പുലിക്കളിലും മേളവുമായി ന​ഗരത്തിൽ സംഘടിപ്പിച്ച സംസ്ഥാന തിരഞ്ഞെടുപ്പ് കമ്മീഷന്റെ ഘോഷയാത്ര വർണ്ണാഭമായി. തിരഞ്ഞെടുപ്പ് പ്രചരണാർത്ഥമാണ് ന​ഗരത്തിൽ പൊലിമയോടെ വിളംബര ഘോഷയാത്ര നടത്തിയത്.

കേരളത്തിന്റെ തനത് കലാരൂപങ്ങളായ കഥകളി, മാർഗംകളി എന്നിവയും വർണ്ണക്കാവടികളും ഘോഷയാത്രയെ വേറിട്ടതാക്കി. ജില്ലാ സ്വീപിന്റെ നേതൃത്വത്തിൽ വടംവലിയും സംഘടിപ്പിച്ചു.

മുഖ്യ തിരഞ്ഞെടുപ്പ് ഓഫീസർ രത്തൻ യു ഖേൽക്കർ ഘോഷയാത്രയ്ക്ക് നേതൃത്വം നൽകി. ഇലക്ഷൻ വിഭാഗം ഉദ്യോഗസ്ഥർ, ജില്ലാ സ്വീപ്‌ ടീം തുടങ്ങിയവർ പങ്കെടുത്തു. 

ജില്ലയിലെ 14 നിയോജക മണ്ഡലങ്ങളിലെ പോളിം​ഗ് ബൂത്തുകളിലേയ്ക്കുള്ള പോളിം​ഗ് സാമ​ഗ്രികൾ വിതരണം ചെയ്തു. അതത് നിയോജക മണ്ഡലങ്ങളിൽ സജ്ജീകരിച്ച വിതരണ കേന്ദ്രങ്ങളിലാണ് സാമ​ഗ്രികളുടെ വിതരണം നടന്നത്. 

പ്രിസൈഡിം​ഗ് ഓഫീസർ, ഫസ്റ്റ് പോളിം​ഗ് ഓഫീസർ, രണ്ട് പോളിം​ഗ് ഓഫീസർമാർ എന്നിവരടങ്ങിയ സംഘമാണ് വിതരണ കേന്ദ്രങ്ങളിൽ എത്തി പോളിം​ഗ് സാമ​ഗ്രികൾ ഏറ്റുവാങ്ങിയത്. തുടർന്ന് റൂട്ട് ഓഫീസറുടെ സഹായത്തോടെ അവരവർക്ക് നിയോ​ഗിക്കപ്പെട്ട പോളിം​ഗ് ബൂത്തുകളിൽ സാമ​ഗ്രികൾ എത്തിച്ചു. 

3173 പോളിംഗ് ബൂത്തുകളിലും അത്യാധുനിക ക്യാമറകൾ സ്ഥാപിച്ചു

നിയമസഭാ തിരഞ്ഞെടുപ്പിന്റെ സുതാര്യത ഉറപ്പാക്കുന്നതിനായി ജില്ലയിലെ എല്ലാ പോളിംഗ് ബൂത്തുകളിലും വെബ്കാസ്റ്റിംഗ് സംവിധാനം നിലവിൽ വന്നു. ഇതിന്റെ ഭാഗമായി സജ്ജീകരിച്ച ജില്ലാതല വെബ്കാസ്റ്റിംഗ് കൺട്രോൾ റൂമിന്റെ ഉദ്ഘാടനം ജില്ലാ കളക്ടർ അനു കുമാരി നിർവഹിച്ചു. 
ജില്ലയിൽ സ്വതന്ത്രവും നീതിപൂർവ്വകവുമായ തിരഞ്ഞെടുപ്പ് ഉറപ്പാക്കുകയാണ് വെബ്കാസ്റ്റിംഗിലൂടെ ലക്ഷ്യമിടുന്നതെന്ന് ജില്ലാ കളക്ടർ പറഞ്ഞു. 

