തപാല്‍ വകുപ്പ് നടത്തിയ 'ദീന്‍ ദയാല്‍ സ്പര്‍ശ് യോജനാ' മത്സരത്തില്‍ വിജയിച്ച പാലക്കാട് ലയണ്‍സ് സ്‌കൂളിലെ ശ്രേയ പത്മകുമാര്‍ ഫിലാറ്റിലി സ്‌കോളര്‍ഷിപ്പിന് അര്‍ഹയായി. വിജയിക്കുള്ള സര്‍ട്ടിഫിക്കറ്റ് പാലക്കാട് പോസ്റ്റല്‍ സീനിയര്‍ സൂപ്രണ്ട് എ. സുധാകരന്‍ വിതരണം ചെയ്തു.

ജില്ലയില്‍ കോവിഡ് 19 ബാധിച്ച് ചികിത്സയിലുള്ള ഏഴ് കുട്ടികള്‍ ഉള്‍പ്പെടെ 178 പേരുടെയും ആരോഗ്യനില തൃപ്തികരമാണെന്ന് ആരോഗ്യ വകുപ്പ് അധികൃതര്‍ അറിയിച്ചു. വനിതകളുടെയും കുട്ടികളുടെയും ആശുപത്രിയില്‍ ചികിത്സയിലുള്ള 12 പേരില്‍ ഏഴുപേര്‍ കുട്ടികളാണ്. ഇതില്‍ മൂന്ന് കുഞ്ഞുങ്ങളുടെ (ശ്രീകൃഷ്ണപുരം -മൂന്ന് മാസം, പെരിങ്ങോട് -ഏഴ് മാസം, കാരാക്കുറിശ്ശി -10 മാസം) ആദ്യ പരിശോധനാ ഫലം നെഗറ്റീവായതായി ആരോഗ്യവകുപ്പ് അധികൃതര്‍ അറിയിച്ചിട്ടുണ്ട്.  

ജില്ലയില്‍ നിന്നും ഇന്നലെ (ജൂണ്‍ 11) വിവിധ ട്രെയിനുകളിലായി 621 അതിഥി തൊഴിലാളികള്‍ സ്വദേശത്തേക്ക് മടങ്ങി. തിരൂര്‍ - ബീഹാര്‍ ട്രെയിനില്‍ 335, പാലക്കാട് - ഉത്തര്‍പ്രദേശ് ട്രെയിനില്‍ 58, പാലക്കാട് - ജാര്‍ഖണ്ഡ് ട്രെയിനില്‍ 142, കൊല്ലം - ഭോപ്പാല്‍ 86 പേര്‍ ഉള്‍പ്പടെ 621 അതിഥി തൊഴിലാളികളാണ് പാലക്കാട് ജംഗ്ഷന്‍ , ഷൊര്‍ണൂര്‍ റെയില്‍വേ സ്റ്റേഷനുകളില്‍ നിന്നായി ഇന്നലെ (ജൂണ്‍ 11) ജില്ലയില്‍ നിന്നും സ്വദേശത്തേ്ക്ക് മടങ്ങിയത്.

ദമാം, കുവൈറ്റ്, അബുദാബി എന്നിവിടങ്ങളില്‍ നിന്നും നെടുമ്പാശ്ശേരി, കരിപ്പൂര്‍ അന്താരാഷ്ട്ര വിമാനത്താവളങ്ങളില്‍ ഇന്നലെ (ജൂണ്‍ 11) ജില്ലയിലെത്തിയത് 37 പാലക്കാട് സ്വദേശികള്‍. ഇവരില്‍ 18 പേര്‍ ഇന്‍സ്റ്റിറ്റിയൂഷനല്‍ ക്വാറന്റൈനില്‍ പ്രവേശിച്ചു. 19 പേര്‍ വീടുകളില്‍ നിരീക്ഷണത്തിലാണ്.

