ഗുരുവായൂർ ഗവ. ആയുർവേദ ആശുപത്രി വികസന കുതിപ്പിലേക്ക്.  പഴയ ആശുപത്രി കെട്ടിടം പൊളിച്ചു മാറ്റി ആധുനിക സൗകര്യങ്ങളടങ്ങിയ പുതിയ കെട്ടിടം യഥാർഥ്യമാകുന്നു. മൂന്ന് കോടി രൂപയുടെ വികസന പ്രവർത്തനങ്ങളാണ് ആശുപത്രിയിൽ പ്രാവർത്തികമാക്കുക.  ബജറ്റിൽ നിന്നും 2.11 കോടി രൂപയും എൻ കെ അക്ബർ എംഎൽഎയുടെ  ഫണ്ടിൽ നിന്നും 73 ലക്ഷം രൂപയും അനുവദിച്ചിട്ടുണ്ട്. നിർമ്മാണത്തിന് തികയാതെ വരുന്ന തുക എംഎൽഎ ഫണ്ടിൽ നിന്നും വീണ്ടും അനുവദിക്കും. 

മാള ശിശുവികസന പദ്ധതി ഓഫീസിലേക്ക് 2023 - 24 സാമ്പത്തിക വർഷത്തിൽ വാഹനം വാടകയ്ക്ക് നൽകാൻ താൽപര്യമുള്ള വ്യക്തികൾ / സ്ഥാപനങ്ങളിൽ നിന്നും  ടെൻഡർ ക്ഷണിച്ചു.  സെപ്റ്റംബർ 15 ന് ഉച്ചയ്ക്ക് രണ്ടുവരെ സമർപ്പിക്കാം. ഫോൺ: 0480 2893269.

കെൽട്രോണിന്റെ ഡിപ്ലോമ ഇൻ മോണ്ടിസോറി ടീച്ചർ ട്രെയിനിംഗ് കോഴ്സിന്റെ സൗജന്യ ഓൺലൈൻ ക്ലാസ് സെപ്റ്റംബർ 16 ന് വൈകിട്ട് ഏഴ് മുതൽ ഒമ്പത് വരെ നടത്തുന്നു. താല്പര്യമുള്ളവർ രജിസ്റ്റർ ചെയ്യണം. ഫോൺ: 9072592412 , 9072592416.

സ്വച്ഛ് ഭാരത് മിഷൻ അർബൻ 2.0 ഇന്ത്യൻ സ്വച്ഛത ലീഗ് സീസൺ - 2 മത്സരത്തിന്റെ ഭാഗമായി കുന്നംകുളം ബെഥനി ഇംഗ്ലീഷ് ഹയര്‍ സെക്കന്‍ഡറി സ്കൂളില്‍ വിദ്യാര്‍ഥികളുടെ മനുഷ്യ ചങ്ങല, തുടര്‍ന്ന് മിഷന്‍ പ്രവര്‍ത്തനങ്ങളുടെ ബോധവത്ക്കരണ അശ്വമേധ പ്രയാണ പ്രചാരണം എന്നിവ നടത്തി. 

മഞ്ചേരി സര്‍ക്കാര്‍ മെഡിക്കല്‍ കോളജില്‍ പ്രവര്‍ത്തിക്കുന്ന വൈറോളജി ലാബിലേക്ക് സയന്റിസ്റ്റ് (മെഡിക്കല്‍, നോണ്‍ മെഡിക്കല്‍), റിസര്‍ച്ച് അസിസ്റ്റന്റ്, ലാബ് ടെക്നിഷ്യന്‍, ഡാറ്റാ എന്‍ട്രി ഓപ്പറേറ്റര്‍,  മള്‍ട്ടി ടാസ്കിങ് സ്റ്റാഫ് തസ്തികകളില്‍ താത്കാലിക നിയമനം നടത്തുന്നു. കരാര്‍ അടിസ്ഥാനത്തില്‍ പരമാവധി ഒരു വര്‍ഷത്തേക്കാണ് നിയമനം. എല്ലാ തസ്തികകളിലേക്കും 45 വയസ്സിനു താഴെ പ്രായമുള്ളവര്‍ അപേക്ഷിച്ചാല്‍ മതി.

ഈ വര്‍ഷത്തെ ജില്ലാ സിവില്‍ സര്‍വീസ് കായികമേള 2023 സെപ്റ്റംബര്‍ 15, 16 തീയതികളില്‍ അറക്കുളം സെന്റ് ജോസഫ്‌സ് കോളേജ്, ഇന്ത്യന്‍ സ്‌പോര്‍ട്‌സ് ബാഡ്മിന്റണ്‍ അക്കാദമി തൊടുപുഴ, വണ്ടമറ്റം അക്വാറ്റിക് സെന്റര്‍, എച്ച്.ആര്‍.സി. ക്ലബ്ബ് മൂലമറ്റം, ജ്വാല ക്ലബ്ബ് മൂലമറ്റം, സെന്റ് സെബാസ്റ്റ്യന്‍ ഹൈസ്‌കൂള്‍ തൊടുപുഴ എന്നിവിടങ്ങളില്‍ നടക്കും.

