അയ്യങ്കാളി ജലോത്സവത്തിന്റെ ഭാഗമായി  സ്വാഗതസംഘം രൂപീകരിച്ചു. എം. വിൻസെന്റ് എം.എൽ.എയുടെ അധ്യക്ഷതയിൽ വെള്ളായണി രാജസൂയം ഓഡിറ്റോറിയത്തിൽ ചേർന്ന യോഗത്തിലാണ് സ്വാഗതസംഘം രൂപീകരിച്ചത്. 

നിലവിൽ പാലപ്പൂര് ഭാഗത്ത്‌ നിന്നും കുളങ്ങര ക്ഷേത്ര ഭാഗത്തെക്കാണ്  മത്സരം നടത്തുന്നത്. നിർമ്മാണം പുരോഗമിക്കുന്ന വെള്ളായണി-കല്ലിയൂർ പാലം അടുത്ത വർഷം പൂർത്തിയാകുന്നതോടെ കായലിൽ ഹൊറിസോണ്ടൽ ശൈലിയിൽ ട്രാക്ക് ഒരുക്കി വള്ളംകളി കൂടുതൽ ആവേശകരമാക്കാൻ മാറ്റാനും യോഗത്തിൽ തീരുമാനമായി. ഇത്തവണയും 
ജലോത്സവത്തോടനുബന്ധിച്ച് ഡി.ടി.പി.സി.യുടെ നേതൃത്വത്തിൽ കാക്കാമൂലയിൽ വിപുലമായ പരിപാടികൾ സംഘടിപ്പിക്കും.

മൂന്ന് പ്രമുഖ സ്വകാര്യസ്ഥാപനങ്ങളിലെ ഇരുന്നൂറിലേറെ ഒഴിവുകളിലേക്ക് ജൂലൈ 25ന് (ശനിയാഴ്ച) രാവിലെ 10 മുതൽ കോട്ടയം ജില്ലാ എംപ്ലോയ്മെന്റ് എക്സ്ചേഞ്ചിൽ പ്രവർത്തിക്കുന്ന എംപ്ലോയബിലിറ്റി സെന്ററിൽ വച്ച് അഭിമുഖം നടത്തും. പങ്കെടുക്കുന്നതിനായി എംപ്ലോയബിലിറ്റി സെന്ററിൽ രജിസ്റ്റർ ചെയ്യണം. ഫോൺ:8138908657, 0481-2563451.

ജൂലൈ മാസത്തെ ജില്ലാവികസന സമിതിയോഗം 25ന്(ശനിയാഴ്ച) രാവിലെ 11ന് കോട്ടയം ജില്ലാ ആസൂത്രണ സമിതി സെക്രട്ടേറിയറ്റ് കോൺഫറൻസ് ഹാളിൽ ചേരും.

എസ്.ആർ.സി കമ്മ്യൂണിറ്റി കോളജ് നടത്തുന്ന സർട്ടിഫിക്കറ്റ് ഇൻ മാനേജ്മെന്റ് ഓഫ് സ്പെസിഫിക് ലേണിംഗ് ഡിസോഡേഴ്സ് പ്രോഗ്രാമിന് https://app.srccc.in/register എന്ന ലിങ്കിലൂടെ ജൂലൈ 31 വരെ അപേക്ഷിക്കാം.  ഫോൺ: 9995113019, 9961613331.

ഉന്നതികളിലെ അടിസ്ഥാന സൗകര്യ വികസനത്തിനും പ്രശ്‌നപരിഹാരത്തിനും ഉയര്‍ന്ന പരിഗണന നല്‍കുമെന്ന് വനം വകുപ്പ് മന്ത്രി ഷിബു ബേബി ജോണ്‍. നെടുങ്കയം ഉന്നതിയിലെ അങ്കണവാടിയും കമ്മ്യൂണിറ്റി ഹാളും മറ്റൊരു സ്ഥലത്തേക്ക് മാറ്റി സ്ഥലപരിമിതി പരിഹരിക്കാന്‍ ശ്രമിക്കുമെന്നും മന്ത്രി പറഞ്ഞു. നെടുങ്കയം ഉന്നതിയില്‍ സന്ദര്‍ശനത്തിനെത്തിയ മന്ത്രിയുടെ മുമ്പാകെ ഉന്നതിയിലെ കുടുംബങ്ങള്‍ ഉന്നയിച്ച മിക്ക പരാതികളും പരിഹരിക്കാന്‍ മന്ത്രി നിര്‍ദ്ദേശം നല്‍കി

സൈനികർ, വിമുക്തഭടന്മാർ, വിമുക്തഭട വിധവകൾ എന്നിവർക്ക് സൗജന്യമായി നിയമസഹായം നൽകാൻ കോട്ടയം ജില്ലാ ലീഗൽ സർവ്വീസസ് അതോറിറ്റിയുടെ ആഭിമുഖ്യത്തിൽ ലീഗൽ സർവ്വീസസ് ക്ലിനിക്കിന്റെ സൗജന്യസേവനം എല്ലാ മാസവും രണ്ടാം വെള്ളിയാഴ്ച മണർകാടുള്ള ജില്ലാ സൈനികക്ഷേമ ഓഫിസിൽ ലഭിക്കും.