ദമാമില്‍ നിന്നും നെടുമ്പാശ്ശേരി അന്താരാഷ്ട്ര വിമാനത്താവളത്തില്‍ എത്തിയ 17 പേരില്‍ 6 പേര്‍ ഇന്‍സ്റ്റിറ്റിയൂഷനല്‍ ക്വാറന്റൈനില്‍ പ്രവേശിച്ചു. 11  പേര്‍ വീടുകളില്‍ നിരീക്ഷണത്തിലാണ്.

മഹാത്മാഗാന്ധി ദേശീയ ഗ്രാമീണ തൊഴിലുറപ്പ് പദ്ധതി ജില്ലാ ഓഫീസില്‍ ഐ.ടി.പ്രൊഫഷണല്‍ തസ്തികയില്‍ കരാര്‍ അടിസ്ഥാനത്തില്‍ നിയമിക്കുന്നതിന് എസ്.ടി. വിഭാഗത്തില്‍പ്പെട്ടവരില്‍ നിന്ന് അപേക്ഷ ക്ഷണിച്ചു.  ബിരുദവും പി.ജി.ഡി.സി.എ.യുമോ എം.സി.എ. യോ എം.എസ്.സി. കമ്പ്യൂട്ടര്‍ സയന്‍സോ യോഗ്യതയുള്ളവര്‍ക്ക് അപേക്ഷിക്കാം.  അപേക്ഷ ജൂണ്‍ 20 നകം ജോയിന്റ് പ്രോഗ്രാം കോ-ഓര്‍ഡിനേറ്റര്‍, മഹാത്മാഗാന്ധി എന്‍.ആര്‍.ഇ.ജി.എ. ജില്ലാ ഓഫീസ്, കളക്‌ട്രേറ്റ്, സിവില്‍ സ്റ്റേഷന്‍, കല്‍പ്പറ്റ എന്ന വിലാസത്തില്‍ ലഭിക്കണം. ഫോണ്‍ 04936 205959.

ജില്ലാ സായുധ സേന ക്യാമ്പ് ഓഫീസില്‍ സൂക്ഷിച്ചിട്ടുള്ള ഉപയോഗശൂന്യമായ 13 വാഹനങ്ങള്‍ ജൂണ്‍ 25 ന് രാവിലെ 11 ന് ക്യാമ്പില്‍ പരസ്യമായി ലേലം ചെയ്യും. ഇതിനുള്ള ദര്‍ഘാസുകള്‍ 24ന് വൈകീട്ട് 4നകം ലഭിക്കണം.

മീനങ്ങാടി  ഐ.എച്ച്.ആര്‍.ഡി  മോഡല്‍  കോളേജില്‍  അസിസ്റ്റന്റ് പ്രൊഫസര്‍, കമ്പ്യൂട്ടര്‍ പ്രോഗ്രാമര്‍ എന്നീ തസ്തികകളിലേക്ക് താത്കാലിക നിയമനം നടത്തുന്നു.  അസിസ്റ്റന്റ് പ്രൊഫസര്‍ (കൊമേഴ്‌സ്), അസിസ്റ്റന്റ് പ്രൊഫസര്‍ (കമ്പ്യൂട്ടര്‍ സയന്‍സ്), കമ്പ്യൂട്ടര്‍ പ്രോഗ്രാമര്‍ എന്നീ തസ്തികകളിലേക്കാണ് നിയമനം. കൂടിക്കാഴ്ച യഥാക്രമം ജൂണ്‍ 19 ന് രാവിലെ 9.30, 18 ന് രാവിലെ 9.30, 18 ന് ഉച്ചയ്ക്ക് 1ന് എന്നിങ്ങനെ നടക്കും. ഉദ്യോഗാര്‍ത്ഥികള്‍ അസല്‍ സര്‍ട്ടിഫിക്കറ്റും പകര്‍പ്പുമായി ഹാജരാകണം. ഫോണ്‍  04936246446,  8547005077.