*

ജല ജീവന്‍ മിഷന്റെ ഭാഗമായി ജില്ലയില്‍ 5380 ഗാര്‍ഹിക കുടിവെള്ള കണക്ഷനുകള്‍ക്ക് അംഗീകാരം നല്‍കി. ജലനിധിയുടെ 5010 ഗാര്‍ഹിക കണക്ഷനും ഭൂജല വകുപ്പിന്റെ 370 ഗാര്‍ഹിക കണക്ഷനുകള്‍ക്കുമാണ് ജില്ലാ ജല ശുചിത്വ മിഷന്‍ അംഗീകാരം നല്‍കിയത്. ഭൂജല വകുപ്പ് 78.53 ലക്ഷം രൂപയും ജലനിധി 936 ലക്ഷവുമാണ് പദ്ധതി്ക്കായി വിനിയോഗിക്കുന്നത്.
ജലനിധി നല്‍കുന്ന ഗാര്‍ഹിക കണക്ഷനുകളില്‍ പൂതാടി, പുല്‍പ്പള്ളി, എടവക, നെന്മേനി, പൊഴുതന എന്നീ പഞ്ചായത്തുകളിലും ഭൂജല വകുപ്പ് നല്‍കുന്ന ഗാര്‍ഹിക കണക്ഷനുകള്‍ കണിയാമ്പറ്റ, തൊണ്ടര്‍നാട്, പൊഴുതന എന്നീ പഞ്ചായത്തുകളിലും കുടിവെള്ളമെത്തിക്കും.

ഒ.ബി.സി വിഭാഗത്തില്‍പ്പെട്ടവരും കുടുംബ വാര്‍ഷിക വരുമാനം ഒരു ലക്ഷം രൂപയില്‍ കൂടാത്തവരും, പരമ്പരാഗതമായി മണ്‍പാത്ര നിര്‍മാണ തൊഴിലില്‍ ഏര്‍പ്പെട്ടിരിക്കുന്നവരുമായ വ്യക്തികള്‍ക്ക് പിന്നോക്ക വിഭാഗ വികസന വകുപ്പ് നടപ്പിലാക്കുന്ന ധനസഹായ പദ്ധതിയ്ക്ക് അപേക്ഷ ക്ഷണിച്ചു. ധനസഹായ പദ്ധതിയ്ക്ക് സെപ്റ്റംബര്‍ 30 അപേക്ഷിക്കാം. അപേക്ഷ ഫോറം www.bcdd.kerala.gov.in എന്ന വിലാസത്തില്‍ ലഭിക്കും. മുന്‍ വര്‍ഷങ്ങളില്‍ ആനുകൂല്യം ലഭിച്ചിട്ടുള്ളവരും 60 വയസ്സ് കഴിഞ്ഞവരും അപേക്ഷിക്കേണ്ടതില്ല. ഫോണ്‍ 0495 2377786
 

കേരള സംസ്ഥാന ലോട്ടറി തൊഴിലാളി ക്ഷേമനിധി ബോര്‍ഡ് വഴിയോര ഭാഗ്യക്കുറി വില്‍പ്പനക്കാര്‍ക്ക് ബീച്ച് അംബ്രല്ല വിതരണം ചെയ്തു. ജില്ലാതല ഉദ്ഘാടനം കല്‍പ്പറ്റ എം.ജി.ടി ഹാളില്‍ ക്ഷേമനിധി ബോര്‍ഡ് ചെയര്‍മാന്‍ പി.ആര്‍.ജയപ്രകാശ് നിര്‍വ്വഹിച്ചു. ജില്ലാ ഭാഗ്യക്കുറി ക്ഷേമനിധി ഓഫീസര്‍ കെ. സെലീനാ ബീവി ,വിവിധ ട്രേഡ് യൂണിയന്‍ നേതാക്കള്‍ തുടങ്ങിയവര്‍ ചടങ്ങില്‍ പങ്കെടുത്തു.

