മലമ്പുഴ നിയോജകമണ്ഡലത്തില്‍ എം.എല്‍.എ.യുടെ പ്രത്യേക വികസന നിധി വിനിയോഗിച്ച് 2017-18ല്‍ ഒരു കോടി ചെലവില്‍ നടപ്പാക്കുന്ന 12 പ്രവൃത്തികള്‍ക്കും ഭരണാനുമതി ലഭിച്ചതായി വി.എസ്.അച്ചുതാനന്ദന്‍ എം.എല്‍.എ. അറിയിച്ചു. 

കല്‍പ്പാത്തി രഥോത്സവത്തോടനുബന്ധിച്ച് ജില്ലാ ടൂറിസം പ്രമോഷന്‍ കൗണ്‍സിലിന്റെ ആഭിമുഖ്യത്തില്‍  സംസ്ഥാന ടൂറിസം വകുപ്പിന്റെ  സഹകരണത്തോടെ നവംബര്‍ 13 വരെ കല്‍പ്പാത്തി ദേശീയ സംഗീതോത്സവം നടക്കും. 

ഇന്ന് (നവംബര്‍ 11) അന്നമാചാര്യര്‍ ദിനത്തില്‍ വൈകീട്ട് അഞ്ചിന് പാലക്കാട് ചെമ്പൈ സ്മാരക സര്‍ക്കാര്‍ സംഗീത കോളെജിലെ വിദ്യാര്‍ഥികള്‍ അവതരിപ്പിക്കുന്ന സംഗീത കച്ചേരി. ഏഴിന് പത്മഭൂഷണ്‍ ജേതാവ് സംഗീത കലാനിധി സുധ രഘുനാഥന്റെ സംഗീത കച്ചേരി. പക്കാല രാംദാസ് (വയലിന്‍), നെയ്‌വേലി സ്‌കന്ദ സുബ്രമണ്യന്‍ (മൃദംഗം), എം.രാമന്‍ (മൂര്‍സിങ്).

നെഹ്‌റു യുവകേന്ദ്രയുടെ 2016-17 വര്‍ഷത്തെ ജില്ലയിലെ മികച്ച ക്ലബ്ബായി കാരാകുറിശ്ശി എയിംസ് കലാ-കായിക വേദി - ഗ്രന്ഥശാലയെ തെരഞ്ഞെടുത്തു. കലാ-കായിക-സാംസ്‌കാരികം , സാമൂഹികക്ഷേമം, പരിസ്ഥിതി, സ്ത്രീശാക്തീകരണം മേഖലകളിലെ പ്രവര്‍ത്തനം പരിഗണിച്ചാണ് ജില്ലാ കലക്ടര്‍ ചെയര്‍മാനായുള്ള സമിതി എയിംസ് ക്ലബ്ബിനെ അവാര്‍ഡിനായി തെരഞ്ഞെടുത്തത്. 25000 രൂപയും പ്രശസ്തി പത്രവും അടങ്ങുന്നതാണ് അവാര്‍ഡ്. 

നെഹ്‌റു യുവകേന്ദ്രയുടെ സ്ഥാപകദിനമായ നവംബര്‍ 14ന് രാവിലെ കലക്ടറേറ്റ് സമ്മേളനഹാളില്‍ എം.ബി.രാജേഷ് എം.പി. അവാര്‍ഡ് വിതരണം നടത്തും. 
 

തൊഴില്‍-എക്‌സൈസ് വകുപ്പ് മന്ത്രി റ്റി.പി.രാമകൃഷ്ണന്‍ ഇന്ന് (നവംബര്‍ 11) ഉച്ചയ്ക്ക്  രണ്ടിന് ഇതര സംസ്ഥാന തൊഴിലാളികള്‍ക്കായി കഞ്ചിക്കോട് നിര്‍മിച്ച പാര്‍പ്പിട സമുച്ചയം   'അപ്നാ ഘര്‍' സന്ദര്‍ശിക്കും. തൊഴില്‍ വകുപ്പിന്റെ കീഴില്‍ പ്രവര്‍ത്തിക്കുന്ന ഭവനം ഫൗണ്ടേഷനാണ് കിന്‍ഫ്ര വ്യവസായ പാര്‍ക്കിനകത്ത് 44,000 ചതുരശ്ര അടിയില്‍ പാര്‍പ്പിട സമുച്ചയം ഒരുക്കിയത്.

