നെടുമങ്ങാട് സർക്കാർ പോളിടെക്നിക് കോളേജിലെ ഒന്നാം സെമസ്റ്ററിലെ ഡിപ്ലോമ പ്രവേശനത്തിനായി ഒഴിവുള്ള സീറ്റുകളിലേക്കുള്ള സ്പോട്ട് അഡ്മിഷൻ സെപ്റ്റംബർ 15ന് വട്ടിയൂർക്കാവ് സർക്കാർ പോളിടെക്നിക് കോളേജിൽ നടക്കും. രജിസ്ട്രേഷൻ സമയം രാവിലെ 9.30 മുതൽ 10.30 വരെ. റാങ്ക് ലിസ്റ്റിൽ ഉൾപ്പെട്ടിട്ടുള്ള അഡ്മിഷനിൽ പങ്കെടുക്കാൻ താല്പര്യമുള്ള മുഴുവൻ അപേക്ഷകരും യോഗ്യത തെളിയിക്കുന്നതിനുള്ള അസൽ രേഖകളുമായി രക്ഷകർത്താവിനൊപ്പം എത്തണം.

        നെടുമങ്ങാട് സർക്കാർ പോളിടെക്നിക് കോളേജിലെ മൂന്നാം സെമസ്റ്ററിലെ ഡിപ്ലോമ പ്രവേശനത്തിനായി ഒഴിവുള്ള രണ്ട് (ഇലക്ട്രോണിക്സ്, കമ്പ്യൂട്ടർ ഹാർഡ്‌വെയർ എൻജിനീയറിംഗ്) സീറ്റുകളിലേക്കുള്ള സ്പോട്ട് അഡ്മിഷൻ സെപ്റ്റംബർ 15ന് കോളേജിൽ നടക്കും. രജിസ്ട്രേഷൻ രാവിലെ 9.30 മുതൽ 10.30 വരെ.

        കൈമനം വനിതാ പോളിടെക്നിക് കോളേജിൽ 2023-24 അധ്യയന വർഷത്തിലേക്കുള്ള ഡിപ്ലോമ കോഴ്സുകളിലെ നിലവിലുള്ള ഒഴിവുകളിലേക്ക് 15ന് സ്പോട്ട് അഡ്മിഷൻ നടക്കും. പ്രവേശനം നേടുവാൻ ആഗ്രഹിക്കുന്ന റാങ്ക് ലിസ്റ്റിൽ ഉൾപ്പെട്ടിട്ടുള്ള അപേക്ഷകർ സെപ്റ്റംബർ 15നു രാവിലെ ഒമ്പത് മുതൽ 11 വരെ പോളിടെക്നിക് കോളേജിൽ എത്തി രജിസ്റ്റർ ചെയ്യണം.

        കൈമനം വനിതാ പോളിടെക്നിക് കോളജിനു കീഴിൽ പ്രവർത്തിക്കുന്ന GIFD ബാലരാമപുരം സെന്ററിന്റെ 2023-24 വർഷത്തേക്കുള്ള ഫാഷൻ ഡിസൈനിങ് ആൻഡ് ഗാർമെന്റ് ടെക്നോളജി പ്രവേശനത്തിന് ഒഴിവുള്ള സീറ്റിലേക്ക് സെപ്റ്റംബർ 19ന് സ്പോട്ട് അഡ്മിഷൻ നടത്തും. താത്പര്യമുള്ള വിദ്യാർഥികൾ അന്നേ ദിവസം രാവിലെ ഒമ്പതിന് പോളിടെക്നിക് കോളജിൽ എത്തി രജിസ്റ്റർ ചെയ്യണം.

തിരുവനന്തപുരം റിജിയണൽ കാൻസർ സെന്ററിന്റെ നേതൃത്വത്തിൽ സംഘടിപ്പിക്കുന്ന ഡയറ്റീഷ്യൻ അപ്രന്റീസ് ട്രെയിനിംഗ് പ്രോഗ്രാമിലേക്ക് അപേക്ഷ ക്ഷണിച്ചു. സെപ്റ്റംബർ 25 ന് വൈകിട്ട് നാലു വരെ അപേക്ഷ സ്വീകരിക്കും.

