റവന്യൂ വകുപ്പില്‍ 2017 -2018 സാമ്പത്തിക വര്‍ഷം ലാന്റ് റവന്യൂ ഇനത്തില്‍ 367.29 കോടി രൂപയും റവന്യൂ റിക്കവറി ഇനത്തില്‍ 863.36 കോടി രൂപയും പിരിച്ചെടുത്തതായി ലാന്റ് റവന്യൂ ജോയിന്റ് കമ്മീഷണര്‍ അറിയിച്ചു.  മുന്‍വര്‍ഷത്തെ അപേക്ഷിച്ച് ലാന്റ് റവന്യൂ ഇനത്തില്‍ 65.22 കോടി രൂപയുടെയും റവന്യൂ റിക്കവറി ഇനത്തില്‍ 171.81 കോടി രൂപയും അധികപിരിവ് ഈ വര്‍ഷം കൈവരിച്ചു.  ഈ ഇനങ്ങളില്‍ കഴിഞ്ഞ അഞ്ചു വര്‍ഷത്തെ പിരിവുമായി താരതമ്യം ചെയ്യുമ്പോള്‍ ഏറ്റവുമധികം പണം പിരിച്ചെടുക്കാന്‍ സാധിച്ച വര്‍ഷമായിരുന്നു 2017 -18.

ഹയര്‍ സെക്കന്ററി ഒന്നാം വര്‍ഷ ഇംപ്ലൂവ്‌മെന്റ്/സപ്ലിമെന്ററി പരീക്ഷകള്‍ ജൂലൈ 24 മുതല്‍ 31 വരെ നടത്തും.  ഗള്‍ഫ് മേഖലയിലെ സ്‌കൂളുകളില്‍ പരീക്ഷയ്ക്ക് രജിസ്റ്റര്‍ ചെയ്യുന്ന വിദ്യാര്‍ത്ഥികള്‍ക്ക് യു.എ.ഇ യിലുള്ള പരീക്ഷാകേന്ദ്രത്തിലോ അതാത് വിഷയ കോമ്പിനേഷനുള്ള കേരളത്തിലെ ഏതെങ്കിലും പരീക്ഷാകേന്ദ്രത്തിലോ പരീക്ഷയെഴുതാം.

പട്ടികജാതി വികസന വകുപ്പിന് കീഴില്‍ പ്രവര്‍ത്തിക്കുന്ന സംസ്ഥാനത്തെ 44 ഐ.റ്റി.ഐ കളിലെ വിവിധ മെട്രിക് നോണ്‍ മെട്രിക് ട്രേഡുകളിലേക്ക് 2018-19 അധ്യയന വര്‍ഷത്തെ പ്രവേശനത്തിന് അപേക്ഷ ക്ഷണിച്ചു.  അപേക്ഷാ ഫോറങ്ങള്‍ വകുപ്പിന്റെ ഐ.റ്റി.ഐ കളില്‍  സൗജന്യമായി ലഭിക്കും.  പട്ടികജാതി വിഭാഗത്തില്‍പ്പെട്ടവര്‍ക്ക് 80 ശതമാനവും പട്ടികവര്‍ഗ്ഗത്തിന് പത്ത് ശതമാനവും മറ്റ് വിഭാഗത്തിന് പത്ത് ശതമാനവുമാണ് സീറ്റുകള്‍.

