പാലക്കാട് നഗരസഭാ ടൗണ്‍ഹാളില്‍ ഡിസംബര്‍ മൂന്നിന് ലോക വികലാംഗ ദിനാചരണം നടത്തുമെന്ന് ജില്ലാ സാമൂഹികനീതി ഓഫീസര്‍ അറിയിച്ചു. രാവിലെ 7.30 മുതല്‍ ഭിന്നശേഷിയുള്ളവര്‍ക്കായി ലളിതഗാനം, പദ്യ പാരായണം, സിംഗിള്‍ ഡാന്‍സ്, ഗ്രൂപ്പ് ഡാന്‍സ്, പെന്‍സില്‍ ഡ്രോയിങ്, പെയിന്‍റിങ്, പ്രഛന്ന വേഷം, മിമിക്രി, പ്രസംഗം തുടങ്ങിയ കലാമത്സരങ്ങളും 50 മീറ്റര്‍ ഓട്ടം, 50 മീറ്റര്‍ നടത്തം , ഷോട്ട്പുട്ട്, ലെമണ്‍സ്പൂണ്‍ എന്നീ കായികമത്സരങ്ങളുമുണ്ട്.താത്പര്യമുള്ള സ്കൂളുകള്‍/വ്യക്തികള്‍ രാവിലെ 7.30ന് നഗരസഭാ ടൗണ്‍ഹാളില്‍ എത്തണമെന്ന് സാമൂഹികനീതി ഓഫീസര്‍ അറിയിച്ചു.  

    സര്‍ക്കാര്‍ ഏജന്‍സികളും വകുപ്പുകളും നേരിട്ട് നടത്തുന്ന പൊതുമേഖലയിലെ നിര്‍മാണ പ്രവര്‍ത്തനങ്ങള്‍ക്ക് മലബാര്‍ സിമന്‍റ്സ് ഉപയോഗിക്കാന്‍ സര്‍ക്കാറിനോട് ശുപാര്‍ശ ചെയ്യാന്‍ നിയമസഭാ സമിതി യോഗം തീരുമാനിച്ചു. പൊതുമേഖലാ സഥാപനങ്ങളെ സംബന്ധിച്ചുള്ള കേരള നിയമസഭാ സമിതി വാളയാര്‍ മലബാര്‍ സിമന്‍റ്സില്‍ ഉദ്യോഗസ്ഥരുമായി നടത്തിയ ചര്‍ച്ചയിലാണ് ഇക്കാര്യം അറിയിച്ചത്. 

ആശുപത്രികളില്‍ വൃക്കരോഗികള്‍ക്ക് ചികിത്സാസൗകര്യം കൂടുതല്‍ വര്‍ദ്ധിപ്പിക്കാനായി താലൂക്ക് ആശുപത്രികളില്‍ ഡയാലിസിസ് കേന്ദ്രങ്ങള്‍ ഏര്‍പ്പെടുത്താന്‍ പദ്ധതികള്‍ ആരംഭിച്ചതായി ആരോഗ്യവകുപ്പ് മന്ത്രി കെ.കെ. ശൈലജ ടീച്ചര്‍ അറിയിച്ചു. 44 ആശുപത്രികളില്‍ ഇതിനകം ഡയാലിസിസ് സൗകര്യങ്ങള്‍ ഏര്‍പ്പെടുത്തുന്ന പ്രവര്‍ത്തനങ്ങള്‍ ആരംഭിച്ചിട്ടുണ്ട്. 

സംസ്ഥാനത്തെ സര്‍ക്കാര്‍ ആശുപത്രികളില്‍ സ്ത്രീകളുടെയും കുട്ടികളുടേയും വിഭാഗത്തിന്റെ പ്രവര്‍ത്തനങ്ങള്‍ വിപുലീകരിക്കുന്നതിന്റെ ഭാഗമായി തൃശൂര്‍ ജനറല്‍ ആശുപത്രിയില്‍ സ്ത്രീകളുടെയും കുട്ടികളുടേയും വിഭാഗത്തില്‍ മൂന്നും നാലും വാര്‍ഡുകള്‍ നിര്‍മ്മിക്കുന്നതിന് 9.25 കോടി രൂപയുടെ ഭരണാനുമതി നല്‍കിയതായി ആരോഗ്യവകുപ്പ് മന്ത്രി കെ.കെ. ശൈലജ ടീച്ചര്‍ അറിയിച്ചു. കൂടാതെ ആറ്റിങ്ങല്‍ താലൂക്ക് ആശുപത്രിയില്‍ മെറ്റേണിറ്റി ബ്ലോക്ക് നിര്‍മ്മിക്കാനായി 3.50 കോടി രൂപയുടെ ഭരണാനുമതിയും നല്‍കി.

