കേരള സംസ്ഥാന ജൈവവൈവിധ്യ ബോര്‍ഡിന്റെ നേതൃത്വത്തില്‍ ജനകീയ ജൈവ വൈവിധ്യ രജിസ്റ്ററിന്റെ രണ്ടാം ഘട്ട പ്രവര്‍ത്തനം പുനരാരംഭിക്കുന്നതിനു വേണ്ടി ജില്ലയിലെ തദ്ദേശ സ്വയംഭരണ സ്ഥാപനങ്ങളുടെ കീഴിലുള്ള ജൈവ വൈവിധ്യ പരിപാലന സമിതികള്‍ക്കായി ജില്ലതല ശില്പശാല സംഘടിപ്പിച്ചു. ജില്ലയിലെ തദ്ദേശ സ്വയം ഭരണ സ്ഥാപനങ്ങളില്‍ ഡിസംബറിന് മുമ്പായി പി ബി ആര്‍ തയ്യാറാക്കുന്നതിനുള്ള കര്‍മപദ്ധതികള്‍ ആസൂത്രണം ചെയ്തു. ജില്ലാ പഞ്ചായത്ത് കോണ്‍ഫറന്‍സ് ഹാളില്‍ സംഘടിപ്പിച്ച ഏകദിന ശില്പശാല ജില്ലാ പഞ്ചായത്ത് പ്രസിഡന്റ് പി കെ ഗോപന്‍ ഉദ്ഘാടനം ചെയ്തു. സംസ്ഥാന ജൈവ വൈവിധ്യ ബോര്‍ഡ് മെമ്പര്‍ കെ വി ഗോവിന്ദന്‍ അധ്യക്ഷനായി.

ജില്ലാ ആസൂത്രണ സമിതി സെക്രട്ടറിയേറ്റ് കോണ്‍ഫറന്‍സ് ഹാളില്‍ സെപ്റ്റംബര്‍ 16ന് ചേരാനിരുന്ന ജില്ലാ ആസൂത്രണ സമിതി യോഗം സെപ്റ്റംബര്‍ 18ന് രാവിലെ 11ന് ചേരും.

ജില്ലാ ലീഗല്‍ സര്‍വീസസ് അതോറിറ്റിയുടെയും താലൂക്ക് ലീഗല്‍ സര്‍വീസസ് കമ്മിറ്റിയുടെയും നേതൃത്വത്തില്‍ ജില്ലയിലെ കോടതികളില്‍ നടത്തിയ നാഷണല്‍ ലോക് അദാലത്തില്‍ 14801 കേസുകള്‍ തീര്‍പ്പാക്കി. ബാങ്ക് റിക്കവറി, വാഹനാപകട കേസുകള്‍, വിവാഹം, വസ്തു തര്‍ക്കങ്ങള്‍, രജിസ്‌ട്രേഷന്‍ വകുപ്പിലെ അണ്ടര്‍ വാല്യൂഷന്‍ തുടങ്ങി കോടതിയിലുള്ള കേസുകളും ഇതരതര്‍ക്ക് കേസുകളുമാണ് പരിഗണിച്ചത്. 18,76,08,210 രൂപ വിവിധ കേസുകളില്‍ നഷ്ടപരിഹാരം നല്കാന്‍ ഉത്തരവായി. മജിസ്‌ട്രേറ്റ് കോടതികളില്‍ സ്‌പെഷ്യല്‍ സിറ്റിംഗ് നടത്തി പിഴ അടച്ചു തീര്‍പ്പാക്കുന്ന കേസുകളില്‍ 44,97,969 രൂപ പിഴ അടക്കാന്‍ ഉത്തരവായി.

ഇടവിട്ടുള്ള മഴ കൊതുക് പെരുകുന്നതിനുള്ള സാഹചര്യമൊരുക്കുമെന്നതിനാല്‍ കൊതുകിന്റെ ഉറവിടനശീകരണ പ്രവര്‍ത്തനങ്ങള്‍ ശക്തിപ്പെടുത്തി ഡെങ്കിപ്പനിക്കെതിരെ ജാഗ്രത പാലിക്കണമെന്ന് ജില്ലാ മെഡിക്കല്‍ ഓഫീസര്‍ ഷിനു കെ എസ് അറിയിച്ചു.

രോഗലക്ഷണങ്ങള്‍

സ്വച്ഛ്ഭാരത് മിഷന്‍ സ്വച്ഛതാ ലീഗ് പ്രവര്‍ത്തനങ്ങളുടെ ഭാഗമായി പുനലൂര്‍ നഗരസഭയുടെ നേതൃത്വത്തില്‍ ശുചീകരണ തൊഴിലാളികള്‍ക്കായി മെഡിക്കല്‍ ക്യാമ്പ് സംഘടിപ്പിച്ചു. കലയനാട് അര്‍ബന്‍ പബ്ലിക് ഹെല്‍ത്ത് സെന്ററില്‍ നഗരസഭാ ചെയര്‍പേഴ്‌സണ്‍ സുജാത ഉദ്ഘാടനം ചെയ്തു. ആരോഗ്യ സ്റ്റാന്‍ഡിങ് കമ്മിറ്റി ചെയര്‍പേഴ്‌സണ്‍ വസന്ത രഞ്ചന്‍, വാര്‍ഡ് കൗണ്‍സിലര്‍മാര്‍, ആരോഗ്യവിഭാഗം ഉദ്യോഗസ്ഥര്‍ തുടങ്ങിയവര്‍ മെഡിക്കല്‍ ക്യാമ്പിന് നേതൃത്വം നല്‍കി

