ജില്ലാ ടി.ബി സെന്ററിലെ ലബോറട്ടറിയിലേക്ക് ഐഎംഎയുടെ കരാര്‍ വ്യവസ്ഥയില്‍ പിഎസ്‌സി അംഗീകൃത യോഗ്യതയുള്ള(ഡിഎംഎല്‍ടി, ബിഎസ്‌സി എംഎല്‍ടി) ലാബ് ടെക്‌നീഷ്യന്റെ ഒഴിവിലേക്ക് ഈ മാസം 23ന് രാവിലെ പത്തിന് കൂടിക്കാഴ്ച നടത്തും. താല്‍പര്യമുള്ളവര്‍ 23ന് രാവിലെ പത്തിന് മുമ്പായി ജില്ലാ ടിബി സെന്ററില്‍ എത്തണമെന്ന് ടിബി ഓഫീസര്‍ അറിയിച്ചു.
 

  തൃക്കരിപ്പൂര്‍ നിയോജക മണ്ഡലത്തില്‍ ചെറുവത്തൂര്‍ ഗ്രാമപഞ്ചായത്തിലെ കുട്ടമത്ത് ഗവ. ഹയര്‍സെക്കന്ററി സ്‌കൂളില്‍  നബാര്‍ഡ് സഹായത്തോടെ രണ്ട് കോടി രൂപ ചെലവില്‍ നിര്‍മ്മിക്കുന്ന കെട്ടിടത്തിന്റെ ഗുണഭോക്തൃവിഹിതമായ 30 ലക്ഷം രൂപ  എം രാജഗോപാലന്‍ എംഎല്‍എ യുടെ പ്രത്യേക വികസന നിധിയില്‍ നിന്നും അനുവദിച്ചു. പദ്ധതിക്ക് ജില്ലാകളക്ടര്‍ ജീവന്‍ബാബു കെ ഭരണാനുമതി നല്‍കി.

       
    എന്‍.എ നെല്ലിക്കുന്ന് എംഎല്‍എ യുടെ പ്രത്യേക വികസന നിധിയില്‍ നിന്ന് കാസര്‍കോട് നിയോജകമണ്ഡലത്തില്‍ കാസര്‍കോട് മുനിസിപ്പാലിറ്റിയിലെ കൊമറഡി ടെമ്പിള്‍ ഫ്രണ്ട് റോഡ്  കോണ്‍ക്രീറ്റിംഗിന് അഞ്ച് ലക്ഷം രൂപയും മഡോണ എ യു പി സ്‌കൂളിലെ  കുഴല്‍കിണറിന് പമ്പ് സെറ്റ്  സ്ഥാപിക്കുന്നതിന് 80,000 രൂപയും മധൂര്‍ ഗ്രാമപഞ്ചായത്തിലെ ഉളിയത്തടുക്ക-റഹ്മത്ത് നഗര്‍ റോഡ് കോണ്‍ക്രീറ്റിംഗിന് ഏഴ് ലക്ഷം രൂപയും കാറഡുക്ക പഞ്ചായത്തിലെ  പണിയ എ എല്‍ പി സ്‌കൂളിന് ലാപ് ടോപ് വാങ്ങുന്നതിന് 54,860 രൂപയും  അനുവദിച്ചു. പദ്ധതികള്‍ക്ക് ജില്ലാ കളക്ടര്‍ ഭരണാനുമതി നല്‍കി.
 

