അഞ്ചാംക്ലാസുകാരന്‍ തങ്കപാണ്ടിക്കും സഹോദരി നാഗമ്മയ്ക്കും ഇനി സ്വന്തം വീട്ടില്‍ ഇരുന്ന് തന്നെ ഓണ്‍ലൈന്‍ പഠനമാകാം. വീട്ടില്‍ ടിവിയോ സ്മാര്‍ട്ട് ഫോണോ ഇല്ലാത്തതിനാല്‍ പഠനം മുടങ്ങുമെന്ന ഇവരുടെ ആശങ്ക അവസാനിച്ചു. ജില്ലയില്‍ ആരംഭിച്ച ഇ-ക്ലാസ് ചലഞ്ചിന്റെ ഭാഗമായി ഇവര്‍ക്ക് പുത്തന്‍ ടിവി ലഭിച്ചു.

 ലോക പരിസ്ഥിതി ദിനത്തിന്റെ ഭാഗമായി എലപ്പുള്ളി  ഗ്രാമപഞ്ചായത്തിലെ എൽ.ജി പാളയം താന്നിപള്ളം പ്രദേശത്തെ ആറ് ഏക്കറോളം ഭൂമിയിലെ മാതൃക പച്ചത്തുരുത്ത്  ജില്ലാ പഞ്ചായത്ത് പ്രസിഡന്റ് അഡ്വ. കെ. ശാന്തകുമാരി ഉദ്ഘാടനം ചെയ്തു. ഹരിതകേരളം മിഷന്റെ  ആഭിമുഖ്യത്തിൽ നടത്തുന്ന പച്ചത്തുരുത്ത് പദ്ധതി ജില്ലയിലെ മുഴുവൻ ഗ്രാമപഞ്ചായത്തുകളിലും നഗരസഭകളിലും രൂപീകരിക്കുമെന്ന് ജില്ലാ പഞ്ചായത്ത് പ്രസിഡന്റ് അഡ്വ. കെ. ശാന്തകുമാരി പറഞ്ഞു.

കോവിഡ് 19 ന്റെ  പശ്ചാത്തലത്തിൽ ജില്ലാ ആശുപത്രിയിലെ ഒ.പി വിഭാഗം പാലക്കാട് ഗവ. മെഡിക്കൽ കോളേജിലേക്ക് മാറ്റുന്നതിന്റെ ഭാഗമായി മന്ത്രി എ.കെ ബാലൻ,  ജില്ലാ കളക്ടർ ഡി. ബാലമുരളി എന്നിവർ മെഡിക്കൽ കോളേജ് സന്ദർശിച്ച് സൗകര്യങ്ങൾ വിലയിരുത്തി. ജില്ലാ ആശുപത്രി കോവിഡ് ആശുപത്രിയാക്കുന്നതിനാലാണ് ജില്ലാ ആശുപത്രിയിലെ ഒ.പി വിഭാഗം മെഡിക്കൽ കോളേജിലേക്ക് മാറ്റുന്നത്. 
മെഡിക്കൽ കോളേജിൽ ഒ.പി സൗകര്യത്തിനായി ഓരോ വിഭാഗത്തിനും പ്രത്യേകം വാർഡുകളാക്കി തിരിച്ചിട്ടുണ്ട്. 100 പേർക്കുള്ള കിടക്കകളാണ് ഇവിടെ സജ്ജീകരിച്ചിരിക്കുന്നത്. 

 അബുദാബി,  കുവൈറ്റ്,  ദുബായ്,  മസ്കറ്റ്, ദോഹ എന്നിവിടങ്ങളിൽ നിന്നും  നെടുമ്പാശ്ശേരി, കരിപ്പൂർ, കണ്ണൂർ  അന്താരാഷ്ട്ര വിമാനത്താവളങ്ങളിൽ  ഇന്നലെ (ജൂൺ 4) ജില്ലയിലെത്തിയത് 53 പാലക്കാട് സ്വദേശികൾ.  ഇവരിൽ 19 പേർ  ഇൻസ്റ്റിറ്റ്യൂഷനൽ ക്വാറന്റൈനിൽ പ്രവേശിച്ചു.  ബാക്കിയുള്ള 34 പേർ വീടുകളിൽ നിരീക്ഷണത്തിലാണ്. 

 ദുബായിൽ നിന്നും നെടുമ്പാശ്ശേരി അന്താരാഷ്ട്ര വിമാനത്താവളത്തിൽ 17 പാലക്കാട് സ്വദേശികളാണ് തിരിച്ചെത്തിയത്. ഇവരിൽ 8 പേർ  ഇൻസ്റ്റിറ്റ്യൂഷനൽ ക്വാറന്റൈനിൽ  പ്രവേശിച്ചു. 9 പേർ വീട്ടിൽ നിരീക്ഷണത്തിലാണ്.