നാട്ടിക ഗ്രാമപഞ്ചായത്തിൽ നവകേരളം കർമ്മപദ്ധതി ഹരിത കേരള മിഷന്റെ ഭാഗമായി ജല ബജറ്റ് തയ്യാറാക്കുന്നതിന് ഗ്രാമപഞ്ചായത്ത്തല കൺവെൻഷൻ ചേർന്നു. നാട്ടിക ഗ്രാമപഞ്ചായത്ത് ഹാളിൽ നടന്ന പരിപാടി ഗ്രാമപഞ്ചായത്ത് പ്രസിഡന്റ് എം.ആർ ദിനേശൻ ഉദ്ഘാടനം ചെയ്തു. നവകേരളം റിസോഴ്സ് പേഴ്സൺ വേലായുധൻ വിഷയാവിതരണം നടത്തി.

തൃശ്ശൂർ കോട്ടപ്പുറം റെയിൽവേ ട്രാക്കിൽ നിന്നും പരിക്കുകളോടെ ആഗസ്റ്റ് 31 ന് തൃശ്ശൂർ ജനറൽ ആശുപത്രിയിൽ പ്രവേശിപ്പിക്കുകയും തുടർ ചികിത്സക്കായി തൃശ്ശൂർ മെഡിക്കൽ കോളേജിലേക്ക് റഫർ ചെയ്ത് ചികിത്സയിൽ കഴിഞ്ഞിരുന്ന 68 വയസ്സ് പ്രായം തോന്നിക്കുന്ന വ്യക്തി സെപ്റ്റംബർ 12 ന് പുലർച്ചെ 2.40 ന് മരണപ്പെട്ടു. ഇയാളെ ബന്ധുക്കളാരും അന്വേഷിച്ച് വരാത്തതിനാൽ തിരിച്ചറിയുന്നവർ തൃശ്ശൂർ വെസ്റ്റ് പോലീസ് സ്റ്റേഷനുമായി ബന്ധപ്പെടണമെന്ന് പോലീസ് സ്റ്റേഷന്‍ ഹൗസ് ഓഫീസര്‍ അറിയിച്ചു. ഫോൺ: 0487 2363608.

പത്തനംതിട്ട ചുട്ടിപ്പാറ  സ്‌കൂള്‍ ഓഫ് അപ്ലൈഡ് ലൈഫ് സയന്‍സില്‍ എം.എസ്‌സി ഫിഷറി ബയോളജി ആന്‍ഡ് അക്വാകള്‍ച്ചറിനു (എം എസ് സി സുവോളജിക്ക് തുല്യം)  സീറ്റൊഴിവ്. ബയോളജിക്കല്‍ സയന്‍സില്‍ ഏതെങ്കിലുമുള്ള ബിരുദമാണ് യോഗ്യത.  ഗവണ്‍മെന്റ് അംഗീകൃത ഫീസിളവ് ലഭ്യമാണ്. ഫോണ്‍ : 9497816632, 9447012027.

എറണാകുളം പ്രൊഫഷണല്‍ എക്‌സിക്യൂട്ടീവ് എംപ്ലോയ്‌മെന്റ് എക്‌സ്‌ചേഞ്ചില്‍ പേര് രജിസ്റ്റര്‍ ചെയ്തിട്ടുള്ള മുന്നാക്ക വിഭാഗങ്ങളിലെ സാമ്പത്തികമായി പിന്നാക്കം നില്‍ക്കുന്നവര്‍ സര്‍ട്ടിഫിക്കറ്റ് രജിസ്റ്റര്‍ ചെയ്യണം. അസ്സല്‍ സര്‍ട്ടിഫിക്കറ്റ് സഹിതം നേരിട്ട് ഹാജരാകാന്‍ സാധിക്കാത്തവര്‍ക്ക് സ്വയം സാക്ഷ്യപ്പെടുത്തിയ പകര്‍പ്പില്‍ പ്രൊഫഷണല്‍ എംപ്ലോയ്‌മെന്റ് രജിസ്‌ട്രേഷന്‍ നമ്പര്‍ രേഖപ്പെടുത്തി rpeeekm.emp.lbr@kerala.gov.in ഇ-മെയിലില്‍ അയക്കാം. ഈ വിഭാഗത്തില്‍ ഉള്‍പ്പെടാത്തവര്‍ ആ വിവരം രേഖാമൂലം അറിയിക്കണം.