  ജില്ലയില്‍ ബാങ്ക് വായ്പ എടുത്ത് റവന്യൂ റിക്കവറി നടപടികള്‍ നേരിടുന്നവര്‍ക്ക് വേണ്ടി ഈ മാസം  20 ന് രാവിലെ 10.30 ന് കളക്ടറേറ്റില്‍ ബാങ്ക് ലോണ്‍ അദാലത്ത് നടത്തും.  ജില്ലാകളക്ടര്‍,  ബാങ്ക് മേലധികാരികള്‍, റവന്യൂ ഉദ്യോഗസ്ഥര്‍ തുടങ്ങിയവര്‍ പങ്കെടുക്കും.  പരമാവധി ഇളവുകള്‍ അദാലത്തില്‍ അനുവദിക്കും. ദേശസാല്‍കൃത ബാങ്ക്, ഷെഡ്യൂള്‍ഡ് ബാങ്ക് എന്നിവയില്‍  നിന്ന് വായ്പ എടുത്ത് റവന്യൂ റിക്കവറി നടപടി നേരിടുന്നവര്‍ അദാലത്തിനെത്തി   ജപ്തി നടപടിയില്‍ നിന്നും ഒഴിവാകണമെന്ന് ജില്ലാ കളക്ടര്‍ അറിയിച്ചു. അദാലത്തിനെ സംബന്ധിച്ച വിശദ വിവരങ്ങള്‍ക്ക് ബന്ധപ്പെട്ട വില്ലേജ് ഓഫീസുമായി  ബന്ധപ്പെടണം. 

    കേന്ദ്രാവിഷ്‌കൃത പദ്ധതികളുടെ നിര്‍വ്വഹണ പുരോഗതി വിലയിരുത്തുന്നതിന്  രൂപീകരിച്ച ഡിസ്ട്രിക്ട് ഡവലപ്പ്‌മെന്റ് കോ-ഓര്‍ഡിനേഷന്‍ ആന്റ് മോണിറ്ററിംഗ് കമ്മറ്റിയുടെ  മീറ്റിംഗ് പി കരുണാകരന്‍ എം പിയുടെ അധ്യക്ഷതയില്‍ ഇന്ന് (16) ഉച്ചയ്ക്ക് രണ്ട് മണിക്ക്  കളക്ടറേറ്റ് മിനി കോണ്‍ഫറന്‍സ് ഹാളില്‍ ചേരും. യോഗത്തില്‍ എംഎല്‍എ മാര്‍, ജില്ലാ-ബ്ലോക്ക്-ഗ്രാമപഞ്ചായത്ത് പ്രസിഡന്റുമാര്‍, നിര്‍വ്വഹണ ഉദ്യോഗസ്ഥര്‍ പങ്കെടുക്കും.
 

  ജില്ലയിലെ ട്രാന്‍സ്‌ജെന്‍ഡറുകള്‍ക്ക് തിരിച്ചറിയല്‍ കാര്‍ഡ് നല്‍കുന്നു.  ജില്ലയില്‍ താമസിക്കുന്ന ട്രാന്‍സ്‌ജെന്‍ഡറുകള്‍ വെളളപേപ്പറില്‍ അപേക്ഷ തയ്യാറാക്കി ഫോട്ടോ, മറ്റ് വിവരങ്ങള്‍ ഉള്‍പ്പെടെയുളള  വിശദാംശം ജില്ലാ സാമൂഹ്യനീതി ഓഫീസില്‍  10 ദിവസത്തിനകം സമര്‍പ്പിക്കണമെന്ന് ജില്ലാ സാമൂഹ്യനീതി ഓഫീസര്‍ അറിയിച്ചു.

    റബ്ബര്‍ മേഖലയിലെ വിദഗ്ധ തൊഴിലാളികളുടെ ദൗര്‍ലഭ്യം പരിഹരിക്കുക, കുടുംബശ്രീ അംഗങ്ങളുടെ ശാക്തീകരണവും സാമൂഹ്യ-സാമ്പത്തിക രംഗങ്ങളില്‍ അവരുടെ ഉയര്‍ച്ചയും ലക്ഷ്യമാക്കി രൂപീകരിച്ച തേജസ്വനി വനിതാ തൊഴില്‍ സേനയുടെ 30 ദിവസത്തെ പരിശീലന പരിപാടി സമാപിച്ചു. 

