സർക്കാർ/എയ്ഡഡ്/സർക്കാർ നിയന്ത്രിത സ്വാശ്രയ എൻജിനീയറിങ് കോളേജുകളിലെ എം.ടെക് പ്രവേശനത്തിനുള്ള അപേക്ഷകൾ എല്ലാ റെഗുലർ വിദ്യാർത്ഥികൾക്കും (ക്യൂ.ഐ.പി സ്‌പോൺസേർഡ് വിദ്യാർത്ഥികൾ ഒഴികെ) ഓൺലൈൻ ആയി സമർപ്പിക്കുന്നതിനുള്ള തീയതി ജൂൺ 22 വരെയും, അപേക്ഷയുടെ പ്രിന്റ് ഔട്ടും ബന്ധപ്പെട്ട രേഖകളും സമർപ്പിക്കുന്നതിനുള്ള തീയതി 25ന് വൈകിട്ട് നാല് വരെയും നീട്ടി. വിശദവിവരങ്ങൾക്ക് www.admissions.dtekerala.gov.in, www.dtekerala.gov.in എന്നീ വെബ്‌സൈറ്റുകൾ സന്ദർശിക്കണം.
പി.എൻ.എക്സ്.1851/19

ആലപ്പുഴ ജില്ലയിലെ ഒരു അർധസർക്കാർ സ്ഥാപനത്തിൽ സ്‌കിൽഡ് വർക്കർ ട്രെയിനി (മോൾഡർ/ഫൗൻട്രിമാൻ) സ്ഥിരം ഒഴിവുണ്ട് (ഈഴവ/തീയ്യ/ബില്ലവ വിഭാഗത്തിനായി സംവരണം ചെയ്തിരിക്കുന്നു).
ഐ.റ്റി.ഐ-മോൾഡർ/ഫൗൻട്രിമാൻ  പാസ്സായിരിക്കണം. 1961 ലെ അപ്രന്റിസ് ആക്ട് പ്രകാരം പൂർത്തിയാക്കിയ അപ്രന്റിസ്ഷിപ്പ് ട്രെയിനിംഗ്, ഏതെങ്കിലും ഫൗണ്ടറി/ഹെവി എൻജിനിയറിംഗ് ഇൻഡസ്ട്രിയിൽ ഒരു വർഷത്തെ പ്രവൃത്തി പരിചയം എന്നിവയുണ്ടായിരിക്കണം. പ്രായം 2018 ജനുവരി ഒന്നിന് 18-41 (നിയമാനുസൃത വയസ്സിളവ് ബാധകം). ഒരു വർഷത്തെ ട്രെയിനിംഗ് കാലയളവിൽ പ്രതിമാസം 7500 രൂപയും തുടർന്ന് 4700-6180 ശമ്പള സ്‌കെയിലും (മിനിമം പ്രതിമാസം 17500)വേതനം ലഭിക്കും.

തിരുവനന്തപുരം സർക്കാർ ആയുർവേദ കോളേജിലും അനുബന്ധ സ്ഥാപന ങ്ങളിലുമായി ഒഴിവുളള സാനിറ്റേഷൻ വർക്കർ തസ്തികയിലേക്ക് ദിവസ വേതനാടിസ്ഥാനത്തിൽ നിയമനം നടത്തുന്നതിന് ജൂൺ 20 രാവിലെ 11ന് ആയുർവേദ കോളേജ് പ്രിൻസിപ്പലിന്റെ ഓഫീസിൽ വാക്ക് ഇൻ ഇന്റർവ്യൂ നടത്തും. യോഗ്യത: ഏഴാം ക്ലാസ് വിജയം, പ്രായ പരിധി: 50 വയസ്സ്, ആശുപത്രികളിൽ പ്രവൃത്തി പരിചയമുളളവർക്ക് മുൻഗണന. ഉദ്യോഗാർത്ഥികൾ വയസ്സ്, യോഗ്യത, പ്രവൃത്തി പരിചയം എന്നിവ തെളിയിക്കുന്നതിനുളള അസ്സൽ സർട്ടിഫിക്കറ്റുകൾ സഹിതം അന്നേ ദിവസം 10.30ന് ഓഫീസിൽ ഹാജരാകണം.
പി.എൻ.എക്സ്.1848/19