ഇടുക്കി ഗവ. എന്‍ജിനീയറിംഗ് കോളേജില്‍ ബി.ടെക്ക്, എം.ടെക്ക് ഒഴിവുളള സീറ്റുകളിലേക്ക് പ്രവേശനം നടത്തുന്നതിന് നാളെ (15) കോളേജില്‍ സ്‌പോട്ട് അഡ്മിഷന്‍ നടത്തും. താല്‍പര്യമുളള വിദ്യാര്‍ഥികള്‍ പ്രോസ്‌പെക്ടസ് പ്രകാരം ഉളള യോഗ്യത തെളിയിക്കുന്ന സര്‍ട്ടിഫിക്കറ്റുകളും അനുബന്ധ പകര്‍പ്പുകളുമായി നാളെ രാവിലെ 11 മണിക്ക് മുമ്പ് കോളേജില്‍ രജിസ്റ്റര്‍ ചെയ്യണം. കൂടുതല്‍ വിവരങ്ങള്‍ക്ക് www.gecidukki.ac.in എന്ന വെബ്‌സൈറ്റ് സന്ദര്‍ശിക്കാം.

2023 വര്‍ഷത്തെ ഐ.ടി.ഐ പ്രവേശനത്തിന് ഇന്ന് (14) ന് കൗണ്‍സിലിംഗിന് ഹാജരാകുന്നതിന് എസ്.എം.എസ് സന്ദേശം ലഭിച്ച എല്ലാ അപേക്ഷകരും സന്ദേശത്തില്‍ അറിയിച്ച എല്ലാ രേഖകളുമായി ഇന്ന് രാവിലെ 8 നും 10 നും ഇടയില്‍ കട്ടപ്പന ഐ ടി ഐ യില്‍ ഹാജരാകണമെന്ന് പ്രിന്‍സിപ്പല്‍ അറിയിച്ചു. കൂടുതല്‍ വിവരങ്ങള്‍ക്ക് ഫോണ്‍ : 04868-272216.

ഇരുപത്തി രണ്ടാമത് സംസ്ഥാന ജൂനിയര്‍ ത്രോബോള്‍ മത്സരവും ഒന്നാമത് മിനി ത്രോബോള്‍ മത്സരവും ഈ മാസം 22,23,24 തീയതികളില്‍ മാങ്കുളം സെന്റ് മേരീസ് ഹയര്‍സെക്കന്‍ഡറി സ്‌കൂള്‍ മൈതാനത്ത് നടക്കും. സംസ്ഥാന, ജില്ലാ ത്രോബോള്‍ അസോസിയേഷനുകളുടെയും സ്പോര്‍ട്സ് കൗണ്‍സിലിന്റെയും നേതൃത്വത്തിലാണ് ചാമ്പ്യന്‍ഷിപ്പ് സംഘടിപ്പിക്കുന്നത്. 14 ജില്ലകളില്‍ നിന്ന് ആണ്‍, പെണ്‍ വിഭാഗങ്ങളില്‍ 1200ഓളം കുട്ടികള്‍ ചാമ്പ്യന്‍ഷിപ്പില്‍ പങ്കെടുക്കും. 12 വയസ്സു വരെയുള്ള കുട്ടികള്‍ക്കാണ് മിനി ത്രോബോള്‍ ചാമ്പ്യന്‍ഷിപ്പ് സംഘടിപ്പിക്കുന്നത്. 12 മുതല്‍ 15 വരെ പ്രായമുള്ള കുട്ടികള്‍ ജൂനിയര്‍ ത്രോബോള്‍ ചാമ്പ്യന്‍ഷിപ്പിലും ഏറ്റുമുട്ടും.

തൊടുപുഴ നഗരസഭ ആരോഗ്യസ്‌ക്വാഡിന്റെ നേതൃത്വത്തില്‍ നഗരപരിധിയിലുള്ള ഓടകള്‍ സ്ലാബുകള്‍ നീക്കി പരിശോധിച്ചു. നഗരമധ്യത്തില്‍ നിന്നും തൊടുപുഴ പുഴയിലേക്ക് കക്കൂസ് മാലിന്യങ്ങള്‍ അടക്കമുള്ളവ ഒഴുക്കുന്നതായി നിരവധി പരാതികള്‍ ലഭിച്ച സാഹചര്യത്തിലാണ് പരിശോധന നടത്തിയത്.