അപേക്ഷ ക്ഷണിച്ചു
കണ്ണൂര്‍ മുന്‍സിഫ് കോര്‍ട്ട് സെന്ററില്‍ അഡ്വക്കറ്റ് ഫോര്‍ ഡൂയിങ്ങ് ഗവണ്‍മെന്റ് വര്‍ക്കറെ നിയമിക്കുന്നതിനായി അഞ്ച് വര്‍ഷത്തില്‍ കുറയാത്ത പ്രവൃത്തി പരിചയമുള്ള അഭിഭാഷകരില്‍ നിന്നും അപേക്ഷ ക്ഷണിച്ചു.  താല്‍പര്യമുള്ളവര്‍ ബയോഡാറ്റ, ജനന തീയതി തെളിയിക്കുന്ന രേഖ, എന്റോള്‍മെന്റ് സര്‍ട്ടിഫിക്കറ്റ് എന്നിവയുടെ സാക്ഷ്യപ്പെടുത്തിയ പകര്‍പ്പുകള്‍, പ്രവൃത്തി പരിചയ സര്‍ട്ടിഫിക്കറ്റ് എന്നിവ സഹിതം അപേക്ഷ ജൂണ്‍ 15 ന് വൈകിട്ട് അഞ്ച് മണിക്കകം കലക്ടറേറ്റില്‍ സമര്‍പ്പിക്കേണ്ടതാണ്

കോവിഡ്-19 പ്രതിരോധത്തിന്റെ ഭാഗമായി കേരള ഖാദി ഗ്രാമ വ്യവസായ ബോര്‍ഡ് ഖാദി മാസ്‌ക് നിര്‍മാണം ആരംഭിച്ചു. പയ്യന്നൂര്‍ ഖാദി കേന്ദ്രത്തിന്റെ റെഡിമെയ്ഡ് യൂനിറ്റ് ഖാദി ഷര്‍ട്ടിനു വേണ്ടി നെയ്ത കോട്ടണ്‍ തുണി അണുവിമുക്തമാക്കിയാണ് മാസ്‌ക് നിര്‍മ്മാണം നടത്തുന്നത്.
വിവിധതരം നിറങ്ങളിലുള്ള മാസ്‌ക് ഒന്നിന് 15 രൂപയാണ് വില. നിരവധി പേര്‍ ഇപ്പോള്‍ തന്നെ മാസ്‌കിനു വേണ്ടി ഖാദി ഷോറൂമുകളില്‍ എത്തുന്നുണ്ടെന്ന് പയ്യന്നൂര്‍ ഖാദി കേന്ദ്രം ഡയറക്ടര്‍ പി സുരേശന്‍, ഡെപ്യട്ടി ഡയറക്ടര്‍ എന്‍ നാരായണന്‍, മാനേജര്‍ കെ വി ഫാറൂഖ് എന്നിവര്‍ അറിയിച്ചു.

ഗവണ്‍മെന്റ്  വൃദ്ധസദനത്തിലേക്ക് സഹായവുമായി സൈനികരുടെ കൂട്ടായ്മ. ജില്ലയിലെ  സൈനികരുടെ വാട്‌സ് ആപ് കൂട്ടായ്മയായ കണ്ണൂര്‍ വാരിയേഴ്‌സിന്റെ നേതൃത്വത്തില്‍  അരിയും പയറും ഉള്‍പ്പെടെ രണ്ടുമാസത്തേക്കുള്ള ഭക്ഷ്യ ധാന്യങ്ങളാണ് ഗവണ്‍മെന്റ് വൃദ്ധമന്ദിരത്തില്‍ എത്തിച്ചത്.  
മുന്‍ എന്‍ എസ് ജി കമാന്റോ പി വി മനേഷ് വൃദ്ധസദനം   സൂപ്രണ്ട് ബി മോഹനന് ഭക്ഷ്യധാന്യ കിറ്റുകള്‍ കൈമാറി. 33 വനിതകളും 28 പുരുഷന്മാരും ഉള്‍പ്പെടെ 61 പേരാണ് വൃദ്ധസദനത്തില്‍ അന്തേവാസികളായുള്ളത്. ചടങ്ങില്‍ സൈനികരായ പി കെ മനോജ്,  കെ രാജേഷ്,  സോഷ്യല്‍ വര്‍ക്കര്‍ അരവിന്ദ് എസ് പണിക്കര്‍ എന്നിവര്‍ പങ്കെടുത്തു

