കാസര്‍കോട് ജില്ലയിലെ  ബേഡഡുക്കയില്‍ ആടു ഫാം  ആരംഭിക്കുമെന്നും ഈ സാമ്പത്തികവര്‍ഷം അവസാനത്തോടെ ഇതിന് തറക്കല്ലിടുമെന്നും ക്ഷീരവികസന മൃഗസംരക്ഷണ വകുപ്പ് മന്ത്രി അഡ്വ.കെ.രാജു പറഞ്ഞു. ഇതിനായി 22 ഏക്കര്‍ സ്ഥലം ലഭ്യമാക്കിയിട്ടുണ്ട്. തൃക്കരിപ്പൂര്‍ ഗ്രാമ പഞ്ചായത്തില്‍ മൃഗാശുപത്രി കെട്ടിടോദ്ഘാടനം നിര്‍വഹിച്ച് സംസാരിക്കുകയായിരുന്നു മന്ത്രി.      ജില്ലയിലെ എല്ലാ മൃഗാശുപത്രികളിലും ഡോക്ടര്‍മാരുടെ സേവനം  ഉറപ്പു വരുത്തും.വെറ്ററിനറി ഡോക്ടര്‍മാരുടെ ഒഴിവുള്ള തസ്തികകളില്‍ 10 ദിവസത്തിനകം നിയമനം നടത്താന്‍  വകുപ്പ് ഡയറക്ടര്‍ക്ക്  നിര്‍ദേശം നല്കി.

   മൃഗസംരക്ഷണ വകുപ്പിന്റെ തൃക്കരിപ്പൂര്‍ ഗ്രാമപഞ്ചായത്ത് മൃഗാശുപത്രി കെട്ടിടോദ്ഘാടനം വനം വന്യജീവി ,മൃഗസംരക്ഷണ വകുപ്പ് മന്ത്രി അഡ്വ.കെ.രാജു നിര്‍വഹിച്ചു. ക്ഷീര കര്‍ഷകര്‍ക്കുള്ള ആനുകൂല്യ വിതരണവും മന്ത്രി നിര്‍വഹിച്ചു. കന്നുകാലി പ്രദര്‍ശനത്തില്‍ പങ്കെടുത്ത മികച്ച കന്നുകുട്ടികള്‍ക്ക് മന്ത്രി മാല അണിയിച്ച് ആദരിച്ചു.

   ജില്ലയില്‍ പത്ത് ദിവസത്തിനകം മുഴുവന്‍ മൃഗാശുപത്രികളിലും ഡോക്ടര്‍മാരെ നിയമിക്കുമെന്ന് ക്ഷീര വികസനം മൃഗസംരക്ഷണ വകുപ്പ് മന്ത്രി അഡ്വ.കെ.രാജു പറഞ്ഞു. അടുത്ത വര്‍ഷം സംസ്ഥാനത്തെ മുഴുവന്‍ ബ്ലോക്കുകളിലും ഒരു മൃഗാശുപത്രിയില്‍ ഒരു ഡോക്ടറുടെ സേവനം രാത്രികാല സേവനം ഉറപ്പു വരുത്തുമെന്നും മന്ത്രി പറഞ്ഞു. ക്ഷീര കര്‍ഷകരുടെ പെന്‍ഷന്‍ 500 ല്‍ നിന്ന് 1100 ആയി വര്‍ധിപ്പിച്ചതും ക്ഷീരമേഖലയില്‍ കര്‍ഷകര്‍ക്ക് ആത്മവിശ്വാസത്തോടെ ഉറച്ച് നില്‍ക്കുന്നതിനാണെന്ന് മന്ത്രി പറഞ്ഞു

