നെഹ്റു യുവ കേന്ദ്രയില്‍ അഫിലിയെറ്റ് ചെയ്ത യുവജന-സന്നദ്ധ സംഘടനകള്‍ മാര്‍ച്ച് 27നകം അഫിലിയേഷന്‍ പുതുക്കണമെന്ന് ജില്ലാ യൂത്ത് കോഡിനേറ്റര്‍ അറിയിച്ചു. യൂത്ത് ക്ലബ്ബിനെ സംബന്ധിച്ച പുതിയ വിശദാംശങ്ങള്‍, അംഗങ്ങളുടെ വിവരങ്ങള്‍ എന്നിവ ഓണ്‍ലൈനില്‍ ചേര്‍ക്കണം. പുതുക്കിയ സംഘടനകള്‍ക്ക് മാത്രമേ  തുടര്‍ന്നും സര്‍ക്കാര്‍ ആനുകൂല്യം   ലഭിക്കൂ. കൂടുതല്‍ വിവരങ്ങള്‍ക്ക് പാലക്കാട് ജില്ലാ പഞ്ചായത്ത് റോഡിലുള്ള നെഹ്റു യുവ കേന്ദ്ര ഓഫീസില്‍ നേരിട്ടോ 0491- 2505024 നമ്പറിലോ dyc.palakkad@gmail.com ലോ  ബന്ധപ്പെടാം.

     നവീന ആശയങ്ങളുള്ള യുവാക്കള്‍ക്ക് അവരുടെ സംരംഭക സ്വപ്നങ്ങള്‍ യാഥാര്‍ത്ഥ്യമാക്കാനുള്ള പശ്ചാത്തലം ഒരുക്കുക എന്ന ലക്ഷ്യത്തോടെ സംസ്ഥാന യുവജനക്ഷേമ ബോര്‍ഡ് ഒരുക്കിയ 'കീ സമ്മിറ്റ് 2018' ശില്പശാലയില്‍ വിജയിച്ച യുവാക്കള്‍ക്ക് സമ്മാനങ്ങള്‍ വിതരണം ചെയ്യും.  സമ്മാന വിതരണത്തിന്റെ ഉദ്ഘാടനം മാര്‍ച്ച് 20 ന് രാവിലെ 10.30 ന് തിരുവന്തപുരം ഗവ. ആര്‍ട്‌സ് കോളേജില്‍ വ്യവസായ കായിക-യുവജനകാര്യവകുപ്പ് മന്ത്രി എ.സി. മൊയ്തീന്‍ നിര്‍വഹിക്കും. സമ്മാന തുക സ്‌പോണ്‍സര്‍ ചെയ്തിരിക്കുന്നത് അല്‍ഡ്രല്‍ വെഞ്ച്വര്‍ ഉടമ റാഡോപോളാണ്.   സംസ്ഥാന യുവജനക്ഷേമ ബോര്‍ഡ് വൈസ് ചെയര്‍മാന്‍ പി. ബിജു അദ്ധ്യക്ഷത വഹിക്കും

     സംസ്ഥാന പിന്നാക്ക വിഭാഗ കമ്മീഷന്‍ മാര്‍ച്ച് 21 ന് എറണാകുളം സര്‍ക്കാര്‍ ഗസ്റ്റ് ഹൗസ് കോണ്‍ഫറന്‍സ് ഹാളില്‍ സിറ്റിംഗ് നടത്തും.  രാവിലെ 11 ന് ആരംഭിക്കും.  തെളിവെടുപ്പില്‍ വിവിധ സംഘടനാ പ്രതിനിധികളും വ്യക്തികളും സമര്‍പ്പിച്ച നിവേദനങ്ങള്‍ പരിഗണിക്കും.
പി.എന്‍.എക്‌സ്.1037/18

    സൗദി അറേബ്യയിലെ അല്‍-മൗവ്വാസാത്ത് ഹെല്‍ത്ത് ഗ്രൂപ്പിലേക്ക് ബി.എസ്.സി/ഡിപ്ലോമ നഴ്‌സുമാരെ (സ്ത്രീകള്‍ മാത്രം) നിയമിക്കുന്നതിനായി ഒ.ഡി.ഇ.പി.സി തിരുവനന്തപുരം വഴുതയ്ക്കാട് ഓഫീസില്‍ വച്ച് സ്‌കൈപ്പ് ഇന്റര്‍വ്യൂ ചെയ്യും. ഇന്റര്‍വ്യൂവില്‍ പങ്കെടുക്കാന്‍ താല്‍പര്യമുള്ളവര്‍ www.odepc.kerala.gov.in എന്ന വെബ്‌സൈറ്റിലെ വിജ്ഞാപന പ്രകാരം മാര്‍ച്ച് 27 ന് മുമ്പ് അപേക്ഷിക്കണം. ഫോണ്‍: 0471-2329440, 41, 42, 43, 45.
പി.എന്‍.എക്‌സ്.1036/18

    മത്സ്യത്തൊഴിലാളി മേഖലയുടെ സമഗ്രവികസനം ലക്ഷ്യമാക്കി പ്രവര്‍ത്തിക്കുന്ന സഹകരണ അപ്പെക്‌സ് ഫെഡറേഷന്‍ ആയ മത്സ്യഫെഡിന്റെ സ്ഥാപകദിനം ആചരിച്ചു.    സ്ഥാപകദിനാചരണത്തിന്റെ സംസ്ഥാനതല ഉദ്ഘാടനം എറണാകുളത്ത് മത്സ്യഫെഡ് ചെയര്‍മാന്‍ പി.പി. ചിത്തരഞ്ജന്‍ നിര്‍വഹിച്ചു.  മാനേജിംഗ് ഡയറക്ടര്‍ ഡോ. ലോറന്‍സ് ഹരോള്‍ഡ്, ഭരണസമിതിയംഗങ്ങളായ കെ.സി. രാജീവ്, പി.ബി ഫ്രാന്‍സിസ് (ദാളോ), റ്റി. രഘുവരന്‍, ശ്രീവിദ്യ സുമോദ്, ഉദ്യോഗസ്ഥര്‍, സഹകാരികള്‍ തുടങ്ങിയവര്‍ പങ്കെടുത്തു.

    പ്ലസ് ടു സയന്‍സ് വിഷയം പഠിക്കുന്ന പട്ടിക വര്‍ഗ വിദ്യാര്‍ത്ഥികള്‍ക്ക് 2018 ലെ നീറ്റ്/എന്‍ജിനീയറിംഗ് എന്‍ട്രന്‍സ് പരീക്ഷയ്ക്കു മുമ്പ് ഒരു മാസത്തെ ക്രാഷ് കോച്ചിംഗ് ക്ലാസ് നടത്തും.  പ്ലസ് വണ്‍ പരീക്ഷയിലും, പ്ലസ് ടു ഇതുവരെയുള്ള പരീക്ഷകളിലും വിജയം കൈവരിച്ച വിദ്യാര്‍ത്ഥികളില്‍ നിന്നുമാണ് അപേക്ഷ ക്ഷണിച്ചത്.