നിയമസഭാ തെരഞ്ഞെടുപ്പിന്റെ ഭാഗമായി ജില്ലയില്‍ ഹോം വോട്ടിംഗ് ചുമതലയുള്ള ഉദ്യോഗസ്ഥര്‍ക്ക് പരിശീലനം നല്‍കി. കളക്ടറേറ്റില്‍ നടന്ന പരിശീലന പരിപാടി തെരഞ്ഞെടുപ്പ് ഓഫീസറായ ജില്ലാ കളക്ടര്‍ ഡി.ആര്‍ മേഘശ്രീ ഉദ്ഘാടനം ചെയ്തു. ഹോം വോട്ടിംഗ് നടപടികള്‍ കൃത്യതയോടെയും സുതാര്യതയോടെയും നടത്തണമെന്നും വോട്ടറുടെ സ്വകാര്യത ഉറപ്പാക്കണമെന്നും കളക്ടര്‍ നിര്‍ദേശിച്ചു.

നിയമസഭാ തെരഞ്ഞെടുപ്പില്‍ 85 വയസ്സിന് മുകളിലുള്ള മുതിര്‍ന്ന പൗരന്മാര്‍, 40 ശതമാനത്തിലധികം ഭിന്നശേഷിയുള്ളവര്‍, കിടപ്പുരോഗികള്‍ എന്നിവര്‍ക്ക് വോട്ടവകാശം വിനിയോഗിക്കുന്നതിനുള്ള ഹോം വോട്ടിംഗ് പ്രക്രിയ ജില്ലയില്‍ തിങ്കളാഴ്ച (മാര്‍ച്ച് 30) ആരംഭിക്കും. ഏപ്രില്‍ അഞ്ച് വരെ ഉദ്യോഗസ്ഥര്‍ അപേക്ഷകരുടെ വീട്ടിലെത്തി വോട്ട് രേഖപ്പെടുത്തും. ജില്ലയില്‍ ആകെ 4420 പേരാണ് ഹോം വോട്ടിങ്ങിനായി അപേക്ഷ സമര്‍പ്പിച്ചത്.

2025-26 സാമ്പത്തിക വര്‍ഷാവസാന കണക്കെടുപ്പുമായി ബന്ധപ്പെട്ട് ഏപ്രില്‍ ഒന്നിന് ട്രഷറി ഇടപാടുകള്‍ ഉണ്ടാകില്ലെന്ന് ജില്ലാ ട്രഷറി ഓഫീസര്‍ അറിയിച്ചു.

വസ്തു നികുതി പിരിവ് സുഗമമാക്കുന്നതിനായി ഇന്ന(മാര്‍ച്ച് 29) നെന്മേനി ഗ്രാമപഞ്ചായത്ത് ഓഫീസ് തുറന്ന് പ്രവര്‍ത്തിക്കുമെന്ന് സെക്രട്ടറി അറിയിച്ചു.

നിയമസഭാ പൊതുതെരഞ്ഞെടുപ്പുമായി ബന്ധപ്പെട്ട് ആന്റി ഡീഫേസ്മെന്റ് സ്‌ക്വാഡിന്റെ നേതൃത്വത്തില്‍ ജില്ലയില്‍ നടത്തിയ പരിശോധനയില്‍ ശനിയാഴ്ച 279 പ്രചരണ സാമഗ്രികള്‍ നീക്കം ചെയ്തു.ഇതില്‍ പൊതു ഇടങ്ങളിലായി വിവിധ രാഷ്ട്രീയ പാര്‍ട്ടികള്‍സ്ഥാപിച്ച 177 പോസ്റ്ററുകള്‍, 14 ബാനറുകള്‍, 63 മറ്റ് പ്രചരണ സാമഗ്രികള്‍, സ്വകാര്യ ഇടങ്ങളില്‍ സ്ഥാപിച്ച 12 പോസ്റ്ററുകള്‍ 13 മറ്റ് പ്രചരണ സാമഗ്രികള്‍ എന്നിവ ഉള്‍പ്പെടുന്നു.

