കൊല്ലം ജില്ലയില്‍ ആരോഗ്യ വകുപ്പില്‍ ലബോറട്ടറി ടെക്‌നിഷ്യന്‍ ഗ്രേഡ്-2 തസ്തികയിലേക്ക് (കാറ്റഗറി നമ്പര്‍ 305/17, 306/17, 307/17) അപേക്ഷ സമര്‍പ്പിച്ചവരുടെ ഒറ്റത്തവണ സര്‍ട്ടിഫിക്കറ്റ് പരിശോധന നവംബര്‍ ഏഴു മുതല്‍ 15 വരെ പി.എസ്.സി കൊല്ലം ജില്ലാ ഓഫീസില്‍ നടക്കും.

(പി.ആര്‍.കെ.നമ്പര്‍  2540/17)

സംസ്ഥാന വനിതാ കമ്മീഷന്‍ മെഗാ അദാലത്ത് നവംബര്‍ 13ന് രാവിലെ 10.30 മുതല്‍ കൊല്ലം ഗസ്റ്റ് ഹൗസില്‍ നടക്കും.

(പി.ആര്‍.കെ.നമ്പര്‍  2539/17)

സംസ്ഥാന പട്ടികജാതി പട്ടിക ഗോത്രവര്‍ഗ്ഗ കമ്മീഷന്‍ നവംബര്‍ 17ന് കൊല്ലം കലക്‌ട്രേറ്റ് കോണ്‍ഫറന്‍സ് ഹാളിലും 18ന് കൊട്ടാരക്കര പൊതുമരാമത്ത് റസ്റ്റ് ഹൗസിലും പരാതി പരിഹാര അദാലത്ത് നടത്തും.

(പി.ആര്‍.കെ.നമ്പര്‍  2538/17)

കാര്‍ഷിക വികസന കര്‍ഷക ക്ഷേമവകുപ്പ് പച്ചക്കറി കര്‍ഷകര്‍ക്കായി മിനി പോളിഹൗസുകള്‍ നിര്‍മിക്കുന്ന പദ്ധതി നടപ്പിലാക്കുന്നു. 100, 200 ചതുരശ്ര അടി വലിപ്പത്തിലുള്ള പോളിഹൗസുകള്‍ നിര്‍മിക്കുന്നതിന് യഥാക്രമം 45000 രൂപയും 60000 രൂപയും സഹായം നല്‍കും. പോളി ഹൗസുകള്‍ നിര്‍മിക്കുന്ന കര്‍ഷകര്‍ക്ക് കേരള അഗ്രിക്കള്‍ച്ചര്‍ യൂണിവേഴ്‌സിറ്റി വഴി പരിശീലനവും ലഭ്യമാക്കും. കര്‍ഷകര്‍ അതത് കൃഷിഭവനുകളുമായി ബന്ധപ്പെടണമെന്ന് പ്രിന്‍സിപ്പല്‍ കൃഷി ഓഫീസര്‍ അറിയിച്ചു.

(പി.ആര്‍.കെ.നമ്പര്‍  2537/17)

ദേശീയ പക്ഷി-മൃഗ പ്രദര്‍ശനത്തിന്റെ പ്രചാരണത്തിനായി സജ്ജമാക്കിയ  പരസ്യവാഹനം ജില്ലാ പഞ്ചായത്ത് പ്രസിഡന്റ് ജഗദമ്മ ടീച്ചര്‍ ഫ്‌ളാഗ് ഓഫ് ചെയ്തു. അഡീഷണല്‍ ഡയറക്ടര്‍മാരായ ഡോ.ബി.ബാഹുലേയന്‍, ഡോ. ബാബു, ഡോ.കെ.കെ.തോമസ്, ഡോ.ഷാഹുല്‍ഹമീദ് തുടങ്ങിവര്‍ പങ്കെടുത്തു.