നിയമസഭാ തിരഞ്ഞെടുപ്പിനോടനുബന്ധിച്ച് ജില്ലയിൽ ഹരിതചട്ടം കർശനമായി പാലിച്ചുകൊണ്ടുള്ള പ്രവർത്തനങ്ങൾ പുരോഗമിക്കുന്നു. ജില്ലാ ഇലക്ഷൻ ഓഫീസർ കൂടിയായ ജില്ലാ കളക്ടറുടെ നേതൃത്വത്തിൽ ശുചിത്വ മിഷന്റെ സജീവ പങ്കാളിത്തത്തോടെയാണ് പ്രവർത്തനങ്ങൾ ഏകോപിപ്പിക്കുന്നത്.
തിരഞ്ഞെടുപ്പ് സാമഗ്രികളുടെ വിതരണ കേന്ദ്രങ്ങളിൽ ഹരിതചട്ടം പാലിക്കുന്നുണ്ടെന്ന് ഉറപ്പുവരുത്താൻ ജില്ലാ ശുചിത്വ മിഷൻ കോർഡിനേറ്ററുടെ നേതൃത്വത്തിൽ പ്രത്യേക പരിശോധന നടത്തി. വിതരണ കേന്ദ്രങ്ങളിലും അനുബന്ധ ഇടങ്ങളിലും പരിസ്ഥിതി സൗഹൃദമായ രീതിയിലാണ് ക്രമീകരണങ്ങൾ ഒരുക്കിയിരുന്നത്. 
 

നിയമസഭാ തിരഞ്ഞെടുപ്പുമായി ബന്ധപ്പെട്ട് ജില്ലയിലെ മൈക്രോ ഒബ്സർവർമാർക്ക് പരിശീലനം നൽകി. തൈക്കാട് ​ഗവ ​ഗസ്റ്റ് ഹൗസിൽ സംഘടിപ്പിച്ച പരിശീലനം ജില്ലാ തിരഞ്ഞെടുപ്പ് ഉദ്യോ​ഗസ്ഥയും ജില്ലാ കളക്ടറുമായ അനു കുമാരി ഉദ്ഘാടനം ചെയ്തു. ജില്ലയിൽ നിയോ​ഗിക്കപ്പെട്ട ജനറൽ ഒബ്സർവർമാരായ രവി കുമാർ അറോറ, ആഷിഷ് ജോഷി, ​ഗോപാൽ മീണ തുടങ്ങിയവർ മൈക്രോ ഒബ്സർവർമാർക്ക് വേണ്ട മാർ​​ഗ നിർദ്ദേശങ്ങൾ നൽകി. 

ഇലക്ഷൻ ട്രയ്നിം​ഗ് നോഡൽ ഓഫീസർ സജി ആർ.എസ്, പരിശീലകരായ നിഷ എസ് ശിവാനന്ദൻ, അജയ്കുമാർ ആർ.എൽ എന്നിവർ ക്ലാസ്സുകൾ നയിച്ചു. 

നിയമസഭാ തിരഞ്ഞെടുപ്പ് നിരീക്ഷിക്കുന്നതിനും വിലയിരുത്തുന്നതിനുമായി വിവിധ വിദേശ രാജ്യങ്ങളിൽ നിന്നും എത്തിയ എട്ട് അംഗ സംഘം ജില്ലയിലെ പോളിം​ഗ് സാമ​ഗ്രികളുടെ വിതരണ കേന്ദ്രങ്ങൾ സന്ദർശിച്ചു. വഴുതയ്ക്കാട് കോട്ടൺഹിൽ ജി.എച്ച്.എസ് സ്കൂളിൽ ക്രമീകരിച്ച നേമം മണ്ഡലത്തിലെ വിതരണ കേന്ദ്രത്തിൽ എത്തിയ സംഘം സ്ഥിതി​ഗതികൾ വിലയിരുത്തി. പോളിംഗ് സാമഗ്രി വിതരണ കേന്ദ്രങ്ങൾക്ക് പുറമേ കൺട്രോൾ റൂമുകളും സംഘം സന്ദർശിച്ചു.

