പാലക്കാട് ജില്ലാ വിദ്യാഭ്യാസ പരിധിയില്‍ 2020 ജൂലൈ ഡി. എല്‍ എഡ് പരീക്ഷാ സെന്ററായ മുതലമട ജി.എച്ച്.എസ് കോവിഡ്-19 ക്വാറന്റൈന്‍ കേന്ദ്രമാക്കിയതിനാല്‍ ജൂലൈ 13 ന് മുതലമട ജി.എച്ച്.എസ് സെന്ററില്‍ നടത്താനിരുന്ന ഡി.എല്‍.എഡ് പരീക്ഷകള്‍ കൊല്ലങ്കോട് വൈ.എം.ജി.എച്ച് എസിലേക്ക് മാറ്റിയതായി ജില്ലാ വിദ്യാഭ്യാസ ഓഫീസര്‍ അറിയിച്ചു. പരീക്ഷാര്‍ത്ഥികള്‍ പുതുക്കിയ പരീക്ഷാ കേന്ദ്രത്തിലാണ്് എത്തേണ്ടത്. 

പാലക്കാട് താലൂക്കിലെ കടുംതുരുത്തി ക്ഷേത്രത്തില്‍  ട്രസ്റ്റി നിയമനത്തിന്  ഹിന്ദുമത വിശ്വാസികള്‍ക്ക് അപേക്ഷിക്കാം. താത്പര്യമുള്ളവര്‍ ജൂലൈ 22 ന് വൈകീട്ട് അഞ്ചിന് മുന്‍പ് മലബാര്‍ ദേവസ്വം ബോര്‍ഡ് അസിസ്റ്റന്റ് കമ്മീഷണര്‍ക്ക് നിശ്ചിത ഫോറത്തില്‍ അപേക്ഷ നല്‍കണം. അപേക്ഷാ ഫോറം മലബാര്‍ ദേവസ്വം ബോര്‍ഡിന്റെwww.malabardevaswom.kerala.gov.in ല്‍ ലഭിക്കും.

 സുഭിക്ഷ കേരളം പദ്ധതിയുടെ ഭാഗമായി ജില്ലാ പഞ്ചായത്തിന്റെ ആഭിമുഖ്യത്തില്‍ കുന്നന്നൂര്‍ സംസ്ഥാന വിത്തുല്പാദന കേന്ദ്രത്തിന്റെ നെല്‍കൃഷിയിടത്തിലെ വരമ്പുകളില്‍ പച്ചക്കറി കൃഷിക്ക് തുടക്കമായി. മരുതറോഡ് ഗ്രാമ പഞ്ചായത്തിലെ തൊഴിലുറപ്പ് തൊഴിലാളികളുടെ സഹായത്തോടെയാണ് പച്ചക്കറി കൃഷി ചെയ്യുന്നത്.  പദ്ധതിയുടെ ഉദ്ഘാടനം ജില്ലാ പഞ്ചായത്ത് പ്രസിഡണ്ട് അഡ്വ. കെ. ശാന്തകുമാരി നിര്‍വഹിച്ചു. മരുതറോഡ് ഗ്രാമപഞ്ചായത്ത് പ്രസിഡന്റ് രാജലക്ഷ്മി അധ്യക്ഷയായി.

ജില്ലയിലെ ഗ്രാമപഞ്ചായത്തുകളില്‍  ജലജീവന്‍ മിഷന്‍ നടപ്പിലാക്കുന്നത് സംബന്ധിച്ച് ചര്‍ച്ച ചെയ്യുന്നതിനായി ജലവിഭവ വകുപ്പ് മന്ത്രി കെ.കൃഷ്ണന്‍കുട്ടിയുടെ അധ്യക്ഷതയില്‍ യോഗം ചേരും. ജൂലൈ 13ന് രാവിലെ 10.30ന് കലക്ടറേറ്റ് കോണ്‍ഫറന്‍സ് ഹാളില്‍ നടക്കുന്ന യോഗത്തില്‍ ബന്ധപ്പെട്ട ഉദ്യോഗസ്ഥര്‍ പങ്കെടുക്കണമെന്ന്  സൂപ്രണ്ടിംഗ് എഞ്ചിനീയര്‍ അറിയിച്ചു. ജൂലൈ ആറിന് നടത്താനിരുന്ന യോഗമാണ് 13ന് നടക്കുക. 

