കേരള സംസ്ഥാന സാക്ഷരതാ മിഷൻ അതോറിറ്റിയുടെ നേതൃത്വത്തിൽ സ്കൂളുകളിൽ മലയാളം ഒരു വിഷയമായി പഠിക്കാത്ത വിദ്യാർഥികൾക്കും സർക്കാർ-അർദ്ധസർക്കാർ സ്ഥാപനങ്ങളിലെ മലയാളം അറിയാത്ത ജീവനക്കാർക്കുമായി നടത്തുന്ന 'പച്ചമലയാളം' സർട്ടിഫിക്കറ്റ് കോഴ്‌സിന്റെ മൂന്നാം ബാച്ചിലേക്കുള്ള രജിസ്‌ട്രേഷൻ തീയതി ഏപ്രിൽ 30 വരെ നീട്ടി. 17 വയസ്സ് പൂർത്തിയായവർക്ക് അപേക്ഷിക്കാവുന്ന ഈ ആറുമാസക്കാലയളവിലുള്ള കോഴ്‌സിന് 500 രൂപ രജിസ്‌ട്രേഷൻ ഫീസും 3,500 രൂപ കോഴ്‌സ് ഫീസുമാണ് നിശ്ചയിച്ചിരിക്കുന്നത്. താല്പര്യമുള്ളവർ www.literacymissionkerala.org എന്ന വെബ്‌സൈറ്റ് വഴി ഓൺലൈനായി അപേക്ഷ സമർപ്പിക്കേണ്ടതാണ്.

ആലപ്പുഴ കളക്ടറേറ്റിലേയ്ക്ക് ഭൂമി തരംമാറ്റവുമായി ബന്ധപ്പെട്ട്  നാല് വാഹനങ്ങള്‍ വാടകയ്ക്ക് നല്‍കുന്നതിന് ക്വട്ടേഷന്‍ ക്ഷണിച്ചു. നാലു മുതല്‍ ആറു വരെ  പേര്‍ക്ക് സഞ്ചരിക്കാവുന്ന വാഹനമാണ് ആവശ്യം. മെയ് നാലിന് വൈകിട്ട് മൂന്ന് മണി വരെ ആലപ്പുഴ ജില്ലാ കളക്ടറുടെ വിലാസത്തില്‍ ക്വട്ടേഷന്‍ നല്‍കാം.

ചേര്‍ത്തല - മാരാരിക്കുളം റെയില്‍വേ സ്റ്റേഷനുകള്‍ക്കിടയിലുള്ള ലെവല്‍ ക്രോസ് നമ്പര്‍ 46 (മാരാരി ടെമ്പിള്‍ ഗേറ്റ്) ഏപ്രില്‍ 28ന് രാവിലെ എട്ട് മുതല്‍ മെയ് രണ്ടിന് വൈകിട്ട് ആറ് വരെ അടിയന്തര അറ്റകുറ്റപ്പണികള്‍ക്കായി അടച്ചിടും. വാഹനങ്ങള്‍ തൊട്ടടുത്തുള്ള ലെവല്‍ ക്രോസ് നമ്പര്‍ 45 (പൂപ്പള്ളിക്കാവ് ടെമ്പിള്‍ ഗേറ്റ്) ലെവല്‍ ക്രോസ് നമ്പര്‍ 47 (മാരാരി സൗത്ത് ഗേറ്റ്) എന്നിവ വഴി പോകണം.

സംസ്ഥാന തീരദേശവികസന കോർപ്പറേഷൻ മുഖേന പൂന്തുറയിൽ പൂർത്തീകരിച്ച ജിയോട്യൂബ് ഓഫ്ഷോർ ബ്രേക്ക് വാട്ടർ തീരസംരക്ഷണ പ്രവർത്തിയുടെ തുടർപഠനം നടക്കുന്നതിനാൽ ചെറിയമുട്ടം മുതൽ പൂന്തുറ പള്ളിക്ക് പുറക് വശം വരെയുളള ഒരു കിലോമീറ്റർ ദൂരത്തിൻ മത്‌സ്യബന്ധനം നടത്തുന്ന മത്സ്യത്തൊഴിലാളികൾ പ്രത്യേകം ശ്രദ്ധിയ്ക്കണമെന്ന് സംസ്ഥാന തീരദേശ വികസന കോർപ്പറേഷൻ മാനേജിംഗ് ഡയറക്ടർ അറിയിച്ചു.

കേരള വാട്ടർ അതോറിറ്റിയുടെ അമൃത് കുടിവെള്ള പദ്ധതിയുടെ ഭാഗമായി കള്ളമ്പള്ളി ജംഗ്ഷൻ, ശ്രീകാര്യം (എളംകുളം ജംഗഷൻ) റോഡ് മുതൽ ശ്രീകാര്യം  സുഡിയോ സ്റ്റോൾ വരെ പൈപ്പ് സ്ഥാപിക്കുന്ന പ്രവൃത്തി നടത്തുന്നതിനാൽ രാത്രിസമയങ്ങളിൽ ഈ ഭാഗത്ത് ഭാഗിക ഗതാഗത തടസ്സം ഉണ്ടാകും.

