സീതത്തോട് പഞ്ചായത്തിലെ ഗുരുനാഥന്‍മണ്ണ് ചിപ്പന്‍കുഴി കോളനിയിലും, മൂഴിയാര്‍ സായിപ്പിന്‍കുഴി കോളനിയിലും താമസക്കാരായ കുട്ടികള്‍ക്ക് തിങ്കളാഴ്ച മുതല്‍ ഓണ്‍ ലൈന്‍ ക്ലാസുകള്‍ മുടങ്ങില്ല. കോളനികള്‍ സന്ദര്‍ശിച്ച കെ.യു. ജനീഷ് കുമാര്‍ എംഎല്‍എ വീടുകളില്‍  വൈദ്യുതിയും, സ്ട്രീറ്റ് ലൈറ്റും ഉടന്‍ നല്‍കാന്‍  നിര്‍ദേശം നല്‍കി. തിങ്കളാഴ്ച എല്ലാ കുട്ടികള്‍ക്കും ഡിടിഎച്ച് കണക്ഷനോടുകൂടി ടെലിവിഷന്‍ നല്‍കുമെന്നും എംഎല്‍എ പറഞ്ഞു. പട്ടികവര്‍ഗ വിഭാഗത്തില്‍ പെട്ടവര്‍ താമസിക്കുന്ന കോളനികള്‍ സീതത്തോട് പഞ്ചായത്തിലെ രണ്ട്, ഒന്‍പത് വാര്‍ഡുകളിലാണ് സ്ഥിതി ചെയ്യുന്നത്.

ഓണ്‍ലൈന്‍ പരാതിപരിഹാര അദാലത്ത് ജനങ്ങള്‍ക്ക് ഏറെ സൗകര്യപ്രദമെന്ന് ജില്ലാ കളകടര്‍ പി.ബി.നൂഹ് പറഞ്ഞു. ജനങ്ങള്‍ക്ക് കുറച്ചു ദൂരം സഞ്ചരിച്ചാല്‍ അദാലത്തില്‍ പങ്കെടുക്കുന്നതിന് വീടിന് അടുത്തുള്ള അക്ഷയകേന്ദ്രത്തില്‍ എത്താം. ഉദ്യോഗസ്ഥര്‍ക്ക് അവരവരുടെ ഓഫീസുകളില്‍ ഇരുന്ന് അദാലത്തില്‍ പങ്കെടുക്കാം. ഇതിനു ശേഷം ഉദ്യോഗസ്ഥര്‍ക്ക് സമയം നഷ്ടപ്പെടുത്താതെ ഓഫീസിലെ ജോലി ചെയ്യുകയും ചെയ്യാമെന്നും കളക്ടര്‍ പറഞ്ഞു.

കോവിഡ് വ്യാപനം വര്‍ധിക്കുന്ന സാഹചര്യത്തില്‍ ജില്ലയില്‍ നിയന്ത്രണങ്ങള്‍ ലംഘിക്കുന്നവര്‍ക്കെതിരെ കര്‍ശനനടപടി തുടരുമെന്ന് ജില്ലാപോലീസ് മേധാവി കെ.ജി.  സൈമണ്‍ പറഞ്ഞു. വിദേശരാജ്യങ്ങളില്‍ നിന്നും ഇതരസംസ്ഥാനങ്ങളില്‍ നിന്നും ആളുകള്‍ തിരിച്ചുവരുന്ന പശ്ചാത്തലത്തില്‍ രോഗവ്യാപനം വര്‍ധിക്കുന്നതായാണ് മനസിലാവുന്നത്. ഇത് തടയുന്നതിന് കനത്ത ജാഗ്രത ആവശ്യമാണ്. കാലവര്‍ഷത്തോട് അനുബന്ധിച്ച്  പകര്‍ച്ചവ്യാധികള്‍ക്ക് സാധ്യതയുള്ളതിനാല്‍ പ്രതിരോധനടപടികളില്‍ വീഴ്ച പാടില്ലെന്നും, ആളുകള്‍ നിലവിലെ നിയന്ത്രണങ്ങള്‍ പൂര്‍ണമായും പാലിക്കണമെന്നും ജില്ലാ പോലീസ് മേധാവി പറഞ്ഞു.

ജില്ലയില്‍ നിന്ന് പശ്ചിമ ബംഗാളിലേക്ക് പുറപ്പെട്ട സ്‌പെഷല്‍ ട്രെയിനില്‍ 1450 അതിഥി തൊഴിലാളികള്‍ കൂടി സ്വദേശത്തേക്ക് മടങ്ങി.  തിരുവല്ല റെയില്‍വേ സ്റ്റേഷനില്‍ നിന്നും ജൂണ്‍ ആറിന് വൈകുന്നേരം മൂന്നിന് പുറപ്പെട്ട ട്രെയിനിലാണ് ഇവര്‍ നാട്ടിലേക്ക് മടങ്ങിയത്.

