കോവിഡ് 19 നിയന്ത്രണ പ്രവര്‍ത്തനങ്ങള്‍ ജില്ലയല്‍ ഊര്‍ജിതം. ഇന്ന് (മാര്‍ച്ച് 13) രാവിലെ ലഭിച്ച 10 പരിശോധനാ ഫലങ്ങളും നെഗറ്റീവായതില്‍ ആശ്വാസമുണ്ടെന്ന് ജില്ലാ കളക്ടര്‍ പി.ബി നൂഹ് പറഞ്ഞു. ഇന്ന് ലഭിച്ച 10 പരിശോധനാ ഫലങ്ങളില്‍ നാലുപേര്‍ ഹൈ റിസ്‌ക്ക് ലിസ്റ്റില്‍ ഉള്ളവരാണ്. ഇന്ന് 12 ഫലങ്ങള്‍കൂടി പ്രതീക്ഷിക്കുന്നുണ്ട്. അതില്‍ ആറുപേര്‍ ഹൈ റിസ്‌ക്കില്‍ ഉള്‍പ്പെട്ടവരാണ്. 

കൊറോണ രോഗ നിയന്ത്രണത്തിന്റെ ഭാഗമായി മൈക്രോ ഫിനാന്‍സുകള്‍, എല്‍.ഐ.സി തുടങ്ങിയവയുമായി ബന്ധപ്പെട്ട ഏജന്റുമാര്‍  വീടുകളിലെത്തിയുള്ള പിരിവുകള്‍ ഈ മാസം  25 വരെ കര്‍ശന നിയന്ത്രണമേര്‍പ്പെടുത്തിയതായി ജില്ലാ കളക്ടര്‍ പി.ബി നൂഹ് അറിയിച്ചു.

ഉപയോഗിച്ച മാസ്‌കുകള്‍ അലക്ഷ്യമായി ഉപേക്ഷിക്കുന്നത് അപകടകരമാണെന്ന് ജില്ലാ മെഡിക്കല്‍ ഓഫീസര്‍ ഡോ.എ.എല്‍ ഷീജ അറിയിച്ചു. ആശുപത്രികളില്‍ മാസ്‌ക് ഉപയോഗിക്കുന്നവര്‍ അവിടെത്തന്നെ സുരക്ഷിതമായി നിക്ഷേപിക്കണം. ഇതിനായി പ്രത്യേക കണ്ടെയ്‌നറുകള്‍ എല്ലാ ആശുപത്രികളിലും ഉണ്ട്. യാതൊരു കാരണവശാലും ഇവ ആശുപത്രിക്ക് പുറത്തേക്ക് കൊണ്ടുപോയി ഉപേക്ഷിക്കരുത്. 

കോഴിക്കോട് ഡിവിഷനിലെ കള്ളുഷാപ്പുകളുടെ ഗ്രൂപ്പ് അടിസ്ഥാനത്തിലുള്ള പരസ്യ വില്പന  മാര്‍ച്ച് 20 ന് നടത്തുമെന്ന് ഡെപ്യൂട്ടി എക്സൈക്സ കമ്മീഷണര്‍ അറിയിച്ചു.  2020-21 വര്‍ഷത്തേക്കാണ് വില്‍പന.    കോഴിക്കോട് കലക്ട്രേറ്റ് കോണ്‍ഫറന്‍സ് ഹാളില്‍ നടത്തുന്ന വില്‍പ്പന സംബന്ധിച്ചുളള വിശദവിവരം  കോഴിക്കോട് എക്സൈസ് ഡിവിഷന്‍ ഓഫീസിലും കോഴിക്കോട്, താമരശ്ശേരി, പേരാമ്പ്ര, വടകര  സര്‍ക്കിള്‍ ഓഫീസുകളിലും ലഭിക്കും.     

