നിയമസഭാ തിരഞ്ഞെടുപ്പിനോടനുബന്ധിച്ച് വോട്ടെടുപ്പ് ദിവസമായ ഏപ്രില്‍ ഒന്‍പതിന് സര്‍ക്കാര്‍/അര്‍ധ സര്‍ക്കാര്‍/ സ്വകാര്യ/ വാണിജ്യ സ്ഥാപനങ്ങള്‍/ ബാങ്കുകള്‍/വിദ്യാഭ്യാസ/ പൊതുമേഖല സ്ഥാപനങ്ങള്‍ക്ക് ഉള്‍പ്പെടെ അവധി പ്രഖ്യാപിച്ചു. ജീവനക്കാര്‍ക്ക് ശമ്പളത്തോടുകുടിയുള്ള അവധിയാണ് പ്രഖ്യാപിച്ചിരിക്കുന്നത്.

നിയമസഭാ തിരഞ്ഞെടുപ്പിന് 48 മണിക്കൂര്‍ മുമ്പും വോട്ടെടുപ്പ് ദിവസവും ദിനപത്രങ്ങള്‍ അടക്കമുള്ള അച്ചടിമാധ്യമങ്ങളില്‍ നല്‍കുന്ന തിരഞ്ഞെടുപ്പ് പരസ്യങ്ങള്‍ക്ക് ജില്ലാതല മീഡിയ മോണിറ്ററിങ് ആന്‍ഡ് മീഡിയ സര്‍ട്ടിഫിക്കേഷന്‍ കമ്മിറ്റിയുടെ (എം.സി.എം.സി) മുന്‍കൂര്‍ അനുമതി നിര്‍ബന്ധം. വോട്ടെടുപ്പ് ദിവസമായ ഏപ്രില്‍ ഒമ്പതിനും തലേദിവസമായ ഏപ്രില്‍ എട്ടിനും പത്രങ്ങളില്‍ പരസ്യം നല്‍കാന്‍ ഉദ്ദേശിക്കുന്ന സ്ഥാനാര്‍ഥികളും വ്യക്തികളും സമിതിയുടെ അംഗീകാരം വാങ്ങിയിരിക്കണം. പരസ്യം പ്രസിദ്ധീകരിക്കാന്‍ ഉദ്ദേശിക്കുന്ന തീയതിക്ക് രണ്ട് ദിവസം മുമ്പെങ്കിലും അപേക്ഷ സമര്‍പ്പിക്കണം.

ശാരീരികഅവശതയുള്ള 85 വയസിനു മുകളില്‍ പ്രായമുള്ള മുതിര്‍ന്ന പൗരര്‍, ഭിന്നശേഷിവിഭാഗം വോട്ടര്‍മാര്‍ എന്നിവര്‍ക്കുള്ള ഹോം വോട്ടിംഗ് പ്രക്രിയയിലൂടെ ജില്ലയില്‍ വോട്ട് ചെയ്ത്  14,376 വോട്ടര്‍മാര്‍. 85  വയസ്സിന് മുകളിലുള്ള 10,384 പേരും ഭിന്നശേഷിക്കാരായ 3992 പേരുമാണ് വീട്ടില്‍ വോട്ട് രേഖപ്പെടുത്തിയത്. മാര്‍ച്ച് 30 മുതല്‍ മുതല്‍ ഏപ്രില്‍ നാലു വരെയാണ് ഹോം വോട്ടിംഗ് നടന്നത്. 12 ഡി ഫോമില്‍  നേരത്തെ 14,912 വോട്ടര്‍മാര്‍ക്കാണ് ജില്ലയില്‍ ഹോം വോട്ടിംഗിന് അനുമതി ലഭിച്ചിരുന്നത്. ഇതില്‍ 10,855 വോട്ടര്‍മാര്‍ മുതിര്‍ന്ന പൗരരും, 4,057 പേര്‍ ഭിന്നശേഷി വിഭാഗത്തിലുള്ളവരുമായിരുന്നു.

നിയമസഭാ തിരഞ്ഞെടുപ്പില്‍ ഉപയോഗിക്കാനുള്ള ഇലക്ട്രോണിക്   വോട്ടിംഗ് യന്ത്രങ്ങളുടെ (ഇ വി എം) കമ്മീഷനിംഗ് ജില്ലയില്‍ പൂര്‍ത്തിയായി.

നിയമസഭാ തിരഞ്ഞെടുപ്പിന്റെ ഭാഗമായി ഇതുവരെ ജില്ലയിൽ 19303 പേർ ഹോം വോട്ടിംഗ് രേഖപ്പെടുത്തി. ജില്ലയിലെ 13 നിയോജകമണ്ഡലങ്ങളിലായി വോട്ടർപട്ടികയിൽ 85 വയസ്സ് പൂർത്തിയായവർ, വോട്ടർപട്ടികയിൽ ഭിന്നശേഷി മാർക്ക് ചെയ്തതും 40 ശതമാനത്തിലധികം ഭിന്നശേഷിയുളളതുമായ വോട്ടർമാർ എന്നിവർക്ക് അപേക്ഷിച്ച പ്രകാരം ഹോം വോട്ടിങ് സംവിധാനമാണ് ജില്ലയിൽ നടപ്പിലാക്കിയത്. ഹോം വോട്ടിംഗ് പ്രക്രിയ ഏപ്രിൽ 6 വരെ ഉണ്ടായിരിക്കും.

