മഴക്കെടുതി മൂലമുളള വെളളപ്പൊക്കവും മണ്ണിടിച്ചലും സാരമായി ബാധിക്കാനുളള പ്രദേശങ്ങളിലെ ജനങ്ങൾ ജാഗ്രത പാലിക്കണമെന്ന് ജില്ലാ കളക്ടർ എസ് ഷാനവാസ് അഭ്യർത്ഥിച്ചു. മഴക്കെടുതി നാശം വിതയ്ക്കാൻ ഇടയുളള പ്രദേശങ്ങൾ ഇവയാണ്: തലപ്പിളളി താലൂക്ക്-കുംഭാര കോളനി, ചിറകോളനി, സാംബവ കോളനി, മേലെതലശ്ശേരി പളളിപരിസരം, ദേശമംഗലം കുന്നുംപുറം, പിഎംഎച്ച് ഗ്രാനൈറ്റ് ക്വാറിക്ക് സമീപമുളള പ്രദേശങ്ങൾ, വെസ്റ്റാർ ഓഡിറ്റോറിയം പാർക്കിങ് ഗ്രൗണ്ട്, പുറശ്ശേരി കോളനി, ചെമ്പികുന്ന് കോളനി, 10/17 കോളനി, മേലെമുറികുന്ന്, കാട്ടാളത്ത് കോളനി, വളളത്തോൾനഗർ, കോട്ടക്കുന്ന് കോളനി, പാറക്കുന്ന് കോളനി, ഉത്രാളിക്കാവ് ലക്ഷംവീടിന് പിൻവശം.

ജില്ലയിൽ കാലവർഷം ശക്തമായതോടെ വിവിധ താലൂക്കുകളിൽ അനിഷ്ട സംഭവങ്ങൾ ഉണ്ടാകുന്ന സാഹചര്യത്തിൽ താലൂക്ക് തലത്തിൽ ദുരിതാശ്വാസ പ്രവർത്തനങ്ങൾ കാര്യക്ഷമമായി നടത്തുന്നതിന് ഇൻസിഡന്റ് കമാൻഡർമാരായി പ്രവർത്തിക്കുന്ന തഹസിൽദാർമാർക്ക് ജില്ലാ ഭരണകൂടം സജ്ജീകരണങ്ങൾ ഒരുക്കും. ഇതിനായി വിവിധ വകുപ്പുകളിൽ നിന്ന് കൂടുതൽ ജീവനക്കാരെയും വാഹനങ്ങളെയും വിട്ടുനൽകാൻ ജില്ലാ കളക്ടർ എസ് ഷാനവാസ് ഉത്തരവിട്ടു.

റെഡ് അലർട്ട് പ്രഖ്യാപിച്ച സാഹചര്യത്തിൽ അടിയന്തിര സ്ഥിതി കൈകാര്യം ചെയ്യുന്നതിനായി ജില്ലയിലെ താലൂക്ക് ഓഫീസുകളും എല്ലാ തദ്ദേശസ്വയംഭരണസ്ഥാപനങ്ങളും ശനിയാഴ്ച (ആഗസ്റ്റ് 8) തുറന്ന് പ്രവർത്തിക്കണമെന്ന് ജില്ലാ കളക്ടർ അറിയിച്ചു. കോവിഡ് മാനദണ്ഡം പാലിച്ച് ക്യാമ്പുകൾ നടത്തുന്നതിനും ദുരിതാശ്വാസ പ്രവർത്തനങ്ങൾ ഏകോപിപ്പിക്കുന്നതിനും ഈ ഓഫീസുകളിൽ നിന്ന് നേതൃത്വം നൽകും.

ആഗ്സ്റ്റ് എട്ട് ശനിയാഴ്ച തൃശൂർ ജില്ലയിൽ കേന്ദ്ര കാലാവസ്ഥ വകുപ്പ് അതീവ ജാഗ്രതയ്ക്കുള്ള റെഡ് അലേർട്ട് പ്രഖ്യാപിച്ചു. അതിതീവ്ര മഴ മുന്നറിയിപ്പാണ് പുറപ്പെടുവിച്ചിരിക്കുന്നത്. 24 മണിക്കൂറിൽ 204.5 മില്ലി മീറ്ററിൽ കൂടുതൽ മഴ ലഭിക്കാനുള്ള സാധ്യതയാണിത്. ഇത്തരത്തിൽ അതിതീവ്ര മഴ ലഭിക്കുന്നത് അപകട സാധ്യത വർധിപ്പിക്കും.

രാജമല പെട്ടിമുടിയിലുണ്ടായ മണ്ണിടിച്ചിലിൽ തമിഴ് വംശജരായ പട്ടികജാതി കുടുംബാംഗങ്ങൾ മരിച്ച സംഭവത്തിൽ പട്ടികജാതി പട്ടികവർഗ വികസന വകുപ്പ് മന്ത്രി എ.കെ. ബാലൻ ജില്ലാ കളക്ടറോട് വിശദമായ റിപ്പോർട്ട് തേടി. ദുരിതാശ്വാസ പ്രവർത്തനങ്ങൾക്കും പുനരധിവാസ പ്രവർത്തനങ്ങൾക്കും വകുപ്പ് എല്ലാ സഹകരണവും നൽകുമെന്ന് മന്ത്രി അറിയിച്ചു.

എസ്റ്റേറ്റ് ലയങ്ങളിൽ ഉരുൾപ്പൊട്ടലിൽ വനം വകുപ്പ് വാച്ചർമാർ ഉൾപ്പെടെ നിരവധി പേർ മരണപ്പെട്ടതിൽ വനം മന്ത്രി കെ.രാജു അനുശോചനം അറിയിച്ചു. കാണാതായവരിൽ മൂന്നാർ വനം റെയ്ഞ്ചിലെയും ഇരവികുളം റെയ്ഞ്ചിലെയും മൂന്ന് വാച്ചർമാർ വീതം ഉൾപ്പെട്ടിട്ടുണ്ട്.  ഇടമലക്കുടിയിലുള്ളവർക്ക് യാത്രയ്ക്കും മറ്റ് ആവശ്യങ്ങൾക്കുമായി ഉപയോഗിക്കുന്നതിന് വനം വകുപ്പ് നൽകിയിരുന്ന ഒരു വാഹനവും ഒലിച്ചു പോയി.  
പി.എൻ.എക്‌സ്. 2696/2020

ജനറൽ നഴ്‌സിംഗ് ആൻഡ് മിഡ്‌വൈഫറി മൂന്നാം വർഷ സപ്ലിമെന്ററി പരീക്ഷകൾ (പ്രാക്ടിക്കൽ ആൻഡ് തിയറി) കോവിഡ് സുരക്ഷാ മാനദണ്ഡങ്ങൾ പാലിച്ച് പത്ത്, 12, 14, 17, 18, 19, 20 തിയതികളിൽ നടത്തുമെന്ന് കേരള നഴ്‌സസ് ആൻഡ് മിഡ്‌വൈഫ്‌സ് കൗൺസിൽ രജിസ്ട്രാർ ഡോ. സലീനാ ഷാ അറിയിച്ചു.  വിശദവിവരങ്ങൾക്ക്: nursingcouncil.kerala.gov.in.    
പി.എൻ.എക്‌സ്. 2694/2020