തദ്ദേശസ്വയംഭരണ സ്ഥാപനങ്ങളുടെ  വാര്‍ഷിക പദ്ധതി ഭേദഗതികള്‍ക്ക് ആസൂത്രണസമിതി ഹാളില്‍ ചേര്‍ന്ന ജില്ലാ ആസൂത്രണസമിതി  യോഗം  അംഗീകാരം നല്‍കി. മീഞ്ച, ബളാല്‍, പുല്ലൂര്‍-പെരിയ, മടിക്കൈ, പിലിക്കോട്, കയ്യൂര്‍-ചീമേനി, ചെറുവത്തൂര്‍, വെസ്റ്റ് എളേരി, കിനാനൂര്‍-കരിന്തളം, വൊര്‍കകാടി ഗ്രാമപഞ്ചായത്തുകളുടെയും കാഞ്ഞങ്ങാട് നഗരസഭയുടെയും ഭേദഗതി പദ്ധതികള്‍ യോഗം അംഗീകരിച്ചു. ജില്ലാ ആസൂത്രണസമിതി ഹാളില്‍ ചേര്‍ന്ന യോഗത്തില്‍ ജില്ലാ പഞ്ചായത്ത് പ്രസിഡന്റ് എ ജി സി ബഷീര്‍ അധ്യക്ഷത വഹിച്ചു. ജില്ലാ കളക്ടര്‍ ജീവന്‍ബാബു കെ പദ്ധതികള്‍ അവലോകനം ചെയ്തു.

പുതുനഗരം സെന്‍ട്രല്‍ സ്‌ക്കൂള്‍ കെട്ടിടം ഉദ്ഘാടനം ഇന്ന് (നവംബര്‍ 16) ഉച്ചയ്ക്ക് 12-ന് വിദ്യാഭ്യാസമന്ത്രി പ്രൊഫ.സി .രവീന്ദ്രനാഥ് നിര്‍വഹിക്കും. പരിപാടിയില്‍ കെ.കൃഷ്ണന്‍ കുട്ടി എം.എല്‍.എ അധ്യക്ഷനാകും.

അഗളി മിനിസിവില്‍സ്റ്റേഷന്‍ ഉദ്ഘാടനം നവംബര്‍ 18-ന് രാവിലെ 11 -ന് മുഖ്യമന്ത്രി പിണറായി വിജയന്‍ നിര്‍വഹിക്കും. അഗളി പഞ്ചായത്ത് സ്റ്റേഡിയത്തില്‍ നടക്കുന്ന പരിപാടിയില്‍ റവന്യൂ മന്ത്രി ഇ.ചന്ദ്രശേഖരന്‍  അധ്യക്ഷനാകും. എന്‍.ഷംസുദ്ദീന്‍ എം.എല്‍.എ, ഭരണപരിഷ്‌കരണ കമ്മീഷന്‍ ചെയര്‍മാന്‍ വി.എസ് അച്യുതാനന്ദന്‍, എം.ബി രാജേഷ് എം.പി , ജില്ലയിലെ എം.എല്‍.എമാര്‍, ജില്ലാ പഞ്ചായത്ത് പ്രസിഡന്റ് കെ.ശാന്തകുമാരി, ഗ്രാമ-ബ്ലോക്ക് ജില്ലാ പഞ്ചായത്ത് പ്രതിനിധികള്‍, മറ്റു രാഷ്ട്രീയ പാര്‍ട്ടി പ്രതിനിധികള്‍, സബ് കലക്ടര്‍ ജെറോമിക് ജോര്‍ജ് തുടങ്ങിയവര്‍ പങ്കെടുക്കും.

ദേശീയ മാധ്യമ ദിനത്തിന്റെ ഭാഗമായി നാളെ (നവംബര്‍ 16) കണ്ണൂര്‍ പ്രസ്സ് ക്ലബ്ബുമായി ചേര്‍ന്ന് ഇന്‍ഫര്‍മേഷന്‍ പബ്ലിക് റിലേഷന്‍സ് വകുപ്പ്് മാധ്യമ സെമിനാര്‍ സംഘടിപ്പിക്കുന്നു. മാധ്യമസ്വാതന്ത്ര്യം-വര്‍ത്തമാനകാല വെല്ലുവിളികള്‍ എന്ന വിഷയത്തില്‍ കണ്ണൂര്‍ പ്രസ്സ്‌ക്ലബ്ബ് ഹാളിലാണ് സെമിനാര്‍. 

ജില്ലാ പഞ്ചായത്തും ആര്‍.എം.എസ്.എയും സംയുക്തമായി ജില്ലയിലെ ഇരുന്നൂറോളം ഹൈസ്‌ക്കൂളുകളില്‍ നടപ്പിലാക്കുന്ന പെണ്‍കുട്ടികള്‍ക്കുള്ള സ്വയംപ്രതിരോധ പരിശീലന പരിപാടിക്ക് മയ്യില്‍ ഐ.എം.എന്‍.എസ് ഗവ. ഹയര്‍ സെക്കന്ററി സ്‌കൂളില്‍ തുടക്കമായി. പദ്ധതിയുടെ ജില്ലാതല ഉദ്ഘാടനം ജില്ലാപഞ്ചായത്ത് പ്രസിഡന്റ് കെ.വി സുമേഷ് നിര്‍വഹിച്ചു. 

