കല്‍പ്പറ്റ മണ്ഡലത്തിലെ കോവിഡ് രോഗ പ്രതിരോധം മഴക്കാല ദുരിതാശ്വാസ നടപടികള്‍,ഓണ്‍ലൈന്‍ വിദ്യാഭ്യാസം തുടങ്ങിയ വിഷയങ്ങള്‍ സംബന്ധിച്ച് സി.കെ ശശീന്ദ്രന്‍ എം.എല്‍.എയുടെ അധ്യക്ഷതയില്‍ ചേര്‍ന്ന യോഗം വിലയിരുത്തി.കോവിഡ് രോഗ പ്രതിരോധത്തിന്റെ കാര്യത്തില്‍ ജനങ്ങള്‍ ജാഗ്രത പുലര്‍ത്തണമെന്ന ജില്ലാ മെഡിക്കല്‍ ഓഫീസര്‍ യോഗത്തില്‍ അറിയിച്ചു. ഈ സാഹചര്യത്തില്‍ സാമൂഹിക വ്യാപനം തടയുന്നതിനായി മാസ്‌ക്,സാമൂഹിക അകലം,സാനിറ്റെയ്‌സര്‍ തുടങ്ങിയ പ്രതിരോധ മാര്‍ഗങ്ങള്‍ വ്യക്തികള്‍ സ്വീകരിക്കേണ്ടതാണ്. ക്വാറന്റെയിനില്‍ കഴിയുന്നവര്‍ ആരോഗ്യ വകുപ്പ് നല്‍കുന്ന നിര്‍ദേശങ്ങള്‍ കര്‍ശനമായി പാലിക്കണം.

തൊണ്ടര്‍നാട് പഞ്ചായത്തിലെ തേറ്റമല ഗവ. ഹൈസ്‌കൂളിന് ഗ്രൗണ്ട് നിര്‍മ്മിക്കുന്നതിന് ഒ.ആര്‍.കേളു എം.എല്‍.എ.യുടെ ആസ്തി വികസന ഫണ്ടില്‍ നിന്നും 25 ലക്ഷം രൂപ അനുവദിച്ചു.

മാനന്തവാടി താലൂക്കിന് കീഴിലെ എല്ലാ വില്ലേജുകളിലെയും പൊതുജനങ്ങളുടെ പരാതി പരിഹരിക്കുന്നതിനായി ജൂണ്‍ 16 ന് മുഖ്യമന്ത്രിയുടെ പരാതി പരിഹാര അദാലത്ത് നടത്തും. ജില്ലാ കളക്ടര്‍ ഓണ്‍ലൈന്‍ വഴി നടത്തുന്ന അദാലത്തില്‍ ചികിത്സാ ധനസഹായം, ഭൂമി സംബന്ധമായ വിഷയങ്ങള്‍, റേഷന്‍ കാര്‍ഡ് സംബന്ധിച്ച പരാതികള്‍ ഒഴിച്ചുള്ള പരാതികളാണ് പരിഗണിക്കുക.  അക്ഷയ കേന്ദ്രങ്ങളില്‍ ജൂണ്‍ 11 ന് വൈകീട്ട് 5 വരെ അദാലത്തിലേക്കുളള അപേക്ഷ നല്‍കാം.  ഓരോ പരാതിക്കും ഫീസായി 10 രൂപ അക്ഷയ കേന്ദ്രങ്ങള്‍ക്ക് ഈടാക്കാം.  

ജില്ലയില്‍ ലോക്ക്ഡൗണ്‍  പിന്‍വലിക്കല്‍ നടപടികളിലേക്ക് കടക്കുന്ന  സാഹചര്യത്തില്‍ ഹോട്ടലുകളും, റെസ്റ്റോറന്റുകളും ഉള്‍പ്പടെയുള്ള ഭക്ഷണ നിര്‍മ്മാണ, വിതരണ സ്ഥാപനങ്ങള്‍ക്ക് ഭക്ഷ്യ സുരക്ഷാ വകുപ്പ് അസി.കമ്മീഷണര്‍ കര്‍ശന നിര്‍ദേശങ്ങള്‍ നല്‍കി.

ഭക്ഷ്യസുരക്ഷാ അസിസ്റ്റന്റ് കമ്മീഷണറുടെ ഭക്ഷ്യ സുരക്ഷാ വകുപ്പിന്റെ നിര്‍ദേശങ്ങള്‍.