കാക്കനാട്: മരട് അഗ്രിക്കള്‍ച്ചറല്‍ അര്‍ബന്‍ ഹോള്‍സെയില്‍ മാര്‍ക്കറ്റില്‍ 24 മണിക്കൂറും പ്രവര്‍ത്തിക്കുന്ന വെയ്ബ്രിഡ്ജിന്റെ പ്രവര്‍ത്തനം കരാര്‍ അടിസ്ഥാനത്തില്‍ 11 മാസത്തേക്ക് ഏറ്റെടുത്ത് നടത്തുന്നതിന് താല്‍പര്യമുളള വ്യക്തികള്‍/സ്ഥാപനങ്ങള്‍/സഹകരണ സ്ഥാപനങ്ങള്‍/സര്‍ക്കാര്‍അര്‍ധ സര്‍ക്കാര്‍ സ്ഥാപനങ്ങള്‍ എന്നിവരില്‍ നിന്ന് ദര്‍ഘാസുകള്‍ ക്ഷണിച്ചു. ദര്‍ഘാസ് പ്രമാണങ്ങളും വിശദ വിവരങ്ങളും നവംബര്‍  16 വരെ രാവിലെ 10.30 മുതല്‍ 12.30 വരെ ഓഫീസില്‍ നിന്നു ലഭിക്കും. 

കൊച്ചി: എറണാകുളം ഡിറ്റിപിസിയുടെ കീഴിലുള്ള, എറണാകുളം ദര്‍ബാര്‍ ഹാള്‍ ഗ്രൗണ്ടിലെ പ്രവേശന കവാടത്തിനു സമീപം സ്ഥിതി ചെയ്യുന്ന  കഫറ്റേരിയ ഇപ്പോള്‍ എങ്ങിനെയാണോ ആ അവസ്ഥയില്‍' അടുത്ത മൂന്നു വര്‍ഷത്തേക്ക് നിബന്ധനകള്‍ക്ക് വിധേയമായി ലൈസന്‍സ് അടിസ്ഥാനത്തില്‍ ഏറ്റെടുത്ത് നടത്തുന്നതിന് ക്വട്ടേഷന്‍ ക്ഷണിച്ചു.  

നവംബര്‍ 21ന്  ഉച്ചയ്ക്ക്   12 ന്, എറണാകുളം  ഡിറ്റിപിസി ഓഫീസില്‍ നടത്തുന്ന ക്വട്ടേഷനോടൊപ്പം പൊതുലേലവും  നടത്തും.    

കൊച്ചി: മഹാരാജാസ് കോളേജിലെ ബിരുദബിരുദാനന്തര ഗവേഷണ രസതന്ത്ര വിഭാഗം, രണ്ടു ദിവസത്തെ അന്തര്‍ദേശീയ സെമിനാര്‍ നവംബര്‍ 14നും 15നും നടത്തുന്നു. നവംബര്‍ 14ന് കോളേജ് സെമിനാര്‍ ഹാളില്‍ മഹാത്മാ ഗാന്ധി സര്‍വ്വകലാശാല വൈസ് ചാര്‍സലന്‍ ഡോ.ബാബു സെബാസ്റ്റ്യന്‍ സെമിനാര്‍ ഉദ്ഘാടനം ചെയ്യും.

കൊച്ചി: മഹാരാജാസ് കോളേജില്‍ പുതുതായി അനുവദിച്ച എംഎ മ്യൂസിക് (വോക്കല്‍) കോഴ്‌സിലേക്ക് 2017-18 അധ്യയനവര്‍ഷത്തെ പ്രവേശനത്തിനായി അപേക്ഷ ക്ഷണിച്ചു. പ്രവേശന യോഗ്യത എംജി സര്‍വകലാശാല നിയമങ്ങള്‍ക്ക് അനുസൃതമായിരിക്കും.

