ചെന്നീര്‍ക്കര സര്‍ക്കാര്‍ ഐടിഐയില്‍ ഐ എം സി ക്ക് കീഴില്‍ കേന്ദ്രസര്‍ക്കാര്‍ അംഗീകാരത്തോടെ നടത്തുന്ന വിവിധ കോഴ്സുകളിലേക്ക് പ്രവേശനം ആരംഭിച്ചു.

അഡ്വാന്‍സ് ഡിപ്ലോമ ഇന്‍ ഹോസ്പിറ്റല്‍ അഡ്മിനിസ്‌ട്രേഷന്‍ ആന്റ് ഹ്യൂമന്റിസോഴ്‌സ്മാനേജ്മന്റ്  (ഒരു വര്‍ഷം),  പ്രൊഫഷണല്‍ ഡിപ്ലോമ ഇന്‍ ഏവിയേഷന്‍ ആന്‍ഡ് ലോജിസ്റ്റിക്‌സ് മാനേജ്‌മെന്റ് (ഒരു വര്‍ഷം)
ഡിപ്ലോമ ഇന്‍ മറൈന്‍ മെക്കാനിക്കല്‍ ഫിറ്റര്‍ (ആറ് മാസം), അഡ്വാന്‍സ്ഡ് ഡിപ്ലോമ ഇന്‍ ഓഫീസ് അഡ്മിനിസ്‌ട്രേഷന്‍ ആന്റ് എച്ച്ആര്‍എം (ആറ് മാസം) എന്നിവയാണ് കോഴ്സുകള്‍.
യോഗ്യത പ്ലസ് ടു/ബിരുദം. ഫോണ്‍ 7306119753.

പട്ടികജാതി വിദ്യാര്‍ഥികള്‍ക്കുള്ള വിവിധ സ്‌കോളര്‍ഷിപ്പുകള്‍ക്ക് അപേക്ഷ ക്ഷണിച്ചു. 2026-27 വര്‍ഷത്തേക്കുള്ള ഒന്നാം ഘട്ട അപേക്ഷ ഇ ഗ്രാന്റ്‌സ് 3.0 പോര്‍ട്ടല്‍ മുഖേനെ അപേക്ഷിക്കാം.  2025-26 അധ്യയന വര്‍ഷം പാസായ പരീക്ഷകള്‍ക്ക് മാത്രമാണ് സ്‌കോളര്‍ഷിപ്പ് അനുവദിക്കുന്നത്.

പുതിയ അധ്യയന വര്‍ഷാരംഭത്തില്‍ സ്‌കൂളുകളില്‍ സുസ്ഥിരവും പരിസ്ഥിതി സൗഹൃദവുമായ അന്തരീക്ഷം ഉറപ്പാക്കുന്നതിന് 'ഹരിത വിദ്യാലയം' ക്യാമ്പയിന് ജില്ലയില്‍ തുടക്കം. ശുചിത്വ മിഷന്റെ മാര്‍ഗനിര്‍ദേശമനുസരിച്ച് നടപ്പാക്കുന്ന ക്യാമ്പയിനിലൂടെ മാലിന്യ നിര്‍മാര്‍ജനം, ഉറവിട മലിനീകരണ നിയന്ത്രണം, പുനരുപയോഗം എന്നിവ കുട്ടികളിലേക്ക് പ്രായോഗിക രീതികളില്‍ എത്തിക്കുകയാണ് ലക്ഷ്യം.