സി-വിജില്‍ ആപ്പ് മുഖേന ജില്ലയില്‍ വെള്ളിയാഴ്ച 246 പരാതികള്‍ ലഭിച്ചു. മുഴുവന്‍ പരാതികളും പരിഹരിച്ചു. ജില്ലയില്‍ ഇതുവരെ 1811 പരാതികളാണ് സി-വിജില്‍ ആപ്പ് വഴി ലഭിച്ചത്. നിയമസഭാ തെരഞ്ഞെടുപ്പിന്റെ മാതൃകാ പെരുമാറ്റ ചട്ടലംഘനവുമായി ബന്ധപ്പെട്ട് സി- വിജില്‍ ആപ്ല് മുഖേന പൊതുജനങ്ങള്‍ക്ക് നേരിട്ട് പരാതി നല്‍കാം.

തെരഞ്ഞെടുപ്പ് അവബോധ പ്രവര്‍ത്തനങ്ങളുടെ ഭാഗമായി ഇന്ന് (മാര്‍ച്ച് 29) വൈകുന്നേരം നാലിന് ബാണസുര സാഗര്‍ ഡാമില്‍ കയാക്കിങ്ങും തുടര്‍ന്ന് ഫ്‌ലാഷ്‌മോബും സംഘടിപ്പിക്കും. തെരഞ്ഞെടുപ്പ് ഓഫീസറായ ജില്ലാ കളക്ടര്‍ ഡി ആര്‍ മേഘശ്രീ ഉദ്ഘാടനം ചെയ്യും.

സ്വീപ് വയനാട് പദ്ധതിയുടെ ഭാഗമായി ജില്ലയിലെ വിവിധ സ്ഥലങ്ങളില്‍ തെരഞ്ഞെടുപ്പ് ബോധവത്ക്കരണ പരിപാടികള്‍ സംഘടിപ്പിച്ചു. കല്‍പറ്റ സ്വീപ് ടീമിന്റെയും ഐ.ടി.ഡി.പി വകുപ്പിന്റെയും സംയുക്താഭിമുഖ്യത്തില്‍ മേപ്പാടി പരൂര്‍ക്കുന്ന് ഉന്നതിയില്‍ നടന്ന പരിപാടി ശ്രദ്ദേയമായി. ഐ.ടി.ഡി.പി ജില്ലാ ഓഫീസര്‍ ജി പ്രമോദ് വോട്ടിന്റെ പ്രാധാന്യം വിശദീകരിച്ചു. ഡെപ്യൂട്ടി കളക്ടര്‍ എം.കെ ഇന്ദു, പി.എസ് രതീഷ്, ട്രൈബല്‍ എക്സ്റ്റന്‍ഷന്‍ ഓഫീസര്‍ രാജനികാന്ത്, വിവിധ ഉദ്യോഗസ്ഥര്‍ എന്നിവര്‍ പങ്കെടുത്തു. 

കാട്ടിക്കുളം ഇലക്ട്രിക്കൽ സെക്ഷൻ പരിധിയിലെ വൈദ്യുതി ലൈനിൽ അറ്റകുറ്റ പ്രവൃത്തി നടക്കുന്നതിനാൽ ഇന്ന് (മാർച്ച് 28) രാവിലെ ഒൻപത്   മുതൽ വൈകിട്ട് അഞ്ച് വരെ അപ്പപ്പാറ, കരമാട്, ചകിണി, അരണപാറ, അക്കൊല്ലി, കുന്നിയൂർ, കാൽകുനി, വെള്ളറ നരിക്കൽ, തോൽപ്പെട്ടി, തിരുനെല്ലി പ്രദേശങ്ങളിൽ വൈദ്യുതി വിതരണം പൂർണ്ണമായോ ഭാഗികമായോ മുടങ്ങും.

വെള്ളമുണ്ട ഇലക്ട്രിക്കൽ സെക്ഷൻ പരിധിയിലെ മാമ്മട്ടംകുന്ന്, പാലമുക്ക്, പാസ്റ്ററൽ സെന്റർ പ്രദേശങ്ങളിൽ വൈദ്യുതി വിതരണം ഭാഗികമായി 
മുടങ്ങും.

2025-26 വർഷത്തെ വിവിധ നികുതികൾ അടവാക്കുന്നതിന് പൊതുജനങ്ങൾക്കായി മാർച്ച് 29 (ഞായർ) ഓഫീസ് പ്രവൃത്തി ദിവസമായിരിക്കുമെന്ന് മേപ്പാടി ഗ്രാമപഞ്ചായത്ത് സെക്രട്ടറി അറിയിച്ചു.