പി.എന്‍.എക്‌സ്.5095/17

സര്‍ഗാലയ അന്താരാഷ്ട്ര കലാ കരകൗശലമേളയുടെ മുന്നോടിയായുള്ള റോഡ്‌ഷോ 'കരകൗശല പൈതൃകയാത്ര'യുടെ ഫ്ളാഗ് ഓഫ് സഹകരണ-ടൂറിസം മന്ത്രി കടകംപള്ളി സുരേന്ദ്രനും തൊഴില്‍-എക്സൈസ് മന്ത്രി ടി.പി. രാമകൃഷ്ണനും ചേര്‍ന്ന് നിര്‍വഹിച്ചു.  കേരളത്തിലെ തിരഞ്ഞെടുത്ത പരമ്പരാഗത കരകൗശല ഗ്രാമങ്ങളിലൂടെയാണ് കരകൗശല പൈതൃകയാത്ര റോഡ് ഷോ സംഘടിപ്പിക്കുന്നത്.

സംസ്ഥാനത്ത് ജപ്പാന്റെ മാനുഫാക്ചറിങ് ഇന്‍സ്റ്റിറ്റ്യൂട്ട് സ്ഥാപിക്കുന്ന കാര്യം പരിഗണിക്കുമെന്ന് ഇന്ത്യയിലെ ജപ്പാന്‍ അംബാസിഡര്‍ കെന്‍ജി ഹിരാമസൂ പറഞ്ഞു. മുഖ്യമന്ത്രി പിണറായി വിജയനുമായി ബുധനാഴ്ച നടത്തിയ ചര്‍ച്ചയിലാണ് ഈ വാഗ്ദാനം. കേരളത്തില്‍ റബ്ബര്‍ അധിഷ്ഠിത വ്യവസായങ്ങള്‍ സ്ഥാപിക്കുന്നതിന് ജപ്പാനുമായി സഹകരിക്കാന്‍ താല്പര്യമുണ്ടെന്ന് മുഖ്യമന്ത്രി അറിയിച്ചപ്പോഴാണ് മാനുഫാക്ചറിങ് ഇന്‍സ്റ്റിറ്റ്യൂട്ട് പരിഗണിക്കാമെന്ന് അംബസിഡര്‍ പറഞ്ഞത്. ഏതൊക്കെ മേഖലകളില്‍ സാങ്കേതിക വിദ്യ ലഭ്യമാക്കണമെന്നും നിക്ഷേപം നടത്തണമെന്നും ഈ സ്ഥാപനത്തിന് തീരുമാനിക്കാന്‍ കഴിയും.

ആന്റി നാര്‍കോട്ടിക് ആക്ഷന്‍ സെന്റര്‍ ഓഫ് ഇന്ത്യാ യൂണിവേഴ്‌സിറ്റി കോളേജ് സ്റ്റുഡന്റ്‌സ് യൂണിയന്‍, ഇന്‍ഫര്‍മേഷന്‍ പബ്ലിക് റിലേഷന്‍സ് വകുപ്പ്, ലയണ്‍സ് ക്ലബ്, തിരുവനന്തപുരം നഗരസഭ എന്നിവ സംയുക്തമായി സംഘടിപ്പിക്കുന്ന എയ്ഡ്‌സ് രോഗനിവാരണ ദിനാചരണവും റെഡ് റിബര്‍ മാര്‍ച്ചും ഡിസംബര്‍ ഒന്നിനു നടക്കും.  രാവിലെ 9.30 ന് റെഡ് റിബണ്‍ മാര്‍ച്ച് യൂണിവേഴ്‌സിറ്റി കോളേജിനു മുന്നില്‍ നിന്നാരംഭിക്കും.  രാവിലെ 10.30 ന് യൂണിവേഴ്‌സിറ്റി കോളേജ് ആഡിറ്റോറിയത്തില്‍ നടക്കുന്ന ദിനാചരണ പരിപാടികള്‍ സഹകരണ വകുപ്പു മന്ത്രി കടകംപള്ളി സുരേന്ദ്രന്‍ ഉദ്ഘാടനം ചെയ്യും.