തിരുവനന്തപുരം പത്മനാഭസ്വാമി ക്ഷേത്രത്തിലെ നിറപുത്തരി ഉത്സവത്തിനാവശ്യമായ നെൽക്കതിർ നിയമസഭാ വളപ്പിലെ നെൽകൃഷിയിൽ നിന്നും നൽകി. പൂർണ്ണമായും ജൈവകൃഷി സമ്പ്രദായത്തിൽ നിയമസഭാ വളപ്പിൽ കൃഷിചെയ്ത് വിളയിച്ച നെല്ല് സ്പീക്കർ പി. ശ്രീരാമകൃഷ്ണൻ കൊയ്തെടുത്ത് മേയർ കെ. ശ്രീകുമാറിനാണ് കൈമാറിയത്. കഴിഞ്ഞ വർഷവും നിറപുത്തരിക്കുള്ള നെല്ല് ഇവിടെ നിന്നാണ് കൈമാറിയത്.
 പി.എൻ.എക്‌സ്. 2691/2020

പട്ടികജാതി വികസന വകുപ്പ് തിരുവനന്തപുരം പ്രസ് ക്ലബുമായി സഹകരിച്ച് പട്ടികജാതി പട്ടികവർഗ വിഭാഗക്കാർക്കായി നടത്തുന്ന ഒരുവർഷത്തെ സൗജന്യ പോസ്റ്റ് ഗ്രാജ്വേറ്റ് ഡിപ്ലോമ ഇൻ ജേർണലിസം കോഴ്‌സിലേക്ക് 20 വരെ അപേക്ഷിക്കാം. അംഗീകൃത സർവകലാശാല ബിരുദമാണ് യോഗ്യത. അവസാന വർഷ ഫലം കാത്തിരിക്കുന്നവർക്കും അപേക്ഷിക്കാം. ബിരുദ പരീക്ഷ മാർക്കിന്റെയും ഇന്റർവ്യൂവിൽ ലഭിക്കുന്ന മാർക്കിന്റെയും അടിസ്ഥാനത്തിൽ 30 വിദ്യാർത്ഥികൾക്കാണ് പ്രവേശനം. പ്രായപരിധി 28 വയസ്സ്. www.icsets.org യിൽ അപേക്ഷിക്കാം. ഫോൺ: 0471 2533272, ഇ-മെയിൽ:   icsets@gmail.com.    

കോവിഡ് പ്രതിരോധ പ്രവർത്തനങ്ങളിൽ വീഴ്ച വരുത്തിയതിന് മലപ്പുറം ജില്ലയിലെ ചെറുകാവ് ഗ്രാമപഞ്ചായത്ത് സെക്രട്ടറി സൽമാ ബീവിയെ പഞ്ചായത്ത് ഡയറക്ടർ സസ്‌പെൻഡ് ചെയ്തു.  ലോക്ക്ഡൗൺ പ്രഖ്യാപിച്ചതിനു ശേഷം സെക്രട്ടറി ഓഫീസിൽ ഹാജരാകാതിരിക്കുകയും ജീവനക്കാർക്ക് ആവശ്യമായ നിർദ്ദേശങ്ങൾ നൽകാതിരിക്കുകയും ചെയ്തതിനെ തുടർന്നാണ് നടപടി.  ഇതുമൂലം പ്രതിരോധ പ്രവർത്തനങ്ങൾ സംബന്ധിച്ച വിവരങ്ങൾ യഥാസമയം സർക്കാരിലേക്ക് റിപ്പോർട്ട് ചെയ്തിരുന്നില്ല. കോവിഡ് ഫസ്റ്റ്‌ലൈൻ ട്രീറ്റ്‌മെന്റ് സെന്ററിന്റെ പ്രവർത്തനങ്ങൾക്ക് മേൽനോട്ടം വഹിക്കുന്നതിലും വീഴ്ചവരുത്തി.  പഞ്ചായത്ത് ഡെപ്യൂട്ടി ഡയറക്ടറുടെ റിപ്പോർട്ടിന്റെ അടിസ്ഥാനത്തിലാണ് നടപടി.

കണ്ണൂർ ഇന്ത്യൻ ഇൻസ്റ്റിറ്റ്യൂട്ട് ഓഫ് ഹാന്റ്‌ലൂം ടെക്‌നോളജിയിൽ ത്രിവത്സര ഹാന്റ്‌ലൂം & ടെക്‌സ്റ്റൈൽ ഡിപ്ലോമ കോഴ്‌സിലേക്ക് സെപ്തംബർ നാല്് വരെ അപേക്ഷിക്കാം. വിശദവിവരങ്ങളും അപേക്ഷഫോമും  www.iihtkannur.ac.in ൽ ലഭിക്കും. അപേക്ഷ info@iihtkannur.ac.in ൽ  ഓൺലൈനായും നൽകാം. വിശദവിവരങ്ങൾക്ക് : 0497-2835390.
പി.എൻ.എക്‌സ്. 2688/2020

ഇടുക്കി, തൃശൂർ, പാലക്കാട്, വയനാട് ജില്ലകളിൽ ആഗസ്റ്റ് 8ന് റെഡ് അലർട്ട് പ്രഖ്യാപിച്ചു. പത്തനംതിട്ട, ആലപ്പുഴ, കോട്ടയം, എറണാകുളം, മലപ്പുറം, കോഴിക്കോട്, കണ്ണൂർ, കാസർഗോഡ് ജില്ലകളിൽ ഓറഞ്ച് അലർട്ടാണ്. തിരുവനന്തപുരം, കൊല്ലം ജില്ലകളിൽ യെല്ലോ അലർട്ടുമായിരിക്കുമെന്ന് കാലാവസ്ഥ നിരീക്ഷണ കേന്ദ്രം അറിയിച്ചു.
പി.എൻ.എക്‌സ്. 2687/2020

 ഒറ്റപ്പാലം താലൂക്കില്‍ താലൂക്കുതല പരാതി പരിഹാര അദാലത്ത് ആഗസ്റ്റ് 17 ന് രാവിലെ 11 ന് വീഡിയോ കോണ്‍ഫ്രന്‍സ് വഴി നടത്തുമെന്ന് ജില്ലാ കളക്ടര്‍ അറിയിച്ചു. അക്ഷയ കേന്ദ്രം വഴി ആഗസ്റ്റ് 13ന് വൈകിട്ട് അഞ്ചു വരെ അപേക്ഷ സ്വീകരിക്കും. അപേക്ഷകര്‍  അന്നേ ദിവസം ബന്ധപ്പെട്ട അക്ഷയ കേന്ദ്രങ്ങളില്‍ ഹാജരായി വീഡിയോ കോണ്‍ഫറന്‍സ് മുഖേന ശാരീരിക അകലം പാലിച്ച് അദാലത്തില്‍ പങ്കെടുക്കേണ്ടതാണ്. ടോക്കണ്‍ സംബന്ധിച്ച വിവരങ്ങള്‍ അപേക്ഷകരെ അറിയിക്കും.