'ഭാവിക്ക് അനുയോജ്യമായ പ്രാദേശിക സര്‍ക്കാറുകള്‍: വിഭവവും ശാക്തീകരണവും' എന്ന വിഷയത്തില്‍ നവംബര്‍ 21 മുതല്‍ 24 വരെ യൂറോപ്പിലെ മാള്‍ട്ട റിപ്പബ്ലിക്കിലെ വലേറ്റയില്‍ നടക്കുന്ന രാജ്യാന്തര സമ്മേളനത്തില്‍ കേരളത്തില്‍നിന്ന് കേന്ദ്ര- പഞ്ചായത്തീരാജ് മന്ത്രാലയം വിദഗ്ധ സമിതി അംഗവും ഭൂട്ടാന്‍ സര്‍ക്കാറിന്റെ ഉപദേഷ്ടാവുമായ ഡോ. പി.പി. ബാലന്‍ സംബധ്ധിക്കും. 52 കോമണ്‍വെല്‍ത്ത് രാജ്യങ്ങളില്‍ 48 രാജ്യങ്ങളിലാണ് പ്രാദേശിക സര്‍ക്കാറുകള്‍ ഉള്ളത്. കേരളത്തിലെ കുമളി ഗ്രാമപഞ്ചായത്ത് നടത്തിയ അധിക വിഭവ സമാഹരണ യജ്ഞത്തെക്കുറിച്ചുള്ള പഠനം അവതരിപ്പിക്കുന്നുണ്ട്.

സംസ്ഥാന പുരാരേഖാ വകുപ്പ് പൊതുവിദ്യാഭ്യാസ വകുപ്പുമായി ചേര്‍ന്ന് ഹൈസ്‌കൂള്‍ വിദ്യാര്‍ഥികള്‍ക്കായി സംഘടിപ്പിക്കുന്ന സംസ്ഥാന തല ക്വിസ് മത്സരത്തിന്റെ മേഖലാതല മത്സരം നവംബര്‍ 17ന് കണ്ണൂര്‍ റബ്‌കോ മിനി ഓഡിറ്റോറിയത്തില്‍ നടക്കും. വിജയികള്‍ക്ക് തുറമുഖ, പുരാരേഖ വകുപ്പ് മന്ത്രി രാമചന്ദ്രന്‍ കടന്നപ്പള്ളി സമ്മാനം വിതരണം ചെയ്യും. കണ്ണൂര്‍ കോര്‍പറേഷന്‍ മേയര്‍ ഇ.പി ലത അധ്യക്ഷത വഹിക്കും. ജില്ലാ പഞ്ചായത്ത് പ്രസിഡന്റ് കെ.വി സുമേഷ് മുഖ്യാതിഥിയായിരിക്കും.
പി എന്‍ സി/4303/2017 
 

തോട്ടടയിലെ ജില്ലാ അഭയ നികേതനില്‍ പുതുതായി നിര്‍മ്മിച്ച രാത്രികാല അഭയസങ്കേതത്തിന്റെ ഉദ്ഘാടനം നവംബര്‍ 17ന് രാവിലെ 10ന് തുറമുഖ, പുരാരേഖ വകുപ്പ് മന്ത്രി രാമചന്ദ്രന്‍ കടന്നപ്പള്ളി നിര്‍വഹിക്കും. അടുക്കള ബ്ലോക്കിന്റെയും ഭക്ഷണശാലയുടെയും ശിലാസ്ഥാപനവും കണ്ണൂര്‍ കോര്‍പറേഷന്‍ മേയര്‍ ഇ.പി ലത നിര്‍വഹിക്കും. ഹഡ്‌കോയുടെ സാമ്പത്തിക സഹായത്തോടെയാണ് രാത്രികാല അഭയസങ്കേതം നിര്‍മാണം പൂര്‍ത്തിയാക്കിയത്. കണ്ണൂര്‍ കോര്‍പറേഷന്റെ ദേശീയ നഗര ഉപജീവനദൗത്യം പദ്ധതിയിലാണ് അടുക്കള ബ്ലോക്കും ഭക്ഷണശാലയും നിര്‍മിക്കുന്നത്. 
ചടങ്ങില്‍ ജില്ലാ കളക്ടര്‍ മീര്‍ മുഹമ്മദ് അലി അധ്യക്ഷത വഹിക്കും.
പി എന്‍ സി/4303/2017

ഭൂരേഖകളുമായി ബന്ധപ്പെട്ട വിവരങ്ങള്‍ എളുപ്പത്തില്‍ ലഭ്യമാക്കുന്നതിന് അവസരമൊരുക്കുന്നതിന്റെ ഭാഗമായി നടപ്പാക്കുന്ന ഭൂരേഖാ കംപ്യൂട്ടര്‍വല്‍ക്കരണത്തിന്റെ ഭാഗമായി കണ്ണൂര്‍ താലൂക്കിലെ ഭൂമിയുടെ ഉടമസ്ഥത സംബന്ധിച്ച സമഗ്ര വിവരശേഖരണം 18 ന് ആരംഭിക്കും. പള്ളിക്കുന്ന്, എളയാവൂര്‍, മക്രേരി, കണ്ണപുരം എന്നീ വില്ലേജുകളിലാണ് ആദ്യഘട്ടത്തില്‍ വിവരങ്ങള്‍ ശേഖരിക്കുന്നത്. 

പങ്കാളിത്ത പെന്‍ഷന്‍ പദ്ധതിയില്‍ ചേരുന്ന ജീവനക്കാരുടെ രജിസ്‌ട്രേഷന്‍ ഫോമില്‍ പി എഫ് ആര്‍ ഡി എ ചില മാറ്റങ്ങള്‍ വരുത്തുന്നതിനാല്‍ നാളെ(നവംബര്‍ 17) മുതല്‍ ഡിസംബര്‍ 5 വരെ പ്രാണ്‍ രജിസ്‌ട്രേഷന്‍ ഉണ്ടായിരിക്കുന്നതല്ലെന്ന് ജില്ലാ ട്രഷറി ഓഫീസര്‍ അറിയിച്ചു.
പി എന്‍ സി/4303/2017