മീനങ്ങാടി ഗവ.പോളിടെക്‌നിക് കോളേജിലെ വിവിധ ഡിപ്പാര്‍ട്ട്‌മെന്റുകളിലെ ഒഴിവുകളിലേക്ക് ഗസ്റ്റ് അധ്യാപകരെ നിയമിക്കുന്നു. ഇതുമായി ബന്ധപ്പെട്ട വിശദ വിവരങ്ങള്‍ പോളിടെക്‌നിക് വെബ് സൈറ്റില്‍ www.gptcmdi.ac.in ലഭിക്കും.

മേപ്പാടി പഞ്ചായത്തിലെ കോട്ടവയല്‍ മാനിവയല്‍ പ്രദേശങ്ങളിലെ വെള്ളപ്പൊക്കത്തിന് പരിഹാരമായി മേപ്പാടി ഗ്രാമപഞ്ചായത്തിന്റെ ആഭിമുഖ്യത്തില്‍ ചെമ്പോത്തറ മുതല്‍ കോട്ടവയല്‍ വരെയുള്ള ഭാഗത്തു കൂടി ഒഴുക്കുന്ന പുഴയിലെ തടസ്സങ്ങള്‍ നീക്കി പുഴ വൃത്തിയാക്കി. പുഴയിലെ കാട് വെട്ടല്‍ കുടുംബശ്രീ പ്രവര്‍ത്തകര്‍ തൊഴിലുറപ്പ്  പദ്ധതിയില്‍ ഉള്‍പ്പെടുത്തി ചെയ്തു തീര്‍ത്തു. പുഴയില്‍ അടിഞ്ഞു കൂടിയ മണ്ണ്, എക്കല്‍, ചെറുമരങ്ങള്‍, എന്നിവ യന്ത്ര സഹായത്തോടെ എടുത്തുമാറ്റി പുഴയുടെ സ്വാഭാവിക ഒഴുക്ക് പുന സൃഷ്ട്ടിച്ചു. 4 കിലോമീറ്റര്‍ നീളത്തിലാണ് ഈ പുഴ ഒഴുകുന്നത്. പഞ്ചായത്ത് പ്രസിഡന്റ് കെ.കെ സഹദ് ഉദ്ഘാടനം ചെയ്തു.

തരിയോട് ഗ്രാമപഞ്ചായത്തിലെ ലൈഫ് ഭവന നിര്‍മ്മാണം മൂന്നാംഘട്ട ഗുണഭോക്തൃ പട്ടികയിലുള്‍പ്പെട്ടവരുടെ അര്‍ഹതാ പരിശോധന ജൂണ്‍ 11, 12, 13 തിയതികളില്‍ ഗ്രാമപഞ്ചായത്ത് ഓഫീസില്‍ നടക്കും. അര്‍ഹതയുള്ള ഗുണഭോക്താക്കള്‍ രേഖകള്‍ സഹിതം ഹാജരാകണം. സ്വന്തമായി ഭൂമിയുള്ളവരും രേഖകള്‍ ഹാജരാക്കണം. അര്‍ഹതാ ഗുണഭോക്തൃപട്ടിക ഗ്രാമപഞ്ചായത്ത് ഓഫീസിലും, കാവുംമന്ദം, തരിയോട് വില്ലേജ് ഓഫീസുകളിലും, ട്രൈബല്‍ എക്സ്റ്റന്‍ഷന്‍ ഓഫീസിലും, വില്ലേജ് എക്സ്റ്റന്‍ഷന്‍  ഓഫീസിലും പ്രസിദ്ധീകരിച്ചിട്ടുണ്ട്.

ക്ഷീര വികസന വകുപ്പിന്റെ 2020-21 വാര്‍ഷിക പദ്ധതിയിലെ മില്‍ക്ക് ഷെഡ് വികസന പദ്ധതിയില്‍ ഉള്‍പ്പെടുത്തി അന്യസംസ്ഥാനങ്ങളില്‍ നിന്നും കിടാരി/പശുക്കളെ വാങ്ങി ചെറുകിട ഇടത്തരം ഡയറി ഫാമുകള്‍ തുടങ്ങുന്നതിനും, കറവയന്ത്രം, അവശ്യാധിഷ്ഠിത ധനസഹായം, കാലിത്തൊഴുത്ത് നിര്‍മ്മാണം എന്നീ പദ്ധതികള്‍ക്കും ധനസഹായം നല്‍കുന്നു. താല്‍പര്യമുള്ളവര്‍ നിശ്ചിത മാതൃകയിലുള്ള അപേക്ഷ സുല്‍ത്താന്‍ ബത്തേരി (04936 222905), കല്‍പറ്റ (04936 206770), മാനന്തവാടി (04935 204093), പനമരം (04935 220002) ക്ഷീര വികസന സേവന യൂണിറ്റ് ഓഫീസുകളില്‍  ജൂണ്‍ 23 ന് വൈകിട്ട് 5 നകം നല്‍കണം.