മനുഷ്യവാസ പ്രദേശങ്ങളില്‍ ഇറങ്ങുന്ന പാമ്പുകളെ പിടികൂടി അവയുടെ സ്വാഭാവിക ആവാസ സ്ഥലങ്ങളില്‍ വിട്ടയക്കുന്നതിന് പാമ്പ് പിടുത്തക്കാര്‍ക്ക് വനം വകുപ്പില്‍ പരിശീലനം നല്കി സര്‍ട്ടിഫിക്കറ്റ് നല്കുന്നു. താത്പര്യമുള്ളവര്‍  സെപ്തംബര്‍ 30ന് മുമ്പ് ആലപ്പുഴ സാമൂഹ്യവനവത്കരണ വിഭാഗം  അസിസ്റ്റന്റ്   ഫോറസ്റ്റ് കണ്‍സര്‍വേറ്ററുടെ കാര്യാലയത്തില്‍ നിര്‍ദ്ദിഷ്ട മാതൃകയില്‍ അപേക്ഷ സമര്‍പ്പിക്കണം. വിശദവിവരങ്ങള്‍ക്ക് 0477 - 2246034

രോഗ ലക്ഷണങ്ങള്‍ ഇല്ലാത്ത കോവിഡ് ബാധിതര്‍ക്ക് വീടുകളില്‍ തന്നെ സമ്പര്‍ക്കം ഒഴിവാക്കി താമസിക്കാന്‍ അനുവദിക്കുമെന്ന് ജില്ലാ കളക്ടര്‍ എ അലക്‌സാണ്ടര്‍ അറിയിച്ചു. ജില്ലാ ദുരന്ത നിവാരണ അതോറിറ്റി ഇതു സംബന്ധിച്ച് തീരുമാനമെടുത്തിട്ടുണ്ട്.

മതിയായ സൗകര്യങ്ങളുള്ള വീടുകളില്‍ സര്‍ക്കാര്‍ അനുമതിയോടെ കഴിയുന്ന രോഗികള്‍ക്കും കുടുംബാംഗങ്ങള്‍ക്കും മാനസിക പിന്തുണ നല്‍കാന്‍ പൊതു സമൂഹം തയ്യാറാകണമെന്നും അനാവശ്യ പ്രചാരണങ്ങള്‍ ഒഴിവാക്കണമെന്നും കളക്ടര്‍ നിര്‍ദേശിച്ചു.

ആലപ്പുഴ :മത്സ്യഫെഡിന്റെ കരുവാറ്റ ഫിഷ് മാര്‍ട്ടിന്റെയും മത്സ്യസംഭരണ കേന്ദ്രത്തിന്റെയും ഉദ്ഘാടനം സെപ്റ്റംബര്‍ 17 ന് രാവിലെ 9 മണിക്ക് ഫിഷറിസ്-തുറമുഖ വകുപ്പ് മന്ത്രി ജെ മേഴ്സികുട്ടിയമ്മ നിര്‍വ്വഹിക്കും. മത്സ്യഫെഡിന്റെ `തീരത്ത് നിന്ന് വിപണിയിലേക്ക്`എന്നുള്ള പദ്ധതിയുടെ ഭാഗമായി മത്സ്യത്തൊഴിലാളികള്‍ പിടിച്ചുകൊണ്ടുവരുന്ന മത്സ്യം നേരിട്ട് അവരില്‍നിന്ന് സംഭരിച്ച് ഗുണമേന്മ നഷ്ടപ്പെടാതെ ഉപഭോക്താക്കള്‍ക്ക് ന്യായവിലയ്ക്ക് എത്തിക്കുന്നതിന് വേണ്ടി ആലപ്പുഴ ജില്ലയില്‍ ആരംഭിക്കുന്ന രണ്ടാമത്തെ ഫിഷ് മാര്‍ട്ടാണിത്. ജില്ലയിലെ ആദ്യത്തെ മത്സ്യസംഭരണകേന്ദ്രവുമാണ് കരുവാറ്റയിലേത്.

ആലപ്പുഴ: പൊതുജനങ്ങളുടെ പരാതികൾക്കും അപേക്ഷകൾക്കും അതിവേഗത്തിലും ജനസൗഹൃദപരമായും തീർപ്പുണ്ടാക്കുന്നതിന് ചേർത്തല താലൂക്കിലെ ജില്ല കളക്ടറുടെ പൊതുജന പരാതി പരിഹാര അദാലത്ത് ഓൺലൈനായി വീഡിയോ കോൺഫറൻസിലൂടെ ഒക്ടോബർ അഞ്ചിന് നടത്തും. അദാലത്തിലേക്കുള്ള എൽ ആർ എം കേസുകൾ, ഭൂമിയുടെ തരംമാറ്റം / പരിവർത്തനം, റേഷൻ കാർഡ് ബി പി എൽ ആക്കുന്നതിനുള്ള അപേക്ഷ, ലൈഫ്, പ്രളയം സംബന്ധമായ പരാതി എന്നിവ ഒഴികെയുള്ള എല്ലാ അപേക്ഷകളും പരാതികളും ഈ മാസം 17 മുതൽ 23 വരെ ചേർത്തല താലൂക്കിലെ അക്ഷയ സെന്റർ വഴി സമർപ്പിക്കാവുന്നതാണ്. അക്ഷയ സെന്റർ വഴി ലഭിക്കുന്ന അപേക്ഷകൾ മാത്രമേ അദാലത്തിൽ പരിഗണിക്കുകയുള്ളൂ.