താല്പര്യമുള്ളവര്‍  നവംബര്‍ 13ന് ഉച്ചയ്ക്ക് 2ന് മുമ്പ് കോളേജ് ഓഫീസില്‍ നിന്നും അപേക്ഷ വാങ്ങി പൂരിപ്പിച്ച് അന്നുതന്നെ നല്‍കേണ്ടതാണ്. പ്രവേശനത്തിനായി ടി.സി. ഉള്‍പ്പെടെ എല്ലാ അസ്സല്‍ രേഖകളും ഹാജരാക്കണം. പ്രവേശന നടപടികള്‍ നവംബര്‍ 13നു തന്നെ പൂര്‍ത്തീകരിക്കും.

കൊച്ചി: സംസ്ഥാനത്തെ പിന്നാക്ക വിഭാഗത്തിലെ പരമ്പരാഗത കരകൗശല തൊഴില്‍ ചെയ്യുന്ന വിശ്വകര്‍മ്മ, ശാലിയ, മൂപ്പര്‍, തോല്‍ക്കൊല്ലന്‍ (ഉപജാതികള്‍ ഉള്‍പ്പെടെ) തുടങ്ങിയ സമുദായങ്ങളില്‍പ്പെട്ട തൊഴിലാളികള്‍ക്ക് റ്റൂള്‍ കിറ്റ് ഗ്രാന്‍ഡ് നല്‍കുന്ന പദ്ധതിയുടെ കരട് മുന്‍ഗണനാ പട്ടിക www. bcdd.kerala.gov.in എന്ന വെബ്‌സൈറ്റില്‍ പ്രസിദ്ധീകരിച്ചിട്ടുണ്ട്.

അപേക്ഷകര്‍ പട്ടിക പരിശോധിച്ച് ആക്ഷേപങ്ങള്‍ ഉണ്ടെങ്കില്‍ നവംബര്‍ 23നകം എറണാകുളം ജില്ലാ മേഖലാ ഓഫീസില്‍ രേഖാമൂലം അറിയിക്കണമെന്ന് മേഖലാ ഡെപ്യൂട്ടി ഡയറക്ടര്‍ അറിയിച്ചു.

കൊച്ചി: സ്പാര്‍ക്കില്‍ (സര്‍വീസ് & പേറോള്‍ അഡ്മിനിസ്‌ട്രേറ്റീവ് റെപ്പോസിറ്ററി ഫോര്‍ കേരള) ഡിഡിഒ-മാരുടെ ഡിജിറ്റല്‍ സിഗ്‌നേച്ചര്‍ ഉള്‍പ്പെടുത്തുന്നതിനായി കെല്‍ട്രോണിന്റെ നേതൃത്വത്തില്‍ നവംബര്‍ 13,14 തീയതികളില്‍ സെന്റ് തെരേസാസ് കോളേജ് ഓഡിറ്റോറിയത്തില്‍ ഡിജിറ്റല്‍ സിഗ്‌നേച്ചര്‍ ക്യാമ്പ് നടത്തും.

എറണാകുളം സബ് ട്രഷറിയുടെയും അഡീഷനല്‍ സബ് ട്രഷറിയുടെയും കീഴിലുള്ള എല്ലാ ഡിഡിഒമാരും ക്യാമ്പില്‍ പങ്കെടുക്കണമെന്ന് സബ് ട്രഷറി ഓഫീസര്‍ അറിയിച്ചു. ഡിജിറ്റല്‍ സിഗ്‌നേച്ചര്‍ രജിസ്‌ട്രേഷന്‍ ഫോം, ആധാര്‍ കാര്‍ഡ്, പാന്‍ കാര്‍ഡ്്, ഒഫീഷ്യല്‍ ഐഡി കാര്‍ഡ് എന്നിവയുടെ സാക്ഷ്യപ്പെടുത്തിയ കോപ്പി കൊണ്ടുവരണം.