മലപ്പുറം താലൂക്ക് ആശുപത്രിയില്‍ പുതിയ കെട്ടിടത്തിന്റെ നിര്‍മ്മാണവുമായി ബന്ധപ്പെട്ട് പൊളിച്ച പഴയ കെട്ടിടത്തിന്റെ ഉപയോഗപ്രദമായ കെട്ടിട നിര്‍മ്മാണ വസ്തുക്കളുടെ ലേലം നടത്തുന്നതിന് ദര്‍ഘാസ് ക്ഷണിച്ചു.  ദര്‍ഘാസുകള്‍ ഫെബ്രുവരി മൂന്നിന് വൈകീട്ട് അഞ്ചിനകം ലഭിക്കണം.  

ചട്ടിപ്പറമ്പ് ഇലക്ട്രിക്കല്‍ സെക്ഷന്‍ പരിധിയില്‍ ഇന്ന് (ജനുവരി 31) രാവിലെ ഒമ്പത് മുതല്‍ വൈകുന്നേരം അഞ്ച് വരെ കാട്ടുങ്ങല്‍ ചോല, നീറ്റിച്ചിറ, ബ്രാഞ്ച് മദ്രസ്സ , പൊന്നരംപള്ളിയാലില്‍  ട്രാന്‍സ്‌ഫോമറുകളിലെ വൈദ്യുതി മുടങ്ങും.

ചങ്ങരംകുളം - കക്കിടിപ്പുറം - ഉണ്ണമ്പൂതിരി റോഡില്‍ പ്രവൃത്തി നടക്കുന്നതിനാല്‍ ഇതിലൂടെ ഫെബ്രുവരി ഏഴ് മുതല്‍ ഗതാഗതം നിരോധിച്ചു.  ചങ്ങരംകുളത്ത് നിന്നും കക്കിടിപ്പുറത്തേക്കുള്ള വാഹനങ്ങള്‍ കക്കിടിപ്പുറം കെ.സി.സി ഓഡിറ്റോറിയം റോഡ് വഴി പോകണം.
അമ്മിണിക്കാട് - ഒടമല - പാറല്‍ റോഡില്‍ പ്രവൃത്തി നടക്കുന്നതിനാല്‍ ഇതിലൂടെ വാഹന ഗതാഗതം നിരോധിച്ചു.   പെരിന്തല്‍മണ്ണ, മണ്ണാര്‍ക്കാട് ഭാഗത്ത് നിന്ന് വരുന്ന വാഹനങ്ങള്‍ താഴെക്കോട്, മരുതല, ഒടമല വഴുയം പെരിന്തല്‍മണ്ണ, ചെര്‍പ്പുളശ്ശേരി ഭാഗങ്ങളില്‍ നിന്ന് വരുന്ന വാഹനങ്ങള്‍ തൂത, മുതിരമണ്ണ വഴിയും പോകണം.

ജില്ലാ പഞ്ചായത്തിലെ ദാരിദ്ര്യ ലഘൂകരണ യൂണിറ്റില്‍ പ്രധാനമന്ത്രി ഗ്രാമ സഡക്ക് യോജന പദ്ധതി നടത്തിപ്പിനായി ഓവര്‍സിയര്‍മാരെ നിയമിക്കുന്നു. പ്രതിമാസം 11000 രൂപ ശമ്പള നിരക്കില്‍ കരാര്‍ അടിസ്ഥാനത്തില്‍ നിയമിക്കുന്നു.  യോഗ്യത സിവില്‍ എഞ്ചിനീയറിങ് ഡിപ്ലോമ. താല്‍പര്യമുള്ളവര്‍ ഫെബ്രുവരി എട്ടിന് വൈകീട്ട് അഞ്ചിനകം എക്‌സിക്യൂട്ടീവ് എഞ്ചിനീയര്‍, പി.എം.ജി.എസ്.വൈ, പി.ഐ.യു, മലപ്പുറം വിലാസത്തില്‍ രേഖകള്‍ സഹിതം അപേക്ഷിക്കണം.  ഫോണ്‍ 0483 2733976, 2736574.