ആശ്രാമം മൈതാനത്ത് നവംബര്‍ 10 മുതല്‍ 13 വരെ നടക്കുന്ന മേളയുടെ  വിളംബരത്തിന് ഏഴ് കുതിരകളെ പൂട്ടിയ വണ്‍ണ്ടിയും ഒട്ടകവുമുണ്ടാകും.   പ്രദര്‍ശന ദിവസങ്ങളില്‍ രാവിലെ ആറു മുതല്‍ 10 വരെയും ഉച്ചകഴിഞ്ഞ് മൂന്നു മുതല്‍ ആറുവരെയുമാണ് കുതിരവണ്ടി നഗരം ചുറ്റുന്നത്. പ്രചാരണത്തിനായി പത്തോളം  പരസ്യവാനുകളും ക്രമീകരിച്ചിട്ടുണ്ട്. 

കടലറിവിന്റെ ആഴവും പരപ്പും വ്യക്തമാക്കി മലയാളത്തോടു ചേര്‍ന്നു നിന്നു കടപ്പുറത്തിന്റെ എഴുത്തുകാരന്‍ എ. ആന്‍ഡ്രൂസ്. ഭാഷയോടുള്ള മമത കവിതയാക്കി കവി വാക്കനാട് സുരേഷ്. ഔദ്യോഗിക ഭാഷാ വാരാചരണത്തിന്റെ ജില്ലാതല സമാപന സമ്മേളനം സദസിന് പുതുമയായി.

ജില്ലാ പഞ്ചായത്ത് കൗണ്‍സില്‍ ഹാളില്‍ നടന്ന പരിപാടി ജില്ലാ പഞ്ചായത്ത് പ്രസിഡന്റ് കെ. ജഗദമ്മ ഉദ്ഘാടനം ചെയ്തു.  പുതുതലമുറയ്ക്ക് ഭാഷയുടെ ആത്മാവ് തിരിച്ചറിയാന്‍ കഴിയാതെവരുന്ന സാഹചര്യത്തില്‍ മലയാള ഭാഷാ പഠനം നിര്‍ബന്ധിതമാക്കിയ സര്‍ക്കാര്‍ തീരുമാനം ഏറെ പ്രസക്തമാണെന്ന് ജഗദമ്മ ടീച്ചര്‍ പറഞ്ഞു. 

സംസ്ഥാന കുട്ടികളുടെ ആറാമത് വിദ്യാഭ്യാസ ചലച്ചിത്രമേള തലസ്ഥാനത്ത് നടക്കും. പൊതുവിദ്യാഭ്യാസ വകുപ്പിന്റെ ഭാഗമായ സ്റ്റേറ്റ് ഇന്‍സ്റ്റിറ്റ്യൂട്ട് ഓഫ് എഡ്യൂക്കേഷണല്‍ ടെക്‌നോളജിയാണ് മേള സംഘടിപ്പിക്കുന്നത്. കേരളത്തിലെ സ്‌കൂള്‍ വിദ്യാര്‍ത്ഥികള്‍ നിര്‍മിച്ചതും വിദ്യാര്‍ത്ഥികള്‍ക്കായി നിര്‍മിച്ചതുമായ ചിത്രങ്ങളുടെ പ്രദര്‍ശനവും മത്സരവുമാണ് നടക്കുക. വിദ്യാര്‍ത്ഥികള്‍ക്ക് ചലച്ചിത്രനിര്‍മാണത്തില്‍ അറിവു പകരുക, അവരുടെ സംരംഭങ്ങള്‍ക്ക് പ്രോത്സാഹനം നല്‍കുക, ചലച്ചിത്രങ്ങള്‍ സംസ്ഥാനതലത്തില്‍ പ്രദര്‍ശിപ്പിക്കുന്നതിന് വേദി ഒരുക്കുക എന്നിവയാണ് മേളയുടെ ലക്ഷ്യം.

