ്യം പരിഹരിക്കുന്നതിന് ജില്ലയിലെ നീതി മെഡിക്കല്‍ സ്റ്റോറുകള്‍ വഴി മാസ്‌കുകള്‍ വിതരണം ചെയ്യുന്നതിന് കണ്‍സ്യൂമര്‍ ഫെഡുമായി ബന്ധപ്പെട്ട് നടപടികള്‍ സ്വീകരിച്ചതായി ഡ്രസ്‌സ് ഇന്‍സ്‌പെക്ടര്‍ ആര്‍.രാജീവ് അറിയിച്ചു. സ്റ്റോക്കിന്റെ അപര്യാപ്തത മൂലം ആവശ്യമുള്ളവര്‍ മാത്രമേ മാസ്‌കുകള്‍ വാങ്ങി ഉപയോഗിക്കാവൂ. മെഡിക്കല്‍ സ്റ്റോറുകള്‍ വഴി വാങ്ങുന്ന എല്ലാ മരുന്നുകളും ഡോക്ടറുടെ കുറിപ്പടിയോടു കൂടി വാങ്ങണം. എല്ലാ മരുന്നുകള്‍ക്കും മറ്റ് സാധനങ്ങള്‍ക്കും നിര്‍ബന്ധമായും ബില്ലുകള്‍ വാങ്ങണം.          

കേരളത്തിലെ സ്റ്റേജ് കാര്യേജുകളിലെ വിദ്യാർഥികളുടെ യാത്രാനിരക്ക് ഭേദഗതി ചെയ്യുന്നത് സംബന്ധിച്ച് കേരള ഫെയർ റിവിഷൻ കമ്മിറ്റി 17ന് തൈക്കാട് ഗസ്റ്റ് ഹൗസിൽ നടത്താനിരുന്ന യോഗം മാറ്റിവച്ചു.
പി.എൻ.എക്സ്.1011/2020