ശക്തികുളങ്ങര പ്രഥമികാരോഗ്യ കേന്ദ്രത്തില്‍ ആശുപത്രി വികസന സമിതി മുഖേന ക്ലീനിംഗ് സ്റ്റാഫിനെ നിയമിക്കുന്നതിനുള്ള അഭിമുഖം ജൂണ്‍ 17 ന് രാവിലെ 10.30 ന് നടക്കും. ശക്തികുളങ്ങര പ്രാഥമികാരോഗ്യ കേന്ദ്രം ഏഴാം ഡിവിഷന്‍ പരിധിയിലുള്ളവരെ മാത്രം പരിഗണിക്കും. വിശദ വിവരങ്ങള്‍ ആശുപത്രി ഓഫീസിലും 0474-2772388 നമ്പരിലും ലഭിക്കും.
(പി.ആര്‍.കെ നമ്പര്‍ 1604/2020)

കേരള മത്സ്യവിത്ത് നിയമം 2015 പ്രകാരം സംസ്ഥാനത്ത് പ്രവര്‍ത്തിക്കുന്ന എല്ലാ മത്സ്യവിത്തുല്‍പാദന കേന്ദ്രങ്ങളും സീഡ് ഫാമുകളും സംസ്ഥാന  മത്സ്യവിത്ത് കേന്ദ്രത്തില്‍ രജിസ്റ്റര്‍ ചെയ്ത് ലൈസന്‍സ് എടുക്കണമെന്ന് സംസ്ഥാന ഫിഷ് സീഡ് സെന്റര്‍ മെമ്പര്‍ സെക്രട്ടറി അറിയിച്ചു.

അഞ്ചല്‍, ഏരൂര്‍, കടയ്ക്കല്‍ എന്നീ പഞ്ചായത്തുകളിലെ മുഴുവന്‍ വാര്‍ഡുകളിലും പ്രാബല്യത്തിലിരിക്കുന്ന കണ്ടയിന്‍മെന്റ് സോണ്‍ നിയന്ത്രണങ്ങള്‍ പിന്‍വലിച്ച് ജില്ലാ ദുരന്ത നിവാരണ അതോറിറ്റി ചെയര്‍മാന്‍ കൂടിയായ ജില്ലാ കലക്ടര്‍ ബി അബ്ദുല്‍ നാസര്‍ ഉത്തരവായി.

ജില്ലയിലെ ഹോട്ടലുകള്‍ക്കും മെഡിക്കല്‍ ഷോപ്പുകള്‍ക്കും രാത്രി ഒന്‍പതുവരെ പ്രവര്‍ത്തിക്കാമെന്ന് ജില്ലാ ദുരന്ത നിവാരണ അതോറിറ്റി ചെയര്‍മാന്‍ കൂടിയായ ജില്ലാ കലക്ടര്‍ ബി അബ്ദുല്‍ നാസര്‍ അറിയിച്ചു. ഓണ്‍ലൈന്‍ ഭക്ഷണ വിതരണം രാത്രി 10 വരെയും നടത്താം. ബാക്കിയുള്ള എല്ലാ വ്യാപാര സ്ഥാപനങ്ങളും വൈകുന്നേരം 7.30 ന് പ്രവര്‍ത്തനം അവസാനിപ്പിക്കണം. പെട്രോള്‍ പമ്പുകള്‍ക്ക് നിയന്ത്രണങ്ങള്‍ ബാധകമല്ല.
(പി.ആര്‍.കെ നമ്പര്‍ 1601/2020)

ജില്ലാ കലക്ടര്‍ ബി അബ്ദുല്‍ നാസര്‍ ഇടപെട്ട് ഓണ്‍ലൈന്‍ പഠന സൗകര്യമില്ലാത്ത ജില്ലയിലെ വിദ്യാര്‍ഥികള്‍ക്കായി  40 ടിവി സ്പോണ്‍സര്‍ഷിപ്പിലൂടെ കണ്ടെത്തി. ബാംഗ്ലൂരിലെ സമി ലാബ്സ് ചെയര്‍മാന്‍ കൊല്ലം സ്വദേശി ഡോ മുഹമ്മദ് മജീദ് 25 ടി വികളും ഹൈദ്രാബാദില്‍ താമസമാക്കിയ കൊല്ലം സ്വദേശിനി ശശിപ്രഭ മാണിക്യ റാവു 15 ടി വികളും സംഭാവനയായി നല്‍കി. 32 ഇഞ്ച് ടി വി മൂന്ന് വര്‍ഷത്തെ അധിക വാറണ്ടിയോട് കൂടിയാണ് സ്ഥാപിക്കുന്നത്. മാളിയേക്കല്‍ ഗ്രൂപ്പ് ലാഭം എടുക്കാതെയാണ് ടി വി ജില്ലാ ഭരണകൂടത്തിനു നല്‍കുന്നത്. മേഘാലയ ഡി ജി പി യുടെ  ഭാര്യാമാതാവും കേരള ഡി ജി പി യുടെ സുഹൃത്തുമാണ് ശശിപ്രഭ.