ഈ പ്രദേശം വഴി യാത്ര ചെയ്യുന്നവർ  ജാഗ്രത പാലിക്കണമെന്ന് തിരുവനന്തപുരം കെ. ഡബ്ലു. എ  പ്രോജക്ട് ഡിവിഷൻ അസിസ്‌റ്റൻ്റ് എൻജിനീയർ അറിയിച്ചു,

ചൂട് അതിരൂക്ഷമായി ഉയരുകയും താപനില ദിനംപ്രതി കുതിച്ചുയരുകയും ചെയ്യുന്ന സാഹചര്യത്തിൽ വഴിയാത്രക്കാർക്ക് തണലും ആശ്വാസവും ആയി മാറുകയാണ് കുടുംബശ്രീ. വടക്കാഞ്ചേരി നഗരസഭ കുടുംബശ്രീ സിഡിഎസ്-2 വിന്റെ നേതൃത്വത്തിൽ ആരംഭിച്ച ദാഹ കുമ്പിൾ പദ്ധതി കുടുംബശീ ജില്ലാ മിഷൻ കോഡിനേറ്റർ അഭിജിത്ത് കെ ദീപക് ഉദ്ഘാടനം  ചെയ്തു. കാൽ നാടയാത്രികർക്കും ദാഹിച്ചു വലയുന്നവർക്കും പൊതുസ്ഥലങ്ങളിൽ മൺകുടങ്ങളിൽ സംഭരിച്ച ശുദ്ധജലം സൗജന്യമായി നൽകുകയാണ് ദാഹ കുമ്പിൾ പദ്ധതിയിലൂടെ. നഗരസഭ സോണൽ ഓഫീസിൽ നടന്ന ചടങ്ങിൽ കുടുംബശ്രീ സിഡിഎസ് ചെയർപേഴ്‌സൺ രശ്മി ഷാജി അധ്യക്ഷത വഹിച്ചു.

 
കുന്നംകുളം നിയോജകമണ്ഡലത്തിലെ ചെറുവള്ളിക്കടവ് റോഡിലെ ചെറുവള്ളിക്കടവ് പാലത്തിന്റെ പുനർനിർമ്മാണ പ്രവൃത്തികൾ നടക്കുന്നതിനാൽ ഈ റോഡിലൂടെയുള്ള ഇരുചക്രവാഹനങ്ങളും മുചക്രവാഹനങ്ങളും ഒഴികെയുള്ള മറ്റു വാഹന ഗതാഗതം ഏപ്രിൽ 29 മുതൽ താത്ക്കാലികമായി നിരോധിച്ചിരിക്കുന്നു. വട്ടംപാടം ഭാഗത്ത് നിന്നും കുന്നംകുളത്തേക്ക് പോകുന്ന വാഹനങ്ങൾ ചെറുവത്താനി റോഡ് വഴി പോകണമെന്ന് അസിസ്റ്റന്റ് എക്‌സിക്യൂട്ടീവ് എഞ്ചിനീയർ അറിയിച്ചു.

നിയമസഭാ തിരഞ്ഞെടുപ്പിനോടനുബന്ധിച്ച് തൃശ്ശൂർ ഗവ. എഞ്ചിനീയറിങ് കോളേജിലെ വോട്ടെണ്ണൽ കേന്ദ്രങ്ങൾ സജ്ജമാക്കുന്നതിന് അംഗീകൃത കരാറുകാരിൽ നിന്നും മുദ്രവെച്ച ക്വട്ടേഷനുകൾ ക്ഷണിച്ചു. ജി.എസ്.ടി രജിസ്ട്രേഷൻ ഉള്ള സ്ഥാപനങ്ങൾക്കും വ്യക്തികൾക്കും മാത്രമാണ് ക്വട്ടേഷനിൽ പങ്കെടുക്കാൻ അർഹതയുളളത്. താത്പര്യമുള്ളവർ നിശ്ചിത നിരക്കുകൾ രേഖപ്പെടുത്തിയ ക്വട്ടേഷനുകൾ ഏപ്രിൽ 27ന് മൂന്ന് മണിക്ക് മുമ്പായി ഇആർഒ ഒല്ലൂർ, നാട്ടിക മുമ്പാകെ സമർപ്പിക്കണം. കവറിന് മുകളിൽ "കേരള നിയമസഭ പൊതു തിരഞ്ഞെടുപ്പ് 2026-നാട്ടിക നിയ‌മസഭാമണ്ഡലം (വോട്ടെണ്ണൽ കേന്ദ്രം)" എന്ന് രേഖപ്പെടുത്തണം.

 മുണ്ടത്തിക്കോട് വെടിക്കെട്ട് അപകടത്തില്‍ മരണപ്പെട്ട സുവിന്റെ വീടു സന്ദര്‍ശിച്ചും അപകടത്തെ തുടര്‍ന്ന് ചികിത്സയിലിരിക്കെ മരണപ്പെട്ട കരാറുകാരന്‍ സതീഷിന്റെ ഭൗതിക ദേഹത്തില്‍ പുഷ്പം സമര്‍പ്പിച്ചും ജില്ലാ കലക്ടര്‍ ശിഖ സുരേന്ദ്രന്‍ ആദരാഞ്ജലികള്‍ അര്‍പ്പിച്ചു. വെടിക്കെട്ട് അപകടത്തില്‍ മരണമടഞ്ഞ സുവിന്റെ മൃതശരീരം അപകട ദിവസം തന്നെ കണ്ടെത്തുകയും തൊട്ടടുത്ത ദിവസം സംസ്‌കാരം നടത്തുകയും ചെയ്തിരുന്നു. ഭാര്യയും മകനും അച്ഛനും അമ്മയും മാത്രമുള്ള കുടുംബത്തിന്റെ ഏക അത്താണിയായിരുന്നു സുവിന്‍. സ്‌പ്രേ പെയിന്റിങ് തൊഴിലാളിയായിരുന്ന സുവിന്‍ പൂര സീസണുകളില്‍ മാത്രമാണ് വെടിക്കെട്ട് ജോലികള്‍ക്കായി പോയിരുന്നത്.