 അടിമാലിയില്‍ നിന്ന് ഇന്നലെ (10.6.2020)  185 അതിഥി തൊഴിലാളികള്‍ വെസ്റ്റ് ബംഗാളിലേക്ക് മടങ്ങി. അടിമാലി  ഗ്രാമപഞ്ചായത്തില്‍ നിന്നും നാലു കെ.എസ്ആര്‍ടിസി ബസുകളിലായാണ് തൊഴിലാളികള്‍ മടങ്ങിയത്. ഇതില്‍ മൂന്ന് സ്ത്രീകളും ഒരു കുട്ടിയും ഉള്‍പ്പെടുന്നു. തൊഴിലാളികള്‍ക്ക് യാത്രാവേളയില്‍ കഴിക്കാനുള്ള ഭക്ഷ്യ സാധനങ്ങളും റവന്യൂ വകുപ്പിന്റെ നേതൃത്വത്തില്‍ നല്‍കിയിരുന്നു. വൈകിട് 3 :30 തോടെയാണ് തൊഴിലാളികളുമായി ബസുകള്‍ പുറപ്പെട്ടത്. രാത്രി 10 (10.6.2020) മണിയോടെ എര്‍ണാകുളത്തു നിന്നായിരുന്നു ഇവര്‍ക്കുള്ള ട്രെയില്‍.  

മൂന്നാറിലും പരിസര പ്രദേശങ്ങളിലും വന്യജീവിശല്യം രൂക്ഷമായതോടെ കരുതല്‍ നടപടികള്‍ സ്വീകരിക്കാന്‍ വിവിധ വകുപ്പ് മേധാവികളുടെ പ്രത്യേക യോഗം ചേര്‍ന്നു.  ഇടുക്കി എംപി ഡീന്‍ കുര്യാക്കോസ്, ദേവികുളം എം.എല്‍.എ എസ് രാജേന്ദ്രന്‍, സബ്കളക്ടര്‍  പ്രേംകൃഷ്ണന്‍ തുടങ്ങിയവരുടെ നേതൃത്വത്തിലായിരുന്നു യോഗം.

മലങ്കര ഡാമിലെ ജലനിരപ്പ് 36.90 മീറ്ററായി നിജപ്പെടുത്തുന്നതിനായി ഡാമിന്റെ ആറു ഷട്ടറുകളും നാളെ രാവിലെ 8 മുതല്‍ ഘട്ടം ഘട്ടമായി തുറന്ന് നിയന്ത്രിത അളവില്‍ ജലം പുറത്തേക്ക് ഒഴുക്കുമെന്നും തൊടുപുഴ, മുവാറ്റുപുഴയാറുകളുടെ തീരത്ത് വസിക്കുന്നവര്‍ ജാഗ്രത പുലര്‍ത്തണമെന്നും ജില്ലാ കളക്ടര്‍ അറിയിച്ചു.
 

