പൊതുവിദ്യാഭ്യാസ സംരക്ഷണ യജ്ഞത്തിന്റെ ഭാഗമായി പൊതുവിദ്യാഭ്യാസ വകുപ്പ് നടപ്പിലാക്കിയ ഓൺലൈൻ വീഡിയോ ക്ലാസുകൾ ജൂൺ 15 മുതൽ തുടർ സംപ്രേഷണം ആരംഭിക്കും. രണ്ടാഴ്ചക്കാലത്തെ ട്രയലിന് ശേഷം തുടർ പാഠഭാഗങ്ങളാണ് ജൂൺ 15 മുതൽ വിക്‌ടേഴ്‌സ് ചാനൽ വഴി ഒന്നു മുതൽ 12 വരെ ക്ലാസുകളിലെ കുട്ടികളിൽ എത്തിക്കുന്നത്.

സംസ്ഥാനത്ത് കൂടുതൽ പ്രദേശങ്ങൾ ഹോട്ട്സ്പോട്ടായി പ്രഖ്യാപിച്ച സാഹചര്യത്തിൽ ജൂൺ 15 മുതൽ നടത്താൻ നിശ്ചയിച്ചിരുന്ന കേരള നഴ്സിംഗ് കൗൺസിലിന്റെ ജനറൽ നഴ്സിംഗ് കൗൺസിലിന്റെ ജനറൽ നഴ്സിംഗ് ആൻറ് മിഡ്വൈഫറി സപ്ലിമെൻററി പരീക്ഷകൾ മാറ്റിവെച്ചതായി രജിസ്ട്രാർ ഡോ: സലീനാ ഷാ അറിയിച്ചു. പുതുക്കിയ തീയതികൾ യഥാസമയം അറിയിക്കും.
പി.എൻ.എക്സ്. 2128/2020
 

അംഗീകൃത സർവകലാശാലകളിൽ നിന്നും ബിരുദാനന്തര ബിരുദം അല്ലെങ്കിൽ എം.ഫിൽ അല്ലെങ്കിൽ പി.എച്ച്.ഡി കഴിഞ്ഞവർഷം പൂർത്തീകരിച്ച അല്ലെങ്കിൽ നിലവിൽ രജിസ്റ്റർ ചെയ്ത വിദ്യാർഥികളിൽ നിന്നും 2020-2021 വർഷത്തേയ്ക്ക് കേരള സംസ്ഥാന ആസൂത്രണ ബോർഡ് ഇന്റേൺഷിപ്പിന് അപേക്ഷ ക്ഷണിച്ചു. കേരളത്തിൽ സ്ഥിരതാമസം ഉള്ള ആളായിരിക്കണം. വിശദവിവരങ്ങളും  അപേക്ഷാ ഫോറവും  http://spb.kerala.gov.in/. എന്ന വെബ്‌സൈറ്റിൽ ലഭ്യമാണ്.
പി.എൻ.എക്സ്. 2127/2020

കോവിഡ്-19 പ്രതിരോധത്തിന്റെ ഭാഗമായി തയ്യൽ തൊഴിലാളി ക്ഷേമനിധി ബോർഡിലെ തൊഴിലാളികൾക്ക് സർക്കാർ പ്രഖ്യാപിച്ച 1000 രൂപ വീതമുള്ള ധനസഹായം 3.70 ലക്ഷം തൊഴിലാളികൾക്ക് 37 കോടി രൂപ വിതരണം ചെയ്തു. ധനസഹായത്തിന് ഇനിയും അപേക്ഷിക്കാത്ത തൊഴിലാളികൾ www.tailorwelfare.in എന്ന വെബ്‌സൈറ്റ് മുഖേന ബാങ്ക് പാസ്സ് ബുക്കിന്റെ പകർപ്പ്, ആധാർ കാർഡിന്റെ പകർപ്പ് എന്നിവ സഹിതം ഓൺലൈനായി അപേക്ഷിക്കണം. ഓൺലൈൻ അപേക്ഷ സമർപ്പിച്ചിട്ട് ധനസഹായം ലഭ്യമാകാത്ത തൊഴിലാളികൾ ജില്ലാ ഓഫീസുമായി ബന്ധപ്പെടണമെന്ന് ചെയർപേഴ്‌സൺ ജി. രാജമ്മ അറിയിച്ചു.
പി.എൻ.എക്സ്. 2126/2020