ചേലക്കര – 1645

കുന്നംകുളം – 1303

ഗുരുവായൂർ – 1105

മണലൂർ- 1765

വടക്കാഞ്ചേരി – 1658

ഒല്ലൂർ – 1172

തൃശ്ശൂർ – 1092

 നിയമസഭ പൊതു തിരഞ്ഞെടുത്തിനോടനുബന്ധിച്ച് ജില്ലയിലെ 13 നിയോജക മണ്ഡലങ്ങളിലേക്കും വോട്ടെടുപ്പിനായി ഉപയോഗിക്കുന്ന ഇലക്ട്രോണിക് വോട്ടിംഗ് മെഷീനുകളുടെ കമ്മീഷനിങ് (20% കൺട്രോൾ യൂണിറ്റ്, 20% ബാലറ്റ് യൂണിറ്റ്, 30% വി.വി പാറ്റ് റിസർവ് ഉൾപ്പെടെ) വിവിധ കമ്മീഷനിങ് സെന്ററുകളിൽ വെച്ച് പൂർത്തിയായെന്ന് ജില്ല തിരഞ്ഞെടുപ്പ് ഉദ്യോഗസ്ഥയും ജില്ലാ കളക്ടറുമായ ശിഖ സുരേന്ദ്രൻ അറിയിച്ചു. വരണാധികാരികളുടെയും, ഭാരത് ഇലക്ട്രോണിക്സ് ലിമിറ്റഡിലെ എൻജിനീയറിങ്ങ്മാരുടെയും നേതൃത്വത്തിലും സ്ഥാനാർത്ഥികളുടെയും അവരുടെ പ്രതിനിധികളുടെയും സാന്നിധ്യത്തിലുമാണ് കമ്മീഷനിങ്ങ് നടത്തിയത്.

ജില്ലാ ഇലക്ഷൻ ടീമിന്റെയും സ്വീപ് തൃശൂരിന്റെയും നേതൃത്വത്തിൽ ജില്ലയിൽ നൂറ് വയസ്സിനു മുകളിൽ പ്രായമുള്ള സമ്മതിദായകരെ ആദരിച്ചു. വോട്ടർ ബോധവത്കരണ പ്രവർത്തനങ്ങളുടെ ഭാഗമായി സംഘടിപ്പിച്ച ചടങ്ങിൽ സ്വീപ് നോഡൽ ഓഫീസറും അസിസ്റ്റന്റ് കളക്ടറുമായ സ്വാതി മോഹൻ റാത്തോഡ് പൊന്നാടയണിയിച്ച് ആദരിച്ചു.

വെളിയന്നൂർ സ്വദേശിനി കല്യാണി പി വി, പെരിങ്ങാവ് സ്വദേശിനി റോസി വർഗീസ് എന്നിവരെയാണ് ചടങ്ങിൽ ആദരിച്ചത്. അസിസ്റ്റന്റ് നോഡൽ ഓഫീസർ ബിനി സെബാസ്റ്റ്യനും സ്വീപ് ടീമംഗങ്ങളും ചടങ്ങിൽ പങ്കെടുത്തു.

തെരഞ്ഞെടുപ്പിനോടനുബന്ധിച്ച് നിശ്ശബ്ദ പ്രചാരണ കാലയളവിൽ വോട്ടർമാരെ സ്വാധീനിക്കുന്ന തരത്തിലുള്ള പ്രചാരണങ്ങൾക്ക് വിലക്കേർപ്പെടുത്തി തിരഞ്ഞെടുപ്പ് കമ്മീഷൻ. ജനപ്രതിനിധ്യ നിയമം 1951ലെ വകുപ്പ് 126(1)(ബി) പ്രകാരം പോളിംഗ് അവസാനിക്കുന്നതിന് മുമ്പുള്ള 48 മണിക്കൂർ സമയത്ത് ടെലിവിഷൻ, റേഡിയോ, കേബിൾ നെറ്റ്‌വർക്കുകൾ തുടങ്ങി ഏതെങ്കിലും മാധ്യമങ്ങളിലൂടെ ഇത്തരത്തിലുള്ള ഉള്ളടക്കങ്ങൾ പ്രചരിപ്പിക്കുന്നത് അനുവദനീയമല്ലെന്ന് കമ്മീഷൻ അറിയിച്ചു. അഭിപ്രായ സർവേകൾ പ്രദർശിപ്പിക്കുന്നതിനും വിലക്കുണ്ട്. ഏപ്രിൽ ഏഴിന് വൈകിട്ട് ആറ് മുതൽ ഏപ്രിൽ ഒൻപതിന് വൈകിട്ട് ആറ് വരെയാണ് നിയന്ത്രണം.