കേന്ദ്ര-സംസ്ഥാന സർക്കാരുകൾ സംയുക്തമായി നടപ്പാക്കുന്ന കാലാവസ്ഥാധിഷ്ഠിത വിള ഇൻഷുറൻസ് പദ്ധതിയിൽ ഖാരിഫ് വിളകൾ ജൂലൈ 31 വരെ ഇൻഷുർ ചെയ്യാം. ഇൻഷുറൻസ് സൈറ്റ് (pmfby.gov.in), കോമൺ സർവ്വീസ് സെന്റർ, അക്ഷയ സെന്റർ, ലോൺ എടുക്കുന്ന ബാങ്ക് എന്നിവ വഴി ഇൻഷുർ ചെയ്യാം. കോട്ടയം ജില്ലയിൽ നെല്ല്, കവുങ്ങ്, വാഴ, വെറ്റില, കശുമാവ്, ഗ്രാമ്പൂ, കൊക്കോ, ഇഞ്ചി, കിഴങ്ങുവർഗ്ഗ പച്ചക്കറി എന്നീ വിളകൾ ഇൻഷുർ ചെയ്യാൻ സാധിക്കും. ആധാർ കാർഡ്, ബാങ്ക് പാസ്ബുക്ക്, കരം അടച്ച രസീത് എന്നിവയുമായി അതത് കൃഷിഭവനുമായി ബന്ധപ്പെട്ടാൽ ഇൻഷുറൻസ് ചെയ്യുന്നതിന് സഹായം ലഭ്യമാകും. ഫോൺ: 18004257064.

മുണ്ടേരി ഉള്‍വനത്തിലെ വാണിയമ്പുഴ ഉന്നതിയില്‍ പ്രീ പ്രൈമറി സ്‌കൂളിനും കമ്യൂണിറ്റി ഹാളിനും കരുളായി ഉള്‍വനത്തിലെ മുണ്ടക്കടവ് ഉന്നതിയില്‍ അങ്കണവാടിക്കും വനംവകുപ്പ് സ്ഥലം നല്‍കുമെന്ന് വനം മന്ത്രി ഷിബു ബേബി ജോണ്‍. പ്രളയത്തില്‍ വീടും സ്ഥലവും നഷ്ടമായി ഏഴു വര്‍ഷമായി മുണ്ടേരി വിത്തുകൃഷി തോട്ടത്തിലെ സ്റ്റാഫ് ക്വാര്‍ട്ടേഴ്സില്‍ കഴിയുന്ന തണ്ടന്‍കല്ല്  ഉന്നതിക്കാരെ പുനരധിവസിപ്പിക്കുമെന്നും മന്ത്രി പറഞ്ഞു. തണ്ടന്‍കല്ലുകാര്‍ മുമ്പ് താമസിച്ചിരുന്ന മുണ്ടേരി വനത്തിനുള്ളിലെ സ്ഥലം വാസയോഗ്യമാണെന്ന് ജിയോളജി വകുപ്പ് റിപ്പോര്‍ട്ട് നല്‍കിയാല്‍ ആ സ്ഥലം ഉടന്‍ കൈമാറും.

മലപ്പുറം ജില്ലയിലെ പോലീസ്, ഫയര്‍ ആന്‍ഡ് റെസ്‌ക്യൂ സര്‍വീസ് എന്നീ വകുപ്പുകളിലേക്ക് ഹോം ഗാര്‍ഡ് വിഭാഗത്തില്‍ ഒഴിവുള്ള തസ്തികകളിലേക്ക് യോഗ്യരായ സ്ത്രീ-പുരുഷ ഉദ്യോഗാര്‍ഥികളില്‍ നിന്നും അപേക്ഷ ക്ഷണിച്ചു. സൈനിക, അര്‍ധസൈനിക അല്ലെങ്കില്‍ സംസ്ഥാന സേനകളില്‍ നിന്ന് വിരമിച്ചവരും എസ്.എസ്.എല്‍.സിയും (അഭാവത്തില്‍ ഏഴാം ക്ലാസ്) നല്ല ശാരീരിക ക്ഷമതയുമുള്ള 35-നും 58-നും ഇടയില്‍ പ്രായമുള്ളവര്‍ക്ക് അപേക്ഷിക്കാം. പ്രതിദിനം 870 രൂപ വേതനവും (പ്രതിമാസം പരമാവധി 24,360 രൂപ) പ്രതിവര്‍ഷം 1500 രൂപ യൂണിഫോം അലവന്‍സും ലഭിക്കും.

സംസ്ഥാന സര്‍ക്കാരിന്റെ 100 ദിന കര്‍മ്മ പദ്ധതിയുടെ ഭാഗമായി കേരള സംസ്ഥാന പിന്നോക്ക വിഭാഗ വികസന കോര്‍പ്പറേഷന്‍ (കെ.എസ്.ബി.സി.ഡി.സി) മലപ്പുറം ജില്ലാ ഓഫീസ് സംഘടിപ്പിച്ച 'സമഗ്ര 2026' വായ്പാ വിതരണ മേളയുടെ ഉദ്ഘാടനം മുനിസിപ്പല്‍ വൈസ് ചെയര്‍പേഴ്സണ്‍ ജിതേഷ് ജി. അനില്‍ നിര്‍വ്വഹിച്ചു. വിവിധ പദ്ധതികളിലായി ആകെ 6.70 കോടി രൂപയുടെ വായ്പയാണ് മേളയില്‍ വിതരണം ചെയ്തത്. ഇതില്‍ ലഘുവായ്പാ പദ്ധതി പ്രകാരം വാഴക്കാട് സി.ഡി.എസിന് മൂന്ന് കോടി രൂപയും, കാവനൂര്‍ സി.ഡി.എസിന് 2.24 കോടി രൂപയും, വ്യക്തിഗത പദ്ധതികളില്‍ 1.55 കോടി രൂപയും ഉള്‍പ്പെടുന്നു. ഇതിലൂടെ 600-ല്‍ പരം ഗുണഭോക്താക്കള്‍ക്ക് പ്രയോജനം ലഭിക്കും.