  ഇന്‍ഫര്‍മേഷന്‍ പബ്ലിക് റിലേഷന്‍സ് വകുപ്പിന്റെ ആഭിമുഖ്യത്തില്‍ മഞ്ചേശ്വരം നിയോജക മണ്ഡലത്തില്‍ നടത്തുന്ന പ്രതിരോധമരുന്ന്- ശുചിത്വബോധവത്ക്കരണ ശില്പശാലയും പ്രദര്‍ശനവും ഇന്ന് (16) ഉച്ചയ്ക്ക് രണ്ടിന് പൈവളിഗെ പഞ്ചായത്ത് ഹാളില്‍ നടക്കും. പി.ബി അബ്ദുള്‍ റസാഖ് എംഎല്‍എ ഉദ്ഘാടനം ചെയ്യും. പൈവളിഗെ ഗ്രാമ പഞ്ചായത്ത് പ്രസിഡന്റ് ഭാരതി അധ്യക്ഷത വഹിക്കും. മഞ്ചേശ്വരം സിഎച്ച്‌സിയിലെ മെഡിക്കല്‍ ഓഫീസര്‍ ഡോ. ബിജി ജോസഫ് ബോധവല്‍ക്കരണ ക്ലാസെടുക്കും. ജില്ലാ ശുചിത്വമിഷന്റെ നേതൃത്വത്തിലാണ് ചിത്രപ്രദര്‍ശനം നടക്കുന്നത്. 

കൃഷി വകുപ്പിന്റെ സഹായത്തോടെ കേന്ദ്രതോട്ടവിള ഗവേഷണ സ്ഥാപനം നടപ്പിലാക്കുന്ന  തെങ്ങിന്റെ സംയോജിത കീടരോഗ നിയന്ത്രണത്തെ ആസ്പദമാക്കിയുളള വിജ്ഞാന  വ്യാപന പദ്ധതിയുടെ  ഭാഗമായുളള ജില്ലാതല കര്‍ഷക പരിശീലന പരിപാടി സിപിസിആര്‍ഐയില്‍  സംഘടിപ്പിച്ചു.  ജില്ലാ പഞ്ചായത്ത് പ്രസിഡന്റ് എജിസി ബഷീര്‍ ഉദ്ഘാടനം ചെയ്തു.  ഡയറക്ടര്‍  ഇന്‍ ചാര്‍ജ് ഡോ. വിനായക ഹെഗ്‌ഡെ അധ്യക്ഷത  വഹിച്ചു.  തെങ്ങിന്റെ സസ്യ സംരക്ഷണത്തെ ആസ്പദമാക്കി സംസ്ഥാനത്തെ  വിവിധ ജില്ലകളില്‍ സിപിസിആര്‍ഐയുടെ നേതൃത്വത്തില്‍ സംഘടിപ്പിക്കുന്ന പരിപാടികളെക്കുറിച്ച് പ്രിന്‍സിപ്പല്‍ സയന്റിസ്റ്റ് ഡോ. സി തമ്പാന്‍ വിശദീകരിച്ചു.

കൊച്ചി: ഹരിതകേരളം മിഷന്‍ ജില്ലാ കോ-ഓര്‍ഡിനേഷന്‍ സെല്ലിന് മാസ വേതനാടിസ്ഥാനത്തില്‍ നാലു ചക്രവാഹനം (ഡ്രൈവര്‍ ഉള്‍പ്പെടെ) ലഭ്യമാക്കുന്നതിന് അപേക്ഷ ക്ഷണിച്ചു. താത്പര്യമുളളവര്‍ അപേക്ഷ, (വാഹനത്തിന്റെ രജിസ്‌ട്രേഷന്‍ സര്‍ട്ടിഫിക്കറ്റ്, ഫിറ്റ്‌നസ് സര്‍ട്ടിഫിക്കറ്റ്, ടാക്‌സ് രസീത്, ഇന്‍ഷുറന്‍സ് എന്നിവയുടെ പകര്‍പ്പ് സഹിതം) 2018 മാര്‍ച്ച് 20-ന് മുമ്പായി  കളക്ടറേറ്റ്, അഡ്മിനിസ്‌ട്രേഷുന്‍ വിഭാഗം ജൂനിയര്‍ സൂപ്രണ്ട് മുമ്പാകെ നേരിട്ട് സമര്‍പ്പിക്കണം. അനുവദിക്കാവുന്ന പരമാവധി മാസ വാടക 25,000 രൂപ. കൂടുതല്‍ വിവരങ്ങള്‍ക്ക് കളക്ടറേറ്റിലെ ഭരണവിഭാഗം സെക്ഷനുമായി ബന്ധപ്പെടുക.