   ജില്ലയിലെ മൂന്ന് ബ്ലോക്കുകള്‍ ഡയറി സോണുകളായി പ്രഖ്യാപിക്കുമെന്ന്  മൃഗസംരക്ഷണ വകുപ്പ് മന്ത്രി അഡ്വ.കെ.രാജു പറഞ്ഞു. കാഞ്ഞങ്ങാട്, നീലേശ്വരം, പരപ്പ ബ്ലോക്കുകളെയാണ് ഡയറി സോണുകളായി പ്രഖ്യാപിക്കുന്നത്.  ക്ഷീരോല്പാദനത്തില്‍ പതിമൂന്നാം സ്ഥാനത്താണ് കാസര്‍കോട് ജില്ല. ഈ സ്ഥിതി മാറണമെന്നും മന്ത്രി പറഞ്ഞു. കഴിഞ്ഞ ഒരു വര്‍ഷത്തിനകം ഏഴര ശതമാനം നേട്ടം കൈവരിക്കാനായിട്ടുണ്ട്. അത് 15 ശതമാനമാക്കണം. അഞ്ചു വര്‍ഷത്തിനകം രണ്ടര കോടി രൂപ ജില്ലയ്ക്ക് അധികം ലഭിക്കുമെന്നും മന്ത്രി പറഞ്ഞു.  

   രണ്ടു വര്‍ഷത്തിനകം ക്ഷീരോല്പാദനത്തില്‍ സംസ്ഥാനം സ്വയംപര്യാപ്തമാകുമെന്ന് ക്ഷീരവികസനം മൃഗസംരക്ഷണ വകുപ്പ് മന്ത്രി അഡ്വ.കെ.രാജു പറഞ്ഞു. കര്‍ഷകരാണ് ക്ഷീരമേഖലയുടെ നട്ടെല്ലെന്നും അദ്ദേഹം പറഞ്ഞു.ക്ഷീരവികസന വകുപ്പിന്റെ കാഞ്ഞങ്ങാട് ബ്ലോക്ക് ക്ഷീര കര്‍ഷക സംഗമവും പുല്ലൂര്‍ ക്ഷീരസംഘം കെട്ടിടോദ്ഘാടനവും നിര്‍വഹിക്കുകയായിരുന്നു മന്ത്രി. 

സംസ്ഥാന സര്‍ക്കാരിന്റെ ഇ-ടിക്കറ്റിംഗ് സംവിധാനത്തിന്റെ ഭാഗമായുള്ള ഓണ്‍ലൈന്‍ ടിക്കറ്റ് ബുക്കിംഗ് പരീക്ഷണാടിസ്ഥാനത്തില്‍ സംസ്ഥാന ചലച്ചിത്ര വികസന കോര്‍പ്പറേഷന്റെ തിരുവനന്തപുരം കൈരളി/നിള/ശ്രീ, ആലപ്പുഴ കൈരളി/ശ്രീ, ചേര്‍ത്തല കൈരളി/ശ്രീ, നോര്‍ത്ത് പറവൂര്‍ കൈരളി/ശ്രീ, തൃശൂര്‍ കൈരളി/ശ്രീ, കോഴിക്കോട് കൈരളി/ശ്രീ എന്നീ തീയേറ്ററുകളില്‍ ഡിസംബര്‍ 12 മുതല്‍ നടപ്പിലാക്കും. പ്രേക്ഷകര്‍ക്ക് ഓണ്‍ലൈനായി keralafilms.gov.in എന്ന വെബ്‌സൈറ്റ് മുഖാന്തിരം ടിക്കറ്റുകള്‍ ബുക്കുചെയ്യാം. ടിക്കറ്റ് റിസര്‍വ്വേഷന്‍ സംബന്ധിച്ചുള്ള സാങ്കേതിക സഹായത്തിന് ഇന്‍ഫര്‍മേഷന്‍ കേരള മിഷന്റെ 0471 - 2773170 എന്ന നമ്പറിള്‍ ബന്ധപ്പെടണം

2018 ലെ സിവില്‍ സര്‍വ്വീസ് പ്രിലിമിനറി പരീക്ഷാ പരിശീലനത്തിന്റെ ഭാഗമായി കേരള സ്റ്റേറ്റ് സിവില്‍ സര്‍വ്വീസ് അക്കാഡമിയുടെ തിരുവനന്തപുരം കേന്ദ്രത്തിലും കോഴിക്കോട്, പൊന്നാനി, പാലക്കാട് ഉപകേന്ദ്രങ്ങളിലും ഡിസംബര്‍ 16 ന് ആരംഭിക്കുന്ന ടെസ്റ്റ് സീരീസില്‍ പങ്കെടുക്കാന്‍ രജിസ്റ്റര്‍ ചെയ്യാം. ഫോണ്‍ : തിരുവനന്തപുരം : 0471 2313065, 2311654, പൊന്നാനി : 0494 2665489, 8281098868, പാലക്കാട് : 0491 2576100, 8281098869, കോഴിക്കോട് : 0495 2386400, 8281098870.