പട്ടികജാതി-പട്ടികവര്‍ഗ്ഗ വിഭാഗങ്ങളില്‍പ്പെടുന്ന സര്‍ക്കാര്‍ ഉദ്യോഗസ്ഥരെ ഡിപ്പാര്‍ട്ട്‌മെന്റ് ടെസ്റ്റിന് തയ്യാറാക്കുന്നതിനായി ഐ.എം.ജി.യുടെ തിരുവനന്തപുരം, കൊച്ചി, കോഴിക്കോട് കേന്ദ്രങ്ങളില്‍ നവംബര്‍ 27 മുതല്‍ ഡിസംബര്‍ 23 വരെ പ്രത്യേക പരിശീലനം സംഘടിപ്പിക്കും. തിരുവനന്തപുരം, കൊല്ലം, പത്തനംതിട്ട ജില്ലകളിലുള്ളവര്‍ തിരുവനന്തപുരത്തും ആലപ്പുഴ, എറണാകുളം, ഇടുക്കി, കോട്ടയം, തൃശൂര്‍ ജില്ലകളിലുള്ളവര്‍ കൊച്ചിയിലും കോഴിക്കോട്, വയനാട്, കണ്ണൂര്‍, കാസര്‍കോട്, മലപ്പുറം, പാലക്കാട് ജില്ലകളിലുള്ളവര്‍ കോഴിക്കോട്ടുമാണ് പരിശീലനത്തിനെത്തേണ്ടത്. പരീശീലന കേന്ദ്രം മാറ്റി നല്‍കില്ല.

കേന്ദ്ര സര്‍ക്കാര്‍ സ്ഥാപനമായ ഭിന്നശേഷിക്കാര്‍ക്കുള്ള ദേശീയ തൊഴില്‍ സേവന കേന്ദ്രം (തിരുവനന്തപുരം) കേള്‍വി വൈകല്യമുള്ള ഉദ്യോഗാര്‍ത്ഥികള്‍ക്കായി സൗജന്യ മത്സര പരീക്ഷ പരിശീലനം നടത്തുന്നു.  തിരുവനന്തപുരം നാലാഞ്ചിറയില്‍ നടത്തുന്ന പരിശീലനത്തിന് 18 നും 35 നുമിടയില്‍ പ്രായമായ കേള്‍വി വൈകല്യമുള്ളവര്‍ക്ക് നേരിട്ടോ തപാല്‍ മുഖേനയോ അപേക്ഷിക്കാം.  വെള്ള പേപ്പറില്‍ തയ്യാറാക്കിയ അപേക്ഷകള്‍ നവംബര്‍ 20 നകം ഡെപ്യൂട്ടി ഡയറക്ടര്‍, ഭിന്നശേഷിക്കാര്‍ക്കുള്ള ദേശീയ തൊഴില്‍ സേവന കേന്ദ്രം, നാലാഞ്ചിറ പി.ഒ, തിരുവനന്തപുരം-695 015.

മൈനിംഗ് &  ജിയോളജി വകുപ്പിന്റെ തിരുവനന്തപുരം, എറണാകുളം ജില്ലാ ഓഫീസുകളില്‍ കേരള ഓണ്‍ലൈന്‍ മൈനിംഗ് പെര്‍മിറ്റ് അവാര്‍ഡിംഗ് സര്‍വ്വീസസ് (KOMPAS) ആരംഭിച്ചിട്ടുണ്ട്. www.portal.dmg.kerala.gov.in ലൂടെയാണ് ഇ-പാസ് അനുവദിക്കുന്നത്. പാസ്സുകളുടെ വിതരണം ഘട്ടംഘട്ടമായി ഓണ്‍ലൈനാക്കുന്നതിനാല്‍ കരിങ്കല്ല് ഉല്‍പാദകരും/ഡീലര്‍മാരും പോര്‍ട്ടലില്‍ രജിസ്റ്റര്‍ ചെയ്യുകയും ഓണ്‍ലൈനായി മൂവ്‌മെന്റ് പെര്‍മിറ്റിനും ഇ-പാസ്സിനും അപേക്ഷിക്കുകയും വേണം. ഇ-പാസ്സ് ലഭിക്കുന്നതിനായി ധാതുക്കള്‍ കയറ്റുന്ന വാഹനങ്ങള്‍ പ്രസ്തുത പോര്‍ട്ടലില്‍ എന്റോള്‍ ചെയ്യണം.