ഇന്റർനാഷണൽ ഇലക്ഷൻ വിസിറ്റേഴ്‌സ് പ്രോഗ്രാമിന്റെ (IEVP) ഭാഗമായിട്ടാണ് വിവിധ രാജ്യങ്ങളിലെ തിരഞ്ഞെടുപ്പ് മാനേജ്‌മെന്റ് ബോഡികളിൽ നിന്നുള്ള പ്രതിനിധികൾ തലസ്ഥാനത്ത് എത്തിയത്. 

ഏപ്രിൽ 9-ന് നടക്കുന്ന വോട്ടെടുപ്പിനുള്ള എല്ലാ തയ്യാറെടുപ്പുകളും ജില്ലയിൽ പൂർത്തിയായതായി ജില്ലാ കളക്ടർ ജി. പ്രിയങ്ക അറിയിച്ചു.  വോട്ടിങ് യന്ത്രങ്ങളുടെ കമ്മീഷനിങ് പൂർത്തിയാക്കി. വോട്ടിങ് സാമഗ്രികളുടെ വിതരണം പൂർത്തിയായി. പോളിങ് ഉദ്യോഗസ്ഥർക്കുള്ള പരിശീലനവും വിന്യാസവും ഇതിനോടകം പൂർത്തിയായിക്കഴിഞ്ഞു. വോട്ടർമാർക്കായി പോളിങ് ബൂത്തുകളിൽ എല്ലാവിധ അടിസ്ഥാന സൗകര്യങ്ങളും ഉറപ്പാക്കിയിട്ടുണ്ടെന്നും ജില്ലാ കളക്ടർ വ്യക്തമാക്കി.

2026 നിയമസഭാ തിരഞ്ഞെടുപ്പിന് ജില്ല സജ്ജം. ജില്ലയിലാകെ 25,03,842 വോട്ടർമാർ ആണ് ഉള്ളത്. ഇതിൽ 12,18,707 പുരുഷ വോട്ടർമാരും 12,85,108 സ്ത്രീ വോട്ടർമാരും 27 ട്രാൻസ്ജെൻഡർ വോട്ടർമാരും ഉൾപ്പെടുന്നു. 

ജില്ലയിൽ കളമശ്ശേരി മണ്ഡലത്തിലാണ് ഏറ്റവും കൂടുതൽ വോട്ടർമാർ. 1,97,711 വോട്ടർമാർ. ഏറ്റവും കുറവ് വോട്ടർമാർ എറണാകുളം നിയോജക മണ്ഡലത്തിലാണ് - 1,36,222. 

കരുനാഗപ്പള്ളി മാലുമേല്‍ ശ്രീഭഗവതിക്ഷേത്രത്തിലെ ഉത്സവം കണക്കിലെടുത്ത്  ഏപ്രില്‍ 14ന് ക്ഷേത്രവും മൂന്ന് കിലോമീറ്റര്‍ ചുറ്റളവിലുള്ള പ്രദേശങ്ങളും  മദ്യനിരോധിത-ഉത്സവമേഖലയായി ജില്ലാ കലക്ടര്‍ പ്രഖ്യാപിച്ചു.
 

നിയമസഭാ തിരഞ്ഞെടുപ്പിലേക്കുള്ള വോട്ടുകള്‍ രാവിലെ 7 മുതല്‍ വൈകിട്ട് 6 വരെ രേഖപ്പെടുത്താമെന്ന് ജില്ലാ തിരഞ്ഞെടുപ്പ് ഉദ്യോഗസ്ഥനായ ജില്ലാ കലക്ടര്‍ എന്‍. ദേവിദാസ്. മോക് പോളിംഗ് വെളുപ്പിന് 5.30ന് നടത്തുമെന്നും വ്യക്തമാക്കി.