വിവരാവകാശ കമ്മിഷനുമായി നടത്തുന്ന ആശയവിനിമയത്തിനും അപ്പീലുകളും പരാതികളും ദ്രുതഗതിയിൽ തീർപ്പാക്കാനും സംസ്ഥാന പബ്ലിക് ഇൻഫർമേഷൻ ഓഫീസർമാരും അപ്പീൽ അധികാരികളും ഇ-മെയിൽ വിലാസം സൃഷ്ടിക്കാൻ സർക്കാർ നിർദേശം നൽകി. നിശ്ചിത പ്രൊഫോർമയിൽ വിവരങ്ങൾ രേഖപ്പെടുത്തി ഐ.ടി. മിഷനുമായി ബന്ധപ്പെട്ട്  spio<officename>@domain name എന്ന മാതൃകയിൽ ഇ-മെയിൽ വിലാസം തയാറാക്കണം. സംസ്ഥാന പബ്ലിക് ഇൻഫർമേഷൻ ഓഫീസർമാർ, അപ്പീൽ അധികാരികൾ എന്നിവർ രൂപീകരിക്കുന്ന ഇ-മെയിൽ വിലാസം വകുപ്പ് മേധാവി സമാഹരിച്ച് സംസ്ഥാന വിവരാവകാശ കമ്മിഷനെ അറിയിക്കണമെന്നും നിർദേശിച്ചിട്ടുണ്ട്.
പി.എൻ.എക്സ്.1847/19

ബി.എൽ.ഐ.എസ് ബിരുദധാരികളെ ലൈബ്രറി ഇന്റേണായി നിയമിക്കുന്നതിനായി വഴുതക്കാട് സർക്കാർ വനിത കോളേജിൽ 24 ന് രാവിലെ 10 ന് അഭിമുഖം നടക്കും. താത്കാലികമായാണ് നിയമനം. 12,000 രൂപ പ്രതിമാസ വേതനം. ഉദ്യോഗാർത്ഥികൾ വിദ്യാഭ്യാസ യോഗ്യത, പ്രവൃത്തി പരിചയം എന്നിവ തെളിയിക്കുന്നതിനുള്ള അസ്സൽ സർട്ടിഫിക്കറ്റുകൾ, തിരിച്ചറിയൽ കാർഡ്, ഫോട്ടോ സഹിതം പ്രിൻസിപ്പലിന്റെ ചേമ്പറിലെത്തണം. 
പി.എൻ.എക്സ്.1845/19

തിരുവനന്തപുരം റീജിയണൽ ക്യാൻസർ സെന്ററിൽ സ്റ്റാഫ് നഴ്‌സ് തസ്തികയിലേക്ക് നടത്തിയ എഴുത്തുപരീക്ഷയിൽ യോഗ്യത നേടിയവർക്കായി പ്രായോഗിക പരീക്ഷ ജൂലൈ ഒന്നു മുതൽ 11 വരെ തിരുവനന്തപുരം തൈക്കാട്ടുള്ള സെന്റർ ഫോർ മാനേജ്‌മെന്റ് ഡെവലപ്പ്‌മെന്റിൽ നടത്തും. വിശദാംശങ്ങൾക്കും യോഗ്യരായ ഉദ്യോഗാർത്ഥികളുടെ അഡ്മിറ്റ് കാർഡ് ഡൗൺലോഡ് ചെയ്യുന്നതിനും www.rcctvm.gov.in,www.cmdkerala.net എന്നീ വെബ്‌സൈറ്റുകൾ സന്ദർശിക്കുക.
പി.എൻ.എക്സ്.1843/19

2018 ലെ സംസ്ഥാന സർക്കാർ അക്ഷയ ഊർജ അവാർഡ് വൈദ്യുതി മന്ത്രി എം.എം. മണി ഇന്ന് (ജൂൺ 18) രാവിലെ 11ന് നിയമസഭ മീഡിയ റൂമിൽ പ്രഖ്യാപിക്കും. ഊർജവകുപ്പ് സെക്രട്ടറി ഡോ.ബി.അശോക്, കെ.എസ്.ഇ.ബി ചെയർമാൻ എൻ.എസ് പിളള, ഇ.എം.സി.ഡയറക്ടർ കെ.എൽ. ധരേശൻ ഉണ്ണിത്താൻ, ചീഫ് ഇലക്ട്രിക്കൽ ഇൻസ്‌പെക്ടർ വി.സി അനിൽകുമാർ, അനർട്ട് ജനറൽ മാനേജർ  പി.ചന്ദ്രശേഖരൻ എന്നിവർ പങ്കെടുക്കും.