ചെറുകിട കര്‍ഷകരെയും കൂട്ടായ്മകളെയും ശക്തിപ്പെടുത്തി കാര്‍ഷിക ഉല്‍പന്നങ്ങളെ  ദേശീയ - അന്താരാഷ്ട്ര നിലവാരത്തിലേക്കുയര്‍ത്തി സുസ്ഥിര വിലയും വിപണിയും ഉറപ്പുവരുത്തുന്ന പദ്ധതിക്ക് ജില്ലയില്‍ തുടക്കം. ലോകബാങ്കിന്റെ സഹകരണത്തോടെ കൃഷി വകുപ്പ് നടപ്പാക്കുന്ന കേര പദ്ധതിയിലെ പ്രൊഡക്ടിവ് അലയന്‍സ് സ്‌കീമിലുള്‍പ്പെടുത്തിയാണ് പദ്ധതി. മാനദണ്ഡങ്ങള്‍ക്കനുസൃതമായി ജില്ലയിലെ തിരഞ്ഞെടുക്കപ്പെട്ട കര്‍ഷക കമ്പനികള്‍ അവരുടെ ഉല്‍പന്നങ്ങള്‍ വാങ്ങാന്‍ പ്രാപ്തിയുള്ള അഗ്രി ബിസിനസ്സ് കമ്പനികളുമായി നേരിട്ട് കരാറുണ്ടാക്കി പ്രൊഡക്ടിവ് അലയന്‍സിന്റെ ഭാഗമാകും.

ലോക പരിസ്ഥിതി ദിനാചരണത്തോടനുബന്ധിച്ച് ഇലന്തൂര്‍ ബ്ലോക്ക്പഞ്ചായത്ത് ''ജീവനം 2026'' സംഘടിപ്പിച്ചു. ഇലന്തൂര്‍ ഖാദി ഗ്രാമോദ്യോഗ് ഭവനില്‍ നടന്ന ശുചീകരണ പരിപാടി ബ്ലോക്ക്പഞ്ചായത്ത് പ്രസിഡന്റ് ഗീതാ സജീവ് ഭാസ്‌കര്‍ ഉദ്ഘാടനം ചെയ്തു. ബ്ലോക്ക്പഞ്ചായത്ത് വൈസ്പ്രസിഡന്റ് അജി അലക്‌സ് ഹരിതസന്ദേശം നല്‍കി. ബ്ലോക്ക്പഞ്ചായത്ത് ആരോഗ്യ വിദ്യാഭ്യാസ സ്റ്റാന്റിംഗ് കമ്മിറ്റി ചെയര്‍മാന്‍ അശോക് ഗോപിനാഥ് വൃക്ഷത്തൈ നട്ടു.

 
അന്തര്‍ദേശീയ പരിസ്ഥിതി ദിനാചരണത്തിന്റെ ഭാഗമായി വിദ്യാര്‍ഥികള്‍ക്ക് ഔഷധ സസ്യങ്ങള്‍ പരിചയപ്പെടുത്തുന്നതിനും സ്‌കൂളുകളില്‍ നടുന്നതിനും സഹകരണ വകുപ്പ് ആവിഷ്‌ക്കരിച്ച 'മാതൃവനം പദ്ധതി' ജില്ലാതല ഉദ്ഘാടനം ആറന്മുള വൊക്കേഷണല്‍ ഹയര്‍ സെക്കന്‍ഡറി സ്‌കൂളില്‍ ജില്ല പഞ്ചായത്ത് പ്രസിഡന്റ് ദീനാമ്മ റോയി നിര്‍വഹിച്ചു. ആറന്മുള സര്‍വീസ് സഹകരണ ബാങ്ക് പ്രസിഡന്റ് കെ.ശിവപ്രസാദ് അധ്യക്ഷനായി. ജില്ല സഹകരണ സംഘം ജോയിന്റ് രജിസ്ട്രാര്‍ (ജനറല്‍) എം.പി സുജാത പരിസ്ഥിതി സന്ദേശം നല്‍കി. സ്‌കൂള്‍ പ്രിന്‍സിപ്പല്‍ എം. ഗീത, പി.ടി.എ പ്രസിഡന്റ്‌റ് വിനോദ് ബാബു തുടങ്ങിയവര്‍ പങ്കെടുത്തു.