ലൈഫ് മിഷൻ സംസ്ഥാന കാര്യാലയത്തിൽ പ്രോഗ്രാം മാനേജർ (ഫിനാൻസ്) തസ്തികയിൽ ഒരു വർഷത്തെ കരാർ നിയമനം നടത്തുന്നു. ഡെപ്യൂട്ടി സെക്രട്ടറി റാങ്കിൽ കുറയാത്ത തസ്തികയിൽ നിന്ന് സെക്രട്ടേറിയറ്റിലെ ധനവകുപ്പിൽ നിന്ന് വിരമിച്ചവർക്ക് അപേക്ഷിക്കാം. പ്രതിമാസ വേതനം 50,000 രൂപ. ലൈഫ് മിഷൻ സംസ്ഥാന കാര്യാലയത്തിൽ 19ന് വൈകിട്ട് മൂന്നിനകം അപേക്ഷ ലഭിക്കണം. ബയോഡാറ്റയിൽ മൊബൈൽ നമ്പറും ഇ-മെയിൽ ഐഡിയും ഉണ്ടാവണം.
പി.എൻ.എക്സ്. 2125/2020

വോളന്റിയര്‍മാരെ ഉള്‍പ്പെടുത്തി ജില്ലാതല സ്‌കൂബാ ഡൈവിംഗ് ടീം രൂപീകരിക്കുന്നതിന് ജില്ലാ കളക്ടര്‍ പി.ബി നൂഹ് ഉത്തരവായി. ഇതുപ്രകാരം  താത്പര്യമുള്ള വോളന്റിയര്‍മാര്‍ക്ക് രജിസ്റ്റര്‍ ചെയ്യുന്നതിനായി പ്രത്യേക പോര്‍ട്ടല്‍ ജില്ലാ ഐടി മിഷന്‍/ എന്‍ഐസി രൂപീകരിക്കും.  രജിസ്റ്റര്‍ ചെയ്തിട്ടുള്ള വോളന്റിയര്‍മാരുടെ സ്വഭാവവും പൂര്‍വകാല ചരിത്രവും പരിശോധിച്ചശേഷം ജില്ലാ ദുരന്തനിവാരണ അതോറിറ്റി കരട് പട്ടിക പ്രസിദ്ധീകരിക്കും.

 ഇരവിപേരൂര്‍ ഗ്രാമപഞ്ചായത്തില്‍ വയോജനങ്ങള്‍ക്കായി സുഖായുഷ്യം പദ്ധതി നടപ്പാക്കുന്നു. പഞ്ചായത്തിലെ അംഗന്‍വാടികള്‍ കേന്ദ്രീകരിച്ച് വയോജനങ്ങള്‍ക്കായി രൂപീകരിച്ചിട്ടുള്ള സായംപ്രഭ ക്ലബ് കഴിഞ്ഞ മൂന്ന് വര്‍ഷമായി പ്രവര്‍ത്തിച്ചു വരുകയാണ്. ഇതിലെ അംഗങ്ങളെ ഉദ്ദേശിച്ചാണ് പദ്ധതി. വയോജനങ്ങള്‍ക്ക് കോവിഡ് രോഗ പ്രതിരോധം ഉറപ്പാക്കുകയാണ് പദ്ധതിയുടെ ലക്ഷ്യം. ഐസിഡിഎസിന്റെ നേതൃത്വത്തില്‍ ആയുര്‍വേദ മെഡിക്കല്‍ അസോസിയേഷനുമായി ചേര്‍ന്നാണ് നിര്‍വഹണം.