കൊണ്ടോട്ടി മഹാകവി മോയിന്‍കുട്ടി വൈദ്യര്‍ മാപ്പിളകലാ അക്കാദമിയില്‍ ഇന്ന്(മാര്‍ച്ച് 13) നടത്താനിരുന്ന യുവ സമാജം രൂപീകരണ യോഗവും ബാലകൃഷ്ണന്‍ വള്ളിക്കുന്ന് അനുസ്മരണവും മാറ്റിവച്ചതായി സെക്രട്ടറി അറിയിച്ചു. 
 

സി-ഡിറ്റിന്റെ കവടിയാര്‍ കേന്ദ്രത്തില്‍ വിഷ്വല്‍ മീഡിയ കോഴ്‌സുകള്‍ക്ക് അപേക്ഷ ക്ഷണിച്ചു. ഡിപ്ലോമ ഇന്‍ ഡിജിറ്റല്‍ പ്രൊഡക്ഷന്‍, വെബ് ഡിസൈന്‍ ആന്‍ഡ് ഡവലപ്‌മെന്റ് , സര്‍ട്ടിഫിക്കറ്റ് കോഴ്‌സ് ഇന്‍ വീഡിയോഗ്രാഫി, നോണ്‍ ലീനിയര്‍ എഡിറ്റിങ്, ഡിജിറ്റല്‍ സ്റ്റില്‍ ഫോട്ടോഗ്രാഫി തുടങ്ങിയ കോഴ്‌സുകളിലാണ് അപേക്ഷ ക്ഷണിച്ചത്. യോഗ്യത: പ്ലസ്ടു. അപേക്ഷ അയക്കേണ്ട അവസാന തീയതി: മാര്‍ച്ച് 20. ഫോണ്‍: 0471 2721917/8547720167.

ജില്ലയില്‍ മത്സ്യത്തൊഴിലാളി കടാശ്വാസകമ്മീഷന്‍ സിറ്റിങ്  മാര്‍ച്ച് 17ന് രാവിലെ 10ന്  തിരൂര്‍ ഇ.എം.എസ് സംസ്‌കാരിക നിലയത്തില്‍ നടത്തും. സിറ്റിങില്‍ പങ്കെടുക്കാന്‍ കമ്മീഷനില്‍ നിന്നും നോട്ടീസ് കൈപ്പറ്റിയ അപേക്ഷകരും ബന്ധപ്പെട്ട ബാങ്കിന്റെ പ്രതിനിധികളും സിറ്റിങില്‍ ഹാജാരാകണമെന്ന് സെക്രട്ടറി അറിയിച്ചു.
 

കരുവാരക്കുണ്ട്, എടപ്പറ്റ, തുവൂര്‍ ഗ്രാമപഞ്ചായത്തുകളിലെ അങ്കണവാടികളില്‍ വര്‍ക്കര്‍, ഹെല്‍പ്പര്‍ തസ്തികളില്‍ നിയമനം നടത്തുന്നു. അപേക്ഷിക്കുന്നവര്‍ അതത് ഗ്രാമപഞ്ചായത്തുകളില്‍ സ്ഥിരതാമസക്കാരാവണം. താത്പര്യമുള്ള വനിതകള്‍ മാര്‍ച്ച് 31നകം കാളികാവ് അഡീഷനല്‍ ഓഫീസില്‍ അപേക്ഷ നല്‍കണം. അപേക്ഷ ഫോം ഐ.സി.ഡി.എസ് ഓഫീസ്, ബന്ധപ്പെട്ട പഞ്ചായത്തുകള്‍ എന്നിവിടങ്ങളില്‍ നിന്ന് മാര്‍ച്ച് 16 മുതല്‍ ലഭിക്കുമെന്ന് കാളികാവ് ശിശുവികസന പദ്ധതി ഓഫീസര്‍ അറിയിച്ചു.
 