പരിസ്ഥിതി സംരക്ഷണവും പരിപാലനവും വരുംതലമുറയ്ക്ക് വേണ്ടിയാണെന്നും ഓരോരുത്തരുടെയും കടമ കൂടിയാണെന്നും വര്‍ഗീസ് മാമ്മന്‍ എം.എല്‍.എ.  കാര്‍ഷിക വികസന കര്‍ഷക ക്ഷേമവകുപ്പും വിദ്യാഭ്യാസ വകുപ്പും ജില്ല പഞ്ചായത്തും പുളിക്കീഴ് ബ്ലോക്ക് പഞ്ചായത്തും  സംയുക്തമായി നിരണം സെന്റ് മേരീസ് ഹൈസ്‌കൂളില്‍ നടത്തിയ പരിസ്ഥിതി ദിനാചരണം ഉദ്ഘാടനം ചെയ്യുകയായിരുന്നു അദ്ദേഹം.
പത്തനംതിട്ട ജില്ല പഞ്ചായത്ത് പ്രസിഡന്റ് ദീനാമ്മ റോയി അധ്യക്ഷയായി.

കാലവര്‍ഷം ശക്തമാകുന്ന സാഹചര്യത്തില്‍ ചെന്നീര്‍ക്കര ഗ്രാമപഞ്ചായത്തിലെ സ്വകാര്യ വ്യക്തികളുടെയോ സ്ഥാപനങ്ങളുടേയോ ഉടമസ്ഥതയിലുള്ള പൊതുജനങ്ങളുടെ ജീവനും സ്വത്തിനും ഭീഷണിയായ മരങ്ങളും ശിഖരങ്ങളും ഫലങ്ങളും അടിയന്തരമായി മുറിച്ചു മാറ്റണം.  അപകടകരമായി നില്‍ക്കുന്ന മരങ്ങള്‍ മൂലം ദുരന്തം ഉണ്ടായാല്‍ സ്ഥല ഉടമകള്‍ക്കെതിരെ നിയമനടപടി സ്വീകരിക്കുമെന്ന് പഞ്ചായത്ത് സെക്രട്ടറി അറിയിച്ചു.
 

കേച്ചേരില്‍ എന്റര്‍പ്രൈസസ് സ്ഥാപനത്തിന്റെയും ഉടമയുടെയും പേരിലുള്ള പുരയിടവും ബഹുനില കെട്ടിടവും ഉള്‍പ്പെടെയുള്ള സ്വത്തുക്കള്‍ ജൂലൈ രണ്ട്  രാവില 11.30 ന് ഏനാത്ത് വില്ലേജ് ഓഫീസില്‍ ലേലം ചെയ്യും. ഫോണ്‍ 04734 224826

കാലവര്‍ഷം ശക്തമാകുന്ന സാഹചര്യത്തില്‍ ജാഗ്രത നിര്‍ദേശവുമായി ജില്ല ഭരണകൂടം. ഉരുള്‍പൊട്ടല്‍, മണ്ണിടിച്ചില്‍, മലവെള്ളപ്പാച്ചില്‍  സാധ്യതയുള്ള പ്രദേശങ്ങളില്‍ താമസിക്കുന്നവര്‍ അധികൃതരുടെ നിര്‍ദേശാനുസരണം സുരക്ഷിതമായ സ്ഥലങ്ങളിലേക്ക് മാറി താമസിക്കണം. ജില്ലയില്‍ 24 മണിക്കൂര്‍ പ്രവര്‍ത്തിക്കുന്ന താലൂക്ക്, ജില്ല കണ്‍ട്രോള്‍ റൂമുകള്‍ തുറന്നിട്ടുണ്ട്. അപകട സാധ്യത മുന്നില്‍ കാണുന്ന ഘട്ടത്തിലും സഹായങ്ങള്‍ക്കുമായി 1077, 1070 എന്നീ ടോള്‍ ഫ്രീ നമ്പറുകളില്‍ ബന്ധപ്പെടണം.