സാക്ഷരതാമിഷന്‍ പാലക്കാട് ജില്ലാ കോര്‍ഡിനേറ്ററായി ഡോ.മനോജ് സെബാസ്റ്റ്യന്‍ ചുമതലയേറ്റു. പാലക്കാട് വടക്കഞ്ചേരി സ്വദേശിയായ ഇദ്ദേഹം തുടര്‍വിദ്യഭ്യാസപദ്ധതിയുടെ തുടക്കം മുതല്‍ പ്രവര്‍ത്തിച്ച് വരുന്നുണ്ട്. കണ്ണൂര്‍ ജില്ലാ കോര്‍ഡിനേറ്ററായി പ്രവര്‍ത്തിച്ച് വരികയായിരുന്നു.
 

കോവിഡ് വ്യാപനം നിയന്ത്രിക്കുന്നതിന് ഒരു പഞ്ചായത്തില്‍ 100 കിടക്കകളും ഒരു നഗരസഭാ വാര്‍ഡില്‍ 50 കിടക്കകളും തീവ്രബാധിത പ്രദേശങ്ങളില്‍ 100 കിടക്കകളും ഉള്ള കോവിഡ് ഫസ്റ്റ്ലൈന്‍ ട്രീറ്റ്മെന്റ് സെന്ററുകള്‍ സജ്ജീകരിക്കേണ്ടതിന്റെ മേല്‍നോട്ട ചുമതല ജില്ലയുടെ നോഡല്‍ ഓഫീസറായി നിയമിതനായ എസ്. കാര്‍ത്തികേയന്‍ ഐ.എ.എസിനായിരിക്കുമെന്ന് ജില്ലാ ദുരന്തനിവാരണ അതോറിറ്റി ചെയര്‍മാന്‍ കൂടിയായ ജില്ലാ കലക്ടര്‍ അറിയിച്ചു.

സംസ്ഥാന സിവില്‍ സര്‍വ്വീസ് അക്കാദമി പാലക്കാട് ഉപകേന്ദ്രത്തില്‍ സിവില്‍ സര്‍വ്വീസ് പരീക്ഷാ പരിശീലന ക്ലാസിലേക്കുള്ള പ്രവേശന പരീക്ഷയുടെ ഓണ്‍ലൈന്‍ രജിസ്ട്രേഷന് ജൂലൈ 31 വരെ നീട്ടിയതായി സ്പെഷല്‍ ഓഫീസര്‍ അറിയിച്ചു. താത്പര്യമുള്ളവര്‍ക്ക്www.ccek.org ല്‍ രജിസ്റ്റര്‍ ചെയ്യാം. പരീക്ഷാ തിയ്യതി പിന്നീട് വെബ്സൈറ്റിലൂടെ അറിയിക്കും. ഫോണ്‍: 0491- 2576100, 8281098869.

ഒറ്റപ്പാലം താലൂക്ക് ആശുപത്രിയില്‍ നടത്തിവരുന്ന കാന്റീന്‍ 2020 ഓഗസ്റ്റ് ഒന്ന് മുതല്‍ 2021 ജൂലൈ 31 വരെ ഒരു വര്‍ഷത്തേക്ക് കരാറടിസ്ഥാനത്തില്‍ ഏറ്റെടുത്തു നടത്താന്‍ താത്പര്യമുള്ള വ്യക്തികള്‍, സ്ഥാപനങ്ങള്‍ എന്നിവയില്‍ നിന്നും ദര്‍ഘാസ് ക്ഷണിച്ചു. നിരതദ്രവ്യം 7200 രൂപ. ദര്‍ഘാസ് ഫോറം ജൂലൈ 21 വൈകീട്ട് 4 വരെ ലഭിക്കും. ജൂലൈ 22 ന് ഉച്ചയ്ക്ക് 12 വരെ 
ദര്‍ഘാസ് സ്വീകരിക്കും. അതേ ദിവസം ഉച്ചയ്ക്ക് മൂന്നിന് ദര്‍ഘാസ് തുറക്കും. ഫോണ്‍-0466 2344053.

ജലജീവന്‍ മിഷനുമായി ബന്ധപ്പെട്ട് ജില്ലാതല ജല ശുചിത്വമിഷന്റെ ആദ്യ യോഗം ഇന്ന്(ജൂലൈ 17) രാവിലെ 10.30 ന് കളക്ടറേറ്റില്‍ ജില്ലാ കലക്ടറുടെ അധ്യക്ഷതയില്‍ ചേരും.

കോവിഡ് -19 ന്റെ പശ്ചാത്തലത്തില്‍ ബ്ലഡ് ബാങ്കുകളിലെ രക്തത്തിന്റെ അപര്യാപ്തത പരിഹരിക്കുകയെന്ന ലക്ഷ്യത്തോടെ ഒരു ദിനം ഒരു ദാതാവ് രക്തദാന പദ്ധതിക്ക് തുടക്കമിട്ട  കേരളാ അസോസിയേഷന്‍ ഓഫ് പ്രൊഫഷണല്‍ സോഷ്യല്‍ വര്‍ക്കേഴ്സ് (കെ.എ.പി.എസ്)പാലക്കാട് ചാപ്റ്ററിന് ജില്ലാശുപത്രി ബ്ലഡ് ബാങ്കിന്റെ  ആദരം. ജില്ലാ ആശുപത്രി സൂപ്രണ്ട് ഡോ.രമാദേവിയില്‍ നിന്നും കെ.എ.പി.എസ് പാലക്കാട് ചാപ്റ്റര്‍ പ്രസിഡന്റ് കെ. സതീഷ് ആദരം ഏറ്റുവാങ്ങി.