മണ്‍റോതുരുത്ത് റെയില്‍വേ സ്റ്റേഷനില്‍ പോര്‍ട്ടബിള്‍ അണ്‍ റിസര്‍വ്ഡ് ടിക്കറ്റിങ്ങ് സിസ്റ്റം (പി യു ടി എസ്) സ്ഥാപിച്ചു. ചവറ കെ എം എം എല്ലിന്റെ സാമൂഹികസുരക്ഷാ ഫണ്ടില്‍ നിന്നുള്ള ഒന്നര ലക്ഷം രൂപ വിനിയോഗിച്ചാണ് സംവിധാനം ഏര്‍പ്പെടുത്തിയത്. ഇനി ഒരു മെഷീന്‍കൂടി സ്റ്റേഷനില്‍ ഉണ്ടാകും. ടിക്കറ്റ് നല്‍കുന്നതിന് തടസ്സംവരില്ലെന്നതാണ് സവിശേഷത. മണ്‍റോതുരുത്ത് റെയില്‍വേ സ്റ്റേഷനില്‍ നിന്നും എല്ലാ ഭാഗത്തേക്കുമുള്ള ട്രെയിനുകളിലേക്ക് മെഷീന്‍ വഴി ടിക്കറ്റുകള്‍ ലഭിക്കും. മെഷീന്‍ പ്രവര്‍ത്തിപ്പിക്കുന്നതിന് ടിക്കറ്റ് നല്‍കുന്ന ഹാള്‍ട്ട് ഏജന്റിന് റെയില്‍വേയുടെ കൊമേഴ്‌സ്യല്‍ വിഭാഗം പരിശീലനം നല്‍കി.

വിവിധ ആരോഗ്യപരിരക്ഷ പദ്ധതികള്‍, സേവനങ്ങള്‍ എന്നിവയെ കുറിച്ച് പരമാവധി ജനങ്ങളില്‍ എത്തിക്കുന്നതിനും അവബോധം സൃഷ്ടിക്കുന്നതിനുമായി ആരോഗ്യ കുടുംബക്ഷേമ മന്ത്രാലയത്തിന്റെ പദ്ധതിയായ ആയുഷ്മാന്‍ ഭവ: ക്യാമ്പയിന്‍ വെളിനല്ലൂര്‍ സി എച്ച് സി യുടെ ആഭിമുഖ്യത്തില്‍ സംഘടിപ്പിച്ചു .

സംക്ഷിപ്ത വോട്ടര്‍ പട്ടിക പുതുക്കുന്നതുമായി ബന്ധപ്പെട്ട് ജില്ലാ തിരഞ്ഞെടുപ്പ് ഓഫീസര്‍ കൂടിയായ ജില്ലാ കലക്ടര്‍ അഫ്‌സാന പര്‍വീണിന്റെ അധ്യക്ഷതയില്‍ കലക്ടറേറ്റ് കോണ്‍ഫ്രന്‍സ് ഹാളില്‍ ബൂത്ത് ലവല്‍ ഏജന്റ്മാരുടെ (ബി എല്‍ എ) അവലോകനയോഗം ചേര്‍ന്നു. തിരഞ്ഞെടുപ്പ് പ്രവര്‍ത്തനങ്ങള്‍ സമയബന്ധിതമായി പൂര്‍ത്തിയാക്കണമെന്നും ഗൃഹസന്ദര്‍ശനം ഉള്‍പ്പെടെ നടത്തി കൃത്യതയോടെ പ്രവര്‍ത്തനങ്ങള്‍ ഏകോപിപ്പിക്കണമെന്നും ജില്ലാ കലക്ടര്‍ നിര്‍ദേശം നല്‍കി.

പേവിഷബാധയെക്കുറിച്ചുള്ള സംശയനിവാരണം, തെറ്റിദ്ധാരണകള്‍ക്കെതിരെ ബോധവത്കരണം എന്നിവ ലക്ഷ്യമാക്കി മൃഗസംരക്ഷണ വകുപ്പും ജന്തുദ്രോഹ നിവാരണ സമിതിയും എസ് എന്‍ വനിതാകോളജില്‍ നടത്തിയ സെമിനാര്‍ വേറിട്ട അറിവുകള്‍ പകര്‍ന്നു. പേവിഷമേറ്റാല്‍ നാരങ്ങയും കുമ്പളങ്ങയും കഴിക്കാം, വിഷബാധയുമായി കോഴിയിറച്ചിക്ക് ബന്ധമില്ല, നായുടെ കടിയേറ്റ പശുവിന്റെ പാല്‍ തിളപ്പിച്ച് ഉപയോഗിക്കാം, 24 മണിക്കുറിനപ്പുറം പേവിഷ വൈറസിന് സൂര്യപ്രകാശത്തില്‍ ജീവിക്കാന്‍ കഴിയില്ല, കരിപ്പോട്ടി വെള്ളവും കോഴിയിറച്ചിയും പേവിഷത്തെ ഉത്തേജിപ്പിക്കുന്നതല്ല തുടങ്ങിയ അവശ്യവിവരങ്ങളാണ് വിദഗ്ധരിലൂടെ കൈമാറ്റംചെയ്യപ്പെട്ടത്.

        തിരുവനന്തപുരം സെൻട്രൽ പോളിടെക്നിക് കോളജിലെ ലാറ്ററൽ എൻട്രി സ്പോട്ട് അഡ്മിഷൻ സെപ്റ്റംബർ 15ന് രാവിലെ 9 മുതൽ നടക്കും. രാവിലെ 9 മുതൽ പ്ലസ്ടു/വിഎച്ച്എസ്ഇ റാങ്ക് ലിസ്റ്റിൽ ഉൾപ്പെട്ട എല്ലാ വിഭാഗക്കാരും എത്തണം. എല്ലാ സർട്ടിഫിക്കറ്റുകളുടേയും അസൽ ഹാജരാക്കണം.