ഐ.സി.ബാലകൃഷ്ണന്‍ എ.എല്‍.എയുടെ ആസ്തി വികസന നിധിയില്‍ നിന്ന് പുല്‍പ്പള്ളി ഗ്രാമ പഞ്ചായത്തിലെ കേളക്കവല-കുളിയന്‍മൂല-പള്ളിത്താഴെ റോഡ് സൈഡ് പ്രൊട്ടക്ഷന്‍ മണ്ണ് ഫില്ലിംഗ് പ്രവൃത്തിയ്ക്ക് ഇരുപത്തിയഞ്ച് ലക്ഷം രൂപയും, മുള്ളന്‍കൊല്ലി ഗ്രാമ പഞ്ചായത്തിലെ ഓണാട്ടുകവല-അയ്യറ്റത്തില്‍ കവല റോഡ് ടാറിംഗ് കോക്രീറ്റിംഗ് പ്രവര്‍ത്തിയ്ക്ക് ഇരുപത് ലക്ഷം രൂപയും അനുവദിച്ചു. പെരിക്കലൂര്‍ ഗവ. ഹയര്‍ സെക്കന്ററി സ്‌കൂളിന് സ്‌കൂള്‍ ബസ് വാങ്ങുതിന് പതിനെട്ട് ലക്ഷം രൂപയും, അമ്പലവയല്‍ ഗവ.എല്‍.പി.സ്‌കൂള്‍, പൂതാടി ഗവ.യു.പി സ്‌കൂള്‍ എന്നീ വിദ്യാലയങ്ങള്‍ക്ക് സ്‌കൂള്‍ ബസ് അനുവദിക്കുതിന് പതിനേഴ് ലക്ഷം രൂപ വീതവും.

മീനങ്ങാടി ഗവ.പോളിടെക്‌നിക് കോളേജില്‍ ആരംഭിക്കുന്ന ഹ്രസ്വകാല തൊഴിലധിഷ്ഠിത കോഴ്‌സുകളിലേക്ക് അപേക്ഷ ക്ഷണിച്ചു. വയര്‍മാന്‍ ലൈസന്‍സിങ് കോഴ്‌സായ ഇലക്ട്രിക്കല്‍ വയറിങ് ആന്റ് സര്‍വീസിങ് (10 മാസം), റഫ്രിജറേഷന്‍ ആന്റ് എയര്‍ കണ്ടീഷന്‍ (6 മാസം) എന്നീ കോഴ്‌സുകള്‍ക്ക് എസ്.എസ്.എല്‍.സി യോഗ്യതയുള്ളവര്‍ക്ക് അപേക്ഷിക്കാം. അപേക്ഷാ ഫോം www.gptcmdi.ac.in എന്ന വെബ്‌സൈറ്റില്‍ ലഭിക്കും. ഫോണ്‍: 04936 248100, 9744134901

ശുചീകരണ തൊഴിലുകളില്‍ ഏര്‍പ്പെട്ടിരിക്കുന്നവരുടെ മക്കള്‍ക്ക് 2020-21 വര്‍ഷത്തില്‍ പ്രീമെട്രിക് സ്‌കോളര്‍ഷിപ്പ് അനുവദിക്കുന്നതിനുള്ള പദ്ധതി പ്രകാരം ജില്ലാ പട്ടികജാതി വികസന ഓഫീസര്‍ അപേക്ഷ ക്ഷണിച്ചു. തുകല്‍ ഉരിക്കല്‍, തുകല്‍ ഊറക്കിടല്‍, ഗ്രാമപഞ്ചായത്ത്, നഗരസഭ തലത്തില്‍ മാലിന്യം നീക്കം ചെയ്യല്‍, പാഴ്‌വസ്തുക്കള്‍ ശേഖരിച്ച് വില്‍ക്കല്‍ തുടങ്ങിയ ജോലികളില്‍ ഏര്‍പ്പെട്ടിരിക്കുന്നവരുടെ മക്കള്‍ക്ക് അപേക്ഷിക്കാം. 1 മുതല്‍ 10 വരെ ക്ലാസ്സുകളില്‍ പഠിക്കുന്ന അര്‍ഹരായ വിദ്യാര്‍ത്ഥികള്‍ക്ക് പ്രതിമാസ സ്‌റ്റൈപ്പെന്റും അഡ്‌ഹോക്ക് ഗ്രാന്റും അനുവദിക്കും.