 
ജില്ലയില്‍ ഇന്ന് (100620) നാലുപേര്‍ക്ക് കോവിഡ് സ്ഥിരീകരിച്ചതായി ജില്ലാ കലക്ടര്‍ അറിയിച്ചു.
1. കുമളി സ്വദേശികളായ അമ്മയ്ക്കും
 (35 വയസ്) രണ്ട് മക്കള്‍ക്കുമാണ് (10 വയസ്, 12 വയസ്) ഇന്ന് കോവിഡ്-19 സ്ഥിരീകരിച്ചത്. ചെന്നൈയില്‍ നിന്നും മെയ് 31 ന് സ്വന്തം വാഹനത്തിലാണ് ഇവര്‍ നാട്ടിലെത്തിയത്.
2. നെടുങ്കണ്ടം സ്വദേശിയായ 30 വയസുകാരന്‍. ജൂണ്‍ 4 ന് ദുബായില്‍ നിന്നും നാട്ടിലെത്തി.
ജില്ലയില്‍ ഇന്ന് ആരും രോഗമുക്തി നേടിയിട്ടില്ല.

ജില്ലയില്‍ റീബില്‍ഡ് കേരളയിലും പ്ലാന്‍ഫണ്ടിലുമുള്‍പ്പെടുത്തിയുളള നിര്‍മ്മാണപ്രവര്‍ത്തനങ്ങള്‍ സംബന്ധിച്ച് ജില്ലാ കലക്ടര്‍ എച്ച്.ദിനേശന്റെ അധ്യക്ഷതയില്‍ ചേംബറില്‍ അവലോകനയോഗം ചേര്‍ന്നു.    റീബില്‍ഡ് കേരളയിലുള്‍പ്പെടുത്തി 27 വില്ലേജ് ഓഫീസുകളുടെ നവീകരണ പുരോഗതിയും, 12കോടി രൂപയുടെ ഭരണാനുമതി ലഭിച്ചിട്ടുളള സ്റ്റാഫ് കോര്‍ട്ടേഴ്സ്, രണ്ടു കോടിരൂപ വീതം അനുമതിയുളള  വണ്ടിപ്പെരിയാര്‍, കുമളി, വാഴത്തോപ്പ്, പീരുമേട്, വാത്തിക്കുടി എന്നിവിടങ്ങളില്‍ റെസ്‌ക്യു ഹോമുകള്‍ തുടങ്ങിയവയുടെ  പ്രാരംഭ നടപടിക്രമങ്ങളും യോഗം വിലയിരുത്തി.

കോവിഡ് 19ന്റെ പശ്ചാത്തലത്തിൽ ശബരിമല ക്ഷേത്രത്തിൽ ഭക്തരെ അനുവദിക്കേണ്ടെന്നും ഈ വർഷം ഉത്‌സവം നടത്തേണ്ടെന്നും തീരുമാനിച്ചതായി ദേവസ്വം മന്ത്രി കടകംപള്ളി സുരേന്ദ്രൻ വാർത്താസമ്മേളനത്തിൽ പറഞ്ഞു. ദേവസ്വം ബോർഡ് അധികൃതരും ക്ഷേത്രം തന്ത്രി കണ്ഠരരു മഹേഷ് മോഹനരരുമായും മന്ത്രിയുടെ അധ്യക്ഷതയിൽ നടത്തിയ ചർച്ചയിലാണ് തീരുമാനം. അതേസമയം ക്ഷേത്രത്തിലെ ആചാരപരമായ ചടങ്ങുകൾ നടത്തും. ചർച്ചയിലെ തീരുമാനങ്ങൾ മുഖ്യമന്ത്രിയെ അറിയിച്ചതായും മന്ത്രി പറഞ്ഞു.

പത്തനംതിട്ട അസിസ്റ്റന്റ് കളക്ടറായി വി.ചെല്‍സാസിനി കളക്ടറേറ്റിലെത്തി ചുമതലയേറ്റു. ജില്ലാ കളക്ടര്‍ പി.ബി നൂഹിന്റെ ചേംബറിലെത്തിയാണ് ചുമതല ഏറ്റെടുത്തത്. എ.ഡി.എം അലക്‌സ് പി.തോമസ്, എല്‍.ആര്‍ ഡെപ്യൂട്ടി കളക്ടര്‍ ആര്‍.രാജലക്ഷ്മി എന്നിവര്‍ ചേര്‍ന്ന് സ്വീകരിച്ചു.