കോഴഞ്ചേരി ജില്ലാ ആശുപത്രിയില്‍ ഐസൊലേഷനില്‍ കഴിയുന്നവര്‍ക്കുള്ള അവശ്യവസ്തുക്കള്‍ നല്‍കുന്നതിന് ജില്ലാ പഞ്ചായത്തിന്റെ നേതൃത്വത്തില്‍ ക്രമീകരണങ്ങള്‍ ഏര്‍പ്പെടുത്തിയതായി ജില്ലാ പഞ്ചായത്ത് പ്രസിഡന്റ് അന്നപൂര്‍ണാ ദേവി പറഞ്ഞു. കൊറോണ പ്രതിരോധ നടപടികള്‍ വിലയിരുത്തുന്നതിന് ജില്ലാ ആശുപത്രിയില്‍ ചേര്‍ന്ന അവലോകന യോഗത്തില്‍ ജില്ലാ പഞ്ചായത്ത് പ്രസിഡന്റ് അന്നപൂര്‍ണാദേവി അധ്യക്ഷത വഹിച്ചു. 

ഐസോലേഷനില്‍ ഉള്ളവര്‍ക്ക് ഭക്ഷണ സാധനങ്ങള്‍ വീട്ടില്‍ എത്തിച്ചു നല്‍കുന്നതിന് ഇരവിപേരൂര്‍ ഗ്രാമപഞ്ചായത്ത് തീരുമാനിച്ചു. പഞ്ചായത്ത് പ്രസിഡന്റ് അനസൂയാദേവിയുടെ  അധ്യക്ഷതയില്‍ ചേര്‍ന്ന യോഗത്തില്‍ ഭരണസമിതി അംഗങ്ങള്‍, ആരോഗ്യപ്രവര്‍ത്തകര്‍ തുടങ്ങിയവര്‍ പങ്കെടുത്തു. 

നിക്കാഹിനായുള്ള അവസാനവട്ട ഒരുക്കങ്ങളും പൂര്‍ത്തിയാക്കിയപ്പോഴാണ് കൊറോണയെന്ന വില്ലന്റെ കടന്നുവരവ്. വീട്ടുകാരെയും നാട്ടുകാരെയും എല്ലാം ക്ഷണിച്ചു. വിവാഹപ്പന്തലും അലങ്കാരങ്ങളും പൂര്‍ത്തിയായി. നിശ്ചയിച്ച സമയത്ത് തന്നെ നിക്കാഹ് നടത്താമായിരുന്നുവെങ്കിലും സമൂഹനന്മക്കായി ജീവിതത്തിലെ ആ പ്രധാന നിമിഷം മാറ്റിവച്ച് മാതൃകയാകുകയാണ് മുഹമ്മദ് തന്‍സീഹും ബുഷ്റ ഇസ്മായിലും. 

കൊറോണ രോഗപ്രതിരോധം ജില്ലയില്‍ ശക്തമാക്കിയ സാഹചര്യത്തില്‍ അഞ്ചു സ്വകാര്യ ആശുപത്രിയില്‍ നിന്നും ആംബുലന്‍സുകള്‍ വിട്ടുനല്‍കി. ആശുപത്രി ആവശ്യങ്ങള്‍ക്കായി ജില്ലയിലെ പ്രമുഖ വ്യവസായി അഞ്ചു ലക്ഷം രൂപയുടെ ഹാന്‍ഡ്  റബ്, ഫെയ്സ് മാസ്‌ക്, ഏപ്രണ്‍ എന്നിവ ജില്ലാ ഭരണകൂടത്തിന് സൗജന്യമായി കൈമാറി.    

കോറോണ രോഗബാധിതരെന്നു സംശയിക്കുന്നവരുടെ തൊണ്ടയിലെ ശ്രവവും രക്ത സാമ്പിളുകളുമാണു പരിശോധനയ്ക്കായി എടുക്കുന്നത്. ഇങ്ങനെ ശേഖരിച്ച  സാമ്പിളുകള്‍ ആലപ്പുഴ നാഷണല്‍ ഇന്‍സ്റ്റിറ്റ്യൂട്ട് ഓഫ് വൈറോളജി ലാബിലേക്ക് അയക്കും. വിദഗ്ധ പരിശോധനകള്‍ക്ക് ശേഷം 48 മണിക്കൂറിനുള്ളില്‍ പരിശോധനാഫലം ആരോഗ്യ വകുപ്പിന് ലഭിക്കും. 

നിലവില്‍ ജില്ലയില്‍ നിന്നുള്ള സാമ്പിളുകള്‍ ആലപ്പുഴ നാഷണല്‍ ഇന്‍സ്റ്റിറ്റ്യൂട്ട് ഓഫ് വൈറോളജി ലാബില്‍ മാത്രമാണ് പരിശോധിക്കുന്നത്. മറ്റു ലാബുകളില്‍ നിന്നുള്ള പരിശോധനാ ഫലങ്ങള്‍ക്ക് ആരോഗ്യ വകുപ്പിന്റെ അംഗീകാരം ലഭിക്കില്ല. 

ജില്ലയില്‍ വീടുകളില്‍ നിരീക്ഷണത്തില്‍ കഴിയുന്ന 70 പേര്‍ക്ക് ജില്ലാഭരണകൂടം ഭക്ഷണസാധനങ്ങള്‍ ഇന്ന് (മാര്‍ച്ച് 12)വിതരണം ചെയ്തു. പഴവങ്ങാടി, വടശേരിക്കര പഞ്ചായത്തുകളിലെ 70 പേര്‍ക്കാണ് കിറ്റുകള്‍ വിതരണം ചെയ്തത്. അരി, പഞ്ചസാര, ചെറുപയര്‍, സാനിറ്ററി നാപ്കിന്‍, ബേബി ഫുഡ്, എണ്ണ എന്നിവയാണ് കിറ്റിലുള്ളത്. തിരുവല്ല സബ് കളക്ടര്‍ ഡോ.വിനയ് ഗോയലിന്റെ നേതൃത്വത്തിലാണു വിതരണം നടക്കുന്നത്. 

പത്തനംതിട്ട ജനറല്‍ ആശുപത്രിയിലും കോഴഞ്ചേരി ജില്ലാ ആശുപത്രിയിലും ഐസലേഷന്‍ വാര്‍ഡില്‍ കഴിയുന്നവര്‍ക്ക് അവശ്യവസ്തുക്കള്‍ നല്‍കുന്നതിന് പ്രത്യേക സംവിധാനം ഏര്‍പ്പെടുത്തിയിട്ടുള്ളതായി ജില്ലാ കളക്ടര്‍ പി.ബി നൂഹ് പറഞ്ഞു. ഇതുസംബന്ധിച്ച പ്രവര്‍ത്തനങ്ങള്‍ ഏകോപിപ്പിക്കുന്നതിന് നോഡല്‍ ഓഫീസര്‍മാരെ നിയോഗിച്ചിട്ടുണ്ട്. കളക്ടറേറ്റിലെ പ്രത്യേക കണ്‍ട്രോള്‍ റൂമില്‍ നിന്നും നോഡല്‍ ഓഫീസര്‍മാരുടെ പ്രവര്‍ത്തനം വിലയിരുത്തുന്നുണ്ട്.

ജില്ലയിൽ നിന്ന് അയച്ച സാമ്പിളുകളിൽ  54 സാമ്പിളുകൾ നെഗറ്റീവ് ആണെന്ന് ആലപ്പുഴ എൻ. ഐ. വി സ്ഥിരീകരണം.