ചുണ്ണാമ്പുകല്ല് - ഡോളമൈറ്റ് ഖനികള്‍,  ബീഡി,സിനിമാ തൊഴിലാളികളുടെ മക്കളിൽ ഒന്നാം ക്ലാസിലും അതിനു മുകളിലും പഠിക്കുന്ന കുട്ടികള്‍ക്ക്   വിദ്യാഭ്യാസത്തിനുള്ള ധനസഹായം നല്‍കുന്നതിന് അപേക്ഷ ക്ഷണിച്ചു.

വനിതാശിശുവികസനവകുപ്പിന്റെ കീഴില്‍ പ്രവര്‍ത്തിക്കുന്ന ഗവ. ചില്‍ഡ്രന്‍സ് ഹോമിലെ കൗണ്‍സിലര്‍ തസ്തികയിലേക്ക് ഒരുവര്‍ഷത്തേയ്ക്ക് കരാര്‍ അടിസ്ഥാനത്തില്‍ നിയമനം നടത്തുന്നതിനായി യോഗ്യതയുളള ഉദ്യോഗാര്‍ത്ഥികളില്‍ നിന്നും അപേക്ഷ ക്ഷണിച്ചു. പ്രതിമാസം 21,850 രൂപ ഹോണറേറിയം ലഭിക്കും. അംഗീകൃത സര്‍വ്വകലാശാലയില്‍ നിന്നും സോഷ്യല്‍വര്‍ക്കിലോ സൈക്കോളജിയിലോ ബിരുദമുള്ള കൗണ്‍സിലിംഗില്‍ 3 വര്‍ഷത്തെ പ്രവര്‍ത്തിപരിചയമുള്ളവര്‍ക്ക് അപേക്ഷിക്കാം. യോഗ്യതാ പരീക്ഷയുടെയും കൂടിക്കാഴ്ചയുടെയും അടിസ്ഥാനത്തിലായിരിക്കും നിയമനം. സെപ്തംബര്‍ 30 വരെ ഫോട്ടോ പതിച്ച അപേക്ഷകള്‍ സ്വീകരിക്കും.

ജില്ലയില്‍ രോഗലക്ഷണങ്ങള്‍ പ്രകടിപ്പിക്കാത്ത, കാറ്റഗറി എ വിഭാഗത്തില്‍ പെടുന്ന കോവിഡ് രോഗികള്‍ക്ക് സര്‍ക്കാര്‍ മാര്‍ഗനിര്‍ദ്ദേശങ്ങള്‍ക്ക് വിധേയമായി ഹോം ഐസൊലേഷന്‍ തിരഞ്ഞെടുക്കുന്നതിന് അനുമതി നല്‍കി ജില്ലാ കലക്ടര്‍ ഡോ. അദീല അബ്ദുള്ള ഉത്തരവിട്ടു. വീടുകളില്‍ സൗകര്യമുണ്ടെങ്കില്‍ മാത്രമാണ് അനുമതി. എന്നാല്‍ ഇവര്‍ക്ക് വീട്ടുനിരീക്ഷണം തിരഞ്ഞെടുക്കണമെന്ന് നിര്‍ബന്ധമില്ല.

കോവിഡ് പ്രതിരോധ പ്രവര്‍ത്തനങ്ങളുമായി ബന്ധപ്പെട്ട് ജില്ലയില്‍ ഹൗസ് സര്‍ജന്‍മാരുടെ കുറവ് അനുഭവപ്പെടുന്ന പശ്ചാത്തലത്തില്‍ മേപ്പാടി ഡി.എം വിംസ് മെഡിക്കല്‍ കോളേജിലെ പകുതി ഹൗസ് സര്‍ജന്‍മാരുടെ സേവനം ജില്ലാ മെഡിക്കല്‍ ഓഫീസര്‍ക്ക് വിട്ടുനല്‍കാന്‍ ജില്ലാ കലക്ടര്‍ ഡോ. അദീല അബ്ദുള്ള ഉത്തരവ് നല്‍കി. ഇവരെ കോവിഡിതര ചുമതലകളില്‍ വിന്യസിക്കാനും താമസ- ഭക്ഷണ- യാത്രാ സൗകര്യങ്ങള്‍ അനുവദിക്കാനും ജില്ലാ മെഡിക്കല്‍ ഓഫീസര്‍ക്ക് കലക്ടര്‍ നിര്‍ദ്ദേശം നല്‍കി.