വടശേരിക്കര ഗ്രാമപഞ്ചായത്തിലെ ലൈഫ് ഗുണഭോക്തൃ പട്ടികയില്‍ പട്ടികജാതി/വര്‍ഗ, മത്സ്യ തൊഴിലാളി വിഭാഗത്തില്‍പ്പെട്ട പുതിയ ഗുണഭോക്താക്കളെ ഉള്‍പ്പെടുത്തുന്നതിനുള്ള അപേക്ഷ ക്ഷണിച്ചു.
ഒരു റേഷന്‍ കാര്‍ഡില്‍ ഒന്നില്‍ അധികം കുടുംബം ഉള്‍പ്പെട്ടിട്ടുണ്ടെങ്കില്‍ ഈ കുടുംബങ്ങളില്‍ സ്വന്തമായി ഭൂമിയും വീടുമില്ലാത്ത കുടുംബത്തിന് ലൈഫ് പദ്ധതിയില്‍ ഉള്‍പ്പെടുത്തുന്നതിന് റേഷന്‍ കാര്‍ഡിന്റെ പകര്‍പ്പ്, ജാതി തെളിയിക്കുന്ന സര്‍ട്ടിഫിക്കറ്റ്, ആധാര്‍ കാര്‍ഡിന്റെ പകര്‍പ്പ് എന്നിവ ഉള്ളടക്കം ചെയ്ത് പഞ്ചായത്ത് സെക്രട്ടറിക്ക് ജൂണ്‍ എട്ടു മുതല്‍ 15 വരെ അപേക്ഷ സമര്‍പ്പിക്കാമെന്ന് സെക്രട്ടറി അറിയിച്ചു.
 

കേന്ദ്ര കാലാവസ്ഥാ വകുപ്പ് ജൂണ്‍ ആറിനും ഏഴിനും  പത്തനംതിട്ട ജില്ലയില്‍ മഞ്ഞ അലര്‍ട്ട് പ്രഖ്യാപിച്ചിട്ടുണ്ട്. ജില്ലയിലെ ഒറ്റപ്പെട്ട പ്രദേശങ്ങളില്‍  ഇടിമിന്നലോടു കൂടിയ ശക്തമായ മഴ (64.5 മില്ലി മീറ്റര്‍  മുതല്‍ 115.5 മില്ലി മീറ്റര്‍ വരെ )  പെയ്യാന്‍ സാധ്യതയുണ്ട്. ഈ സാഹചര്യത്തില്‍  ജനങ്ങള്‍ ജാഗ്രത പുലര്‍ത്തുകയും കാറ്റ്, ഇടി മിന്നല്‍ എന്നിവ മൂലമുള്ള നാശനഷ്ടങ്ങള്‍ ഒഴിവാക്കുന്നതിനായി സംസ്ഥാന ദുരന്ത നിവാരണ അതോറിറ്റി പുറത്തിറക്കിയിട്ടുള്ള  മാര്‍ഗനിര്‍ദേശങ്ങള്‍ കര്‍ശനമായി പാലിക്കണമെന്നും ജില്ലാ കളക്ടര്‍ പി.ബി. നൂഹ് അറിയിച്ചു.
ജില്ലാ തല, താലൂക്ക് തല കണ്‍ട്രോള്‍ റൂമുകളുടെ ഫോണ്‍ നമ്പര്‍:

ഇതര സംസ്ഥാനങ്ങളില്‍ നിന്നും കേരളത്തിലെത്തി തിരികെ പോകാന്‍ കഴിയാതിരുന്നവരില്‍ തിരിച്ചു പോകേണ്ടവര്‍ യാത്രാവിവരം അറിയിക്കണമെന്ന് ജില്ലാ കലക്ടര്‍ ബി അബ്ദുല്‍ നാസര്‍ അറിയിച്ചു. 1077 എന്ന ടോള്‍ ഫ്രീ നമ്പരിലോ deockollam@gmail.com  എന്ന ഇ-മെയിലിലോ പോകുന്നവരുടെ മൊബൈല്‍ നമ്പര്‍, പോകേണ്ട സ്ഥലത്തെ വിലാസം, ജില്ല, സംസ്ഥാനം, ഇവിടുത്തെ വിലാസം എന്നിവ ഉടന്‍ അറിയിക്കണം.
(പി.ആര്‍.കെ നമ്പര്‍ 1579/2020)

ഫിഷറീസ് വകുപ്പിന്റെ മത്സ്യ വിത്തുല്പ്പാദന കേന്ദ്രങ്ങളിലേയ്ക്ക് കരാര്‍ അടിസ്ഥാനത്തില്‍ നിയമിക്കുന്ന പ്രോജക്ട് അസിസ്റ്റന്റുമാര്‍ക്ക്  ബി എഫ് എസ് സി/എം എഫ് എസ് സി/അംഗീകൃത യൂണിവേഴ്‌സിറ്റിയില്‍ നിന്നും ഫിഷറീസിലോ അക്വാകള്‍ച്ചറിലോ നിശ്ചിത യോഗ്യത ഉണ്ടായിരിക്കണം. മറ്റ് ബിരുദധാരികള്‍ അര്‍ഹരല്ല. അഭിമുഖം ജൂണ്‍ 12 ന് രാവിലെ 10 ന് നടക്കും.  വിശദ  വിവരങ്ങള്‍ 0474-2792850 എന്ന നമ്പരില്‍ ലഭിക്കുമെന്ന് ഫിഷറീസ് ഡെപ്യൂട്ടി ഡയറക്ടര്‍ അറിയിച്ചു.
(പി.ആര്‍.കെ നമ്പര്‍ 1578/2020)