 ഇതര സംസ്ഥാനങ്ങളിൽ  നിന്ന് വാളയാർ ചെക്പോസ്റ്റ് വഴി ഇന്നലെ   ( ജൂൺ നാലിന് രാവിലെ 6 മുതൽ ജൂൺ അഞ്ചിന് രാവിലെ 6 വരെ) 1814 പേർ  കേരളത്തിൽ എത്തിയതായി സ്പെഷ്യൽ ബ്രാഞ്ച് ഡി.വൈ.എസ്.പി ആർ. മനോജ് കുമാർ അറിയിച്ചു. 1091 പുരുഷൻമാരും 479 സ്ത്രീകളും 244
കുട്ടികളുമുൾപ്പെടെയുള്ളവർ 562 വാഹനങ്ങളിലായാണ് കേരളത്തിലേക്ക് എത്തിയത്. 403 കാറുകൾ, 62 ഇരുചക്രവാഹനങ്ങൾ,11 ട്രാവലറുകൾ,72 മിനി ബസുകൾ, ഒൻപത് ആംബുലൻസുകൾ, അഞ്ച് ഓട്ടോറിക്ഷകൾ എന്നിവയാണ് അതിർത്തി കടന്ന് കേരളത്തിലെത്തിയത്.
 

അറ്റകുറ്റപ്പണി നടക്കുന്നതിനാല്‍ ചുണ്ടമ്പറ്റ മുതല്‍ കട്ടുപ്പാറ വരെയുള്ള റോഡില്‍ ജൂണ്‍ 8 മുതല്‍ 15 ദിവസത്തേക്ക് താല്‍ക്കാലികമായി ഗതാഗതം നിരോധിച്ചതായി അസിസ്റ്റന്റ് എക്‌സിക്യൂട്ടീവ് എന്‍ജിനീയര്‍ അറിയിച്ചു. ചുണ്ടമ്പറ്റ വഴി വിളയൂരിലേക്ക് വാഹനങ്ങള്‍ തിരിച്ചു വിടുന്നതായിരിക്കും.

പാലക്കാട് വിദ്യാഭ്യാസ ജില്ലയിലെ പരീക്ഷാ സെന്ററുകളില്‍ 2019 നവംബറിലും  മുന്‍ വര്‍ഷങ്ങളിലും നടന്ന കെ - ടെറ്റ് പരീക്ഷകള്‍ വിജയിച്ച് സര്‍ട്ടിഫിക്കറ്റ് പരിശോധന പൂര്‍ത്തിയാക്കിവര്‍ക്ക് സര്‍ട്ടിഫിക്കറ്റുകള്‍ ജൂണ്‍ എട്ടിന് രാവിലെ 10 മുതല്‍ ജില്ലാ വിദ്യാഭ്യാസ ഓഫീസില്‍ വിതരണം ചെയ്യും. അര്‍ഹരായവര്‍ ഹാള്‍ടിക്കറ്റ് സഹിതം ഹാജരാകണമെന്ന് പാലക്കാട് ജില്ലാ വിദ്യാഭ്യാസ ഓഫീസര്‍ അറിയിച്ചു.

നെഹ്രു യുവകേന്ദ്രയുടെ ആഭ്യമുഖ്യത്തില്‍ ജില്ലയിലുടനീളം വിവിധ യൂത്ത് ക്ലബുകളുടെ നേതൃത്വത്തില്‍ റോഡരികിലും പൊതുസ്ഥലങ്ങളിലും വൃക്ഷ തൈകള്‍ വെച്ചുപിടിപ്പിക്കുന്ന പ്രവര്‍ത്തനത്തിന് തുടക്കമായി. പാലക്കാട് ജില്ലാ പഞ്ചായത്ത് റോഡില്‍ നേരത്തെ നട്ട മരങ്ങളുടെ പരിപാലനവും പുതിയ തൈകള്‍ വെച്ച് പിടിപ്പിക്കലും നടന്നു. ചെമ്പകം, ഇലഞ്ഞി, മഹാഗണി, ഉങ്ങു, കണിക്കൊന്ന എന്നീ  മരങ്ങളാണ് നട്ടത്. പരിസ്ഥിതി ദിനാഘോഷം നെഹ്രു യുവകേന്ദ്ര ജില്ല യൂത്ത് കോഡിനേറ്റര്‍ എം.അനില്‍കുമാര്‍ ഉദ്ഘാടനം ചെയ്തു. എസ്.ശിവദാസ്, കെ.വിനോദ് കുമാര്‍, എന്‍.കര്‍പ്പകം, നാഷണല്‍ യൂത്ത് വളണ്ടിയര്‍മാര്‍ നേതൃത്വം നല്‍കി.

ജില്ലയിലെ മഴക്കാലപൂര്‍വ പ്രവര്‍ത്തങ്ങള്‍ വിലയിരുത്തുന്നതിനും  മഴക്കാലത്തോടനുബന്ധിച്ച് അടിയന്തിരമായി പൂര്‍ത്തിയാക്കേണ്ട പ്രവര്‍ത്തനങ്ങള്‍ സംബന്ധിച്ച് ചര്‍ച്ചചെയ്യാനുമായി മന്ത്രി എ.കെ. ബാലന്റെ  നേതൃത്വത്തില്‍ കലക്ട്രേറ്റ്  കോണ്‍ഫറന്‍സ് ഹാളില്‍ യോഗം ചേര്‍ന്നു.