കായംകുളം ആറാട്ടുപുഴ പെരുമ്പിള്ളില്‍ സ്വദേശിയായ അര്‍ച്ചന എന്ന യുവതി ആത്മഹത്യ ചെയ്യാനിടയായ സംഭവത്തില്‍ വനിതാകമ്മിഷന്‍ സ്വമേധയാ കേസെടുത്തു. സംഭവത്തെക്കുറിച്ചന്വേഷിച്ച് അടിയന്തരമായി റിപ്പോര്‍ട്ട് സമര്‍പ്പിക്കാന്‍ ആലപ്പുഴ പോലീസ് സൂപ്രണ്ടിന് വനിതാ കമ്മിഷന്‍ അംഗം അഡ്വ. എം.എസ്.താര നിര്‍ദേശം നല്‍കി. റിപ്പോര്‍ട്ടിന്റെ അടിസ്ഥാനത്തില്‍ തുടര്‍ നടപടികള്‍ സ്വീകരിക്കും.

‌ആലപ്പുഴ :ചെങ്ങന്നൂർ വെറ്ററിനറി പോളിക്ലിനിക്കിലെ ലാബ് ടെക്നിഷ്യൻ ഒഴിവിലേക്ക് ദിവസവേതന അടിസ്ഥാനത്തിൽ ലാബ് ഡിപ്ലോമ കോഴ്സ് പാസ്സായ ഉദ്യോഗർത്ഥികളെ വോക്ക് ഇൻ ഇന്റർവ്യൂനായി ക്ഷണിക്കുന്നു.വെറ്ററിനറി യൂണിവേഴ്സിറ്റിയിൽ നിന്നും വെറ്ററിനറി ലാബ് ഡിപ്ലോമ കഴിഞ്ഞവർക്ക് മുൻഗണന. താല്പര്യമുള്ളവർ ആവശ്യമായ രേഖകൾ സഹിതം  2020 സെപ്റ്റംബർ 22 ന് രാവിലെ 11 മണിക്ക് മുഖാമുഖത്തിനും പ്രാക്ടിക്കൽ ടെസ്റ്റിനുമായി ചെങ്ങന്നൂർ വെറ്റിറിനറി പോളി ക്ലിനിക്കിൽ ഹാജരാകേണ്ടതാണ്.

ആലപ്പുഴ :സമഗ്ര ശിക്ഷാ കേരളം ആലപ്പുഴ ജില്ലയിലെ വിവിധ ബി. ആര്‍.സി കളില്‍ നിലവിലുള്ള ഒഴിവുകളിലേക്ക് ഡെപ്യൂട്ടേഷന്‍ വ്യവസ്ഥയില്‍ ബി. ആര്‍. സി ട്രെയിനര്‍ തസ്തികയില്‍ നിയമനം നടത്തുന്നതിനായി ആലപ്പുഴ എസ്. എസ്. കെ ജില്ലാ പ്രൊജക്റ്റ് കോ ഓര്‍ഡിനേറ്ററുടെ കാര്യാലയത്തില്‍ വെച്ച് സെപ്തംബര്‍ 17 ല്‍ നടത്താന്‍  തീരുമാനിച്ചിരുന്ന അഭിമുഖം സെപ്തംബര്‍ 22 ലേക്ക് മാറ്റിവെച്ചു. ഫോണ്‍ - 0477 2239655

ആലപ്പുഴ: ഇലക്ട്രിഷ്യന്‍, പ്ലംബര്‍, പെയിന്റര്‍, കാര്‍പന്റര്‍  എന്നിങ്ങനെ 42 സേവനമേഖലകളിലെ വിദഗ്ധരുടെ സേവനങ്ങള്‍ വിരല്‍തുമ്പില്‍ ഒരുക്കി സ്‌കില്‍ രജിസ്ട്രി ആപ്പ്. തൊഴിലും നൈപുണ്യവും വകുപ്പിന് കീഴിലുള്ള സംസ്ഥാന നൈപുണ്യ വികസന മിഷനായ കേരള അക്കാദമി ഫോര്‍ സ്‌കില്‍സ് എക്‌സലന്‍സാണ് (കെ.എ.എസ്.ഇ)  'സ്‌കില്‍ രജിസ്ട്രി' എന്ന പേരില്‍ മൊബൈല്‍ ആപ്ലിക്കേഷന്‍ പ്രവര്‍ത്തന സജ്ജമാക്കിയത്.