പി.എന്‍.എക്‌സ്.5254/17

അഞ്ച് വര്‍ഷത്തിലധികം ടാക്‌സ് അടയ്ക്കാനുള്ള വാഹനങ്ങളുടെ കുടിശിക ഒറ്റത്തവണ തീര്‍പ്പാക്കല്‍ പദ്ധതിയില്‍ കുറഞ്ഞ നിരക്കില്‍ അടയ്ക്കാന്‍ സര്‍ക്കാര്‍ ഏര്‍പ്പെടുത്തിയ സൗകര്യം ഡിസംബര്‍ 31 ന് അവസാനിക്കും.

2017 മാര്‍ച്ച് 31 ന് അഞ്ച് വര്‍ഷമോ അതിലധികമോ ടാക്‌സ് കുടിശികയുള്ള വാഹനങ്ങളുടെ ഉടമകള്‍ക്ക് യഥാക്രമം 20 ശതമാനം (ട്രാന്‍സ്‌പോര്‍ട്ട് വാഹനങ്ങള്‍), 30 ശതമാനം (നോണ്‍ ട്രാന്‍സ്‌പോര്‍ട്ട് വാഹനങ്ങള്‍) വീതം ടാക്‌സ് അടച്ച് ടാക്‌സ് കുടിശിക ഒഴിവാക്കാം.

തിരുവനന്തപുരം ഇന്‍സ്റ്റിറ്റ്യൂട്ട് ഓഫ് പ്രൊഫഷണല്‍ മാനേജ്‌മെന്റ് സ്റ്റഡീസില്‍ നിന്ന് പരിശീലനത്തിനായി കോഴിക്കോട് പോയ വിദ്യാര്‍ത്ഥിനിയായ ആതിര കെട്ടിടത്തിന്റെ നാലാം നിലയില്‍ നിന്ന് വീണ സംഭവത്തെക്കുറിച്ച് നിഷ്പക്ഷവും സ്വതന്ത്രവുമായ അന്വേഷണം നടത്തി കുറ്റക്കാരെ ശിക്ഷിക്കാന്‍ വേണ്ട നടപടി സ്വീകരിക്കുമെന്ന് പട്ടികജാതി പട്ടികവര്‍ഗ പിന്നാക്കക്ഷേമ മന്ത്രി എ.കെ. ബാലന്‍ പറഞ്ഞു. എസ്. പി. ഫോര്‍ട്ട് ആശുപത്രിയില്‍ ചികിത്‌സയില്‍ കഴിയുന്ന ആതിരയെ സന്ദര്‍ശിച്ച ശേഷമാണ് മന്ത്രി ഇക്കാര്യം അറിയിച്ചത്. 

        പരിവര്‍ത്തിത ക്രൈസ്തവ ശുപാര്‍ശിത  വിഭാഗ വികസന കോര്‍പ്പറേഷന്‍, പട്ടികജാതിയില്‍ നിന്നും ക്രിസ്തുമതത്തിലേയ്ക്ക് പരിവര്‍ത്തനം ചെയ്തിട്ടുള്ളവരും പട്ടിക ജാതിയിലേയ്ക്ക് ശുപാര്‍ശ ചെയ്തിട്ടുള്ളവരുമായവര്‍ക്ക് (ഒ.ഇ.സി മാത്രം, മുന്നോക്ക/പിന്നോക്ക വിഭാഗങ്ങളിലെ മറ്റു ജാതിക്കാര്‍ അര്‍ഹരല്ല ) തൊഴില്‍ സംരഭങ്ങള്‍ തുടങ്ങുന്നതിനായി 2 ദിവസത്തെ സൗജന്യ പരിശീലനപരിപ്പാടി നടത്തും. 18 നും 45നും ഇടയില്‍ പ്രായമുള്ള എസ്.എസ്.എല്‍.സി അടിസ്ഥാന യോഗ്യതയുള്ളവര്‍ക്ക് പങ്കെടുക്കാം.