ജില്ലയില്‍ ഇന്നലെ (ജൂണ്‍ 11) എട്ടു പേര്‍ക്ക് കോവിഡ് പോസിറ്റീവ് സ്ഥിരീകരിച്ചു. സമ്പര്‍ക്കംമൂലമുള്ള രോഗബാധയിമില്ല.  രോഗം സ്ഥിരീകരിച്ച മൂന്നു പേര്‍ മോസ്‌കോയില്‍ നിന്നും മൂന്നുപേര്‍ നൈജീരിയയില്‍ നിന്നും ഒരാള്‍ ബഹ്‌റിനില്‍ നിന്നും ഒരാള്‍ മുംബൈയില്‍ നിന്നും എത്തിയവരാണ്.

2020-21 നടപ്പ് സാമ്പത്തിക വർഷത്തിൽ തൃശ്ശൂർ ജില്ലയിൽ 82 ലക്ഷം തൊഴിൽ ദിനങ്ങൾ അനുവദിച്ചതായി ദേശീയ ഗ്രാമീണ തൊഴിലുറപ്പു പദ്ധതിയുടെ ജില്ലാ കോ-ഓർഡിനേറ്റർ പി. സി ബാലഗോപാൽ അറിയിച്ചു. ലോക്ക് ഡൗണിന് ശേഷം തൊഴിലുറപ്പ് പദ്ധതി പ്രവർത്തനങ്ങൾ ഏപ്രിൽ 21ന് പുനരാരംഭിച്ചിരുന്നു. കൊവിഡ് 19 പ്രോട്ടോകോൾ മുൻകരുതലുകൾ പൂർണ്ണമായും പാലിച്ചാണ് ഗ്രാമ, ബ്ലോക്ക്, ജില്ലാ തലങ്ങളിൽ ഉദ്യോഗസ്ഥരുടെ മേൽനോട്ടത്തിൽ വിവിധ തൊഴിലുറപ്പു പദ്ധതികൾ നടക്കുന്നത്.

വിവിധ കാരണങ്ങളാൽ കയർ ക്ഷേമനിധി വിഹിതം കുടിശ്ശികയായവരിൽ നിന്നും കുടിശ്ശികയും കാലയളവും പരിഗണിക്കാതെ വിഹിതം ഒറ്റ തവണയായി സ്വീകരിക്കുന്നതിനുള്ള സമയ പരിധി ജൂൺ 30 വരെ നീട്ടി. 60 വയസ്സ് പൂർത്തികരിക്കാത്ത തൊഴിലാളികൾ ഈ അവസരം പ്രയോജനപ്പെടുത്തിയാൽ മറ്റ് പെൻഷനുകൾ ഇല്ലെങ്കിൽ കുടിശ്ശിക തീർക്കുന്ന മുറയ്ക്ക് ലോക്ക് ഡൗൺ ധനസഹായമായി 1000 രൂപ ലഭിക്കുന്നതാണെന്ന് റീജിയണൽ ഓഫീസർ അറിയിച്ചു. ഫോൺ : 0484 2441945.
 

ചരക്കുസേവന നികുതി വകുപ്പിന്റെ ഡെപ്യൂട്ടി കമ്മീഷണറുടെ (ഇന്റലിജൻസ്) കാര്യാലയത്തിൽ ജൂൺ 16 ന് നടത്താനിരുന്ന താൽക്കാലിക ഡ്രൈവർ തസ്തികയുടെ അഭിമുഖം മാറ്റി വച്ചു. ഫോൺ: 0487 2380695.