സംസ്ഥാനത്തെ എട്ടുമുതല്‍ പന്ത്രണ്ടുവരെയുള്ള മുഴുവന്‍ സര്‍ക്കാര്‍-എയ്ഡഡ് സ്‌കൂളുകളിലുമായി 45000 ക്ലാസ് മുറികള്‍ ഹൈടെക്കാക്കുന്നതിന്റെ ഭാഗമായുള്ള മൂന്നാംഘട്ട വിന്യാസത്തിന് സ്‌കൂളുകള്‍ ഏപ്രില്‍ 22 ന് മുന്‍പ് വിശദാംശങ്ങള്‍ നല്‍കണം.  ആദ്യ രണ്ടുഘട്ടങ്ങളിലായി 33775 ക്ലാസ്മുറികള്‍ ഹൈടെക്കാക്കുന്നതിനുള്ള സംവിധാനങ്ങള്‍ ലഭ്യമാക്കിയിരുന്നു.  ഇതിന്റെ ഭാഗമായി 2969 സ്‌കൂളുകളിലെ മുഴുവന്‍ ക്ലാസ് മുറികളും ഹൈടെക്കായി.

  പകര്‍ച്ചപ്പനി പ്രതിരോധ നിയന്ത്രണ പ്രവര്‍ത്തനങ്ങള്‍ കാര്യക്ഷമമാക്കുന്നതിന്റെ ഭാഗമായി തദ്ദേശ സ്വയംഭരണ സ്ഥാപനങ്ങളുടെ അധികാരപരിധിയില്‍ വരുന്ന പ്രാഥമിക/സാമൂഹ്യ ആരോഗ്യ കേന്ദ്രങ്ങളില്‍ താത്കാലികമായി നിയമിക്കുന്ന ഡോക്ടര്‍മാര്‍ക്കും പാരാമെഡിക്കല്‍ സ്റ്റാഫിനും സര്‍ക്കാര്‍ മാനദണ്ഡ പ്രകാരമുള്ള വേതനം തനത് പ്ലാന്‍ഫണ്ടില്‍ നിന്നും നല്‍കുന്നതിന് സര്‍ക്കാര്‍ അനുമതി നല്‍കി ഉത്തരവായി.
പി.എന്‍.എക്‌സ്.1410/18

    കൊണ്ടോട്ടി ലേബര്‍ ഓഫീസിന്റെ പരിധിയില്‍ വരുന്ന തൊഴിലാളികള്‍ ഉള്ളതും ഇല്ലാത്തതുമായ സ്ഥാപന ഉടമകള്‍ ഏപ്രില്‍ 20നകം ലൈസന്‍സ് എടുക്കുകയും പുതുക്കാത്തവര്‍ പുതുക്കുകയും ചെയ്യണമെന്ന്  ലേബര്‍ ഓഫീസര്‍ അറിയിച്ചു. ഫോണ്‍ 04832712034

സംസ്ഥാനത്തെ മുഴുവന്‍ വാര്‍ഡുകളിലും ജൂലായ് മാസത്തില്‍ കര്‍ഷക സഭകള്‍ സംഘടിപ്പിക്കുമെന്ന് കാര്‍ഷിക വികസന കര്‍ഷക ക്ഷേമ മന്ത്രി വി. എസ്. സുനില്‍കുമാര്‍ പറഞ്ഞു. തിരുവനന്തപുരം വിമന്‍സ് കോളേജില്‍ നടന്ന വിഷന്‍ 2018 ഏകദിന ശില്‍പശാല ഉദ്ഘാടനം ചെയ്യുകയായിരുന്നു അദ്ദേഹം.

    ഭൂജല വകുപ്പിന്റെ പരിധിയില്‍ വരുന്ന ജില്ലയിലെ വിവിധ ഗ്രാമ പഞ്ചായത്തുകളിലെ കുഴല്‍ കിണറുകളിലെ ഹാന്‍ഡ് പമ്പുകള്‍ റിപ്പയര്‍ ചെയ്യുന്നതിന് ദര്‍ഘാസ് ക്ഷണിച്ചു.   ദര്‍ഘാസുകള്‍ ഏപ്രില്‍ 19ന് വൈകീട്ട് മൂന്നിനകം ജില്ലാ ഓഫീസ്, ഭൂജല വകുപ്പ്, മലപ്പുറം എന്ന വിലാസത്തില്‍ ലഭിക്കണം.  ഫോണ്‍ 0483 2731450.