കോവിഡ് 19 റെ സമൂഹ വ്യാപന    പ്രതിരോധ പ്രവര്‍ത്തനങ്ങള്‍ സര്‍ക്കാര്‍ കൂടുതല്‍ ശക്തിപ്പെടുത്തുമെന്ന് മന്ത്രി എ.കെ ബാലന്‍ പറഞ്ഞു.  സമ്പര്‍ക്ക രോഗബാധ , ഉറവിടം കണ്ടെത്താത്ത രോഗബാധ പ്രതിരോധിക്കാന്‍ പൊതുജനങ്ങള്‍  ഗൗരവത്തോടെ നിര്‍ദേശങ്ങള്‍ പാലിക്കണമെന്ന് മന്ത്രി ആവശ്യപ്പെട്ടു. കോവിഡ് 19 പ്രതിരോധവുമായി ബന്ധപ്പെട്ട അവലോകന യോഗത്തിന് ശേഷം കലക്ടറേറ്റ് കോണ്‍ഫറന്‍സ് ഹാളില്‍ നടന്ന പത്രസമ്മേളത്തില്‍ സംസാരിക്കുകയായിരുന്നു മന്ത്രി. ജലവിഭവ മന്ത്രി കെ.കൃഷ്ണന്‍കുട്ടിയും പത്രസമ്മേളനത്തില്‍ സന്നിഹിതനായിരുന്നു.

ജില്ലയിലെ റേഷന്‍ കാര്‍ഡുകളില്‍ ഉള്‍പ്പെട്ട എല്ലാ അംഗങ്ങളുടെയും ആധാര്‍ റേഷന്‍കാര്‍ഡുമായി ബന്ധിപ്പിച്ചിട്ടില്ലെങ്കില്‍ കാര്‍ഡ് ഉടമകള്‍ ജൂലൈ 31 നകം അക്ഷയ കേന്ദ്രങ്ങള്‍, റേഷന്‍ കടകള്‍ മുഖേന ലിങ്ക് ചെയ്യണമെന്ന് ജില്ലാ സപ്ലൈ ഓഫീസര്‍ അറിയിച്ചു.

കോവിഡ്-19 ന്റെ പശ്ചാത്തലത്തില്‍ മലബാര്‍ ദേവസ്വം ബോര്‍ഡിന് കീഴിലുള്ള ക്ഷേത്രങ്ങളില്‍ കര്‍ക്കിടക വാവ് ബലിതര്‍പ്പണത്തിന് സമ്പൂര്‍ണ വിലക്ക് ഏര്‍പ്പെടുത്തിയതായി ദേവസ്വം ബോര്‍ഡ് കമ്മീഷണര്‍ അറിയിച്ചു. വിശേഷ  ദിവസങ്ങളിലെബലിതര്‍പ്പണ ചടങ്ങിന് ആളുകള്‍ കൂട്ടമായി എത്തുന്നതിനാല്‍ ശാരീരിക അകലം പാലിക്കുന്നതിനോ ആരോഗ്യസുരക്ഷാ മാനദണ്ഡങ്ങള്‍ പാലിക്കുന്നതിനോ സാധിക്കാതിരിക്കുകയും സമൂഹവ്യാപന സാധ്യത മുന്‍നിര്‍ത്തിയാണ് ചടങ്ങുകള്‍ക്ക്വിലക്കേര്‍പ്പെടുത്തിയത്.