മഹിള സമഖ്യ സൊസൈറ്റിയുടെ ആഭിമുഖ്യത്തില്‍ പ്രവര്‍ത്തിക്കുന്ന കാസര്‍ഗോഡ് നിര്‍ഭയ ഷെല്‍ട്ടര്‍ ഹോമിലേയ്ക്ക് ഹോം മാനേജര്‍, വാര്‍ഡന്‍, സോഷ്യല്‍ വര്‍ക്കര്‍, സൈക്കോളജിസ്റ്റ് (പാര്‍ട്ട് ടൈം) എന്നീ തസ്തികകളിലേയ്ക്ക് 20 ന് രാവിലെ 10.30 ന് കാസര്‍ഗോഡ് കളക്ടറേറ്റ് മെയില്‍ കോണ്‍ഫറന്‍സ് ഹാളില്‍ വാക് -ഇന്‍-ഇന്റര്‍വ്യൂ നടത്തും.  ഒരു വര്‍ഷത്തെ കരാര്‍ അടിസ്ഥാനത്തിലാണ് നിയമനം. എം.എസ്.ഡബ്ല്യൂ/എം.എ (സോഷ്യോളജി), എം.എ (സൈക്കോളജി), എം.എസ്.സി(സൈക്കോളജി) എന്നിവയാണ് ഹൗസ് മാനേജറുടെ യോഗ്യത. പ്രതിമാസം 18000 രൂപ വേതനം ലഭിക്കും. ഫുള്‍ടൈം റസിഡന്‍സ് വാര്‍ഡന് ബിരുദം, സമാന തസ്തികയിലുള്ള പ്രവൃത്തി പരിചയം അഭികാമ്യം.

കണ്‍സ്യൂമര്‍ഫെഡിന്റെ സഹകരണ റംസാന്‍ വിപണിയുടെ സംസ്ഥാനതല ഉദ്ഘാടനം സഹകരണ ടൂറിസം മന്ത്രി കടകംപള്ളി സുരേന്ദ്രന്‍ നിര്‍വഹിച്ചു. ഈ മാസം 13 വരെയാണ് വിപണി. കോഴിക്കോട് ജില്ലയില്‍ നാലു മൊബൈല്‍ ത്രിവേണി യൂണിറ്റുകളാവും വില്‍പന നടത്തുക. ഒരു ദിവസം ആയിരം പേര്‍ക്ക് വിലക്കുറവില്‍ സാധനങ്ങള്‍ വില്‍പന നടത്തുകയാണ് ലക്ഷ്യമിടുന്നതെന്ന് മന്ത്രി പറഞ്ഞു. 

വിഴിഞ്ഞം മുതല്‍ കാസര്‍ഗോഡ് വരെയുള്ള തീരപ്രദേശത്ത് ഇന്ന് (ജൂണ്‍ എട്ട്) വൈകിട്ട് 5.30 മുതല്‍ പത്തിന് രാത്രി 11.30 വരെ ശക്തമായ കാറ്റിനും സമുദ്ര നിരപ്പില്‍നിന്നും പത്ത് അടി മുതല്‍ 15 അടി വരെ തിരമാലകള്‍ ഉയരാനും സാധ്യതയുണ്ട്. മീന്‍പിടിത്തക്കാര്‍ കടലില്‍ പോകരുതെന്ന് ഇന്‍കോയിസ് അറിയിച്ചു.

പി.എന്‍.എക്‌സ്.2313/18

തൊഴില്‍ നിയമങ്ങളുടെ പ്രയോഗം തൊഴില്‍ മേഖലയുടെ സംരക്ഷണത്തിനാകണമെന്ന് തൊഴിലും നൈപുണ്യവും വകുപ്പ് മന്ത്രി ടി.പി. രാമകൃഷ്ണന്‍ പറഞ്ഞു. കേരള ഇന്‍സ്റ്റിറ്റ്യൂട്ട് ഓഫ് ലേബര്‍ ആന്റ് എംപ്ലോയ്‌മെന്റിന്റെ അഭിമുഖ്യത്തില്‍ തൊഴില്‍ വകുപ്പ് ഉദ്യോഗസ്ഥര്‍ക്കായി സംഘടിപ്പിച്ച 'തൊഴില്‍ നയം: കാഴ്ചപ്പാടും ദൗത്യവും' ശില്‍പശാല ഉദ്ഘാടനം ചെയ്യുകയായിരുന്നു അദ്ദേഹം.