 കോഴിക്കോട് ബീച്ചില്‍ ഏപ്രില്‍ 16 മുതല്‍ 21 വരെ നടത്താനിരുന്ന വേള്‍ഡ് ഫുട്‌വോളി ചാമ്പ്യന്‍ഷിപ്പ് കോവിഡ് 19 (കൊറോണ) നിയന്ത്രണത്തിന്റെ ഭാഗമായി മാറ്റിവെയ്ക്കാന്‍ ഡല്‍ഹിയില്‍ നടന്ന ദേശീയ എക്‌സിക്യുട്ടീവ് യോഗം തീരുമാനിച്ചതായി ഫുട് വോളി അസോസിയേഷന്‍ സെക്രട്ടറി ജനറല്‍ അറിയിച്ചു.  മണ്‍സൂണിനു ശേഷം കോഴിക്കോട് ബീച്ചില്‍ വേള്‍ഡ് ചാമ്പ്യന്‍ഷിപ്പ് നടത്താനും യോഗം തീരുമാനിച്ചു.

ചാലിക്കര - പുളിയോട്ടുമുക്ക് - അവറാട്ട്മുക്ക് റോഡില്‍ കലുങ്ക് നിര്‍മ്മാണം നടക്കുന്നതിനാല്‍ ഇന്ന് (മാര്‍ച്ച് 14) മുതല്‍ പ്രവൃത്തി തീരുന്നതുവരെ ഈ റോഡ് വഴിയുളള ഗതാഗതം ഭാഗികമായി നിയന്ത്രിച്ചതായി എക്സിക്യൂട്ടീവ് എഞ്ചിനീയര്‍ അറിയിച്ചു.

സംസ്ഥാന പാത പാലേരി അങ്ങാടിയില്‍ ഓവുചാല്‍ നിര്‍മ്മാണം നടക്കുന്നതിനാല്‍ ഇന്ന് (മാര്‍ച്ച് 14) മുതല്‍ പ്രവൃത്തി തീരുന്നതുവരെ ഈ റോഡ് വഴിയുളള ഗതാഗതം ഭാഗികമായി നിയന്ത്രിച്ചതായി എക്സിക്യൂട്ടീവ് എഞ്ചിനീയര്‍ അറിയിച്ചു.

പങ്കാളിത്ത പെന്‍ഷന്‍ പുന:പരിശോധന സമിതി സര്‍വ്വീസ് സംഘടനകളുമായി മാര്‍ച്ച് 16 മുതല്‍ നടത്താന്‍ നിശ്ചയിച്ചിരുന്ന മീറ്റിങ്ങുകള്‍ കോവിഡ് - 19 ന്റെ പശ്ചാത്തലത്തില്‍ മാറ്റിവെച്ചതായി സമിതി ചെയര്‍മാന്‍ അറിയിച്ചു. പുതുക്കിയ തീയതികള്‍ പിന്നീട് അറിയിക്കും.

കൊറോണ രോഗവ്യാപന പ്രതിരോധത്തിന്റെ ഭാഗമായി ജില്ലയിലെ എംപ്ലോയ്മെന്റ് എക്സ്ചേഞ്ചുകളിലെത്തുന്ന തൊഴിലന്വേഷകരുടെ എണ്ണം പരിമിതപ്പെടുത്തിയതായി ജില്ലാ എംപ്ലോയ്മെന്റ് ഓഫീസര്‍ അറിയിച്ചു.   അന്വേഷണങ്ങള്‍ ടെലിഫോണ്‍ മുഖേന മാത്രമേ നടത്താവൂ.   ഫോണ്‍നമ്പറുകള്‍:  കോഴിക്കോട് - 04952370179 വടകര- 04962523039 ബാലുശ്ശേരി- 04962640170  കൊയിലാണ്ടി- 04962630588  താമരശ്ശേരി- 0495-2225995 കരിയര്‍ ഡവലപ്പ്മെന്റ് സെന്റര്‍ പേരാമ്പ്ര- 0496 2615500.  

തദ്ദേശസ്വയംഭരണ സ്ഥാപനങ്ങള്‍ക്കായുള്ള ഓംബുഡ്‌സ്മാന്‍ ജസ്റ്റിസ് കെ.കെ.ദിനേശന്‍ 24ന് കണ്ണൂരും 25,26,27 തിയതികളില്‍ കോഴിക്കോടും നടത്താനിരുന്ന ക്യാമ്പ് സിറ്റിംഗുകള്‍ സാങ്കേതിക കാരണങ്ങളാല്‍ മാറ്റിയതായി സെക്രട്ടറി അറിയിച്ചു.