സംസ്ഥാനത്ത് പ്ലാസ്റ്റിക് നിരോധനം കര്‍ശനമായി നടപ്പാക്കിയതിന്റെ പശ്ചാത്തലത്തില്‍ പച്ചക്കറി കൃഷിയിലും  പുതു മാതൃക തീര്‍ക്കുകയാണ്  തൃക്കലങ്ങോട് ഗ്രാമപഞ്ചായത്ത്. 'മണ്‍ചട്ടിയില്‍ പച്ചക്കറികൃഷി' ചെയ്തുകൊണ്ടാണ് തൃക്കലങ്ങോട് പഞ്ചായത്ത് മാതൃകയാവുന്നത്. വിഷരഹിത പച്ചക്കറിയുടെ ഉല്പാദനത്തില്‍ സ്വയം പര്യാപ്തത കൈവരിക്കുക, ജൈവകൃഷി പ്രോത്സാഹിപ്പിക്കുക, സ്ഥലപരിമിതിയുള്ള വര്‍ക്കും കൃഷി ചെയ്യാന്‍ സൗകര്യമൊരുക്കുക തുടങ്ങിയ ആശയങ്ങള്‍ മുന്‍നിര്‍ത്തി കൃഷിഭവന്‍ മുഖേനയാണ് പദ്ധതി നടപ്പാക്കുന്നത്. 2018-19 സാമ്പത്തിക വര്‍ഷം മുതല്‍ ആരംഭിച്ച പദ്ധതി വിജയകരമായി മുന്നേറുകയാണ്.

പരപ്പനങ്ങാടി പാലത്തിങ്ങലില്‍ പക്ഷിപ്പനി സ്ഥിരീകരിച്ച സാഹചര്യത്തില്‍ അടിയന്തര പ്രതിരോധ പ്രവര്‍ത്തനങ്ങള്‍ തുടങ്ങി. പരപ്പനങ്ങാടി നഗരസഭയിലെ 16-ാം ഡിവിഷനായ പാലത്തിങ്ങല്‍ പ്രദേശത്തെ ഒരു കിലോ മീറ്റര്‍ ചുറ്റളവിലുള്ള നാലായിരത്തോളം കോഴികളെയും വളര്‍ത്തുപക്ഷികളെയും കൊന്നൊടുക്കാനും പത്ത് കിലോമീറ്റര്‍ പരിധിയിലെ കോഴിക്കടകളും മുട്ടവില്‍പ്പന കേന്ദ്രങ്ങളും വളര്‍ത്തുപക്ഷി വില്‍പ്പനശാലകളും  അടപ്പിക്കാനും തീരുമാനിച്ചതായി ജില്ലാ കലക്ടര്‍ ജാഫര്‍ മലിക് അറിയിച്ചു. 

    ഇന്ന് തിരുവനന്തപുരം ജില്ലയില്‍ പുതുതായി 21 പേര്‍ രോഗ നിരീക്ഷണത്തിലായി. ജില്ലയില്‍ ഇതുവരെ 815 പേരെയാണ്  സ്‌ക്റീനിംഗിന് വിധേയരാക്കിയത് ജില്ലയില്‍ 160 പേര്‍ വീടുകളില്‍ കരുതല്‍ നിരീക്ഷണത്തിലുണ്ട്. ജനറല്‍ ആശുപത്റി ഐസൊലേഷന്‍ വാര്‍ഡില്‍ ഇന്ന്  2 പേരും മെഡിക്കല്‍ കോളേജ് ഐസൊലേഷന്‍ വാര്‍ഡില്‍ 3 പേരും നിരീക്ഷണത്തിലുണ്ട്. പരിശോധനയ്ക്കായി അയച്ച 197 സാമ്പിളുകളില്‍ 145 പരിശോധനാഫലം ലഭിച്ചു,  എല്ലാ റിസല്‍ട്ടുകളും നെഗറ്റീവാണ്. 52 സാമ്പിളുകളുടെ ഫലം ലഭിക്കാനുണ്ട്.