വ്യവസായ ഏരിയ/പ്ലോട്ടുകളിലെ ലാന്റ് ട്രാന്‍സ്ഫര്‍  ഭേദഗതിയുമായി ബന്ധപ്പെട്ട് വ്യവസായ വകുപ്പ് മന്ത്രിയുടെ സാന്നിദ്ധ്യത്തില്‍ മെയ് ആദ്യവാരത്തില്‍ കോഴിക്കോട് അദാലത്ത് നടത്തും.  പങ്കെടുക്കുവാന്‍ താല്‍പര്യമുള്ള പയ്യനാട് ഫങ്ഷണല്‍ ഇന്‍ഡസ്ട്രിയല്‍ എസ്റ്റേറ്റിലെ സംരംഭകര്‍ അപേക്ഷയും അനുബന്ധ രേഖകളും മഞ്ചേരി താലൂക്ക് വ്യവസായ ഓഫീസ് മുഖേന സമര്‍പ്പിക്കണം.

ഏപ്രില്‍ 16 ന് കാണ്‍പൂരില്‍ നടക്കുന്ന നാഷണല്‍ മാനക്  ഇന്‍സ്‌പെയര്‍ അവാര്‍ഡ് മത്സരത്തിലേക്ക്  കേരളത്തില്‍ നിന്ന് ദിയ എസ് ലാല്‍ തെരഞ്ഞെടുക്കപ്പെട്ടു. അവശ്യഘട്ടങ്ങളില്‍ വൃദ്ധ ജനങ്ങളെ തൊട്ടടുത്തുളളവരുമായി മൊബൈല്‍ ആപ്പ് വഴി ബന്ധപ്പെടുത്തുന്ന പ്രൊജക്റ്റിനാണ് അംഗീകാരം. ഐ.എന്‍.എസ് ദ്രോണാചാര്യ കേന്ദ്രീയ വിദ്യാലയത്തില്‍ നടന്ന മത്സരത്തിലാണ് ദിയ എസ് ലാല്‍ ഒന്നാം സ്ഥാനം നേടിയത്. മലപ്പുറം കേന്ദ്രീയ വിദ്യാലയത്തിലെ ഒന്‍പതാം ക്ലാസ് വിദ്യാര്‍ത്ഥിനിയാണ് ദിയ എസ് ലാല്‍. താനിക്കല്‍ കോഡൂര്‍ നിവാസിയായ ഡോ.എ ഷിബുലാലിന്റെയും ഡോ. സീനയുടേയും മകളാണ്.

      പകര്‍ച്ച വ്യാധി പ്രതിരോധത്തിന്റെ ഭാഗമായി ഹരിത കേരള മിഷന്റെ നേതൃത്വത്തില്‍ മലപ്പുറം ബ്ലോക്ക് പഞ്ചായത്തില്‍ ദ്വിദിന പരിശീലന ക്യാമ്പ് സംഘടിപ്പിച്ചു. ജില്ലാ പഞ്ചായത്ത് പ്രസിഡന്റ് എ.പി ഉണ്ണി കൃഷ്ണന്‍ ഉദ്ഘാടനം ചെയ്തു. കില, ശുചിത്വ മിഷന്‍, കുടുംബശ്രീ,സാക്ഷരത മിഷന്‍, ആരോഗ്യ വകുപ്പ് എന്നിവയുടെ സഹകരണത്തോടെയാണ് ജാഗ്രതോത്സവം സംഘടിപ്പിക്കുന്നത്.

സുജലം പദ്ധതിയുടെ ഭാഗമായി ജില്ലയിലെ കുളങ്ങള്‍ സംരക്ഷിക്കാന്‍ ജില്ലാ പഞ്ചായത്ത് നടപടികള്‍ തുടങ്ങി. ക്ലബ്ബുകള്‍, സന്നദ്ധസംഘടനകള്‍, എന്‍എസ്എസ് യൂനിറ്റുകള്‍ എന്നിവയുടെ സഹായത്തോടെയാണ് കുളങ്ങള്‍ നവീകരിക്കുക. ഗ്രാമങ്ങളില്‍ സംരക്ഷിക്കപ്പെടേണ്ട കുളങ്ങള്‍ തെരഞ്ഞെടുക്കുന്നതിനും സന്നദ്ധപ്രവര്‍ത്തകരുടെ പങ്കാളിത്തം ഉറപ്പാക്കുന്നതിനുമായി ഏപ്രില്‍ 21 നകം പഞ്ചായത്ത് തല യോഗം വിളിക്കാന്‍ ജില്ലാപഞ്ചായത്ത് പ്രസിഡന്റ് എ.പി ഉണ്ണികൃഷ്ണന്റെ അധ്യക്ഷതയില്‍ ചേര്‍ന്ന യോഗം തീരുമാനിച്ചു.