ഇതര സംസ്ഥാന തൊഴിലാളികള്‍ക്ക് കേരള സര്‍ക്കാര്‍ ഏര്‍പ്പെടുത്തിയ 'ആവാസ്' ആരോഗ്യ ഇന്‍ഷൂറന്‍സ് പദ്ധതി പ്രകാരം 15000/ രൂപയുടെ സൗജന്യ ചികിത്സയും, 2 ലക്ഷം രൂപയുടെ അപകട ഇന്‍ഷൂറന്‍സ് പരിരക്ഷയും ലഭിക്കുന്നതാണ്. ഇന്‍ഷൂറന്‍സ് കാര്‍ഡ് നല്‍കുന്നതിന് പെരിന്തല്‍മണ്ണ സിവില്‍ സ്റ്റേഷനില്‍ പ്രവര്‍ത്തിക്കുന്ന  അസി.ലേബര്‍ ഓഫീസില്‍ സൗകര്യം ഒരുക്കിയിട്ടുണ്ട്. തൊഴിലാളികള്‍ക്ക് നേരിട്ടെത്തി അംഗീകൃത തിരിച്ചറിയല്‍ കാര്‍ഡ് നല്‍കി 'ആവാസ്' തിരിച്ചറിയല്‍ കാര്‍ഡ് കൈപറ്റാവുന്നതാണ്.  തൊഴിലുടമകള്‍ ഇതിന് പ്രത്യേക പ്രാധാന്യം നല്‍കേണ്ടതാണെന്ന് ജില്ലാ ലേബര്‍ ഓഫീസര്‍ അിറയിച്ചു. ഫോണ്‍: 04832734814,8547655273.

കുടുംബശ്രീ നടപ്പാക്കുന്ന ദീന്‍ദയാല്‍ ഉപാധ്യായ ഗ്രാമീണ്‍ കൗശല്യ യോജന പദ്ധതിയിലൂടെ സൗജന്യ തൊഴില്‍ പരിശീലനത്തിനുള്ള കൂടിക്കാഴ്ച ഫെബ്രുവരി ഒന്നിന് കല്‍പ്പകഞ്ചേരി ഗ്രാമ പഞ്ചായത്ത് ഓഫീസില്‍ നടത്തും.  ഗ്രാമീണ മേഖലയിലെ 18നും 32നും ഇടയില്‍ പ്രായമുള്ള ബി.പി.എല്‍, കുടുംബശ്രീ തൊഴിലുറപ്പ്, ആശ്രയ കുടുംബാംഗങ്ങള്‍ എന്നിവര്‍ക്ക് പങ്കെടുക്കാം.  പരിശീലനം വിജയകരമായി പൂര്‍ത്തീകരിക്കുന്നവര്‍ക്ക് ജോലിയില്‍ നിയമനം നല്‍കും.  വിദ്യാഭ്യാസ യോഗ്യത പ്ലസ്ടു/വി.എച്ച്.എസ്.സി. ഫോണ്‍ 9074611961, 04832 733470.

ജില്ലാ മെഡിക്കല്‍ ഓഫീസ് കുഷ്ഠരോഗ നിര്‍മ്മാര്‍ജ്ജന വിഭാഗത്തിന്റെയും പെരിന്തല്‍മണ്ണ ജില്ലാ ആശുപത്രിയുടെയും പെരിന്തല്‍മണ്ണ എം.ഇ.എസ് മെഡിക്കല്‍ കോളേജിന്റെയും സംയുക്താഭിമുഖ്യത്തില്‍ പെരിന്തല്‍മണ്ണ എം.ഇ.എസ് മെഡിക്കല്‍കോളേജില്‍ ദേശീയ കുഷ്ഠരോഗ നിര്‍മ്മാര്‍ജ്ജന പഷാചരണത്തിന്റെ ഭാഗമായി കുഷ്ഠരോഗ പ്രതിരോധ ബോധവല്‍ക്കരണ സെമിനാറും ഒപ്പുശേഖരണവും നടത്തി.  എം.ഇ.എസ് മെഡിക്കല്‍ കോളേജ് ഡയറക്റ്റര്‍ ഡോ. പി.എ. ഫസല്‍ ഗഫൂര്‍ ഉദ്ഘാടനം ചെയ്തു.  ഡോ. ഗോപിനാഥ്, ഡോ. ഷീലാ പി. ഹാവേരി, ജില്ലാ ആശുപത്രി എന്‍.എം.എസ് ടി.കെ ശ്രീകുമാര്‍, ഡോ. ഷെറിന്‍ ഇഷാഖ്, ഡോ. റിഷാദ് എന്നിവര്‍ സംസാരിച്ചു.