തൊഴിലാളി വിരുദ്ധ സമീപനം കേരളത്തില്‍ അനുവദിക്കില്ല. ആ അര്‍ഥത്തിലുള്ള പ്രവര്‍ത്തനം ഉദ്യോഗസ്ഥരില്‍നിന്നുണ്ടാകണം. തൊഴില്‍ സുരക്ഷിതത്വവും, തൊഴിലാളികളുടെ അവകാശങ്ങളും സാമൂഹ്യ സുരക്ഷയും ഉറപ്പുവരുത്തണമെന്നത് സര്‍ക്കാരിന്റെ പ്രതിബദ്ധതയാണ്. 

കേന്ദ്രാവിഷ്‌കൃത പദ്ധതിയായ പരമ്പരാഗത കൃഷി വികാസ് യോജനയില്‍ ജൈവ കൃഷിക്ക് പ്രാധാന്യം നല്‍കുമെന്ന് കൃഷി വകുപ്പു മന്ത്രി വി.എസ് സുനില്‍കുമാര്‍ പറഞ്ഞു. പരമ്പരാഗത കൃഷി വികാസ് യോജനയുടെ ഭാഗമായി കൃഷി വകുപ്പ് ജീവനക്കാര്‍ക്കുള്ള പരിശീലനത്തിന്റെ ഉദ്ഘാടനം നിര്‍വഹിക്കുകയായിരുന്നു മന്ത്രി. ഓരോ പഞ്ചായത്തിലെയും കൃഷിയോഗ്യമായ അമ്പത് സെന്റ് സ്ഥലം കണ്ടെത്തി ഒരു  ക്ലസ്റ്ററാക്കി തിരിച്ചാണ് പദ്ധതി നടപ്പാക്കുന്നത്. ജൈവകൃഷി ചെയ്യുന്ന പഞ്ചായത്തുകള്‍ക്ക് മുന്‍ഗണന നല്‍കും. ഈ പദ്ധതിയെ ജനകീയമാക്കാന്‍ എല്ലാവരുടെയും സഹകരണം ഉണ്ടാകണമെന്നും മന്ത്രി പറഞ്ഞു. കൃഷി വകുപ്പ് ഡയറക്ടര്‍ ഡോ.പി.കെ.ജയശ്രീ സന്നിഹിതയായിരുന്നു. 

വൊക്കേഷണല്‍ ഹയര്‍ സെക്കന്ററി ജൂണ്‍ അഞ്ച് മുതല്‍ നടത്താന്‍ നിശ്ചയിച്ചിരുന്ന  സേവ് എ ഇയര്‍/ഇംപ്രൂവ്‌മെന്റ് പരീക്ഷകള്‍ 13 മുതല്‍ നടത്തും.  തിയറി പരീക്ഷകള്‍ 13 മുതല്‍ 20 വരെ തിരഞ്ഞെടുത്ത പരീക്ഷാകേന്ദ്രങ്ങളിലും എല്ലാ നോണ്‍ വൊക്കേഷണല്‍, വൊക്കേഷണല്‍ മൊഡ്യൂള്‍ പ്രായോഗിക പരീക്ഷകളും പഠനം പൂര്‍ത്തിയാക്കിയ സ്‌കൂളുകളിലും 21 മുതല്‍ 26 വരെ നടക്കും.  പുന:ക്രമീകരിച്ച ടൈംടേബിള്‍ വി.എച്ച്.എസ്.ഇ പോര്‍ട്ടലിലും എല്ലാ വി.എച്ച്.എസ്.ഇ സ്‌കൂളുകളിലും ലഭിക്കും.

പി.എന്‍.എക്‌സ്.2310/18

തിരുവനന്തപുരം റീജിയണല്‍ കാന്‍സര്‍ സെന്ററില്‍ 2018 ഏപ്രില്‍ ഒമ്പതിലെ വിജ്ഞാപനമനുസരിച്ച് ജൂണ്‍ 17 ന് നടത്താനിരുന്ന സ്റ്റാഫ് നഴ്‌സ് തസ്തികയിലേക്കുള്ള ഒ.എം.ആര്‍ രീതിയിലുള്ള പരീക്ഷ മാറ്റിവച്ചു.

പി.എന്‍.എക്‌സ്.2309/18